Maaku 1 - Bibeli do fee

Waazoi Zãa woo dasi inyi

¹ Kusintii laabaau jiidai Jesu Kirisi Amai Ilaaɔ̃ wee.

² Í sinti si bɛi walii Ezai í tako í kɔ si tiaɛ í ni, Ilaaɔ̃ í ni, cɔ, an bɛ woo sisi idem wa si wajuɛ, iyi á teeseɛ kpãaɛ.

³ Nŋui á dɔ̃ anu si gbaau ku ni, i teese kpãai Lafɛ̃ɛ ku tɛ ŋa.

⁴ Bɛɛbɛi Zãa í naa si gbaa wa dasi inɛ ŋa iyi à koo bi tɛɛ inyi. Wa waazoa inɛ ŋa wa ni, i kpaasi idɔ ku ba Ilaaɔ̃ ku kpa idei kurara nŋɛ nɔ a dasi ŋɛ inyi.

⁵ Nɔ inɛ ŋa à naa bi tɛɛ hai Zeruzalɛmu do hai ilɛi Zudee fei. À ce tuubai dulum du ŋa nɔ à jɔ̀ Zãa í dasi ŋa inyi idoi Zuudɛ̃ɛ.

⁶ Zãa wa dasi ibɔi ntoi kpookpo, nɔ wa dĩ santiikii bata. Kɛtɛngbo do nyikɔ̃i í jɛ ijɛɛ.

⁷ Wa waazoa zamaa wa ni, inɛ gɔ á naa si anyim iyi í nɛ gbugbã í rem. N kù to baa n bate n fũ ikũi baataɛ si kutɛɛ.

⁸ Amu ǹ dasi ŋɛ inyi, amma njɛ Hundei Ilaaɔ̃i á da nŋɛ si.

À dasi Jesu inyi nɔ Seetam* í lɛlɛɛ

⁹ Waati bɛɛbɛ Jesu í dede wa hai Nazarɛti si ilɛi Galilee í naa bi Zãa. Iyi í to wa nɔ Zãa í dasiɛ inyi si idoi Zuudɛ̃ɛ.

¹⁰ Waati iyi Jesu wa fita wa hai si inyiu gbakã ŋɔi í ba lelei Aɔ̃ í cĩ. Nɔ Hundei Ilaaɔ̃ í de siɛ wa bɛi ankasiidi.

¹¹ Nɔ à gbɔ ide ku fɔ wa hai lele í ni, awɔ amam nii, ǹ biɛ jiida jiida. Siɛi inɔ didɔ̃m fei í ya wa.

¹² Ŋɔi gbakã, Hundeu í tale siɛ si gbaa.

¹³ Bɛi í ce ajɔ ciiji nɔ Seetam wa lɛlɛɛ ku ce laalɔ. Í wa bɛ do mɛɛmui sako ŋa nɔ amaleka ŋa à sobiɛ.

Jesu í kpe sɔɔkɔ mɛɛ gɔ ŋa a tooɛ

¹⁴ Si anyiɛ ŋɔi à dasi Zãa piisɔ̃ɔ. Nɔ waati bɛɛbɛ Jesu í bɔ ilɛi Galilee wa waazo laabaau jiida iyi wa naa hai bi Ilaaɔ̃.

¹⁵ Í ni, awaati í to iyi Ilaaɔ̃ á na ku jɛ bommaɛ. I kpaasi idɔ nŋɛ nɔ i dasi laabaau jiidau naanɛ ŋa.

¹⁶ Ajɔ nŋu gɔ Jesu wa too itĩi tenkui Galileeu. Ŋɔi í yɛ Simɔɔ do ifɔɛ Anderee, sɔɔkɔ ŋa, à waa le taao si inɔ tenkuu.

¹⁷ Ŋɔi Jesu í sɔ̃ ŋa í ni, i toom wa ŋa nɔ n ce ŋɛ woo dɛdɛ inɛ ŋa iyi aa jɛ ti Ilaaɔ̃.

¹⁸ Bɛ gbakã à jɔ̀ taao nŋa ŋa à waa tooɛ.

¹⁹ Ŋɔi Jesu í nɛ í jĩ keeke nɔ í yɛ Zaaki do ifɔɛ Zãa, amai Zebedee ŋa. Aŋa mɔ à wa si inɔ akɔi inyi nŋa, à waa teese taao nŋa ŋa.

²⁰ Ŋɔi gbakã í kpe ŋa. Nɔ à jɔ̀ Zebedee baa nŋa si inɔi akɔi inyiu bɛ do woo ce icɛɛ ŋa, nɔ à waa tooɛ.

Jesu í lele inɛi inɔɔko hai si inɛ gɔ

²¹ Ŋɔi Jesu do mɔcɔɛ ŋa à bɔ Kapɛranumu. Nɔ ajɔi kusĩmi Jesu í bɔ ile bii Zuifu ŋa à ya ce kutɔtɔɔu. Nɔ wa kɔ inɛ ŋa si cioi idei Ilaaɔ̃.

²² Wa kɔ nŋa si cio do yiiko. Kù waa kɔ nŋa si bɛi woo kɔ inɛ ŋa si wooda ŋa à ya kɔsi. Nŋui í jɔ̀ à biti.

