Luku 8 - Bibeli do fee

Inaabo ŋa iyi à waa too Jesu

¹ Si anyii nŋu, Jesu í dabii dabii si wangaa ŋa do si ilɛɛko ŋa, wa waazo wa sisi laabaau jiidai bommai Ilaaɔ̃. Nɔ mɔcɔ maateeji ŋau à suu

² do inaabo nkpɔ gɔ ŋa. Si inɔi inaabo ŋau, gɔgɔ ŋa à waa ce bɔ̃ɔ wo, gɔgɔ ŋa mɔ à nɛ inɛi inɔɔko ŋa wo, nɔ Jesu í jɔ̀ aŋa fei à ba iri. Inaabo ŋau wee. Maari iyi à ya kpe inɛi Madala, nŋui Jesu í lelea inɛi inɔɔko mɛɛje ŋau,

³ do Zoana aboi Cuza, woo mu amanii ilaalu Herodu, do Suzani do inaabo nkpɔ gɔ ŋa má. Inaabo ŋau à waa sobi ŋa do amani nŋa.

Mɔndai woo gbɛ̃

⁴ Hai ilu fei inɛ ŋa à wasi ku naa bi Jesu. Si bɛi zamaa í tɔtɔɔ ŋɔi í kpa nŋa mɔnda.

⁵ Si mɔndau í ni, mɔkɔ gɔ í fita wa fã dimi. Si bɛi wa fã dimiu, ŋɔi gɔgɔ ŋa à cuku si kpãa, nɔ inɛ ŋa à nɛ̀ si nɔ yɛi ŋa à jɔɔ.

⁶ Nɔ gɔgɔ ŋa mɔ à cuku si ilɛ iyi í nɛ kuta. Iyi í fita gbakã, í gbɛi, domi mandi kù wa si.

⁷ Gɔgɔ ŋa mɔ à cuku si inɔ agũ ŋa. Ŋɔi agũ ŋau do dimi jiidau à fita ajɔ, ŋɔi agũ ŋau à dede à la à bii dimi jiidau.

⁸ Gɔgɔ ŋa mɔ à cuku si ilɛ jiida, nɔ à fita à la à so iso cĩɔ cĩɔ. Iyi Jesu í fɔ bɛɛbɛ í tã, nɔ í la hee lele í ni, inɛ iyi í nɛ itĩ iyi á gbɔò ide, ku gbɔ.

Mii iyi í jɔ̀ Jesu í ya maa kpa mɔnda

⁹ Nɔ mɔcɔɛ ŋa à beeɛ yaasei mɔndau.

¹⁰ Ŋɔi í jɛ nŋa í ni, iŋɛi Ilaaɔ̃ í jɔ̀ ì mà asiii bommaɛ, amma inɛ ŋa iyi à gbe à waa sɔ̃ ŋai do mɔnda ŋa ku ba baa bii à waa cɔ a maà yɔɔ, nɔ bii à waa gbɔ a kaa mà yaaseɛ.

Yaasei mɔndai woo gbɛ̃

¹¹ Nɔ Jesu í ni, yaasei mɔndau wee. Dimiu, idei Ilaaɔ̃i.

¹² Inɛ gɔ ŋa à yɛi bɛi kpãa tengi bii dimiu í cuku. Aŋai à gbɔ ideu, amma Seetam í naa í nyaa hai si idɔ nŋa ku ba a maà dasi naanɛ a ba faaba.

¹³ Inɛ gɔ ŋa mɔ à yɛi bɛi ilɛ kuta. Aŋai à gbɔ ideu nɔ à gbaa do inɔ didɔ̃. Amma a kù jɔ̀ kù ce icã si idɔ nŋa. Naanɛ ku dasi nŋa í kpɛ keeke amma iyi wahala í naa, à nyiò anyi.

