Maaku 14 - Bibeli do fee

Inɛ ngbo ŋa à waa busi njɛ a kpa Jesu

¹ Si afei ajɔ minji jingaui Iku ku kua do ti Pɛ̃ɛ hai nɛ levɛ̃ɛ á to wa. Ŋɔi inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau à waa dɛ kpãa bɛi aa ce a mu Jesu do bisi a kpaa.

² Amma à waa ni, kù sĩa ku jɛ si waatii jingauu ku ba hoya hoya ku maà dede si zamaau.

Abo gɔ í fãsi irii Jesu tuae

³ Jesu í wa Betani kpasɛ̃i Simɔɔ iyi í tako í ce bɔ̃ɔi dintɛu, ŋɔi abo gɔ í lɔ wa bi tɛɛ waati iyi à waa jɛ. Wa mu ama caka kusĩa gɔ iyi í nɛ tuae iyi à ce do ikpoi naadi. Tuaeu í caada. Ŋɔi í lɛgɛ ama cakau nɔ í fãsi tuaeu si irii Jesu.

⁴ Nɔ inɛ gɔ ŋa à wa bɛ. À sɔ̃ njɛ do idɔɔkɔ̃ à waa ni, na mii í ce abou í koo í ce asɔɔi tuaeu ihɛ̃.

⁵ Aa ka taai wo zakai fiai icɛi adɔ̃ akã nɔ ka mua ilu are ŋa. Ŋɔi à waa la si abou do kugaabu.

⁶ Amma Jesu í ni, i jɔ̀ abou. Na mii í ce ì waa yɛ taaleɛ ŋa. Mii jiidai í ceem bɛ.

⁷ Ntɔ ntɔ, ilu are ŋa aa maa wɛɛ do iŋɛ waati kãma fei, nɔ waati iyi ì bi fei aa yɔkɔ i ce nŋa jiida ŋa, amma amu n kaa n na n wɛɛ do iŋɛ hee do ajɔ fei.

⁸ Abou í ce andi gbugbãɛ iyi á yɔkɔ mbɛ, í fãsi aram tuae do njuma ku ceò sɔɔlui kusim.

⁹ Ntɔ ntɔ, tengi bii inɛ ŋa aa koo a maa waazo laabaau jiidau si andunya fei, aa sisi ide iyi abou ihɛ̃ í ce a maa yeò gigiɛ.

Zudasi á fita anyii Jesu

¹⁰ Ŋɔi Zudasi Isikariɔti, inɛ akãi mɔcɔ maateeji ŋau, í bɔ bi inɛ ngboi woo weei Ilaaɔ̃ ŋau í ni nŋu á da nŋa Jesu si awɔ.

¹¹ Iyi à gbɔ ideu, ŋɔi inɔ nŋa í dɔ̃ nɔ à ni aŋa aa muaa fia. Ŋɔi Zudasi wa dɛ kpãa bɛi á ce ku zambaò Jesu ku na ŋa.

Jesu wa jɛ jingaui Iku ku kua* do mɔcɔɛ ŋa

¹² Si ajɔ sintei jingaui Pɛ̃ɛ hai nɛ levɛ̃ɛu, si waati iyi inɛ ŋa à ya saka ama angudã ŋa si jingaui Iku ku kua a ceò kuwee, ŋɔi mɔcɔi Jesu ŋau à beeɛ à ni, iwoi ì bi kaa ceɛ ijɛi jingauu.

¹³ Ŋɔi í bɛ amanɛ minji si inɔi mɔcɔɛ ŋau í sɔ̃ ŋa í ni, i bɔ inɔ ilu, aa yɛ mɔkɔ gɔ wa so inyi jɔlɔ. I tooɛ.

¹⁴ Mɔkɔu á koo ku lɔ kpasɛ̃ gɔ. Kpasɛ̃ bii á lɔu, i koo i sɔ̃ ilu kpasɛ̃u i ni ŋa, Mɛɛtu í ni ka beeɛ ile bii nŋu á jɛ jingaui Iku ku kua do mɔcɔi nŋu ŋa.

¹⁵ Mɔkɔu á bɔò ŋɛ si antaii ile kukpɛkɛ gɔ nɔ á nyisi ŋɛ ilaawa nla gɔ iyi à ce sɔɔlui fei ndɛɛ tã. Bɛi aa ce nwa sɔɔlui jingauu ŋa.

¹⁶ Ŋɔi mɔcɔ ŋau à dasi kpãa à nɛ. Iyi à to inɔ iluu nɔ à yɛ ideu í ce bɛi Jesu í sɔ̃ ŋau, ŋɔi à ce sɔɔlui ijɛi jingauu bɛ.

