Maaku 10 - Bibeli do fee

Jesu wa fɔ idei njɛ ku kɔ̀i abo do mɔkɔ

¹ Ŋɔi Jesu í nɛ hai bɛ í bɔ ilɛi Zudee. Si anyiɛ nɔ í kua í bɔ ikpa icei idoi Zuudɛ̃ɛ. Ŋɔi zamaa gɔ í tɔtɔɔ kɔkɔɛ má, ŋɔi í lɔsi ku kɔ nŋa si cioi idei Ilaaɔ̃ si bɛi í nɛ dɔ̃ɔnɛi ku ce.

² Ŋɔi Farisi gɔ ŋa à naa bi tɛɛ ku ba a cɔ laakaiɛ, nɔ à beeɛ bii í jɛ amanɛ í nɛ kpãa ku kɔ̀si aboɛ.

³ Ŋɔi Jesu í jɛ nŋa í ni, si ideu bɛ, wooda yoomai Moizi í kɔ nŋɛ wo.

⁴ Ŋɔi à ni, Moizi í ni, bii ì waa kɔ̀si aboɛ aa ceaa tiai njɛ ku kɔ̀i i bɛi i kɔsiɛ.

⁵ Ŋɔi Jesu í sɔ̃ ŋa í ni, na idɔ ku le nŋɛi í jɔ̀ Moizi í kɔ nŋɛ bɛɛbɛ.

⁶ Amma hai sinte, waati iyi Ilaaɔ̃ í taka andunya, í ce inɛmɔkɔi do inaabo.

⁷ Na nŋu, mɔkɔ á jɔ̀ iyeò baaɛ nɔ nŋu do aboɛ a maa wɛɛ

⁸ nɔ aŋa minji fei a baa a jɛ ara akã. Si bɛɛbɛ a kù jɛ aŋa minji má, ara akã dei à jɛ.

⁹ Na nŋu, amanɛ ku nɛ ku fɛɛfɛ mii iyi Ilaaɔ̃ í tɔtɔɔ.

¹⁰ Iyi í fɔ bɛɛbɛ í tã ŋɔi à bɔ kpasɛ̃ nɔ mɔcɔɛ ŋau à waa beeɛ ide si ide akãu má.

¹¹ Ŋɔi Jesu í sɔ̃ ŋa í ni, inɛ iyi í kɔ̀si aboɛ nɔ í so mmuɛ dulum nii í ce bi abo sinteu si na iyi í jɔ̀ í ce sakara.

¹² Bɛɛbɛ mɔi bii inaabo í kɔ̀ mɔkɔɛ nɔ í so mɔkɔ titɔ̃ í ce sakarai.

Jesu í weea ama keeke ŋa

¹³ Ŋɔi inɛ ŋa à gbã ama keeke ŋa à naaa Jesu wa ku lu ŋa. Amma mɔcɔɛ ŋau à waa lasi inɛ ŋa iyi à naaò ŋa wa.

¹⁴ Iyi Jesu í yɛ mii iyi à waa ceu, ŋɔi idɔɛ í kɔ̃, í sɔ̃ ŋa í ni, i jɔ̀ amu ŋau a naa bi tom, i maà ganji ŋa, domi bommai Ilaaɔ̃ í jɛ ti inɛ ŋa iyi à jɔ ŋa.

¹⁵ Ntɔ ntɔ, inɛ iyi kù waa sũa Ilaaɔ̃ iri ilɛ bɛi ama keeke, kaa lɔ si bommai Ilaaɔ̃ pai.

¹⁶ Ŋɔi í so amu ŋau si ikpaɛ í lesi aŋa fei awɔ, nɔ í wee nŋa.

Idei ilu fia gɔ

¹⁷ Ŋɔi Jesu í dasi kpãa. Iyi wa nɛ, ŋɔi inɛ gɔ í sɛi wa í naa í gulɛ si wajuɛ í ni, Mɛɛtu, awɔ inɛ ncɛɛ, mii an ce n baò kuwɛɛ hai tã.

¹⁸ Ŋɔi Jesu í beeɛ í ni, na mii í ce ì waa kpem inɛ ncɛɛ. Inɛ gɔ kù wɛɛ iyi í jɛ ncɛɛ bii kù jɛ Ilaaɔ̃ nŋu akã.

¹⁹ Ì mà sãa sãa mii iyi wooda í ni. Mii iyi wooda í ni wee. Maà kpa inɛ, maà ce sakara, maà ce ile, maà jɛ sɛɛda ibo si gãmɛi inɛ gɔ, maà takii inɛ gɔ, jirima iyeò baaɛ.

