Matie 10 - Bibeli do fee

Mɔcɔ maateeji ŋau

¹ Si anyii nŋu, Jesu í kpe mɔcɔ maateejiɛ ŋau í tɔtɔɔ ŋa bi tɛɛ. Nɔ í mu nŋa gbugbã a leleò inɛi inɔɔko ŋa nɔ a jɔ̀ kɔ̃ɔ ŋa a ba iri do inɛ ŋa iyi à waa ce bɔ̃ɔ dimi ikã ikã fei.

² Irii woo bɛ maateeji ŋau wee. Sinte, Simɔɔ iyi à ya kpe Piɛɛu do ifɔɛ Anderee, do ama minjii Zebedee ŋa Zaaki do ifɔɛ Zãa,

³ do Filipu do Baatelemi, do Tomaa, do Matie iyi í tako í jɛ woo gba fiai lɛmpoo, do Zaaki amai Alifee do Tadee,

⁴ do Simɔɔ inɛi igbɛi Zelɔtu, do Zudasi Isikariɔti, inɛ iyi á na ku zambaɛu.

Jesu í bɛ mɔcɔ maateeji ŋau

⁵ Jesu í bɛ amanɛ maateeji ŋau nɔ í sɔ̃ ŋa bɛi nŋu í bi a ce. Í ni, i maà bɔ bi dimi mmu ŋa, nɔ i maà lɔ si ilui inɛi Samari kãma ŋa.

⁶ Amma i bɔ bi inɛi Izirɛli ŋa, aŋa iyi à nyɔ bɛi angudã ŋa.

⁷ I koo i waazo nŋa i ni, Ilaaɔ̃ í maai ku jɛ bommaɛ.

⁸ Nɔ i jɔ̀ bɔ̃ɔ ŋa a ba iri nɔ i jĩ iku ŋa, i jɔ̀ dintɛ ŋa a ba iri a jɛ inɛ kumaaju, nɔ i lele inɛi inɔɔko ŋa iyi à wa si inɛ ŋa. Si bɛi ì ba hai nɛ ku sã ŋa, iŋɛ mɔ i na hai nɛ ku sã.

⁹ I maà ti i so fia ŋa.

¹⁰ I maà ti i so bɔgɔ, i maà ti i so ibɔ minjisia ŋa, walakɔ baata, walakɔ golo. I maà so mii ŋau bɛ kãma ŋa si na iyi í jɔ̀ woo ce icɛ í nɛ kpãai a náa bukaatai mii iyi í nɛ ku maa wɛɛò.

¹¹ Bii ì to ilu nla walakɔ si ilɛɛko gɔ, i dɛdɛ inɛ iyi á jɛsi ku gba ŋɛ, nɔ i buba kpasɛ̃ɛ bɛ ŋa hee ku to ajɔ iyi ì waa nɛ hai si iluu.

¹² Bii ì lɔ kpasɛ̃ gɔ i ya ce inɛ ŋau fɔɔ i ni ŋa, laakai ku sũ ku wɛɛ do iŋɛ.

¹³ Bii à gba ŋɛ, laakai ku sũu á wɛɛ do aŋai, amma bii a kù gba ŋɛ, á baa si ŋɛi.

¹⁴ Si ilu gɔ walakɔ si kpasɛ̃ gɔ, bii inɛ ŋau à kɔ̀ ku gba ŋɛ, hee má jɛ a gbɔ ide nŋɛ, i nɛ hai bɛ nɔ i gbugbã nŋa ilùlùi baata nŋɛ ŋa ku ba ku jɛ nŋa sɛɛda iyi kiitii Ilaaɔ̃ á naa si ŋa.

¹⁵ Ntɔ ntɔ, an sɔ̃ ŋɛ, si ajɔi kiitiu, Ilaaɔ̃ á ce araarei inɛi Sodomu do Gomɔɔ ŋa ku re inɛi ilu dimi bɛɛbɛ ŋau bɛ.

Ijuukpã iyi á naa

¹⁶ Jesu í sɔ̃ ŋa má í ni, wee ǹ wa n bɛ ŋɛ nɔ aa yɛ ŋai bɛi angudã ŋa si inɔi mbo ŋa. Na nŋu, i jɔ̀ i nɛ bisi bɛi njo ŋa, nɔ i jɛ hai ce laalɔ bɛi ankasiidi ŋa.

¹⁷ Nɔ i ce laakai ŋa si na iyi í jɔ̀ inɛ gɔ ŋa aa na a mu ŋɛ a bɔò ŋɛ bi ku ce kiiti, aa nɔ a cã ŋɛ ile bi ku ce kutɔtɔɔ nŋa ŋa.

¹⁸ Aa bɔò ŋɛ si wajui ilu ilɛ ŋa do bi amanlu ŋa na irim, ku ba i jɛ sɛɛdam si waju nŋa ŋa do bi dimi mmu ŋa.

¹⁹ Amma bii à bɔò ŋɛ bi ku kiiti, i maà ti i biti do ide iyi aa fɔ ŋa walakɔ do yaase bɛi aa fɔɔò ŋa. Bii waatiu í to, Ilaaɔ̃ á mu nŋɛ ide iyi aa fɔ ŋa.

²⁰ Nɔ ide iyi aa fɔ ŋa kaa jɛ ide nŋɛ, á naai hai bi Hundei Ilaaɔ̃ Baa nŋɛ iyi í wa si ŋɛ.

