Maaku 12 - Bibeli do fee

Mɔndai gaanɔɔma laalɔ ŋa

¹ Si anyii nŋu, Jesu í lɔsi ku sɔ̃ ŋa ide do mɔnda. Í ni, inɛ gɔ í ce ikoɛ, í lɔ si jĩi ndii rezɛ̃ɛ ŋa nɔ í ce kaa í kaakoɛò. Nɔ í ce bi ku fɔ̃ inyii isoɛ. Nɔ í cã tafa bi ku degbe ikou. Ŋɔi í so gaanɔɔma ŋa í dasi ŋa si ikou a maa logooɛ, í bɛi í bɔ ilu koo kpɛ bɛ.

² Waati iyi jĩi ŋau à so à to ku ka ŋɔi í bɛ woo ce icɛ gɔ bi gaanɔɔma ŋau koo gba iyi í jɛ ti nŋu wa.

³ Ŋɔi à muu à cãa nɔ à leleɛ í nɛ awɔ ngbɛ.

⁴ Nɔ ilu ikou í bɛ woo ce icɛ mmu má bi tu ŋa. Ŋɔi à bu nŋu mɔ nɔ à cãa si iriɛ.

⁵ Nɔ í bɛ amanɛ mɛɛtasia nɔ à cãa à kpaa. Bɛɛbɛi à cea inɛ nkpɔ má. À cã inɛ gɔ ŋa nɔ à kpa inɛ gɔ ŋa mɔ.

⁶ Nsɛi í gbe amaabíi ilu ilɛu iyi í bi jiida jiida. Nŋui í bɛ do ankãanyi í ni, aa jirima amam.

⁷ Amma waati iyi amaɛu wa to, woo ce icɛ ŋau à fɔ aŋa duusɔ̃ɔ à waa ni, i cɔ inɛ iyi á na ku jɛ tubuu. Ka kpaa nɔ tubuu ku baa ku jɛ tu wa.

⁸ Ŋɔi à muu à kpaa nɔ à soo à koo à nyɔɔ do alalai kaau.

⁹ Ŋɔi Jesu í ni, to, bɛbɛi bɛirei ilu ikou takaɛ á ce nŋa. Á koo ku kpa ŋai nɔ ku dɛ inɛ mmu ŋa ku dasi ŋa ikou.

¹⁰ To, i kù cio ideu ihɛ̃ si kukɔi idei Ilaaɔ̃ ŋa ba. Í ni, kuta iyi woo ma ŋa à kɔ̀siu nŋui í baa í jɛ kuta sintei icui ileu.

¹¹ Aɔ̃ Lafɛ̃ɛi í coo, nɔ í mu wa biti.

¹² Iyi Jesu í fɔ bɛɛbɛ í tã ŋɔi inɛ ngboi Zuifu ŋau à waa dɛ Jesu ku mu, domi à mà na irii aŋai í kpa mɔndau. Amma si bɛi à waa ce njoi zamaau, ŋɔi í jɔ̀ à jɔ̀ɔ à nɛ.

Fiai lɛmpoo ku sã

¹³ Ŋɔi inɛ ngboi Zuifu ŋau à bɛ Farisi gɔ ŋa do inɛi Herodu gɔ ŋa bi Jesu a koo a lea taai ide.

¹⁴ Iyi à to bi tɛɛ nɔ à sɔ̃ɔ à ni, Mɛɛtu, à mà iyi ì ya fɔ ntɔ. Bɛɛbɛ mɔi i kù waa ce njoi inɛ gɔ, domi i ci ya cɔ ijui amanɛ ŋa, amma ì waa kɔ inɛ ŋa si idei Ilaaɔ̃ do ntɔ. Í sĩa ka sãa ilaalu Sezaa fiai lɛmpoo? Mà ka maà sãa.

¹⁵ Amma Jesu í mà muafiti nŋa, nɔ í ni, bɛirei í ce ì waa leem taai ide ŋa. I naam kpɛkɛlɛ akã wa n cɔ ŋa.

¹⁶ Ŋɔi à naa akã wa. Nɔ Jesu í bee ŋa í ni, fotooi yooi í wa si kpɛkɛlɛu ihɛ̃ nɔ irii yooi à kɔ si. Ŋɔi à jɛaa à ni, ti Sezaai.