²⁰ Nɔ inɛɛu í ni, Mɛɛtu, ǹ wa n jirima iyi bɛ fei tã hai keekem.

²¹ Ŋɔi Jesu í cɔ inɛɛu do kubi nɔ í ni, í gbeɛ mii akã. Koo i ta mii iyi ì nɛ fei nɔ i kpɛ̃a ilu are ŋa fiau. Bii ì ce bɛɛbɛ aa ba amani jiida lelei Aɔ̃. Si anyiɛ nɔ i naa i toom.

²² Ide iyi Jesu í fɔu kù dɔ̃a inɛɛu si. Nɔ si bɛi í jɛ ilu amani nla nla, í sinda wa nɛ do inɔ ku fɔ.

²³ Ŋɔi Jesu í cɔ inɛ ŋa iyi à kaakoɛu nɔ í sɔ̃ mɔcɔɛ ŋa í ni, á gaabua ilu fia ku lɔ tengi bii Ilaaɔ̃ í jɛ bommaɛ.

²⁴ Ŋɔi mɔcɔ ŋau à biti do ide iyi Jesu í fɔu. Nɔ Jesu í ni má, kpaasim ŋa, á gaabu hee ku caa inɛ ku jɛsi Ilaaɔ̃ ku jɛ ilaaluɛ.

²⁵ Á faalaa kpookpo ku lɔ si iwoi abɛɛ do iyi ilu amani á lɔò tengi bii Ilaaɔ̃ í jɛ bommaɛ.

²⁶ Ŋɔi mɔcɔɛ ŋau à biti hee í caa nɔ à bee njɛ à waa ni, bii bɛɛbɛi nɔ yooi á ba faaba.

²⁷ Ŋɔi Jesu í cɔ ŋa tii, nɔ í ni, bi amanɛ ŋai kaa ce, amma bi Ilaaɔ̃ á ce, domi Ilaaɔ̃ á yɔkɔ ku ce fei ndɛɛ.

²⁸ Ŋɔi Piɛɛ í sɔ̃ɔ í ni, wee à jɔ̀ mii fei tã à waa tooɛ.

²⁹ Ŋɔi Jesu í ni, ntɔ ntɔ, inɛ iyi í jɔ̀ kpasɛ̃ɛ wa, walakɔ igbãɛ ŋa walakɔ ifɔɛ ŋa walakɔ wecĩɛ ŋa, walakɔ iyeò baaɛ, walakɔ amaɛ ŋa, walakɔ ikoɛ ŋa na irim do na laabaau jiidau,

³⁰ baa hai si andunyau ihɛ̃ á ba mii ŋau bɛ fei ikɔ cĩɔ. Á ba kpasɛ̃ ŋa, do igbã do ifɔ ŋa do wecĩ ŋa, do iye ŋa, do amu ŋa, do iko ŋa, nɔ si antaiɛ á ba ijuukpã mɔ má. Nɔ ala á ba kuwɛɛ iyi ci ya tã.

³¹ Amma inɛ ŋa iyi à jɛ inɛi waju ŋa si nsɛi, nkpɔ nŋa á na ku jɛ inɛi anyi ŋa nɔ inɛi anyi ŋa mɔ aa na a jɛ inɛi waju ŋa.

Jesu wa fɔ idei ikuɛ do kujĩɛ isɛ gbɛɛtasia

³² Nɔ Jesu do mɔcɔɛ ŋa à dasi kpãa má, nŋu takaɛ wa cua nŋa. À waa bɔ Zeruzalɛmu. Ŋɔi njo í mu mɔcɔɛ ŋau nɔ inɛ mmu ŋa iyi à waa too anyi nŋau, zigi nŋa í da. Ŋɔi Jesu í nya mɔcɔ maateeji ŋau ikã í lɔsi ku sɔ̃ ŋa mii iyi á na ku ba nŋu.

³³ Í ni, wee à waa bɔ Zeruzalɛmu. Bɛi aa mu amu Amai Amanɛ a dasim awɔi inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa. Aa yɛ taalem a ni a kpam. Si anyiɛ nɔ a dasim si awɔi dimi mmu ŋa,

³⁴ aa yaakom nɔ a tusim antɔ, aa tɛɛm kpɔtɔɔ, nɔ a kpam. Nɔ si ajɔ mɛɛtasia an jĩ má hai si balɛ.

