Maaku 4 - Bibeli do fee

Mɔndai woo gbɛ̃

¹ Ŋɔi Jesu í lɔsi ku kɔ inɛ ŋa si cioi idei Ilaaɔ̃ má kɔkɔi tenkuu. Nɔ zamaa nla gɔ í naa í tɔtɔɔ siɛ í kaakoɛ, ŋɔi í jɔ̀ í gũ akɔi inyiu í buba. Akɔi inyiu í wa si tenkuu nɔ zamaau fei wa leekĩ itĩi tenkuu.

² Wa kɔ ŋa si mii nkpɔ do mɔnda. Si bɛi wa kɔ ŋa si ciou í sɔ̃ ŋa í ni,

³ i sotĩ i gbɔ mɔnda gɔ ŋa. Mɔkɔ gɔ í fita wa fã dimi.

⁴ Si bɛi wa fã dimiu, ŋɔi gɔgɔ ŋa à cuku si kpãa, nɔ yɛi ŋa à naa à jɔɔ.

⁵ Nɔ gɔgɔ ŋa mɔ à cuku si ilɛ iyi í nɛ kuta, tengi bii sãa kù kpɔ. Nɔ í fita bɛ gbakã si na iyi í jɔ̀ sãa kù la bɛ.

⁶ Amma iyi inunu wa ce, ŋɔi í joo nɔ í gbɛ, domi icãɛ kù mi lɛlɛ.

⁷ Gɔgɔ ŋa mɔ à cuku si inɔ agũ ŋa. Ŋɔi agũ ŋau à dede siɛ à biiɛ, nɔ à ganjiɛ ku bí.

⁸ Nɔ gɔgɔ ŋa mɔ à cuku si ilɛ jiida. Ŋɔi à fita à la, à bí jiida. Dimi gɔ ŋa à so kuntaa, gɔgɔ ŋa mɔ kita, gɔgɔ ŋa mɔ cĩɔ.

⁹ Iyi Jesu í kpa mɔndau í tã ŋɔi í ni, inɛ iyi í nɛ itĩ iyi á gbɔò ide, ku gbɔ.

Mii iyi í jɔ̀ Jesu í ya maa kpa mɔnda

¹⁰ Waati iyi Jesu í kpaa zamaau mɔnda í tã, ŋɔi inɛ ŋau à nɛ. Nɔ inɛ ŋa iyi à gbe bi tɛɛ do mɔcɔ maateeji ŋau à waa beeɛ yaasei mɔnda ŋau.

¹¹ Ŋɔi í jɛ nŋa í ni, iŋɛi Ilaaɔ̃ í jɔ̀ ì mà asiii bommaɛ ŋa. Amma inɛ ŋa iyi à gbe fei à waa gbɔ ideu do mɔndai.

¹² Ǹ ya n fɔ nŋa ide do mɔndai ku ba, baa bii à cɔ ilu a maà yɛ. Nɔ baa bii à gbɔ ide a kaa mà yaaseɛ. Bii kù jɛ bɛɛbɛ aa na a sinda wa bi Ilaaɔ̃, nɔ Ilaaɔ̃ ku kpa idei dulum du ŋa.

Yaasei mɔndai woo gbɛ̃u

¹³ Ŋɔi Jesu í bee ŋa má í ni, debɛi i kù gbɔ yaasei mɔndau bɛ ŋa? Nɔ bɛirei aa ce i gbɔ yaasei mɔnda ŋa iyi à gbe fei ŋa.

¹⁴ Yaaseɛ wee. Mɔkɔu, idei Ilaaɔ̃i wa fã.

¹⁵ Inɛ gɔ ŋa à yɛi bɛi kpãa bii ideu í cuku. Iyi à gbɔ ideu gbakã Seetam í naa í nyaa hai si idɔ nŋa.

¹⁶ Bɛɛbɛ mɔi inɛ gɔ ŋa à yɛi bɛi dimi ŋa iyi à cuku si ilɛ iyi í nɛ kuta. Iyi à gbɔ ideu gbakã à gbaai do inɔ didɔ̃.

¹⁷ Amma a kù nɛ icã. Inɛ dimi bɛɛbɛ ŋa a ci ya leekĩ ku kpɛ. Waati iyi ijuukpã do wahala gɔ í naa si ŋa na irii idei Ilaaɔ̃ gbakã, à ya fũsi awɔi.

¹⁸ Inɛ gɔ ŋa mɔ à yɛi bɛi dimi ŋa iyi à cuku si inɔ agũ ŋa. Aŋai à jɛ inɛ ŋa iyi à gbɔ idei Ilaaɔ̃,

¹⁹ amma lasabu bututui mii ŋa wa bitandi ŋa. Fia ku bi wa dĩ iju nŋa nɔ à nɛ kɔdɛɛi mii nkpɔ. Mii ŋau bɛi wa ganji ideu ku ce icɛ si ŋa.

