Maaku 15 - Bibeli do fee

À bɔò Jesu si wajui Pilati

¹ Ŋɔi daadaakɔ inɛ ngboi woo weei Ilaaɔ̃ ŋau do inɛ ngboi Zuifu ŋau do woo kɔ inɛ ŋa si wooda ŋau do inɛ ŋa iyi à gbe si igbɛi woo kiiti ŋau fei à tɔtɔɔ à wũa ideu ajɔ. Nɔ à dĩ Jesu à koo à daa Pilati si awɔ.

² Ŋɔi Pilati í beeɛ í ni, awɔi ì jɛ ilaalui Zuifu ŋa? Nɔ Jesu í jɛaa í ni, awɔi ì fɔɔ.

³ Ŋɔi inɛ ngboi woo wee ŋau à má Jesu ide ikã ikã fei.

⁴ Ŋɔi Pilati í beeɛ má í ni, i kù waa fɔ ide gɔ? I kù gbɔ bɛi à waa niɛ?

⁵ Amma Jesu kù jɛ ide kãma má hee biti í mu Pilati.

À yɛ taalei Jesu a ba a kpaa

⁶ Wee si jingaui Iku ku kua fei Pilati í ya jɔ̀ inɛi piisɔ̃ɔ akã iyi zamaa í bii.

⁷ Wee inɛ gɔ í wa ile piisɔ̃ɔ bɛ do kpaasiɛ ŋa si na iyi í jɔ̀ à kpa inɛ gɔ si waatii ide ku kɔ̀ nŋa. Iriɛi Barabasi.

⁸ Ŋɔi zamaau í bɔ bi Pilati à waa tɔɔɛ ku cea aŋa bɛi í ya ce nŋa adɔ̃ fei si jingauu.

⁹ Ŋɔi Pilati í bee ŋa í ni, ì bi n jɔ̀ nŋɛ ilaalui Zuifu ŋau ŋa?

¹⁰ Í fɔ bɛɛbɛi si na iyi í jɔ̀ wa mà sãa sãa iyi na igui í jɔ̀ inɛ ngboi woo weei Ilaaɔ̃ ŋau à daa nŋu Jesu si awɔ.

¹¹ Amma inɛ ngboi woo weei Ilaaɔ̃ ŋau à wasi ku mante zamaau à ni a sɔ̃ Pilati ku nya nŋa Barabasi.

¹² Nɔ Pilati í bee ŋa má í ni, to, bɛirei ì bi n cea inɛ iyi ì ya maa kpe ilaalui Zuifu ŋau ŋa.

¹³ Ŋɔi à dɔ̃ anu à ni, kpakpaɛ si jĩi ku gaau.

¹⁴ Nɔ Pilati í bee ŋa í ni, laalɔ yoomai í bɛi í ce. Amma bɛi Pilati wa fɔ fei, bɛɛbɛ mɔi inɛ ŋau à ya dɔ̃ anu hee lele a maa ni, kpakpaɛ si jĩi ku gaau.

¹⁵ Si na iyi í jɔ̀ Pilati í bi ku ce iyi á dɔ̃a zamaau si, nŋui í jɔ̀ í nya nŋa Barabasi nɔ í mu Jesu í jɔ̀ à tɛaa kpɔtɔɔ. Si anyiɛ, nɔ í daa sooge ŋa si awɔ a koo a kpakpaɛ si jĩi ku gaau.

Sooge ŋa à waa yaako Jesu

¹⁶ Ŋɔi sooge ŋau à gbã Jesu à lɔòɛ kabai ilu ilɛu, nɔ à tɔtɔɔ sooge ŋa iyi à gbe ŋau fei bɛ.

¹⁷ Ŋɔi à daa Jesu si ibɔ nkpa sisɔ gɔ, nɔ à ba fulai agũ à daa si iriɛ.

¹⁸ Ŋɔi à yaakoɛ à waa ni, fɔɔ ilaalui Zuifu ŋa.

¹⁹ Ŋɔi à ya maa cãa kpokpoo si iriɛ, a maa tu siɛ antɔ, nɔ à waa gulɛaa à waa sɛɛbata si wajuɛ.

²⁰ Iyi à yaakoɛ à tã, ŋɔi à nyaa ibɔ nkpau à bɛi à daa si ibɔɛ, nɔ à bɔòɛ waduude a koo a kpakpaɛ si jĩi ku gaau.

À kpakpa Jesu si jĩi ku gaau

²¹ Wee inɛi Sirɛni gɔ iyi à ya kpe Simɔɔ wa baa hai iko, nɔ í to wa bɛ. Baai Alesandu do Rufusii. Iyi í to wa nɔ sooge ŋau à muu do gbugbã à kãa jĩi ku gaau bii aa kpakpa si Jesuu.

²² Ŋɔi à bɔò nŋu do Jesu si inya gɔ iyi à ya kpe Gɔɔgɔta, waatɔ inya iyi í jɔ kokoi iri.

²³ Nɔ à ná Jesu atɛ̃ vɛ̃ɛ iyi à yɔgɛɛ do iwɔ iyi à ya kpe miru, amma í kɔ̀ ku mɔɔ.

²⁴ Ŋɔi à kpakpaɛ si jĩi nɔu. Si anyiɛ sooge ŋau à ta kpasa si jĩnɛɛ ŋa a ba a yɛ iyi inɛ fei á ba. Bɛɛbɛi à ce ikpɛ̃i jĩnɛɛ ŋau.

²⁵ Daakɔ zaka bɛi isɔ mɛɛsãi à kpakpaɛ si jĩi nɔu.