¹⁷ Iyi alɛ í lɛ, ŋɔi Jesu í to wa do mɔcɔ maateeji ŋau.

¹⁸ Waati iyi à waa jɛ ŋɔi Jesu í ni, ntɔ ntɔ, inɛ akã nŋɛ iyi awaò à waa jɛi á zambam.

¹⁹ Ŋɔi inɔi aŋa fei í fɔ, nɔ à wasi ku beeɛ akã akã à waa ni, isa kù jɛ amu ya.

²⁰ Ŋɔi Jesu í jɛ nŋa í ni, si inɔi iŋɛ maateejiu, inɛ akã nŋɛ á gũsi pɛ̃ɛ si inɔ jɛɛ awaò ajɔ. Lafɛ̃ɛi á zambam.

²¹ Do ntɔ amu Amai Amanɛ an ku si bɛi kukɔi idei Ilaaɔ̃ wa fɔ. Amma inɛ iyi á zambam á yɛ ijuukpã nla nla. Á tiaa inɛɛu bii í jɛ a kù búu mɔm wo.

Ijɛ iyi aa ka yeò gigii ikui Jesu

²² Waati iyi à waa jɛ, ŋɔi Jesu í so pɛ̃ɛ í saabu Ilaaɔ̃ titã í bɛi í bububuɛ í na mɔcɔɛ ŋau í ni, i gba ŋa. Iyi ihɛ̃i í jɛ aram.

²³ Ŋɔi í so kɔɔfu má si bii à dasi vɛ̃ɛ í saabu Ilaaɔ̃ nɔ í na ŋa aŋa fei à mɔ.

²⁴ Ŋɔi í sɔ̃ ŋa í ni, iyi ihɛ̃i í jɛ njɛm. Nŋui í jɛ nyindai akabuu iyi Ilaaɔ̃ í dĩ do amanɛ ŋa. An nikãɛ na irii dulum dii inɛ nkpɔ.

²⁵ Ntɔ ntɔ, n kaa n mɔ atɛ̃ vɛ̃ɛ má í gbe hee ajɔ iyi an mɔ vɛ̃ɛ titɔ̃ si bommai Ilaaɔ̃.

²⁶ Si anyiɛ à kɔ̃ iri ŋa nɔ à fita à bɔ geetei Olivie ŋa.

Jesu wa fɔ iyi Piɛɛ á jã ku ni kù mà nŋu

²⁷ Ŋɔi Jesu í sɔ̃ mɔcɔɛ ŋa í ni, iŋɛ fei aa nyiò anyi na irim. Bɛi Ilaaɔ̃ í fɔ si kukɔi ideɛ, bɛɛbɛi á ce. Í ni, an kpa woo degbeu nɔ angudã ŋau a fangaa bii fei.

²⁸ Amma amu Jesu an jĩ hai si balɛ nɔ n cua nŋɛ n bɔ ilɛi Galilee.

²⁹ Ŋɔi Piɛɛ í sɔ̃ɔ í ni, baa bii inɛ fei wa nyiò anyi na iriɛ, amu n kaa n nyiò anyi pai.

³⁰ Ŋɔi Jesu í sɔ̃ɔ í ni, ntɔ ntɔ, nnyi, idũuyi mɔm, hee ajɛɛ ku maa kɔ isɛ gbeeji, aa jã isɛ gbɛɛta i ni i kù màm.

³¹ Amma bɛi Jesu wa fɔ, bɛɛbɛ mɔi Piɛɛ í ya fɔ hee lele ku ni, n kaa n kɔ̀siɛ pai, baa bii í jɛ an ku do awɔ ajɔi. Ŋɔi aŋa fei à fɔ bɛɛbɛ.

Jesu wa ce kutɔɔ Gɛsemanee

³² Ŋɔi Jesu do mɔcɔɛ ŋa à bɔ inya gɔ iyi à ya kpe Gɛsemanee. Iyi à to bɛ nɔ í sɔ̃ ŋa í ni, i buba ihɛ̃ titã ŋa n koo n ce kutɔɔ wa.

³³ Ŋɔi í gbã Piɛɛ do Zaaki do Zãa à bɔ waju. Nɔ njo í muu hee araɛ fei í rɔ.

³⁴ Ŋɔi í sɔ̃ ŋa í ni, inɔ kufɔ í naa sim nla nla hee wa bi ku kpam. I wa ihɛ̃, i wɔ njoo ŋa.

³⁵ Iyi í fɔ bɛɛbɛ í tã ŋɔi í bɔ waju keeke í koo í sɛɛbata ilɛ wa ce kutɔɔ, bii á ce, wahalau ku jĩò nŋu.