²⁰ Inɛ gɔ ŋa mɔ à yɛi bɛi dimi ŋa iyi à cuku si ilɛ ncɛɛ. Iyi à gbɔ idei Ilaaɔ̃ à gbaa nɔ wa so. Si inɔ nŋa inɛ gɔ ŋa à so kuntaa, inɛ gɔ ŋa mɔ kita, inɛ gɔ ŋa mɔ cĩɔ.

Mɔndai fitila

²¹ Ŋɔi Jesu í sɔ̃ ŋa má í ni, a ci ya má fitila a biiɛ do caka walakɔ a dasi abɛ daayi. Amma si antaii taabui à ya lesi. Mà kù jɛ bɛɛbɛ.

²² Mii iyi wa manji fei á fita gbugbãa nɔ asiii ide gɔ mɔ kù wɛɛ iyi a kàa fɔɔ.

²³ Inɛ iyi í nɛ itĩ iyi á gbɔò ide, ku gbɔ.

²⁴ Ŋɔi í sɔ̃ ŋa má í ni, i ce laakai ŋa do ide iyi ì gbɔ ŋa. Si gũa iyi ì wãaò inɛ ŋa, si bɛi aa wãa iŋɛ mɔ nɔ a kɔ̃ɔsi má ku re bɛɛbɛ.

²⁵ Ǹ wa n sɔ̃ ŋɛi, inɛ iyi í nɛ, nŋui à ya kɔ̃ɔa si má, amma inɛ iyi kù nɛ, baa keeke iyi í nɛu má à ya gbaai.

Mɔndai dimi ku gbɛ̃ iyi wa fita do araɛ

²⁶ Ŋɔi Jesu í fɔ má í ni, ide iyi aa ka wãò bommai Ilaaɔ̃ wee. Inɛ gɔ í fã dimi si ikoɛ.

²⁷ Si anyiɛ, baa bii wa sũ walakɔ wa cɔ ilu, alɛò daakɔ, waati kãma fei dimiu í fita wa la. Kù mà baa bɛi wa ce.

²⁸ Ilɛ í ya jɔ̀ amaajɛ ku fitai do araɛ. Í ya ce wuai titã, ku bɛi ku ce asĩ nɔ ku bí.

²⁹ Bii amaajɛu í jĩa nɔ a muu do kɔɔma, domi waatii kumui í to.

Mɔndai dimi keeke iyi à ya kpe mutaadi

³⁰ Ŋɔi Jesu í fɔ má í ni, mii aa ka wãò bommai Ilaaɔ̃. Do mɔnda yoomai aa ka sisiò yaaseɛ.

³¹ Í yɛi bɛi ngboi mutaadi iyi waati iyi à waa gbɔ̃ɔ, nŋui í kere í re ngboi mii ku gbɛ̃ fei si ilɛ.

³² Amma waati iyi à gbɔ̃ɔ à tã, nŋui í ya dede ku la ku re ama jĩi fei. Nɔ í ya ce amaawɔ nla nla hee yɛi ŋa a maa ce antɛ si amaawɔɛ ŋa, nɔ a wa si jĩjĩɛ.

³³ Do mɔnda nkpɔ bɛɛbɛi Jesu í ya kɔ inɛ ŋa si cio, zaka bɛi aa yɔkɔ a gbɔɔ.

³⁴ Ci ya sɔ̃ ŋa ide hai nɛ mɔnda, amma bii í gbe nŋu do mɔcɔɛ ŋa í ya tusɛ nŋai fei.

Jesu í leekĩ fufu si tenku

³⁵ Alɛ ajɔ nŋu, Jesu í sɔ̃ mɔcɔɛ ŋa í ni, ka bɔ ice ihɔ̃.

³⁶ Iyi à jɔ̀ zamaau í nɛ ŋɔi à lɔ akɔi inyi bii Jesu í tako í wau ku ba a kua ice ajɔ. Nɔ akɔ mmu gɔ ŋa mɔ à waa too ŋa má.

³⁷ Ŋɔi fufu nla gɔ í dede, í jɔ̀ inyi wa lɔ inɔ akɔu hee í maai ku kɔ̃.

³⁸ Amma Jesu wa sĩ njoo si anyii akɔu, í lesi iriɛ si lɛfɛu gɔ. Ŋɔi à jũu à beeɛ à ni, Mɛɛtu, kù jɛɛ ide kãma bii à waa bi ka ce nfe?

³⁹ Iyi Jesu í jĩ, ŋɔi í la si fufuu, nɔ í sɔ̃ tenkuu í ni, í to bɛɛbɛ, i coko. Nɔ fufuu í leekĩ nɔ inyau í coko cau.

⁴⁰ Ŋɔi Jesu í bee mɔcɔɛ ŋa í ni, na mii í ce ì jɔ̀ njo wa mu ŋɛ ŋa. I kù dasim naanɛ hee nsɛi ŋa?

⁴¹ Ŋɔi njo nla nla wa mu ŋa nɔ à sɔ̃ njɛ à waa ni, inɛ dimi yoomai ihɛ̃, iyi fufu do inyi fei wa jirimaɛ.