²¹ Inɛ gɔ ŋa aa zamba ifɔ nŋa ŋa walakɔ igbã nŋa ŋa ku ba a kpa ŋa. Bɛɛbɛ mɔi baa ŋa aa maa cea ama nŋa ŋa. Amu ŋa mɔ aa dede si baa nŋa ŋa ku ba a kpa ŋa.

²² Inɛ fei á cé ŋɛi na irim, amma inɛ iyi í temua hee kɔɔ á ba faaba.

²³ Bii à waa kpã ŋɛ iju si ilu gɔ i sa i bɔ ilu mmu. Ntɔ ntɔ, an sɔ̃ ŋɛ, i kaa dabii si ilɛi Izirɛliu i kpa iriɛ ŋa amu Amai Amanɛ n to wa.

²⁴ Ama cio ci ya re woo kɔsiɛ, amaacɛ mɔ ci ya re lafɛ̃ɛɛ.

²⁵ Na nŋu, í sĩa ama cio ku jɛsi a cea nŋu bɛi à cea woo kɔsiɛ. Bɛɛbɛ mɔi, í sĩa amaacɛ mɔ ku jɛsi a cea nŋu bɛi à cea lafɛ̃ɛɛ. Bii à waa kpe amu ilu kpasɛ̃u Seetam, aa sɔ iŋɛ inɛi kpasɛ̃ɛ ŋau iri laalɔ iyi í re bɛɛbɛ.

Njoi inɛ iyi í jɔ i ce ŋa

²⁶ Nɔ Jesu í ni má, do nŋu fei i maà ce njo nŋa ŋa, domi ngɔgɔ kù wɛɛ iyi wa manji iyi kaa fita gbugbãa, nɔ asii kãma kù wɛɛ iyi a kàa na a mà.

²⁷ Iyi ǹ wa n sɔ̃ ŋɛ si ilu kuku, i fɔɔ si inya kumá ŋa. Iyi ì gbɔ si asii ŋa i cã kɛsɛɛdɛ.

²⁸ I maà ce njoi inɛ ŋa iyi aa kpa ara nŋu akã, nɔ a kaa yɔkɔ a kpa hunde. Amma i ce njoi inɛ iyi á yɔkɔ ku kpa ara do hunde ajɔ si ina iyi ci ya ku.

²⁹ A ci ya ta ama yɛi minji súù akã ba. Do nŋu fei, Ilaaɔ̃ wa mà baani nŋa. Baa akã nŋa ci ya nɔ ku ku iyi kù jɛ do kumàsiɛ.

³⁰ Iŋɛ mɔ, hee do ntoi iri nŋɛ ŋa fei Ilaaɔ̃ í mà jia nŋa.

³¹ Na nŋu, i maà ce njo ŋa, bɛɛrɛ nŋɛ í re yɛi ŋa hee bii í jĩ.

³² Na nŋu, inɛ iyi í fɔ si wajui amanɛ ŋa í ni nŋu í gbam, amu mɔ an gbaa si wajui Baam iyi í wa lele.

³³ Amma inɛ iyi í kɔ̀sim si wajui amanɛ ŋa, amu mɔ an kɔ̀siɛ si wajui Baam iyi í wa lele.

Kù jɛ laakai ku sũ, ijai

³⁴ Í sɔ̃ ŋa má í ni, i maà tamaa mà laakai ku sũi ǹ naaò wa si andunya. Aawo, ijai ǹ naaò wa.

³⁵ Ǹ naa ku kosi ama inɛmɔkɔ do baaɛi, ama inaabo mɔ do iyeɛ, à so mɔkɔ mɔ do iyei mɔkɔɛ.

³⁶ Inɛi kpasɛ̃ nŋɛ ŋai aa jɛ mbɛɛ nŋɛ ŋa.

³⁷ Inɛ iyi í bi baaɛ walakɔ iyeɛ í rem, lafɛ̃ɛ kù to ku jɛ inɛm. Bɛɛbɛ mɔi inɛ iyi í bi ama inɛmɔkɔɛ walakɔ ama inaaboɛ í rem, lafɛ̃ɛ kù to ku jɛ inɛm.

³⁸ Inɛ iyi kù jɛsi nŋu ku so jĩi ku gaauɛ ku toom do wa, kù to ku jɛ inɛm.

³⁹ Inɛ iyi í bi ku jɛ kuwɛɛ do idɔɔbiɛ á na ku kuaɛ. Amma inɛ iyi í kɔ̀si kuwɛɛɛ na irim, lafɛ̃ɛ á na ku báa ntɔ ntɔ.

Idei riba

⁴⁰ Jesu í ni má, inɛ iyi í gba ŋɛ í gbam nii, nɔ inɛ iyi í gbam í gba inɛ iyi í bɛm wai.

⁴¹ Inɛ iyi í gba walii si na iyi í jɔ̀ Ilaaɔ̃ í bɔɔ wa, Ilaaɔ̃ á na nŋu mɔ ribai walii, nɔ inɛ iyi í gba amanɛ iyi wa ce idɔɔbii Ilaaɔ̃ si na iyi í jɔ̀ í jɛ dee dee, Ilaaɔ̃ á na nŋu mɔ ribai inɛ dee dee.

⁴² Inɛ mɔ iyi í mua inɛ gɔ iyi a kù waa saalu baa inyi tũtũ si na iyi í jɔ̀ í jɛ mɔcɔm, ǹ wa n sɔ̃ ŋɛi, lafɛ̃ɛ kaa kua ribaɛ pai.