²³ Wee mɔkɔ gɔ í wa ile bɛ, í nɛ inɛi inɔɔko. Nɔ í dɔ̃ anu hee lele í ni,

²⁴ mii í wa si gãmɛi awaɛ ŋa, awɔ Jesu inɛi Nazarɛti. Ì naa ku kpa wai? Ǹ mà inɛ iyi ì jɛ. Awɔi ì jɛ Inɛ Kumá iyi Ilaaɔ̃ í bɛ wa.

²⁵ Ŋɔi Jesu í la siɛ í ni, coko, fita hai si mɔkɔu.

²⁶ Ŋɔi inɛi inɔɔkou í dɔ̃ anu nla nla, í yayaɛ do gbugbã nɔ í fita siɛ.

²⁷ Nɔ aŋa fei à biti ntɔ ntɔ hee à waa bee njɛ ide à waa ni, dimii mii iyi ihɛ̃. Inɛɛu wa kɔ wa si cio titɔ̃ do yiiko. Wa jilɛa hee do inɛi inɔɔko ŋa fei ide nɔ à waa jirimaɛ.

²⁸ Ŋɔi gbakã í nya iri si ilɛi Galilee fei.

Jesu í jɔ̀ bɔ̃ɔ nkpɔ í ba iri

²⁹ Ŋɔi Jesu í fita hai ile bii Zuifu ŋa à ya ce kutɔtɔɔu, nŋu do Zaaki do Zãa nɔ à bɔ kpasɛ̃i Simɔɔ do Anderee.

³⁰ Wee iyei aboi Simɔɔ wa sũ domi wa ce ara gbãa. Iyi à to wa gbakã ŋɔi à koo à sɔ̃ Jesu à ni abou kù waa nɛ baani.

³¹ Ŋɔi í sɛkɛɛ siɛ wa í mu awɔɛ í dedeɛ. Bɛ gbakã ara gbãau í nya nɔ abou í yaaɛ ŋa.

³² Alɛ ajɔ nŋu iyi inunu í lɔ ŋɔi inɛ ŋa à naaa Jesu bɔ̃ɔ ŋa wa do inɛ ŋa iyi à nɛ inɛi inɔɔko ŋa fei.

³³ Nɔ inɛi ilu ŋau fei à naa à tɔtɔɔ si andɛ koofau.

³⁴ Í jɔ̀ inɛ nkpɔ í ba iri si bɔ̃ɔ ikã ikã ŋa, nɔ í lele inɛi inɔɔko nkpɔ nkpɔ. Amma ci ya jɛ inɛi inɔɔko ŋau a fɔ ide domi à màa.

Jesu í dabii si ilɛi Galilee

³⁵ Daadaakɔu, hee inya ku maa má, Jesu í dede í fita hai kpasɛ̃u í bɔ si gbaa, í koo í ce kutɔɔ bɛ.

³⁶ Ŋɔi Simɔɔ do kpaasiɛ ŋa à wasi ku dɛdɛɛ.

³⁷ Iyi à na à yɔɔ, ŋɔi à sɔ̃ɔ à ni, inɛ fei wa dɛdɛɛ.

³⁸ Ŋɔi í jɛ nŋa í ni, ka bɔ waju si ilu mmu ŋa ku ba n waazo idei Ilaaɔ̃ bɛ, domi na ŋɔi í jɔ̀ ǹ naa.

³⁹ Nɔ à koo à dabii si ilɛi Galilee fei. Í ya maa waazo ile bii Zuifu ŋa à ya ce kutɔtɔɔ ŋau, nɔ í ya maa lele inɛi inɔɔko ŋa.

Jesu í jɔ̀ dintɛ gɔ í ba iri

⁴⁰ Ŋɔi dintɛ gɔ í naa bi Jesu í naa í gulɛ si wajuɛ, wa tɔɔɛ wa ni, bii ì bi, aa yɔkɔ i jɔ̀ n ba iri nɔ n jɛ inɛ iyi í maaju.

⁴¹ Ŋɔi Jesu í ce araareɛ. Í yɔ awɔɛ í luu nɔ í ni, ǹ bi. Ba iri nɔ i jɛ inɛ kumaaju.

⁴² Bɛ gbakã bɔ̃ɔi dintɛu í nya siɛ nɔ í jɛ inɛ iyi í maaju.

^43-44 Ŋɔi Jesu í sɔ̃ɔ ide do gbugbã í ni, gbɔ. Maà sɔ̃ inɛ gɔ ideu ihɛ̃, amma koo nyisi araɛ bi woo weei Ilaaɔ̃u. Nɔ i ce kuwee iyi Moizi í jilɛu. Kuweeu bɛi á nyisi inɛ ŋa iyi ì jɛ inɛ iyi í maaju bɛbɛi. Iyi í sɔ̃ɔ bɛɛbɛ í tã nɔ í ni ku nɛ.

⁴⁵ Do nŋu fei inɛɛu, iyi í nɛ, í koo í wasi ku sisi ideu bantuma hee lele, ŋɔi í jɔ̀ Jesu kù yɔkɔ ku lɔ si inɔ ilu do gaaze má. Í ya maa mu araɛi angule si gbaa ŋa. Nɔ inɛ ŋa à ya maa koo bi tɛɛ bɛ hai bii fei.