Maaku 3 - Bibeli do fee

Idei inɛ iyi awɔ akãɛ í ku

¹ Si anyii nŋu ŋɔi Jesu í bɔ ile bii Zuifu ŋa à ya ce kutɔtɔɔu má. Wee mɔkɔ gɔ í wa bɛ, awɔ akãɛ í ku.

² Nɔ inɛ ŋa iyi à wa bɛ à kãsi Jesu iju, à waa cɔ mà á jɔ̀ inɛɛu ku ba iri si ajɔi kusĩmi. À waa cɔɔ domi à waa bi a yɛ taaleɛi.

³ Ŋɔi Jesu í sɔ̃ inɛ iyi awɔɛ í kuu í ni, dede i leekĩ si anini nŋa bɛ.

⁴ Nɔ í bee inɛ ŋau í ni, si ajɔi kusĩmi, wooda í na inɛ kpãa ku ce jiida de mà laalɔ, ku faaba inɛ de, mà ku kpaa. Ŋɔi aŋa fei à coko.

⁵ Ŋɔi Jesu wa cɔ aŋa fei do idɔɔkɔ̃, nɔ inɔɛ í fɔ ntɔ ntɔ domi í yɛ idɔ nŋa í le. Ŋɔi í sɔ̃ inɛɛu í ni, tɛ awɔɛ. Nɔ í tɔɔ nɔ awɔu í baa dee dee.

⁶ Ŋɔi Farisi ŋau à fita hai ile bɛ. Nɔ à tɔtɔɔ do inɛi Herodu ŋa. À waa busi njɛ bɛi aa ce a kpaò Jesu.

Zamaa nla gɔ wa naa bi Jesu

⁷ Ŋɔi Jesu do mɔcɔɛ ŋa à nya ara nŋa à bɔ ikpa tenkui Galilee, nɔ zamaa nla gɔ í tooɛ wa hai ilɛi Galilee.

⁸ Nɔ inɛi Zeruzalɛmu ŋa do inɛi ilu mmu gɔ ŋa iyi à wa si ilɛi Zudee má, do inɛi ilɛi Idumee ŋa, do inɛi icei idoi Zuudɛ̃ɛ ŋa, do inɛi ilɛɛkoi Tii do Sidɔ̃ɔ ŋa à gbɔ mii iyi wa ce nɔ à naa bi tɛɛ aŋa nkpɔ nkpɔ.

⁹ Ŋɔi í ni mɔcɔ ŋau a jilɛa nŋu akɔi inyi na bii zamaau í na wa manteɛ wa.

¹⁰ Ntɔi, si bɛi í jɔ̀ inɛ nkpɔ í ba iri, nŋui í jɔ̀ bɔ̃ɔ ŋa fei à ya maa naa bi tɛɛ a maa tale njɛ a ba a luu ku ba a ba iri.

¹¹ Nɔ bii inɛ ŋa iyi à nɛ inɛi inɔɔko ŋa à yɔɔ à ya na a gulɛ si wajuɛi a dɔ̃ anu a maa ni, awɔi ì jɛ Amai Ilaaɔ̃.

¹² Amma Jesu í ya sɔ̃ inɛi inɔɔko ŋau ide do kugaabu ku ba a maà sɔ̃ inɛ ŋa inɛ iyi nŋu í jɛ.

Jesu í cica woo bɛ maateeji ŋa

¹³ Si anyii nŋu, Jesu í gũ iri kuta gɔ, ŋɔi í kpe inɛ ŋa iyi í bi. Nɔ à naa bi tɛɛ.

¹⁴ Ŋɔi í cica amanɛ maateeji ku ba a ya maa wa bi tɛɛ, nɔ ku bɛ ŋa a koo a waazoa inɛ ŋa. Nɔ í sɔ ŋa woo bɛ ŋa.

¹⁵ Nɔ í mu nŋa gbugbã a leleò inɛi inɔɔko ŋa.

¹⁶ Amanɛ maateeji ŋa iyi í cicau wee. Sinte titã í cica Simɔɔ nɔ í sɔɔ Piɛɛ, waatɔ kuta.

