Maaku 2 - Bibeli do fee

Jesu í jɔ̀ wɛɛgɛ gɔ í ba iri

¹ Iyi í ce ajɔ minji má Jesu í nyi wa Kapɛranumu. Ŋɔi inɛ ŋa à gbɔ iyi í wa kpasɛ̃.

² Nɔ à tɔtɔɔ bɛ bututu hee andɛi ileu kaa yɔkɔ ku gba ŋa. Ŋɔi wa sɔ̃ ŋa idei Ilaaɔ̃.

³ Nɔ inɛ mɛɛ gɔ ŋa mɔ à naa bi tɛɛ à waa so wɛɛgɛ gɔ wa.

⁴ Wee a kaa ba a to wa bi Jesu na irii zamaau. Ŋɔi à gũ antaii ileu à lu antaii sikifai tengi bii Jesu í wau. Ŋɔi à to wɛɛgɛu do makɛɛ si bii wa sũ siu hai do ikpa andɛ bii à luò sikifau.

⁵ Iyi Jesu í yɛ naanɛi inɛ ŋau ŋɔi í sɔ̃ wɛɛgɛu í ni, baakɔɔm, ǹ kpa idei dulum dɛɛ.

⁶ Wee woo kɔ inɛ ŋa si wooda gɔ ŋa à waa buba bɛ à waa lasabu si idɔ nŋa à waa ni,

⁷ bɛirei inɛɛu í ce wa fɔ bɛɛbɛ. Wa bu Ilaaɔ̃. Yooi á yɔkɔ ku kpa idei dulum dii inɛ gɔ bii kù jɛ Ilaaɔ̃ nŋu akã.

⁸ Jesu í mà gbakã si idɔɛ mii iyi à waa lasabu, ŋɔi í sɔ̃ ŋa í ni, na mii í ce ì waa ce dimii lasabuu bɛ si idɔ nŋɛ ŋa.

⁹ Yoomai í faala í re, inɛ ku sɔ̃ wɛɛgɛ ku ni nŋu í kpa idei dulum dɛɛ, walakɔ ku ni ku dede ku so makɛɛɛ ku nɛ.

¹⁰ Amma ǹ bi i mà ŋa iyi amu Amai Amanɛ ǹ nɛ gbugbã n kpa idei dulum dii inɛ ŋa si andunya. Iyi í fɔ bɛɛbɛ í tã ŋɔi í sɔ̃ wɛɛgɛu í ni,

¹¹ dede i so makɛɛɛ i bɔ kpasɛ̃.

¹² Ŋɔi gbakã wɛɛgɛu í dede í so makɛɛɛ í nɛ wa fita hai inɔ kpasɛ̃u. Fei ndɛɛ í cei si wajui inɛ ŋa hee í mu aŋa fei biti. Nɔ à saabu Ilaaɔ̃ à waa ni aŋa a kù yɛ dimiɛ ajɔ kãma.

Jesu í kpe Levii

¹³ Ŋɔi Jesu í nyi itĩi tenkuu má. Ŋɔi zamaa nla nla gɔ í naa bi tɛɛ, nɔ wa kɔ ŋa si cioi idei Ilaaɔ̃.

¹⁴ Ŋɔi í gbe wa lɔ kɔkɔi ile bi ku gba fiai lɛmpoo nɔ í yɛ Levii, amai Alifee wa buba bɛ. Ŋɔi í sɔ̃ɔ í ni, toom wa. Nɔ Levii í dede í tooɛ.

¹⁵ Si anyiɛ Jesu wa jɛ kpasɛ̃i Levii. Nɔ wee woo gba fiai lɛmpoo do inɛ nkpɔ gɔ ŋa má iyi kuwɛɛ nŋa kù sĩa à waa jɛ do nŋu do mɔcɔɛ ŋa ajɔ, si na iyi í jɔ̀ aŋa nkpɔ nkpɔi à waa tooɛ.

¹⁶ To, wee Farisi gɔ ŋa à wa bɛ iyi à jɛ woo kɔ inɛ ŋa si wooda ŋa. Iyi à yɔɔ wa jɛ do woo gba fiai lɛmpoo ŋa do inɛ ŋa iyi kuwɛɛ nŋa kù sĩa, nɔ à bee mɔcɔɛ ŋau à ni, bɛirei í ce wa jɛ nɔ wa mɔ do woo gba fiai lɛmpoo ŋa do inɛ laalɔ ŋau.