³⁶ Wa ni, Baam, aa yɔkɔ i ce mii fei. Jɔ̀ wahalau ihɛ̃ ku jĩim. Amma do nŋu fei, ku maà ti ku jɛ ti idɔɔbim, jɔ̀ idɔɔbiɛ ku ce.

³⁷ Si anyiɛ ŋɔi í nyi wa bi mɔcɔ mɛɛta ŋau í ba ŋa à waa sĩ njoo. Ŋɔi í bee Piɛɛ í ni, Simɔɔ, ì waa sĩ njooi? Debɛi, i kù yɔkɔ i kù wɔ njoo baa isɔ akã?

³⁸ I wɔ njoo nɔ i maa ce kutɔɔ ŋa ku ba i maà dasi kulɛlɛi inɛ ŋa. Idɔi amanɛ í bi, amma araɛ í kua gbugbãɛ.

³⁹ Ŋɔi í nyi má í koo í ce kutɔɔ si ide akãu.

⁴⁰ Iyi í nyi wa bi tu ŋa má, nɔ í ba ŋa à waa sĩ njoo má, domi njoo wa kpa ŋa. Iyi í jĩ ŋa nɔ a kù mà bɛi aa sɔ̃ɔ má.

⁴¹ Ŋɔi í nyi í koo í ce kutɔɔ má nɔ í baa bi tu ŋa isɛ gbɛɛtasiaɛ í bee ŋa í ni, ì sũ ì waa sĩmi ŋai hee nsɛi? Í to bɛɛbɛ. Wee awaatiu í to tã, iyi aa mu amu Amai Amanɛ, á daa ilu dulum ŋa si awɔ.

⁴² Wee inɛ iyi á zambam wa to wa. I dede ka kòo ŋa.

À mu Jesu

⁴³ Iyi Jesu wa fɔ bɛɛbɛ gbakã, ŋɔi Zudasi, inɛ akãi mɔcɔ maateeji ŋau, í to wa. Zamaa nla gɔ wa tooɛ wa à waa mu taakuba ŋa do golo ŋa. Inɛ ngboi woo weei Ilaaɔ̃ ŋau do woo kɔ inɛ ŋa si wooda ŋa do inɛ ngboi Zuifu ŋaui à bɛ ŋa wa.

⁴⁴ Zudasi nŋu iyi á zamba Jesuu, í tako í sɔ̃ zamaau nyinda gɔ iyi nŋu á ce. Í ni, inɛ iyi an koo n ya n baabaaɛ, lafɛ̃ɛ mbɛ. I muu dim dim i nɛɛ ŋa.

⁴⁵ Hai Zudasi í to wa gbakã, í sɛkɛɛ si Jesu í ni, Mɛɛtu. Ŋɔi í baabaaɛ.

⁴⁶ Ŋɔi inɛ ŋau à to Jesu awɔ à muu.

⁴⁷ Ŋɔi inɛ akãi mɔcɔ ŋau í yɔ taakubaɛ í cafe itĩi amaacɛi woo wee nlai Ilaaɔ̃u í buu.

⁴⁸ Ŋɔi Jesu í bee ŋa í ni, amui ì naa ku mu ŋa do taakuba do golo ŋa bɛi woo ce ile?

⁴⁹ Ǹ ya n wa inɔ nŋɛ ajɔ fei n maa n kɔ inɛ ŋa si cio kpasɛ̃i Ilaaɔ̃, nɔ i kù mum ŋa. Amma mii ŋau ihɛ̃ fei wa cei ku ba kukɔi idei Ilaaɔ̃ ku kɔ̃.

⁵⁰ Ŋɔi mɔcɔ ŋau fei à jɔ̀ɔ à sa.

⁵¹ Ŋɔi ama awaasũ gɔ mɔ wa too Jesu, wa kpaka acɔ. Ŋɔi inɛ gɔ wa dɛ ku muu,

⁵² amma í sa basĩ í jɔ̀ acɔu.

Jesu í wa wajui igbɛi woo kiiti ŋa

⁵³ Ŋɔi à bɔò Jesu bi woo wee nlai Ilaaɔ̃u. Tengi bɛi inɛ ngboi woo wee ŋau do inɛ ngboi Zuifu ŋau do woo kɔ inɛ ŋa si wooda ŋau à tɔtɔɔ.

⁵⁴ Nɔ Piɛɛ í wa hee jĩijĩ wa too Jesu wa do anyi hee í bɔ inɔ bantumai kpasɛ̃i woo wee nlau. Ŋɔi í buba bɛ do woo degbe andɛ koofa ŋau, wa nyia kɔkɔi ina.

