Maaku 6 - Bibeli do fee

Inɛi Nazarɛti ŋa a kù dasi Jesu naanɛ

¹ Ŋɔi Jesu í nɛ hai kpasɛ̃i Zairusi bɛ í bɔ ilu bii í jɛ ama. Nɔ mɔcɔɛ ŋa à suu.

² Iyi ajɔi kusĩmi í naa ŋɔi í lɔsi ku kɔ inɛ ŋa si cio ile bii Zuifu ŋa à ya ce kutɔtɔɔu. Ŋɔi inɛ nkpɔ nkpɔ í gbɔ ideu nɔ à biti à waa ni, hai iwoi nŋu í ba dimii lasabu jiidau bɛ. Dimii bisi yoomai à mua nŋu. Bɛirei í ce wa ceò dimii maamaake ŋau ihɛ̃.

³ Kù jɛ woo gbe jĩi nɔu mbɛ ya, amai Maariu mɛɛ. Mà kù jɛ igbãi Zaaki do Zozee, do Zudu do Simɔɔ mbɛ ba. Nɔ wecĩɛ ŋa a kù wa inɔ nwa ihɛ̃? To, lasabu nŋu ŋau bɛi wa ganji ŋa a dasiɛò naanɛ.

⁴ Ŋɔi Jesu í sɔ̃ ŋa í ni, kù nɛ bii walii ci ya nɛ bɛɛrɛ bii kù jɛ si ilɛi ideɛ do si inɔi inɛɛ ŋa do kpasɛ̃ɛ.

^5-6 Ŋɔi Jesu í biti domi a kù dasiɛ naanɛ. Bɛɛbɛi kù yɔkɔ kù ce maamaake bɛ, bii kù jɛ bɔ̃ɔ gɔ ŋa iyi í lesi awɔ nɔ à ba iri. Si anyiɛ, Jesu í ya maa dabii dabii si ilɛɛko ŋau ku maa sisia inɛ ŋa idei Ilaaɔ̃.

Jesu í bɛ mɔcɔ maateeji ŋau minji minji

⁷ Ŋɔi í kpe woo bɛ maateejiɛ ŋau nɔ í bɛ ŋa minji minji, í mu nŋa gbugbã a leleò inɛi inɔɔko ŋa.

⁸ Í sɔ̃ ŋa í ni, i maà so nkãma si isɛɛnɛ nŋɛu. I maà so ijɛ hee má jɛ bɔgɔ, hee má jɛ fia, í gbe golo.

⁹ I dasi baata nŋɛ ŋa amma i maà kpele ibɔ minji.

¹⁰ Ŋɔi í sɔ̃ ŋa má í ni, bii ì to ilu bii ì waa bɔ ŋa, i wa kpasɛ̃ bii à dasi ŋɛ hee i koo i nɛò hai ilu bɛ ŋa.

¹¹ Bii í jɛ bii gɔ ŋa inɛ ŋa a kù gba ŋɛ hee má jɛ a gbɔ ide nŋɛ, i fita hai bɛ ŋa, nɔ i gbugbã nŋa ilùlùi baata nŋɛ ŋa ku ba ku jɛ nŋa sɛɛda iyi kiitii Ilaaɔ̃ á naa si ŋa.

¹² Nɔ mɔcɔ ŋau à nɛ nɔ à waa waazoa inɛ ŋa à waa ni a kpaasi idɔ.

¹³ Nɔ à lele inɛi inɔɔko nkpɔ nkpɔ, nɔ à ya tontooa bɔ̃ɔ nkpɔ nkpɔ ikpo si iri. Nɔ à ya ba iri.

Idei ikui Zãa woo dasi inyiu

¹⁴ Ilaalu Herodu í gbɔ baaui Jesu, si na iyi í jɔ̀ iriɛ í fangaa bii fei. Nɔ inɛ gɔ ŋa à nia Jesu, Zãa woo dasi inyiui í jĩ hai si balɛ. Na ŋɔi í jɔ̀ í nɛ gbugbã wa ceò maamaake.

¹⁵ Inɛ gɔ ŋa mɔ à waa nia Jesu, Elii walii nlai takoui. Nɔ inɛ gɔ ŋa mɔ à waa niaa, nŋu mɔ waliii bɛi ti tako ŋau.

¹⁶ Amma iyi Herodu í gbɔ ideu í ni, Zãa woo dasi inyiui. Ǹ jɔ̀ à bu iriɛ wo. Debɛi á jɛ nŋui í jĩ hai si balɛ.

^17-18 Mii iyi í jɔ̀ Herodu wa fɔ bɛɛbɛ wee. Herodu í tako í so Herodiasi aboi Filipu, ifɔɛ. Ŋɔi Zãa í sɔ̃ɔ í ni, kù sĩa i gba aboi ifɔɛ i dasi kpasɛ̃ɛ. Ide iyi Zãa í fɔ na irii Herodiasiui í jɔ̀ Herodu í ni a muu a dũu a dasiɛ piisɔ̃ɔ.

