Maaku 13 - Bibeli do fee

Jesu wa fɔ idei kpasɛ̃i Ilaaɔ̃ ku lɛgɛ

¹ Ŋɔi Jesu wa fita wa hai bantumai kpasɛ̃i Ilaaɔ̃ nɔ mɔcɔ akãɛ gɔ í ni, Mɛɛtu, cɔ bɛi kpasɛ̃i Ilaaɔ̃u ihɛ̃ í la nɔ à maa do kuta kusĩa ŋa.

² Ŋɔi Jesu í ni, ì waa yɛ ile nla ŋau ihɛ̃? Kuta baa akã kaa na ku maa lesi njɛ bɛ má, aa kɛkɛɛ mbɛ fei.

Wahala iyi á naa si waatii ankãanyi

³ Ŋɔi Jesu í koo í buba si geetei Olivieu wa cɔ ikpa kpasɛ̃i Ilaaɔ̃. Ŋɔi Piɛɛ do Zaaki do Zãa do Anderee à wa bi Jesu aŋa nŋa. Ŋɔi à beeɛ à ni,

⁴ sɔ̃ wa waati iyi mii nɔu bɛ á ce. Nyinda yoomai aa ka yɛ ka ba ka mà iyi waatiu í to.

⁵ Ŋɔi Jesu í jɛ nŋa í ni, i ce laakai ŋa inɛ gɔ ku maà na ku dĩ iju nŋɛ,

⁶ domi inɛ ŋa iyi aa na a maa naa akã akã a maa ni aŋai à jɛ inɛ iyi Ilaaɔ̃ í cicau aa kpɔ. Aa dĩ ijui inɛ nkpɔ.

⁷ Bii ì gbɔ ibai igũ amɛɛ amɛɛ ŋa do baaui igũ ŋa hee jĩijĩ i maà jɔ̀ idɔ nŋɛ ku dede, domi í gbe mii ŋau bɛ fei ku cei. Amma kù nɔ kù jɛ iri ku kpai andunyau bɛ titã.

⁸ Dimi gɔ ŋa aa ya na a maa ja do dimi mmu ŋa, nɔ ilaalu gɔ ŋa mɔ aa maa ja do ilaalu mmu ŋa. Nɔ ilɛ á yaya si ilu gɔ ŋa, nɔ ari á ce. Nŋu bɛ á yɛi bɛi ara kuro sintei bãasĩ ku bɛi ku bí.

⁹ Amma iŋɛ taka nŋɛ i ce laakai. Aa na a mu ŋɛ a koo a na woo kiiti ŋa, nɔ a tɛ nŋɛ kpɔtɔɔ ile bi kutɔtɔɔ ŋa. Nɔ aa bɔò ŋɛ bi ilaalu ŋa do bi ilu ilɛ ŋa na irim ku ba i jɛ nŋa sɛɛda ŋa.

¹⁰ Amma í gbe a waazoa inɛ ŋa laabaau jiidai Ilaaɔ̃ si dimi fei titã waatii iri ku kpau ku bɛi ku to wa.

¹¹ Waati iyi à mu ŋɛ à waa bɔ ku na woo ce kiiti ŋau, i maà ti i biti do ide iyi aa fɔ ŋa, amma bii awaatiu í to i fɔ ide iyi í naa nŋɛ si idɔ. Nɔ ide ŋa iyi aa fɔ ŋa kaa jɛ ide nŋɛ, Hundei Ilaaɔ̃i á fɔɔ.

¹² Inɛ gɔ ŋa aa zamba ifɔ nŋa ŋa walakɔ igbã nŋa ŋa ku ba a kpa ŋa. Bɛɛbɛ mɔi baa ŋa aa maa cea ama nŋa ŋa. Amu ŋa mɔ aa dede si baa nŋa ŋa ku ba a kpa ŋa.

¹³ Inɛ fei á cé ŋɛi na irim. Amma inɛ iyi í temua hee kɔɔ á ba faaba.

Faajii ide laalɔ iyi í ya bɛjɛ mii ŋa

¹⁴ Nɔ Jesu í ni má, aa yɛ mii laalɔ iyi wa bɛjɛ mii ŋa tengi bii kù jɔ ku wa ŋa. Inɛ iyi wa cio idei mii laalɔu ku ce laakai ku gbɔɔ sãa sãa. Waati bɛɛbɛ inɛ ŋa iyi à wa ilɛi Zudee a sa a bɔ iri kuta ŋau.

¹⁵ Nɔ inɛ iyi í wa antaii ile sikifa, bii í kita ilɛ ku ba ku sa ku maà bɔ ngɔgɔ ku so inɔ ileɛ.

¹⁶ Nɔ inɛ mɔ iyi í wa iko ku maà nyi kpasɛ̃ koo so kumbooɛ má.

¹⁷ Waati bɛɛbɛ wahalai bãasĩ ŋa do ayawo ŋa á caa.