¹⁴ Inɛ gɔ ŋa mɔ à yɛi bɛi inya iyi í nɛ agũ ŋau. Aŋai à gbɔ ideu, amma si bɛi à waa nɛ, zigiida do amani do didɔ̃i andunya ŋai à bii ideu à kpaa, nɔ iso nŋa ŋa kù jĩa.

¹⁵ Inɛ gɔ ŋa mɔ à yɛi bɛi ilɛ jiidau. Aŋai à gbɔ ideu nɔ à jilɔɔ si idɔ jiida hai nɛ muafiti, nɔ à waa temua hee wa so iso.

Mɔndai fitila

¹⁶ Ŋɔi Jesu í sɔ̃ ŋa má í ni, inɛ gɔ ci ya ma fitila ku biiɛ do caka, walakɔ ku dasi abɛ daayi. Amma à ya kɔaɛi lele ku ba inɛ ŋa iyi à waa lɔ wa fei a yɛ inya kumá.

¹⁷ Si bɛɛbɛ mii iyi wa manji fei á boli, nɔ mii iyi à ce si asii fei á na ku fita gbugbãa.

¹⁸ Na nŋu, i ce laakai ŋa do yaase bɛi ì waa gbɔò ide ŋa, domi inɛ iyi í nɛ, nŋui à ya kɔ̃ɔa si. Inɛ mɔ iyi kù nɛ, andi iyi wa tamaa siu má à ya gbaai.

Iyei Jesu do ifɔɛ ŋa

¹⁹ Iyei Jesu do ifɔɛ ŋa à naa bi tɛɛ, amma a kù ba a kù to siɛ na zamaau.

²⁰ Nɔ inɛ ŋa à sɔ̃ɔ à ni, iyeɛ do ifɔɛ ŋa à waa leekĩ waduude à waa bi ku yɛɛ.

²¹ Amma í jɛ nŋa í ni, inɛ ŋa iyi à waa gbɔ idei Ilaaɔ̃ nɔ à waa jirimaɛ, aŋai à jɛ iyem walakɔ ifɔm ŋa.

Jesu í leekĩ fufu si tenku

²² Ajɔ nŋu gɔ Jesu í lɔ akɔi inyi nŋu do mɔcɔɛ ŋa, nɔ í sɔ̃ ŋa í ni, ka kua tenkuu ka bɔ ice ikpa ihɔ̃. Nɔ à nɛ.

²³ Si bɛi à waa nɛu, Jesu í sĩ njoo. Ŋɔi fufu nla gɔ í dede si tenkuu, nɔ inyi wa kɔ̃ akɔu. À wa si mbiisi.

²⁴ Ŋɔi à sɛkɛɛ si Jesu à jũu à ni, Mɛɛtu, Mɛɛtu, à waa bɔ nfe ku ce. Ŋɔi Jesu í jĩ nɔ í la si fufuu do kutãngãm dii inyiu. Nɔ à dɛ̀ à coko sɔ̃m sɔ̃m.

²⁵ Nɔ í bee mɔcɔɛ ŋau í ni, hee iwoi naanɛ iyi ì dasim ŋa í wa. Nɔ njo í mu ŋa à biti, à bee njɛ à waa ni, dimii amanɛ yoomai ihɛ̃, iyi wa ba fufu do inyi ide ku fɔ nɔ à waa gbɔ ideɛ.

Jesu í jɔ̀ inɛi inɔɔko ŋa à fita hai si inɛ gɔ

²⁶ Nɔ Jesu do mɔcɔɛ ŋau à to ice ikpa ihɔ̃, si ilɛi inɛi Zerazee ŋa iyi í wa do wajui ilɛi Galilee.

