Maaku 11 - Bibeli do fee

Jesu wa lɔ inɔ ilu Zeruzalɛmu*

¹ Jesu do mɔcɔɛ ŋa à maai Zeruzalɛmu wa. À wa tengii Bɛtifazee do Betani, nɔ à to geetei Olivie ŋau. Ŋɔi Jesu í bɛ mɔcɔ minjiɛ gɔ ŋa,

² í sɔ̃ ŋa í ni, i bɔ ilu iyi í wa waju nŋɛu bɛ ŋa. Bii ì lɔ inɔ iluu gbakã ŋa aa yɛ ama gbankɛlɛ gɔ wa so bɛ iyi inɛ gɔ kù gũu titã. I fũu nɔ i naam wa ihɛ̃ ŋa.

³ Bii inɛ gɔ í bee ŋɛ í ni, na mii í ce ì waa fũu ŋa, i ni Lafɛ̃ɛi í nɛ bukaataɛ nɔ á sindo wa ihɛ̃ nsɛi.

⁴ Iyi Jesu í fɔ bɛɛbɛ í tã ŋɔi inɛ ŋau à koo. Nɔ à ba ama gbankɛlɛu wa so si andɛi ile gɔ itĩ kpãa, ŋɔi à fũu wa.

⁵ Nɔ si inɔi inɛ ŋa iyi à wa bɛu inɛ gɔ ŋa à bee ŋa à ni, mii ì waa ce bɛ ŋa. Bɛirei í ce ì waa fũ ama gbankɛlɛu ŋa.

⁶ Ŋɔi à jɛ nŋa bɛi Jesu í fɔu. Nɔ inɛ ŋau à jɔ̀ à nɛò.

⁷ Ŋɔi à naaa Jesu ama gbankɛlɛu wa. Nɔ à tɛ́ si acɔ nŋa ŋa Jesu í bɛi í gũ antaiɛ í buba si.

⁸ Ŋɔi inɛ nkpɔ gɔ ŋa à tɛ ibɔ nŋa ŋa si kpãa, inɛ gɔ ŋa mɔ à da wua ŋa wa hai iko ŋa à waa tɔɔ si kpãau.

⁹ Inɛ ŋa iyi à waa cua Jesu do inɛ ŋa iyi à waa tooɛ fei à wasi ku dɔ̃ anu à waa ni, à waa saabuɛ. Aɔ̃ Lafɛ̃ɛ ku weeɛ, awɔ iyi ì waa naa do iriɛ.

¹⁰ Ilaaɔ̃ ku weea bomma iyi wa naa, bommai Davidi bala nwa. Ka saabu Ilaaɔ̃ hee lele.

¹¹ Ŋɔi Jesu í to Zeruzalɛmu, í koo í lɔ bantumai kpasɛ̃i Ilaaɔ̃. Ŋɔi í cɔ mii fei í kaakoɛ. Iyi í yɛ idũ wa dũ ŋɔi í bɔ Betani do mɔcɔ maateeji ŋau.

Jesu í ceekpe jĩi ndii figi

¹² Iju kumáɛ Jesu do mɔcɔɛ ŋa à waa nɛ hai Betani ku ba a bɔ Zeruzalɛmu má. Ŋɔi ari wa kpa Jesu.

¹³ Nɔ í hɔ̃nnɛ jĩi ndii figi gɔ do wuaɛ ŋa. Ŋɔi wa bɔ ku cɔ mà á ba siɛ iso. Amma iyi í to kɔkɔɛ í ba wee wua ŋai fei domi kù jɛ waatii kusoi figi.

¹⁴ Ŋɔi í sɔ̃ jĩi nɔu í ni, inɛ gɔ kaa jɛ isoɛ má ajɔ kãma. Nɔ mɔcɔɛ ŋau à gbɔ ideu.

Jesu í wa bantumai kpasɛ̃i Ilaaɔ̃*

¹⁵ Waati iyi à to Zeruzalɛmu Jesu í bɔ bantumai kpasɛ̃i Ilaaɔ̃. Nɔ í lɔsi ku lele woo ta iwò ŋa do woo ra iwo ŋa iyi à wa bɛ. Í fuka fuka taabui woo kpaasi fia ŋa do kitãi woo ta ankasiidi ŋa.

¹⁶ Kù jɛ inɛ kãma ku so aso gɔ si inɔ bantumai kpasɛ̃i Ilaaɔ̃ bɛ.