Kutɔɔi Zaaki do Zãa

³⁵ Ŋɔi Zaaki do Zãa, amai Zebedee ŋa, à bɔ bi Jesu à sɔ̃ɔ à ni, Mɛɛtu, à waa bi i ce nwa mii iyi à waa tɔɔɛ.

³⁶ Nɔ í bee ŋa í ni, mii ì bi n ce nŋɛ ŋa.

³⁷ Ŋɔi à jɛaa à ni, waati iyi aa na i jɛ bomma do amboe, jɔ̀ ka buba inɛ akã awɔ njɛɛ, inɛ akã mɔ awɔ cangaɛ.

³⁸ Nɔ Jesu í ni, i kù mà mii iyi ì waa tɔɔm ŋa mɔm. Aa yɔkɔ i temuaò ijuukpã iyi an yɛ ŋa? Zaka bɛi inɛ ŋa aa kpãm iju á caa. Aa jɛsi aa ce nŋɛ dimiɛ ŋa?

³⁹ Nɔ à ni aŋa aa jɛsi. Nɔ í sɔ̃ ŋa má í ni, ntɔi, aa yɛ ijuukpã iyi an yɛ ŋa. Zaka bɛi inɛ ŋa aa kpãm iju, bɛɛbɛi aa cea iŋɛ mɔ.

⁴⁰ Amma kù jɛ amui an cica inɛ ŋa iyi aa buba canga do njɛm. Bi ku bubau bɛ, inɛ ŋa iyi à cea sɔɔluɛ ŋai aa buba si.

⁴¹ Ŋɔi mɔcɔ mɛɛwa ŋau à gbɔ ideu nɔ idɔ nŋa í kɔ̃ si Zaaki do Zãa.

⁴² Ŋɔi Jesu í kpe ŋa í ni, iŋɛ mɔ ì mà ŋa si andunyau ihɛ̃ ilaalu ŋa à ya maa taa inɛ nŋa ŋa gbugbãi. Nɔ inɛ ngbo nŋa ŋa mɔ a maa nyisi yiiko nŋa.

⁴³ Amma bi tu ŋɛ kaa ce bɛɛbɛ. Inɛ nŋɛ iyi wa bi nŋu ku jɛ inɛ ngbo, nŋui á jɛ woo ce nŋɛ icɛ.

⁴⁴ Bɛɛbɛ mɔi inɛ iyi wa bi nŋu ku jɛ woo cua nŋɛ, nŋui á jɛ arui inɛ fei.

⁴⁵ Nɔ baa amu Amai Amanɛ n kù naa inɛ ŋa a ceem icɛ, amma amui an ce nŋa icɛ, nɔ n na kuwɛɛm n yaò inɛ nkpɔ hai si dulum.

Jesu í jɔ̀ fɛɛju gɔ iyi à ya kpe Baatimee í yɛ ilu

⁴⁶ Si isɛɛnɛu Jesu do mɔcɔɛ ŋa à to Zeriko nɔ à waa fita hai bɛ. Waati iyi à waa fitau zamaa nla gɔ wa too ŋa. Wee fɛɛju woo bara gɔ iyi à ya kpe Baatimee, amai Timee, wa buba itĩ kpãa.

⁴⁷ Iyi í gbɔ à ni Jesu inɛi Nazarɛtiui wa lɔ, ŋɔi í wasi ku dɔ̃ anu wa ni, Jesu, tɔkui Davidi, ce araarem.

⁴⁸ Nɔ inɛ nkpɔ wa la siɛ à waa ni ku coko. Amma bɛi à waa ni ku cokou, bɛɛbɛ mɔi í ya dɔ̃ anu hee lele ku maa ni, tɔkui Davidi, ce araarem.

⁴⁹ Ŋɔi Jesu í leekĩ í ni a kpoo wa. Nɔ à kpe fɛɛjuu à sɔ̃ɔ à ni, maà jɔ̀ inɔɛ ku fɔ, dede wa. Jesu wa kpeɛ.

⁵⁰ Ŋɔi fɛɛjuu í nyɔ kumbooɛ í dede gbakã í koo bi Jesu.

⁵¹ Nɔ Jesu í beeɛ í ni, mii ì bi n ceɛ. Ŋɔi fɛɛjuu í jɛaa í ni, Mɛɛtu, ǹ bi n yɛ ilui.

⁵² Nɔ Jesu í sɔ̃ɔ í ni, koo. Naanɛɛ í faabaɛ. Ŋɔi gbakã í yɛ ilu, nɔ í too Jesu si isɛɛnɛɛu.