¹⁹ Na ŋɔi í jɔ̀ Herodiasi wa mu Zãa do idɔɔkɔ̃. Wa bi ku kpaa amma kù ba kpãa

²⁰ si na iyi í jɔ̀ Herodu wa ce njoi Zãa. Bii wa gbɔ ideɛ idɔɛ í ya dedei, amma do nŋu fei í ya bi nŋu ku gbɔɔ. Í mà iyi amanɛ dee deei nɔ kuwɛɛɛ kù nɛ taale kãma. Na ŋɔi í jɔ̀ í bii anyiɛ.

²¹ Do nŋu fei, ajɔ nŋu gɔ Herodiasi í ba kpãaɛ. Ajɔ nŋu Herodu í nya jingau nla nla ku yeò gigii ajɔi kubíɛ. Ŋɔi í kpe akawe nlaɛ ŋa do inɛ ngboi soogeɛ ŋa, do inɛ ngboi ilɛi Galilee ŋa fei.

²² Ŋɔi ama inaaboi Herodiasi í lɔ ileu wa jojo, ŋɔi í dɔ̃a Herodu si do inɛɛ ŋa iyi í kpe wa ŋau fei. Ŋɔi Herodu í sɔ̃ mudɛ̃ɛu í ni, tɔɔm mii iyi ì bi fei, an muuɛ.

²³ Nɔ í gbasi do mii fei í ni, mii iyi ì tɔɔm fei, an muuɛ, baa bii í jɛ bubui bommam nii.

²⁴ Ŋɔi ama inaabou í koo í bee iyeɛ í ni, mii í jɔ n tɔɔɛ. Ŋɔi iyeɛ í jɛ í ni, tɔɔɛ irii Zãa woo dasi inyiu.

²⁵ Ŋɔi gbakã ama inaabou í naa bi ilaaluu í sɔ̃ɔ í ni, ǹ bi i muum irii Zãa woo dasi inyiu nsɛi nsɛi si pɛrɛnti.

²⁶ Baa do iyi inɔi ilaaluu í fɔ ntɔ ntɔ fei kù bi ku kɔ̀ɔ, si na iyi í jɔ̀ í gbasi do mii fei si wajui inɛ njooɛ ŋau.

²⁷ Ŋɔi gbakã í bɛ sooge gɔ koo bù irii Zãa woo dasi inyiu wa. Ŋɔi soogeu í koo í bu irii Zãa wa hai ile piisɔ̃ɔ.

²⁸ Nɔ í naaò wa si pɛrɛntiu í naa í na ama inaabou. Nɔ ama inaabou mɔ í koo í na iyeɛ.

²⁹ Iyi mɔcɔi Zãa ŋa à gbɔ iyi í ku, ŋɔi à koo à so ikuɛu à koo à suu.

Jesu í wò inɛmɔkɔ dubu miiu (5.000)

³⁰ Woo bɛ maateeji ŋa iyi Jesu í tako í bɛ ŋau à baa bi tɛɛ à waa sisiaa mii ŋa iyi aŋa à ce fei do cio iyi à kɔ inɛ ŋa si fei.

³¹ Nɔ inɛ ŋa à wasi ku naa ku nɛ hee Jesu do mɔcɔɛ ŋa a kù ba fayai ku jɛ. Na ŋɔi í jɔ̀ í sɔ̃ ŋa í ni, i jɔ̀ ka nya ara nwa ka bɔ ikpa gbabua ku ba i sĩmi keeke ŋa.

³² Ŋɔi à jɔ̀ inɛ ŋau bɛ, nɔ à koo à lɔ akɔi inyiu à bɔ ikpa gbabuau.

³³ Amma inɛ nkpɔ í yɛ ŋa waati iyi à waa nɛ, nɔ à mà ŋa. Ŋɔi à mà tengi bii à waa bɔu. Nɔ inɛ ŋa à sɛi wa do isɛ hai ilu ŋa fei à cua nŋa tengi bii à waa bɔu.

³⁴ Iyi Jesu í to wa ŋɔi í fita hai inɔ akɔu. Nɔ í yɛ zamaa nlau. Ŋɔi í ce araare nŋa, domi à yɛi bɛi angudã ŋa iyi a kù nɛ woo degbe. Ŋɔi í lɔsi ku kɔ nŋa si cio nkpɔ.

³⁵ Si bɛi alɛ wa lɛ, ŋɔi mɔcɔɛ ŋa à naa bi tɛɛ à ni, inyau wee gbabuai, nɔ idũ wa dũ.

³⁶ Na nŋu, da inɛ ŋau a bɔ ilɛɛko ŋa do inɔ ilu ŋa iyi à wa amɛɛ, ku ba a koo a ra mii iyi aa jɛ.