¹⁷ Ŋɔi í sinti ku kɔ inɛ ŋau si cio í ni, à kɔɔ à ni, Ilaaɔ̃ í ni ilei nŋu ile bi kutɔɔi dimi feii á jɛ. Amma iŋɛ wee ì coo bi ku tɔtɔɔi ile ŋa.

¹⁸ Iyi inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau à gbɔ ideu, ŋɔi à waa dɛ kpãa iyi aa kpaò Jesu, domi à waa ce njoɛ si na iyi í jɔ̀ zamaau fei í biti do cioɛ.

¹⁹ Iyi alɛ í lɛ ŋɔi Jesu do mɔcɔɛ ŋa à fita hai inɔ iluu.

Idei Jesu do jĩi ngbɛ

²⁰ Ŋɔi à waa lɔ daakɔ, nɔ à yɛ jĩi ndii figiu í gbɛ hee do icãɛ ŋa fei.

²¹ Wee Piɛɛ wa ye gigii mii ŋa iyi í tako í ceu, ŋɔi í sɔ̃ Jesu í ni, Mɛɛtu, cɔ jĩi iyi ì ceekpeu í gbɛ.

²² Ŋɔi Jesu í sɔ̃ mɔcɔɛ ŋa í ni, i dasi Ilaaɔ̃ naanɛ ŋa.

²³ Ntɔ ntɔ, bii inɛ gɔ í sɔ̃ iri kutau ihɛ̃ í ni, dede hai bɛ i koo i dasi tenku nɔ kù waa sika sika si idɔɛ, bii í dasi naanɛ, bɛɛbɛ mɔi á ce.

²⁴ Na iyi ihɛ̃i ǹ wa n sɔ̃ ŋɛ, mii iyi ì waa tɔɔ si kutɔɔ nŋɛ fei, i dasi naanɛ iyi ì baa tã ŋa nɔ bɛɛbɛ mɔi á ce nŋɛ.

²⁵ Waati iyi ì dede ì leekĩ ì waa bi i ce kutɔɔ ŋa, bii ì nɛ ide gɔ do inɛ gɔ ŋa i kpa idei kurara iyi í wa si gãmɛi iŋɛò ŋa titã ku ba Baa nŋɛ mɔ iyi í wa lele ku kpa idei dulum du ŋɛ. [

²⁶ Amma bii iŋɛ taka nŋɛ i kù waa kpa idei kurara iyi inɛ ŋa à ce nŋɛ, Baa nŋɛ mɔ iyi í wa lele kaa kpa idei kurara nŋɛ.]

Hai iwoi yiikoi Jesu wa naa

²⁷ Ŋɔi à nyi à bɔ Zeruzalɛmu má. Iyi Jesu wa dabii si bantumai kpasɛ̃i Ilaaɔ̃ ŋɔi inɛ ngboi woo weei Ilaaɔ̃ ŋau do woo kɔ inɛ ŋa si wooda ŋau do inɛ ngboi Zuifu ŋau à naa bi tɛɛ,

²⁸ à beeɛ à ni, mii ŋa iyi ì waa ceu ihɛ̃, yooi í naɛ kpãa iyi ì waa cooò. Do yiikoi yooi ì waa cooò.

²⁹ Ŋɔi Jesu í jɛ nŋa í ni, amu mɔ an bee ŋɛ ide gɔ. Bii ì yɔkɔ ì jɛɛm ŋa, an sɔ̃ ŋɛ inɛ iyi í nam yiiko ǹ wa n ceò mii ŋau ihɛ̃.

³⁰ Hai iwoi Zãa í ba yiiko iyi í dasiò inɛ ŋa inyi. Hai bi Ilaaɔ̃ de, mà hai bi amanɛ ŋa. I jɛɛm ŋa.

³¹ Nɔ à busi njɛ à waa ni, bɛirei aa ka jɛaa. Nsɛi nɔɔ, bii à jɛaa à ni hai bi Ilaaɔ̃i, á bee wa bɛirei í ce a kù dasi Zãa naanɛ.

³² Bii à nɔ à ni hai bi amanɛ ŋai, to. Wee à fɔ bɛɛbɛi si na iyi í jɔ̀ à waa ce njoi zamaau, domi zamaau fei í jɛsi iyi Zãa waliii kãm kãm.

³³ Ŋɔi í jɔ̀ à jɛa Jesu à ni, a kù mà. Nɔ Jesu mɔ í sɔ̃ ŋa í ni, to, debɛi amu mɔ, n kaa n sɔ̃ ŋɛ inɛ iyi í nam yiiko ǹ wa n ceò mii ŋau ihɛ̃.