Matie 12 - Bibeli do fee

Jesu do ajɔi kusĩmi

¹ Si anyii ajɔ minji, ajɔi kusĩmi gɔ, Jesu do mɔcɔɛ ŋa à waa too kɔɔi ilɛ gɔ. Nɔ wee ari wa kpa mɔcɔɛ ŋau ŋɔi à wɔ amaajɛ iyi à gbɛ̃ si ilɛu à waa ŋɔ.

² Wee Farisi gɔ ŋa à wa bɛ. Iyi à yɔɔ ŋɔi à sɔ̃ Jesu à ni, cɔ, mɔcɔɛ ŋa à waa ce mii iyi a kù nɛ kpãai ku ce si ajɔi kusĩmi.

³ Amma Jesu í jɛ nŋa í ni, i kù cio mii iyi Davidi í ce si waati iyi ari wa kpa nŋu do inɛɛ ŋa?

⁴ Í lɔ kpasɛ̃i Ilaaɔ̃ nɔ í so pɛ̃ɛ iyi à jilɛa Ilaaɔ̃ í jɛ, nŋu do inɛɛ ŋa. Nɔ wee a kù nɛ kpãai pɛ̃ɛu ku jɛ, í gbe woo weei Ilaaɔ̃ ŋa aŋa akã.

⁵ Mà i kù cioɛ si tiai woodai Moizi ŋa iyi si ajɔi kusĩmi woo wee ŋa iyi à ya nɛ icɛ si kpasɛ̃i Ilaaɔ̃ a kù waa jirima ajɔi kusĩmi? Do nŋu fei, a kù jɛ ilu taale ŋa.

⁶ Amma an sɔ̃ ŋɛ iyi mii gɔ í wa ihɛ̃ iyi í nɛ bɛɛrɛ í re kpasɛ̃i Ilaaɔ̃.

⁷ Kukɔi idei Ilaaɔ̃ wa fɔ í ni, Ilaaɔ̃ í ni, ǹ bi i ce araarei njɛ ŋa ku re i ceem kuwee. Bii í jɛ ì mà yaasei ideu bɛ ŋa wo i kaa maa yɛ taalei hai nɛ taale ŋa.

⁸ Nɔ aa mà ŋa iyi amu Amai Amanɛi ǹ jɛ inɛ ngboi ajɔi kusĩmi.

Inɛ iyi awɔ akãɛ í ku

⁹ Nɔ Jesu í nɛ hai bɛ í koo í lɔ ile bii Zuifu ŋa à ya ce kutɔtɔɔu.

¹⁰ Wee mɔkɔ gɔ í wa bɛ, awɔ akãɛ í ku. Nɔ inɛ ŋa iyi à wa bɛu à bee Jesu à ni, wooda í na inɛ kpãa ku jɔ̀ inɛ ku ba iri si ajɔi kusĩmi? À waa fɔ bɛɛbɛi ku ba a yɛ taaleɛ.

¹¹ Nɔ Jesu í jɛ nŋa í ni, bii inɛ gɔ nŋɛ í nɛ angudã akã nɔ angudãu í koo í dasi inɔ isa baa bii ajɔi kusĩmii, lafɛ̃ɛ kaa nyaa?

¹² Amanɛ í bɛi í re angudã hee bii í jĩ. Na nŋu, inɛ í nɛ kpãa ku ce mii jiida si ajɔi kusĩmi.

¹³ Nɔ Jesu í sɔ̃ mɔkɔu í ni, tɛ awɔɛ. Iyi í tɔɔ nɔ í baa dee dee bɛi awɔ akãu má.

¹⁴ Ŋɔi Farisi ŋau à fita à koo à waa busi njɛ bɛi aa ce a kpaò Jesu.

¹⁵ Amma Jesu í mà si ŋa nɔ í nɛ hai bɛ. Waati iyi Jesu wa nɛ, zamaa nla nla gɔ í tooɛ. Nɔ í jɔ̀ bɔ̃ɔ ŋa fei à ba iri.

Jesui í jɛ woo ce icɛ iyi Ilaaɔ̃ í cica

¹⁶ Amma í sɔ̃ ŋa í kɔnkɔn du ŋa í ni a maà sɔ̃ inɛ gɔ inɛ iyi nŋu í jɛ.

¹⁷ Í jɔ̀ à ba iri ku ba ide iyi walii Ezai í fɔu ku kɔ̃, iyi í ni,

¹⁸ Ilaaɔ̃ í ni, woo ce icɛm iyi ǹ cica wee. Nŋui ǹ bi jiida, siɛi inɔ didɔ̃m fei í ya wa. An daa si Hundem, nɔ ku sisia dimi fei dee dee ku jɛm.