⁵⁵ Waati nŋu inɛ ngboi woo wee ŋa do igbɛi woo kiiti ŋau fei à waa dɛ ide gɔ iyi aa yɛò taalei Jesu a ba a kpaa. Amma a kù ba.

⁵⁶ Inɛ nkpɔ í wasi ku máa ide, amma ide nŋa kù waa so njɛ.

⁵⁷ Ŋɔi inɛ gɔ ŋa à dede à máa ide à ni,

⁵⁸ à gbɔ iyi í ni nŋu á lɛgɛ kpasɛ̃i Ilaaɔ̃u nɔ si afei ajɔ mɛɛta nŋu á be ku ma mmuɛ iyi kaa jɛ do awɔi amanɛ.

⁵⁹ Amma baa si bɛ, ide nŋa kù so njɛ.

⁶⁰ Ŋɔi woo wee nlau í dede í leekĩ si wajui aŋa fei, nɔ í bee Jesu í ni, i kù waa ni ide gɔ? Ide mii inɛ ŋau ihɛ̃ à waa yɛò taaleɛ.

⁶¹ Amma Jesu wa cokoɛ, kù fɔ ide gɔ. Ŋɔi woo wee nlau í beeɛ má í ni, awɔi ì jɛ inɛ iyi Ilaaɔ̃ í cica, Amai Ilaaɔ̃ iyi à waa saabu?

⁶² Ŋɔi Jesu í jɛaa í ni, oo, amui. Nɔ aa yɛ ŋa amu Amai Amanɛ ǹ wa n buba si awɔ njɛi Ilaaɔ̃ ilu gbugbã fei. Nɔ ajɔ akã aa na i yɛm ŋa ǹ wa n naa si kudũi ijĩ má.

⁶³ Ŋɔi woo wee nlau í ga ibɔɛ ku nyisiò idɔɔkɔ̃ɛ. Nɔ í ni, a kù waa dɛ siɛ ilu sɛɛda kãma má.

⁶⁴ Ì gbɔ bɛi wa bu Ilaaɔ̃ ŋa. Bɛirei ì yɛ a cea mɔkɔu ŋa. Ŋɔi aŋa fei à yɛ taaleɛ à ni a kpaa.

⁶⁵ Ŋɔi inɛ gɔ ŋa à wasi ku tu si Jesu antɔ gbakã nɔ à bii ijuɛ à bɛi à waa daa kutu à beeɛ à waa ni, awɔ walii, sɔ̃ wa inɛ iyi í cãɛ. Ŋɔi sooge ŋau à mu Jesu à wasi ku sambalaɛ.

Piɛɛ í jã í ni nŋu kù mà Jesu

⁶⁶ Waati iyi Piɛɛ í wa bantumai kpasɛ̃u, ŋɔi inɛ akãi ama inaabo woo ce icɛi woo wee nlai Ilaaɔ̃u í naa bɛ.

⁶⁷ Iyi í yɛ Piɛɛ wa nyia, ŋɔi í cɔɔ sɛ̃ɛ í ni, awɔ mɔ, ì tako ì wɛɛ do Jesu inɛi Nazarɛtiu.

⁶⁸ Amma í jã í ni, n kù màa fɔ́, n kù gbɔ ide iyi ì waa fɔ. Ŋɔi í fita í bɔ ikpa andɛ kabau. Waati bɛɛbɛi ajɛɛ wa kɔ.

⁶⁹ Ŋɔi ama inaabo woo ce icɛu í yɔɔ bɛ má, ŋɔi í wasi ku sɔ̃ inɛ ŋa iyi à wa bɛu wa ni, inɛɛu ihɛ̃ inɛ akã nŋai.

⁷⁰ Ŋɔi Piɛɛ í jã má. Iyi í kpɛ keeke, ŋɔi inɛ ŋa iyi à wa bɛu à sɔ̃ Piɛɛ à ni, ntɔ ntɔ, awɔ inɛ akã nŋai, domi awɔ mɔ inɛi Galileei.

⁷¹ Ŋɔi Piɛɛ í ceekpe nɔ í sisi í fɔ do kugbasi í ni, n kù mà mɔkɔ iyi ì waa fãau bɛ ŋa.

⁷² Bɛ gbakã ajɛɛ í kɔ isɛ gbeejisiaɛ. Ŋɔi Piɛɛ í ye gigii ide iyi Jesu í sɔ̃ɔ wo í ni, hee ajɛɛ ku maa kɔ isɛ gbeeji aa jã isɛ gbɛɛta i ni i kù màm. Ŋɔi Piɛɛ í lɔsi ku kpata.