¹⁸ I ce kutɔɔ ŋa ku ba ide sãmiu bɛ ku maà jɛ si sukui tũtũ.

¹⁹ Ntɔ ntɔ, ajɔ nŋu wahala nla nlai á naa iyi a kù yɛ dimiɛ hai sinte waati iyi Ilaaɔ̃ í taka andunya hee ku baa nsɛi. Nɔ a kaa ka yɛ dimiɛ má hee do ajɔ fei.

²⁰ Nɔ bii Aɔ̃ Lafɛ̃ɛ kù jilɛ si nŋu ku kaye kukpɔi ajɔu wo inɛ gɔ kaa wɛɛ má. Amma í kayeɛ na irii inɛ ŋa iyi í cicau.

²¹ Waati bɛɛbɛ bii inɛ gɔ í sɔ̃ ŋɛ í ni, i cɔ, inɛ iyi Ilaaɔ̃ í cicau í wa ihɛ̃, walakɔ inɛ mmu gɔ ku ni í wa ihɔ̃, i maà dasi lafɛ̃ɛ naanɛ ŋa.

²² Inɛ gɔ ŋa aa na a naa akã akã a maa ni aŋai à jɛ inɛ iyi Ilaaɔ̃ í cicau walakɔ a ni aŋai à jɛ walii ŋa amma iboi. Aa maa ce dobu dobu do maamaake ŋa ku ba a dĩ hee do ijui inɛ ŋa iyi Ilaaɔ̃ í cicau bii aa yɔkɔ.

²³ To, iŋɛ, i maa ce laakai ŋa. Na ŋɔi í ce ǹ wa n sɔ̃ ŋɛ fei ndɛɛ do njuma.

Kubaai Amai Amanɛ*

²⁴ Amma si ajɔ nŋu si anyii wahalau, inunu á kuku inya, cukpa mɔ kaa má inya má,

²⁵ leleaɔ̃ ŋa aa cuku wa hai lele, nɔ gbugbãi lele ŋa a yaya.

²⁶ Waati bɛɛbɛ inɛ ŋa aa yɛ amu Amai Amanɛ, ǹ wa n naa si kudũi ijĩ do gbugbã nla nla gɔ do amboe.

²⁷ Si anyii nŋu, an bɛ amaleka ŋa wa si andunya gonta mɛɛu. Aŋai aa bɔ bii fei a tɔtɔɔ inɛ ŋa iyi ǹ cicau. Aa tɔtɔɔ ŋa si andunyau fei.

Mii iyi jĩi ndii figi wa kɔ inɛ ŋa si

²⁸ Jesu í ni, i cɔ mii iyi jĩi ndii figi wa kɔ ŋɛ si ŋa. Bii ì na ì yɛ amaawɔɛ ŋa à sinti ku wu wua kpɔtɔɔ ì ya mà ŋa iyi atɛ í maai wa mbɛ.

²⁹ Bɛɛbɛ mɔi, bii ì yɛ mii ŋau bɛ fei wa ce, i mà ŋa iyi kubaai amu Amai Amanɛ kaa kpɛ má, ajɔu í maai wa mɔm.

³⁰ Ntɔ ntɔ, ǹ wa n sɔ̃ ŋɛi, kù jɛ inɛi nsɛi ŋa feii aa ku ideu ku bɛi ku ce.

³¹ Lele do ilɛ fei á na ku tã, amma idem ŋa kaa tã pai.

Ilaaɔ̃ nŋu akãi í mà ajɔu

³² Jesu í sɔ̃ ŋa má í ni, inɛ kãma kù mà waatiu hee má jɛ ajɔ iyi mii ŋau aa ce, baa amaleka ŋa iyi à wa lele, baa amu Amau, í gbe Ilaaɔ̃ Baaba nŋu akã.

³³ I ce laakai ŋa, nɔ i ya maa cɔ kpãa ŋa, si na iyi í jɔ̀ i kù mà waati iyi ajɔu á to wa ŋa.

³⁴ Á yɛi bɛi inɛ iyi wa bɔ ilu nɔ í jɔ̀a woo ce icɛɛ ŋa kpasɛ̃ɛ í na inɛ fei icɛɛ, nɔ í sɔ̃ woo degbe andɛ koofau ku maa cɔ kpasɛ̃u.

³⁵ Si na iyi í jɔ̀ i kù mà ŋa mà alɛi ilu kpasɛ̃u á na ku to wa walakɔ idũ laja, walakɔ waatii kukɔi ajɛɛ, walakɔ daadaakɔ, na nŋu, i máa cɔ kpãa ŋa,

³⁶ ku ba ku maà naa ku ba ŋɛ ì waa sĩ njoo ŋa, nɔ ku maà naa ku boe ŋɛ.

³⁷ Ide iyi ǹ wa n sɔ̃ ŋɛu ihɛ̃, nŋu mɔi ǹ wa n sɔ̃ inɛ fei. I máa cɔ kpãa ŋa.