¹⁷ Si anyii nŋu, ŋɔi í cica Zaaki, do Zãa ifɔɛ, amai Zebedee ŋa, nɔ í sɔ ŋa Boanɛzɛɛ, waatɔ inɛ ŋa iyi à jɔ ibai ijĩ.

¹⁸ Si anyii nŋu í bɛi í cica Anderee, do Filipu, do Baatelemi, do Matie, do Tomaa, do Zaaki amai Alifee, do Tadee, do Simɔɔ inɛi igbɛi Zelɔtu,

¹⁹ do Zudasi Isikariɔti, inɛ iyi á na ku zambaɛu.

Nyaanzei Jesu ŋa à waa bi a nɛòɛ

²⁰ Ŋɔi Jesu do mɔcɔɛ ŋa à bɔ kpasɛ̃. Nɔ zamaa í tɔtɔɔ bɛ hee a kù ba baa fayai ku jɛ.

²¹ Ŋɔi nyaanzei Jesu ŋa à gbɔ mii iyi wa ce, nɔ à waa naa ku muu, domi à ni wa sũmui.

Jesu í jɛa inɛ ŋa iyi à máa ide

²² Wee woo kɔ inɛ ŋa si wooda gɔ ŋa à wa bɛ iyi à naa hai Zeruzalɛmu. À ni, Bɛɛlizebu, waatɔ Seetam inɛ ngboi inɛi inɔɔko ŋai í wa siɛ. Nŋui í muaa gbugbã wa leleò inɛi inɔɔko ŋa.

²³ Ŋɔi Jesu í kpe ŋa í bee ŋa ide do mɔnda í ni, bɛirei Seetam á ce ku lele araɛ.

²⁴ Bii inɛi bomma akã ŋa à waa jaò njɛ, bommau bɛ kaa yɔkɔ ku bɔ waju má.

²⁵ Bii inɛi kpasɛ̃ akã ŋa à waa jaò njɛ, kpasɛ̃u bɛ kaa yɔkɔ ku bɔ waju má.

²⁶ Bɛɛbɛ mɔi bii Seetam wa ja do araɛ, bommaɛ á kpɛ̃i nɔ kaa bɔ waju má, á tãi.

²⁷ Inɛ gɔ kaa yɔkɔ ku lɔ kpasɛ̃i inɛ iyi í nɛ gbugbã ku coo ile, bii kù jɛ í tako í dĩ lafɛ̃ɛ. Amma bii í dũu á yɔkɔ ku coo ile.

²⁸ Ntɔ ntɔ an sɔ̃ ŋɛ, arabu do dulum ŋa iyi amanɛ í ce fei, Ilaaɔ̃ á yɔkɔ ku cea suuru ku kpa ideu.

²⁹ Amma inɛ iyi á bu Hundei Ilaaɔ̃, Ilaaɔ̃ kaa kpa idei dulum dii lafɛ̃ɛ ajɔ kãma. Dulum dɛɛu á maa wɛɛai hee do ajɔ fei.

³⁰ Jesu í sɔ̃ ŋa bɛɛbɛi si na iyi í jɔ̀ inɛ ŋa à waa ni í nɛ inɛi inɔɔko.

Idei iyei Jesu do ifɔɛ ŋa

³¹ Ŋɔi iyei Jesu do ifɔɛ ŋa à to wa à waa leekĩ waduude. Nɔ à bɛ inɛ gɔ koo kpoo wa.

³² Wee zamaa í buba í kaakoɛ. Ŋɔi à sɔ̃ɔ à ni, cɔ, iyeɛ do ifɔɛ ŋa à wa waduude, à waa kpeɛ.

³³ Ŋɔi Jesu í jɛ nŋa í ni, yooi í jɛ iyem, nɔ yoo ŋai à jɛ ifɔm ŋa.

³⁴ Nɔ í cɔ inɛ ŋa iyi à buba à kaakoɛu nɔ í ni, inɛ ihɛ̃ ŋai à jɛ iyem do ifɔm ŋa.

³⁵ Nɔ í ni má, inɛ iyi wa ce idɔɔbii Ilaaɔ̃ fei, lafɛ̃ɛi í jɛ ifɔm, walakɔ wecĩm walakɔ iyem.