¹⁷ Ŋɔi Jesu í sɔ̃ ŋa í ni, to, i sãa Sezaa iyi í jɛ tɛɛ ŋa. Nɔ i sãa Ilaaɔ̃ mɔ iyi í jɛ tɛɛ ŋa. Ŋɔi inɛ ŋa à biti ntɔ ntɔ do yaase bɛi í fɔò ide.

Idei kujĩi iku ŋa

¹⁸ Ŋɔi Sadusi gɔ ŋa à naa bi Jesu. Aŋai à ya maa ni iku ŋa a kaa jĩ. Iyi à to wa bi Jesu ŋɔi à beeɛ à ni,

¹⁹ Mɛɛtu, tako wo Moizi í kɔ nwa í ni, bii inɛ gɔ í ku í jɔ̀ aboɛ, nɔ nŋu do aboɛu a kù nɛ ama, ifɔɛ ku so jaaɔ̃u ku ba ku bía igbãɛ ama.

²⁰ Wee inɛ mɛɛje gɔ ŋa à wɛɛ iyi à jɛ amai baa akã. Igbã nŋa í so abo nɔ í ku, nŋu do aboɛ a kù nɛ ama.

²¹ Ŋɔi inɛ minjisiau í so jaaɔ̃u nɔ nŋu mɔ í ku, kù ba ama. Ŋɔi inɛ mɛɛtasiau mɔ í ce bɛɛbɛ má.

²² Nɔ aŋa mɛɛje iyi à so abou fei à kú, baa inɛ akã nŋa kù ba ama. Si anyi nŋa, ŋɔi abou mɔ í na í ku.

²³ To, ajɔ iyi iku ŋa aa na a jĩ, aboi yoo nŋai á jɛ, si bɛi aŋa mɛɛjeu fei à soo aboi.

²⁴ Ŋɔi Jesu í jɛ nŋa í ni, ì waa rara ŋai si na iyi í jɔ̀ i kù mà gbugbãi Ilaaɔ̃ ŋa hee má jɛ mii iyi kukɔi ideɛ wa fɔ.

²⁵ Ntɔ ntɔ, si waati iyi iku ŋa aa na a jĩ, waati bɛɛbɛ inɛmɔkɔ do inaabo ŋa a kaa so njɛ má, amma aa yɛi bɛi amaleka ŋa.

²⁶ Iyi í jɛ ti idei kujĩi iku ŋa, Moizi í kɔ si tiaɛ tengi bii wa fɔ idei ama jĩi nɔu. Tengi bɛi Ilaaɔ̃ í sɔ̃ɔ ide gɔ. Í ni nŋu Aɔ̃ Lafɛ̃ɛi Aburahamui, do ti Izaaki, do ti Zakɔbu. I kù cio ideu bɛ ŋa?

²⁷ Bii Ilaaɔ̃ í ni nŋu í jɛ Lafɛ̃ɛi inɛ gɔ ŋa iyi à kú, iyi bɛ wa nyisi iyi inɛ ŋau à wɛɛ baa bii à ku. Ntɔ ntɔ, Ilaaɔ̃ kù jɛ Lafɛ̃ɛi iku ŋa, Lafɛ̃ɛi inɛ ŋa iyi à wɛɛi. Debɛi i kù yɛ iyi ì wa si kurara nla nla ŋa?

Wooda* iyi í re

²⁸ Ŋɔi inɛ akãi woo kɔ inɛ ŋa si wooda ŋau í gbɔ kakɔɔ iyi à waa ceu. Nɔ í yɛ iyi Jesu í jɛa Sadusi ŋau í ce ncɛɛ. Ŋɔi í bɔ bi Jesu í beeɛ í ni, si wooda ŋau fei, yoomai í re.

²⁹ Ŋɔi Jesu í jɛaa í ni, wooda iyi í reu wee. I de itĩ i gbɔ, iŋɛ inɛi Izirɛli ŋa. Ilaaɔ̃ Lafɛ̃ɛ nwa, nŋu akãi í jɛ Lafɛ̃ɛ.

³⁰ Bi Aɔ̃ Lafɛ̃ɛɛ do idɔɛ fei, do lasabuɛ fei, do gbugbãɛ fei.