¹⁹ Kaa ce kakɔɔ do inɛ gɔ hee ku la siɛ. Bɛɛbɛ mɔi kaa kosi inɛ ŋa ija si inɔ ilu pai.

²⁰ Kaa tambɔ ama jĩi iyi í kɔmba wa bi ku cɛ, nɔ kaa kpa fitila iyi inya kumáɛ kù la, hee waati koo to si bii á jɔ̀ dee dee ku jɛm ku kãmia inɛ fei,

²¹ nɔ kpãa ku cɔi dimi fei kú wa siɛ.

Jesu wa kɔ̀ò araɛ

²² Si anyii nŋu, à naa Jesu mɔkɔ gɔ wa iyi inɛi inɔɔko í jɔ̀ í fɛɛju nɔ í dekĩ. Nɔ Jesu í faaba inɛɛu, í jɔ̀ wa yɛ ilu nɔ wa fɔ ide.

²³ Nɔ zamaau fei í biti à waa ni, debɛi, á jɛ tɔkui Davidiu mbɛ.

²⁴ Amma iyi Farisi ŋau à gbɔ ideu, à ni, mɔkɔu ihɛ̃ wa lele inɛi inɔɔko ŋai do gbugbãi Bɛɛlizebu ilaalu nŋa.

²⁵ Si bɛi Jesu í mà lasabu nŋa, ŋɔi í sɔ̃ ŋa í ni, bomma iyi inɛɛ ŋa à waa ja aŋa duusɔ̃ɔ á na ku gbe ngbɛ. Bɛɛbɛ mɔi ilu walakɔ kpasɛ̃ gɔ iyi inɛɛ ŋa à waa ja aŋa duusɔ̃ɔ kaa na ku kpɛ.

²⁶ Na nŋu, bii Seetam wa lele araɛ, wa ce igũ do araɛi, bommaɛ kaa kpɛ.

²⁷ Bii í jɛ do gbugbãi Bɛɛlizebuui ǹ wa n leleò inɛi inɔɔko ŋa, to, do gbugbãi yooi mɔcɔ nŋɛ ŋa mɔ à waa leleò ŋa. Debɛi aŋa taka nŋa aa yɛ taale nŋɛ.

²⁸ Amma bii do gbugbãi Hundei Ilaaɔ̃i ǹ wa n leleò inɛi inɔɔko ŋau, nŋu bɛ wa nyisi iyi Ilaaɔ̃ í sinti ku jɛ bommaɛ si anini nŋɛ.

²⁹ Bɛirei inɛ á ce ku lɔ kpasɛ̃i inɛ iyi í nɛ gbugbã ku coo ile bii kù jɛ í tako í dĩ ilu gbugbãu. Amma bii í dũu á yɔkɔ ku coo ile.

³⁰ Inɛ iyi kù jɛ tom, mbɛɛm nii. Inɛ iyi kù waa bam ku tɔtɔɔ, wa fangaaɛi.

³¹ Na ŋɔi í ce ǹ wa n sɔ̃ ŋɛ, Ilaaɔ̃ á yɔkɔ ku kpa idei dulum do arabu fei. Amma inɛ iyi wa bu Hundei Ilaaɔ̃, kaa ba a kpa idei dulum dɛɛ pai.

³² Bii amanɛ wa fɔ laalɔi Amai Amanɛ Ilaaɔ̃ á yɔkɔ ku kpa idei dulum dɛɛ. Amma inɛ iyi wa fɔ taalei Hundei Ilaaɔ̃ kaa ba a kpa idei dulum dɛɛ hai nnyi hee do ala fei.

Jĩi do isoɛ

³³ Jesu í sɔ̃ ŋa má í ni, à ya mà jĩii hai si isoɛ. Jĩi jiida iso jiidai í ya so, amma jĩi laalɔ, iso laalɔi í ya so.

³⁴ Iŋɛ inɛ buu ŋai bɛi njo wukuku. Iŋɛ inɛ laalɔ ŋa, bɛirei aa ce i fɔ ide jiida ŋa. Mii iyi wa kɔ̃ si idɔi amanɛ nŋui gɛlɛɛ í ya fɔ.