¹⁷ Iyi Jesu í gbɔ bɛɛbɛ, ŋɔi í sɔ̃ ŋa í ni, ilu baani ŋa a kù nɛ bukaatai ilu iwɔ bii kù jɛ bɔ̃ɔ ŋa. Bɛɛbɛ mɔi n kù naa ku kpe inɛ dee dee ŋa, amma ilu dulum ŋai ǹ naa ku kpe.

Jesu wa fɔ idei anu ku dĩ

¹⁸ Ajɔ nŋu gɔ mɔcɔi Zãa ŋa do ti Farisi ŋa à waa dĩ anu ŋɔi inɛ gɔ ŋa à naa à bee Jesu à ni, bɛirei í ce mɔcɔi Zãa do ti Farisi ŋa à ya dĩ anu, nɔ wee mɔcɔɛ ŋa a ci ya dĩ anu.

¹⁹ Ŋɔi Jesu í jɛ nŋa í ni, kpaasii mɔkɔ titɔ̃ ŋa aa yɔkɔ a dĩ anu waati iyi mɔkɔ titɔ̃u í wa inɔ nŋa? Ntɔ ntɔ, waati iyi mɔkɔ titɔ̃u í wa inɔ nŋa fei, a kaa yɔkɔ a dĩ anu.

²⁰ Amma ajɔ wa naa iyi aa nya mɔkɔ titɔ̃u hai si inɔ nŋa. Waati bɛɛbɛi aa dĩ anu.

²¹ Ntɔ ntɔ, inɛ gɔ kaa sɔ jaaɛ ngbo do titɔ̃ɛ ku tɔtɔɔɛ. Bii í ce bɛɛbɛ, titɔ̃u á ga jaaɛ ngbou ku kɔ̃ɔsii.

²² Bɛɛbɛ mɔi a ci ya dasi vɛ̃ɛ titɔ̃ iyi wa gba si bɔgɔ bata ngbo ŋa. Bii ì ce bɛɛbɛ, bɔgɔ bata ngbo ŋau aa gai, nɔ vɛ̃ɛu ku nikã. Nɔ bɔgɔ ŋau do vɛ̃ɛu fei a ce nfe. Amma à ya dasi vɛ̃ɛ titɔ̃i si bɔgɔ titɔ̃ ŋa.

Jesu wa fɔ idei ajɔi kusĩmi*

²³ Si ajɔi kusĩmi gɔ Jesu do mɔcɔɛ ŋa à waa too kɔɔi ilɛ gɔ. Si isɛɛnɛ nŋau ŋɔi mɔcɔɛ ŋau à wɔ ijui amaajɛ iyi à gbɛ̃ si ilɛu.

²⁴ Ŋɔi Farisi ŋau à bee Jesu à ni, i kù waa yɔɔi? Na mii í ce à waa ce mii iyi a kù nɛ kpãai ku ce si ajɔi kusĩmi.

²⁵ Nɔ í jɛ nŋa í ni, i kù cio ajɔ kãma ŋa mii iyi Davidi í ce si waati iyi í wa si wahala nɔ ari wa kpa nŋu do inɛɛ ŋa?

²⁶ Í lɔ kpasɛ̃i Ilaaɔ̃ nɔ í jɛ pɛ̃ɛ iyi à jilɛa Ilaaɔ̃ iyi à ganji inɛ fei ku jɛ bii kù jɛ woo weei Ilaaɔ̃ ŋa aŋa akã. Amma Davidi í so pɛ̃ɛu nɔ í na do inɛɛ ŋa fei à jɛ. Waati bɛɛbɛ Abiataai wa jɛ woo wee nlau.

²⁷ Nɔ Jesu í sɔ̃ ŋa má í ni, Ilaaɔ̃ í jilɛ ajɔi kusĩmii na aranfãanii amanɛ ŋa. Kù jɛ amanɛ ŋai aa na a jɛ arui ajɔi kusĩmiu.

²⁸ Na nŋu, i mà ŋa iyi amu Amai Amanɛi ǹ jɛ inɛ ngboi ajɔi kusĩmi.