^27-29 Ŋɔi à fita hai inɔi akɔi inyiu. Iyi à kita ilɛ ŋɔi Jesu í yɛ mɔkɔ gɔ wa naa ku kòo. Mɔkɔu inɛi ilu bɛi. Wee í bɛi í nɛ inɛi inɔɔko ŋa. Waati kãma fei à ya maa dede siɛi. Ŋɔi inɛ ŋa à ya dũu do sesee nɔ à dĩ isɛɛ ŋa do isɔ ku ba a nɔɔ. Amma í ya da kudĩ ŋaui fei nɔ inɛi inɔɔkoɛ ŋau à bɔòɛ hee si gbabua ŋa. Hai ku kpɛ basĩi í ya maa wɛɛ, ci ya buba kpasɛ̃. Bi ku si iku ŋai í ya wa. Iyi mɔkɔu í yɛ Jesu ŋɔi í koo í cuku si wajuɛ í dɔ̃ anu hee lele wa ni, mii í wa aninii awaɛ, Jesu awɔ Amai Ilaaɔ̃. Ilaaɔ̃ í re fei nɔ ǹ wa n tɔɔɛi, maà wahalam. Wa dɔ̃ bɛɛbɛi si na iyi í jɔ̀ Jesu í ni inɛi inɔɔko ŋau a fita siɛ.

³⁰ Nɔ Jesu í beeɛ í ni, irei iriɛ. Nɔ í jɛaa í ni, Zamaa. Í ni bɛɛbɛi si na iyi í jɔ̀ inɛi inɔɔko nkpɔ nkpɔi í nɛ.

³¹ Nɔ inɛi inɔɔkoɛ ŋau à waa tɔɔ Jesu suuru ntɔ ntɔ ku maà dasi aŋa si isa nla hai nɛ kɔɔu.

³² Wee kuusɔɔ gaa nla gɔ ŋa à wa bɛ à waa jɛ si iri kuta gɔ. Nɔ inɛi inɔɔko ŋau à tɔɔ Jesu ku jɔ̀ aŋa a koo a mu kuusɔɔ ŋau. Nɔ í yɔɔda nŋa.

³³ Nɔ inɛi inɔɔko ŋau à fita hai si mɔkɔu, à koo à mu kuusɔɔ ŋau. Nɔ kuusɔɔ gaa ŋau à sɛi hai antaii iri kutau à dasi tenku nɔ inyiu í jɛ ŋa.

³⁴ Ŋɔi woo degbe kuusɔɔ ŋau à yɛ mii iyi í ce, nɔ à sa à koo à waa sisi laabaaui ideu si ilu nlau do si ilɛɛko ŋa.

³⁵ Nɔ inɛ ŋa à fita à bɔ ku cɔ mii iyi í ceu. Iyi à to bi Jesu, ŋɔi à yɛ mɔkɔ iyi inɛi inɔɔko ŋa à fita siɛu. Mɔkɔu í baa si laakaiɛ má, nɔ wa buba kɔkɔi Jesu í dasi jĩnɛ ŋa. Ŋɔi njo í mu ŋa.

³⁶ Inɛ ŋa iyi ideu í ce iju nŋa à waa sisia inɛ ŋa bɛi inɛɛu í ce í ba faaba.

³⁷ Ŋɔi inɛi ilɛi Zerazee ŋa fei à tɔɔ Jesu suuru à ni ku nɛ hai bɛ, domi njo í mu ŋa ntɔ ntɔ. Nɔ Jesu í lɔ akɔi inyiu wa bi ku nɛ.

³⁸ Ŋɔi mɔkɔ iyi inɛi inɔɔko ŋa à fita siɛu wa tɔɔ Jesu ku jɔ̀ nŋu ku tooɛ. Amma Jesu í ni

³⁹ ku sinda ku nyi ideɛ, koo sisi mii iyi Ilaaɔ̃ í ceaa fei. Nɔ inɛɛu í nɛ í koo í wasi ku sisi mii iyi Jesu í cea nŋu fei si iluu fei.

Idei ama inaaboi Zairusi do inaabo iyi í lu ibɔi Jesu

⁴⁰ Iyi Jesu í baa hai ilɛi Zerazee nɔ zamaa í wasi ku coo fɔɔ, domi aŋa fei à waa degbeɛi.