²⁶ Ŋɔi à kɔ kuraraɛ si jĩi gɔ à masi jĩi bii à kpakpaɛu, à ni ilaalui Zuifu ŋa.

²⁷ Ŋɔi à kpakpa ile minji gɔ ŋa bɛ má, inɛ akã ikpa awɔ njɛɛ, inɛ akã mɔ ikpa awɔ cangaɛ. [

²⁸ Bɛɛbɛi kukɔi idei Ilaaɔ̃ í kɔ̃ iyi í ni, à dooaɛ si inɛ laalɔ ŋa.]

²⁹ Inɛ ŋa iyi à waa too do bɛ à ya maa gbugbã irii a buu a maa ni, ãhãa, kù jɛ awɔi ì ni aa lɛgɛ kpasɛ̃i Ilaaɔ̃u nɔ i maa má si afei ajɔ mɛɛta?

³⁰ To, faaba araɛ bɛ, kita hai si antaii jĩi ku gaauu.

³¹ Bɛɛbɛ mɔi inɛ ngboi woo weei Ilaaɔ̃ ŋau do woo kɔ inɛ ŋa si wooda ŋau à waa yaakoɛ. À sɔ̃ njɛ à waa ni, í faaba inɛ gɔ ŋa amma kaa yɔkɔ ku faaba araɛ.

³² Bɛbɛi, nŋu Kirisi ilaalui Izirɛliu ku kita wa hai si jĩi nɔu ku ba ka yɔɔ, nɔ ka dasiɛ naanɛ. Bɛɛbɛ mɔi, inɛ ŋa iyi à kpakpa do Jesu ajɔu à waa yaakoɛ.

Waati iyi Jesu í ku

³³ Ŋɔi dasã nkpau ilu í kuku si ilɛu fei hee í koo í to isɔ mɛɛtai alɛ.

³⁴ Ŋɔi si isɔ mɛɛtau Jesu í dɔ̃ anu hee lele í ni, Eloi, Eloi, lema sabatani, waatɔ Ilaaɔ̃ Lafɛ̃ɛm, Ilaaɔ̃ Lafɛ̃ɛm, na mii í ce ì fũsim awɔ.

³⁵ Ŋɔi inɛ gɔ ŋa iyi à wa bɛu à gbɔ anu ku dɔ̃u. Nɔ à ni, i gbɔ, wa kpe Elii.

³⁶ Ŋɔi inɛ akã nŋa í sɛi í koo í dĩ kanya si golo gɔ í sɔsi inyiikã í bɛi í naa í toa Jesu ku cɔ̃ɔcɔ̃ɔɛ, nɔ í ni, ka leekĩ, ka cɔ mà Elii á naa ku kitaɛ hai si jĩi ku gaauu.

³⁷ Ŋɔi Jesu í dɔ̃ anu hee lele í bɛi í ku.

³⁸ Asee, waati bɛɛbɛ si ilui Zeruzalɛmu, ridoo iyi í wa kpasɛ̃i Ilaaɔ̃u í ga í kpɛ̃ minji hai lele hee ku bɔ ilɛ.

³⁹ Inɛ ngboi sooge ŋa iyi í wa wajui Jesuu í yɛ yaase bɛi í ce í bɛi í ku, nɔ í ni, ntɔ ntɔ, inɛɛu ihɛ̃ Amai Ilaaɔ̃i.

⁴⁰ Ŋɔi inaabo gɔ ŋa mɔ à wa bɛ à waa cɔ ilu wa hai jĩijĩ. Si inɔ nŋa Maari inɛi Madalau í wa bɛ do Salomee do Maari iyei Zozee do Zaaki iyi í jɛ ama awaasũu.

⁴¹ Wee hai tako, waati iyi Jesu í wa ilɛi Galilee, aŋai à tooɛ à ya maa ceaa icɛ. Nɔ inaabo nkpɔ gɔ ŋa mɔ à wa bɛ, iyi aŋaò ŋa à sì Jesu wa iyi wa naa Zeruzalɛmu.

À dasi ikui Jesu balɛ

^42-43 Iyi alɛ í lɛ, ŋɔi Zozɛfu inɛi Arimateeu í koo bɛ. Zozɛfuu, ilu bɛɛrɛi si inɔi Zuifu woo kiiti ŋau, nɔ wa cɔ kpãa iyi Ilaaɔ̃ á na ku jɛ bomma. Wee ajɔi sɔɔlui jingaui. Iju kumáɛ ajɔi kusĩmii á jɛ. Na ŋɔi í jɔ̀ Zozɛfu í bɔ bi Pilati do wɔɔkɔ ku tɔɔɛ ikui Jesu.

⁴⁴ Ŋɔi Pilati í biti do iyi í gbɔ à ni í kú tã. Ŋɔi í kpe inɛ ngboi sooge ŋau í beeɛ mà Jesu í kú í kpɛ.

⁴⁵ Iyi inɛ ngboi sooge ŋau í sisiaa yaase bɛi Jesu í kuò, ŋɔi í jɛsi Zozɛfu koo nya ikuu.

⁴⁶ Ŋɔi Zozɛfu í koo í ra acɔ fũfũ, nɔ í nya ikui Jesu wa hai si jĩi ku gaauu, í woo do acɔu. Nɔ í suu si isai kuta gɔ iyi à gbe wo. Si anyiɛ í bimbili kuta nla gɔ í dĩò andɛi balɛu.

⁴⁷ Ŋɔi Maari inɛi Madalau do Maari iyei Zozee à yɛ bii à waa dasi ikui Jesuu.