Maaku 16 - Bibeli do fee

Kujĩi Jesu hai si balɛ

¹ Iyi ajɔi kusĩmi í lɔ, ŋɔi Maari inɛi Madalau do Salomee do Maari iyei Zaaki, à ra tuae iyi aa koo a fãsi ikui Jesu.

² Ŋɔi ajɔ amaazuma daadaakɔu abo ŋau à waa bɔ bi balɛu,

³ ŋɔi à waa bee njɛ si kpãau à waa ni, yooi á tale nwa kutau hai si andɛi balɛu ya.

⁴ À waa fɔ bɛɛbɛi si na iyi í jɔ̀ kutau í la í caa. Amma iyi à cɔ waju à yɛ kutau í bimbili.

⁵ Ŋɔi à lɔ inɔ balɛu nɔ à yɛ awaasũ gɔ wa buba do awɔ njɛ bɛ, wa dasi jaba fũfũ, nɔ njo í mu ŋa jiida jiida.

⁶ Ŋɔi í sɔ̃ ŋa í ni, i maà jɔ̀ njo ku mu ŋɛ. Ǹ mà iyi Jesu inɛi Nazarɛtiui ì waa dɛdɛ ŋa, iyi à kpakpa si jĩi ku gaauu. Í jĩ hai si balɛ, kù wa ihɛ̃ má. I cɔ tengi bii à dasiɛu wo.

⁷ Amma i koo bɛbɛi i koo i sɔ̃ mɔcɔɛ ŋau do Piɛɛ takaɛ i ni, á cua nŋɛ ku bɔ ilɛi Galilee. Bɛi aa koo i yɔɔ ŋa si bɛi í sɔ̃ ŋɛ wo.

⁸ Ŋɔi à fita wa à sa hai bi balɛu do kuyaya domi njo í mu ŋa ntɔ ntɔ. A kù nɔ a kù sɔ̃ inɛ gɔ ideu na irii njo iyi í mu ŋau. [

Jesu í tusɛa Maari inɛi Madalau araɛ

⁹ Iyi Jesu í jĩ hai si balɛ ajɔ amaazuma daadaakɔu, bi Maari inɛi Madalaui í tako í nyisi araɛ. Maariui Jesu í tako í lelea inɛi inɔɔko mɛɛje wo.

¹⁰ Ŋɔi abou í koo í sɔ̃ kpaasii Jesu ŋa laabaauu. Aŋai à waa too Jesu wo nɔ à wɛɛò inɔ kufɔ à wasi ku kpata.

¹¹ Iyi í ni Jesu í jĩ má, nŋu í yɔɔ, a kù dasiɛ naanɛ.

Jesu í tusɛa mɔcɔ minji gɔ ŋa araɛ

¹² Si anyii nŋu, ŋɔi Jesu í tusɛ araɛ bi mɔcɔ minjiɛ gɔ ŋa iyi à waa nɛ si kpãa, à waa bɔ ilɛɛko. Amma í kpaasi araɛ si kuyɛ nŋa.

¹³ Ŋɔi inɛ ŋau à baa inɔ ilu nɔ à koo à sɔ̃ inɛ bubu ŋau, amma kpaasi ŋau a kù dasi aŋa mɔ naanɛ má.

Jesu í tusɛa mɔcɔ maatakã ŋau araɛ

¹⁴ Si anyiɛ Jesu í koo í tusɛ araɛ bi mɔcɔ maatakã ŋau bii à waa jɛ. Ŋɔi í gbagba si ŋa na naanɛ hai dasi nŋa do na idɔ kulele nŋa, si na iyi í jɔ̀ a kù jɛsi idei inɛ ŋa iyi à yɔɔ í jĩ hai si balɛu.

¹⁵ Ŋɔi í sɔ̃ ŋa í ni, i bɔ si andunya fei, nɔ i waazoa inɛ baa yooma fei laabaau jiidau ŋa.

¹⁶ Inɛ iyi í dasi naanɛ nɔ í jɔ̀ à dasiɛ inyi á ba faaba, amma inɛ iyi kù dasi naanɛ, Ilaaɔ̃ á yɛ taaleɛ ku kpãa iju.

¹⁷ Maamaake gɔ ŋa iyi woo dasim naanɛ ŋa aa ce wee. Aa lele inɛi inɔɔko ŋa do irim, nɔ aa fɔ ide do fee ŋa iyi a kù waa gbɔ.

¹⁸ Aa mu njo ŋa do awɔ, nɔ baa bii à mɔ kɔ̃ɔtɛ̃ gɔ kaa ce nŋa ide kãma. Aa lesi bɔ̃ɔ ŋa awɔ nɔ a ba iri.

Jesu í nyi bi Ilaaɔ̃ má

¹⁹ Iyi Lafɛ̃ɛ Jesu í sɔ̃ ŋa ideu í tã, ŋɔi à soo lele í koo í buba si awɔ njɛi Ilaaɔ̃.

²⁰ Ŋɔi mɔcɔ ŋau à koo à waa waazoa inɛ ŋa bii fei. Nɔ Lafɛ̃ɛ wa sobi ŋa si icɛu, í jɔ̀ à ya maa ce maamaake ŋa ku ba inɛ ŋa a mà iyi ide nŋa í jɛ ntɔ.]