³⁵ Inɛ jiida ide jiidai í ya fɔ. Nɔ ide jiidau í ya naai hai si ide jiida iyi wa singa si idɔɛ. Bɛɛbɛ mɔi inɛ laalɔ ide laalɔi í ya fɔ. Nɔ ide laalɔu mɔ í ya naai hai si ide laalɔ iyi wa singa si idɔɛ.

³⁶ An sɔ̃ ŋɛ, ide nfe iyi inɛ ŋa à waa fɔ fei, Ilaaɔ̃ á na ku bee ŋa si ajɔi kiitiu,

³⁷ domi hai si ideɛi Ilaaɔ̃ á kiitiɛ, nɔ ku kpeɛ hai nɛ taale walakɔ ilu taale.

Inɛ ŋa à bi maamaake

³⁸ Ŋɔi woo kɔ inɛ ŋa si wooda do Farisi gɔ ŋa à sɔ̃ Jesu à ni, Mɛɛtu, à bi i ce maamaake gɔ iyi á nyisi wa iyi Ilaaɔ̃i í bɛɛ wa.

³⁹ Amma Jesu í jɛ nŋa í ni, inɛ laalɔi nsɛi ŋa iyi a kù waa leekĩ do Ilaaɔ̃ nŋu akã, maamaakei à ya maa bi, amma maamaake gɔ kù wɛɛ iyi aa nyisi ŋa má bii kù jɛ ti walii Zonasi,

⁴⁰ domi si bɛi Zonasi í ce dasã mɛɛta do idũ mɛɛta si inɔi cɛ̃ɛ nlau, bɛɛbɛ mɔi Amai Amanɛ á ce dasã mɛɛta do idũ mɛɛta si balɛ.

⁴¹ Si ajɔi kiitiu, inɛi Ninivu ŋa aa dede si inɛi nnyi ŋa a yɛ taale nŋa, si na iyi í jɔ̀ à kpaasi idɔ nŋa na waazoi Zonasi. Wee nsɛi mii gɔ í wa ihɛ̃ iyi í nɛ bɛɛrɛ í re Zonasi.

⁴² Si ajɔi kiitiu, ilaalu inaabo iyi í naa hai awɔ cangai kpãai inunu á dede si inɛi nnyi ŋa ku yɛ taale nŋa, si na iyi í jɔ̀ hai jĩijĩi í dede í naa ku gbɔ idei bisii Salomɔɔ, ilaalu nlau. Nɔ wee nsɛi mii gɔ í wa ihɛ̃ iyi í nɛ bɛɛrɛ í re Salomɔɔ.

Kunyii inɛi inɔɔko wa má

⁴³ Ŋɔi Jesu í kpa nŋa mɔndau ihɛ̃ í ni, bii inɛi inɔɔko í fita si inɛ, í ya maa dabii si gbaa ŋai ku maa dɛ bi ku sĩmi. Bii í kua,

⁴⁴ ŋɔi í ya ni, an nyi inya nwom hai bii ǹ fita wai. Waati iyi í nyi wa nɔ í ba inɛɛu í yɛ bɛi ile ngbɛ iyi à kpã à teeseɛ sãa sãa,

⁴⁵ á koo ku dɛdɛ kpaasi laalɔ ŋa iyi à roo wa má bɛi aŋa mɛɛje, a na a lɔ si inɛɛu a maa wa bɛ. Waati bɛɛbɛ kuwɛɛi takoi inɛɛu á tia baa ti ankãanyiɛ má. Mii iyi á ba inɛ laalɔi nsɛi ŋa mbɛ.

Idei iyei Jesu do ifɔɛ ŋa

⁴⁶ Waati iyi Jesu wa ba zamaau ide ku fɔ, ŋɔi iyeɛ do ifɔɛ ŋa à naa à leekĩ waduude, à waa bi a baa ide ku fɔ.

⁴⁷ Nɔ inɛ gɔ í naa í sɔ̃ Jesu í ni, iyeɛ do ifɔɛ ŋa wee à wa waduude à waa bi a baɛ ide ku fɔ.

⁴⁸ Amma Jesu í jɛa inɛɛu í ni, yooi í jɛ iyem, nɔ yoo ŋai à jɛ ifɔm ŋa.

⁴⁹ Nɔ í tosi mɔcɔɛ ŋau awɔ í ni, inɛ ihɛ̃ ŋai à jɛ iyem do ifɔm ŋa.

⁵⁰ Ntɔ ntɔ inɛ iyi wa ce idɔɔbii Baam iyi í wa lele, lafɛ̃ɛi í jɛ ifɔm walakɔ wecĩm walakɔ iyem.