³⁷ Amma í sɔ̃ ŋa í ni, iŋɛ taka nŋɛ i na ŋa ijɛ a jɛ. Ŋɔi à jɛaa à ni, i kù mà baa bii à so fiai icɛi cukpa mɛɛjɔ, kaa to ka ra nŋa pɛ̃ɛ ka na ŋa a jɛ?

³⁸ Ŋɔi Jesu í bee ŋa í ni, pɛ̃ɛ fɛloi ì nɛ ŋa. I koo i cɔ wa. Iyi à koo à cɔ, ŋɔi à ni, pɛ̃ɛ miiui à nɛ do cɛ̃ɛ minji.

³⁹ Nɔ Jesu í sɔ̃ mɔcɔɛ ŋau í ni a jɔ̀ inɛ ŋau a buba si fɔfɔ tũtũu bɛ ikã ikã.

⁴⁰ Ŋɔi à buba ikã ikã, tuuba gɔ ŋa amanɛ cĩɔ, tuuba gɔ ŋa mɔ amanɛ ciitaa.

⁴¹ Ŋɔi Jesu í so pɛ̃ɛ miiuu do cɛ̃ɛ minjiu, nɔ í wu iju lele í saabu Ilaaɔ̃. Ŋɔi í bububu pɛ̃ɛu nɔ í na mɔcɔ ŋau a kpɛ̃a zamaau. Nɔ í kpɛ̃ nŋa cɛ̃ɛ minjiu mɔ inɛ fei í ba.

⁴² Aŋa fei à jɛ à yo.

⁴³ Ŋɔi à ko pɛ̃ɛ do cɛ̃ɛ bubu iyi í gbeu kɔlɔ maateeji í kɔ̃.

⁴⁴ Inɛmɔkɔ ŋa iyi à jɛ pɛ̃ɛu à wɛɛi amanɛ dubu miiu (5.000) baka inaabo do amu ŋa baasi.

Jesu wa nɛ si antaii tenku

⁴⁵ Iyi à tã gbakã ŋɔi Jesu í jɔ̀ mɔcɔɛ ŋau à lɔ akɔi inyiu ku ba a takoɛ a kua ice ihɔ̃, ikpa Bɛsaida. Iyi à waa nɛ nɔ í ni zamaau ku nɛ.

⁴⁶ Waati iyi í jɔ̀ à nɛ ŋɔi í koo í gũ iri kuta gɔ ku ba ku ce kutɔɔ.

⁴⁷ Nɔ í wa bɛ hee idũ í koo í dũ, nɔ akɔi inyiu í wa si aninii tenkuu do mɔcɔ ŋau nɔ nŋu takaɛ mɔ í wɛɛ nŋu akã.

⁴⁸ Í yɛ mɔcɔɛ ŋau à wa si wahalai ku wai akɔi inyiu, domi fufuu wa kò ŋa. Zakai amɛɛjuumá ŋɔi í maai si ŋa, wa nɛ si antaii inyiu wa bi ku cua nŋa.

⁴⁹ Amma waati iyi à yɔɔ wa nɛ si antaii tenkuu à tamaa bɛi zĩii, ŋɔi à waa dɔ̃ anu.

⁵⁰ Aŋa fei à yɔɔ ŋɔi njo wa mu ŋa. Ŋɔi gbakã Jesu í ba ŋa ide ku fɔ í sɔ̃ ŋa í ni, i sũ laakai nŋɛ ŋa. Amui Jesu, i maà ce njo ŋa.

⁵¹ Ŋɔi í lɔ inɔ akɔu í ba ŋa bɛ, nɔ fufuu í leekĩ. Ŋɔi aŋa fei à biti hee í caa,

⁵² domi a kù gbɔ yaasei maamaakei pɛ̃ɛu si na iyi í jɔ̀ idɔ nŋa í le.

Jesu í jɔ̀ bɔ̃ɔ ŋa à ba iri si ilɛi Zenezarɛti

⁵³ Iyi à kua tenkuu à tã ŋɔi à to ilɛi Zenezarɛti à koo à dĩ akɔ nŋa bi ku leekĩu.

⁵⁴ Wee inɛ gɔ ŋa à wa bɛ. Iyi Jesu do mɔcɔɛ ŋa à fita hai si akɔu gbakã ŋɔi inɛ ŋau à mà Jesu.

⁵⁵ Ŋɔi aŋa fei à sɛi à waa naaò bɔ̃ɔ ŋa wa hai inɔ ilu ŋa. À ya so ŋa wai si makɛɛ ŋa a naaò ŋa wa tengi bii à gbɔ í wau.

⁵⁶ Bii Jesu í to fei, hai ilɛɛko ŋa do ilu nla ŋa do iko bii inɛ ŋa à waa sũ fei, à ya maa naaò bɔ̃ɔ ŋa wai si bantuma bii í wau. Ŋɔi à ya tɔɔɛ ku jɔ̀ aŋa a lu baa itĩi kumbooɛ. Nɔ inɛ ŋa iyi à luu fei à ya ba irii.