⁴¹ Ŋɔi inɛ gɔ í naa bi tɛɛ, à ya kpoo Zairusi. Inɛ ngboi ile bii Zuifu ŋa à ya ce kutɔtɔɔi. Iyi í yɛ Jesu, ŋɔi í sɛɛbata si wajuɛ nɔ í tɔɔɛ ku naa kpasɛ̃i nŋu.

⁴² Wa tɔɔ Jesu ku naa kpasɛ̃ɛi si na iyi í jɔ̀ ama inaabo akã lege legeɛ iyi í nɛ adɔ̃ maateeji, wa bi ku ku. Ŋɔi Jesu wa koo. Iyi wa koo, nɔ zamaa nla nla wa manteɛ.

⁴³ Wee abo gɔ mɔ í wa bɛ iyi wa ce bɔ̃ɔi awɔ ku mu hai adɔ̃ maateeji. Nɔ í jɛ fiaɛ fei bi lokotoo ŋa, nɔ kãma nŋa kù yɔkɔ kù faabaɛ.

⁴⁴ Ŋɔi í sɛkɛɛ si Jesu do anyi í koo í lu itĩi ibɔɛ. Bɛ gbakã bɔ̃ɔu í tã.

⁴⁵ Nɔ Jesu í bee í ni, yooi í lum. Ŋɔi aŋa fei à waa jã, ŋɔi Piɛɛ í ni, Mɛɛtu, zamaaui í kaakoɛ wa manteɛ.

⁴⁶ Amma Jesu í ni, ǹ mà iyi inɛ gɔ í lum kãm kãm si na iyi í jɔ̀ gbugbãm í ce icɛ.

⁴⁷ Iyi abou í yɛ iyi Jesu í mà iyi inɛ gɔ í lu nŋu, ŋɔi í koo í gulɛ si wajuɛ do kuyaya. Nɔ í fɔ si wajui zamaau mii iyi í jɔ̀ nŋu í lu Jesu, do bɛi nŋu í ba iri anu akã.

⁴⁸ Nɔ Jesu í sɔ̃ɔ í ni, abooyi, naanɛɛi í faabaɛ, koo nɛ do laakai ku sũ.

⁴⁹ Waati iyi Jesu wa fɔ ideu ŋɔi inɛ gɔ í naa hai kpasɛ̃i Zairusi inɛ ngbou í sɔ̃ɔ í ni, ama inaaboɛu kù wɛɛ, maà bitandi Mɛɛtu má.

⁵⁰ Iyi Jesu í gbɔ ideu nɔ í sɔ̃ Zairusi í ni, maà jɔ̀ zigiɛ ku da, awɔ de dasi naanɛ, á ba iri.

^51-53 Ŋɔi à dasi kpãa má à waa koo. Iyi í to kpasɛ̃ bɛ, í ba wee inɛ fei í wasi ku kpata à waa cã kpokpo na irii amau. Nɔ Jesu í ni, i maà kpata ŋa, kù ku, wa sĩ njooi. Ŋɔi à waa yaakoɛ domi à mà iyi í kui. Ŋɔi Jesu kù jɛ inɛ gɔ ku lɔ kpasɛ̃u do nŋu ajɔ bii kù jɛ Piɛɛ do Zãa do Zaaki do iyeò baai amau.

⁵⁴ Iyi í to bi ama inaabou ŋɔi í mu awɔɛ nɔ í fɔ ide hee lele í ni, ama mudɛ̃ɛ, dede.

⁵⁵ Nɔ hundeɛ í baa má, nɔ í dede tengi bɛ gbakã. Nɔ Jesu í sɔ̃ ŋa í ni a naa ijɛ.

⁵⁶ Nɔ iyeò baaɛ ŋau à biti ntɔ ntɔ, amma Jesu í sɔ̃ ŋa í ni a maà sɔ̃ inɛ gɔ mii iyi í ce.