³¹ Minjisiau wee. Bi inɛ mmu ŋa bɛi ì bi araɛ. Wooda gɔ kù wɛɛ iyi í re bɛɛbɛ má.

³² Ŋɔi woo kɔ inɛ ŋa si woodau í sɔ̃ Jesu í ni, í sĩa Mɛɛtu. Ide iyi ì fɔu ntɔi. Ilaaɔ̃ akãi í wɛɛ, nɔ Lafɛ̃ɛ gɔ kù wɛɛ má bii kù jɛ nŋu akãu.

³³ Amanɛ ku bi Ilaaɔ̃ do idɔɛ fei, do lasabuɛ fei, do gbugbãɛ fei, nɔ ku bi inɛ ŋa bɛi í bi araɛ, inɛ nŋu bɛi í sĩa í re kuwee iyi à ya jo si ina fei sãa sãa do kuwee ŋa iyi à gbe fei.

³⁴ Iyi Jesu í yɛ í jɛ do lasabu jiida, ŋɔi í sɔ̃ɔ í ni, í gbe keeke i jɛsi Ilaaɔ̃ ku jɛ ilaaluɛ. Si anyii nŋu, inɛ kãma kù jɛ ku bee Jesu ide gɔ má.

Davidi* do inɛ iyi Ilaaɔ̃ í cica*

³⁵ Si anyii nŋu, Jesu í wasi ku kɔa inɛ ŋa si cio inɔ bantumai kpasɛ̃i Ilaaɔ̃ nɔ í bee ŋa í ni, bɛirei í ce woo kɔ inɛ ŋa si wooda ŋau à ni inɛ iyi Ilaaɔ̃ í cicau tɔkui ilaalu Davidii.

³⁶ Davidi takaɛ í fɔ do gbugbãi Hundei Ilaaɔ̃ í ni, Aɔ̃ Lafɛ̃ɛ í sɔ̃ Lafɛ̃ɛm í ni, buba do ikpa awɔ njɛm ihɛ̃, hee n ce mbɛɛɛ ŋa bi ku lesi isɛɛ.

³⁷ Nɔ Jesu í ni má, to, bii Davidi takaɛ wa kpoo Lafɛ̃ɛ, bɛirei á ce ku jɛ tɔkuɛ má. Nɔ zamaa nkpɔ gɔ wa gbɔ idei Jesu do inɔ didɔ̃.

I mu ara nŋɛ do woo kɔ inɛ ŋa si wooda* ŋa

³⁸ Wa sɔ̃ ŋa si cioɛu wa ni, i mu ara nŋɛ do woo kɔ inɛ ŋa si wooda ŋau, aŋa iyi à ya bi a maa dabii do ibɔ jaba ŋau nɔ à bi inɛ ŋa a ya ce aŋa fɔɔ do jirima si bantuma.

³⁹ À ci ya bi kaa kitãi inɛ ngbo ŋa ile bi ku ce kutɔtɔɔ, do inya sinte bi ku ce jingau ŋa.

⁴⁰ À ya takii jaaɔ̃ ŋa a gba mii ndu ŋa ŋa fei, nɔ à ya maa ce kutɔɔ sisɔ ku ba a yɛ ŋa nŋu akã. Na ŋɔi í jɔ̀ ijuukpã nŋa á la ku caa.

Idei fia iyi abo jaaɔ̃ gɔ í dasi

⁴¹ Ŋɔi Jesu í koo í buba kɔkɔi kpakoi kɔlɛti wa cɔ bɛi inɛ ŋa à waa dasi fia. Ilu fia gɔ ŋa à dasi fia nkpɔ.

⁴² Ŋɔi jaaɔ̃ ilu are gɔ mɔ í naa, ŋɔi í dasi kpɛkɛlɛ keeke minji gɔ ŋa iyi kù re baa dala.

⁴³ Ŋɔi Jesu í kpe mɔcɔɛ ŋau í sɔ̃ ŋa í ni, ntɔ ntɔ, jaaɔ̃ ilu areu í dasi fia si kpakoi kɔlɛtiu ihɛ̃ í re inɛ fei,

⁴⁴ domi aŋa fei, iyi í lesi antaii fia nŋa ŋai à dasi, amma abou baa do iyi í jɛ ilu are, í dasii andi iyi í nɛ fei, nkãma kù gbea iyi á maa wɛɛò má.