Luku 6 - Bibeli do fee

Jesu wa fɔ idei ajɔi kusĩmi*

¹ Si ajɔi kusĩmi gɔ Jesu wa too kɔɔi ilɛ gɔ, ŋɔi mɔcɔɛ ŋa à wɔ amaajɛ iyi à gbɛ̃ si ilɛu à nunu ijuɛ si awɔ à waa ŋɔ.

² Ŋɔi Farisi gɔ ŋa à bee ŋa à ni, na mii í jɔ̀ ì waa ce mii iyi a kù nɛ kpãai ku ce si ajɔi kusĩmi ŋa.

³ Ŋɔi Jesu í bee ŋa í ni, i kù cio mii iyi Davidi í ce, nŋu do inɛɛ ŋa, si waati iyi ari wa kpa ŋau?

⁴ Í lɔ kpasɛ̃i Ilaaɔ̃ nɔ í so pɛ̃ɛ iyi à jilɛa Ilaaɔ̃ í jɛ, nŋu do inɛɛ ŋa. Wee à ganji inɛ fei ku jɛ pɛ̃ɛu bɛ bii kù jɛ woo weei Ilaaɔ̃ ŋa aŋa akã.

⁵ Nɔ Jesu í sɔ̃ ŋa má í ni, amu Amai Amanɛ, amui ǹ jɛ inɛ ngboi ajɔi kusĩmi.

Inɛ iyi awɔ akãɛ í ku

⁶ Si ajɔi kusĩmi mmu gɔ, Jesu í lɔ ile bii Zuifu ŋa à ya ce kutɔtɔɔu nɔ í wasi ku cea inɛ ŋa cioi idei Ilaaɔ̃. Wee mɔkɔ gɔ í wa bɛ, awɔ njɛɛ í ku.

⁷ Woo kɔ inɛ ŋa si wooda do Farisi ŋa à kãsi Jesu iju, à waa cɔ mà á jɔ̀ inɛɛu ku ba iri si ajɔi kusĩmi. À waa cɔɔ domi à waa bi a yɛ taaleɛi.

⁸ Amma Jesu í mà lasabu nŋa, ŋɔi í sɔ̃ mɔkɔ iyi awɔɛ í kuu í ni, dede i leekĩ si anini nŋa bɛ. Nɔ í dede í leekĩ.

⁹ Nɔ Jesu í ni, ǹ wa n bee ŋɛi, si ajɔi kusĩmi, wooda í na inɛ kpãa ku ce jiida de mà laalɔ, ku faaba amanɛ de, mà ku kpaa.

¹⁰ Ŋɔi í cɔ aŋa fei í kaako ŋa, nɔ í sɔ̃ mɔkɔu í ni, tɛ awɔɛ. Iyi í tɛ awɔu ŋɔi í baa dee dee.

¹¹ Ŋɔi idɔ nŋa í kɔ̃, nɔ à waa busi njɛ bɛi aa cea Jesu.

Jesu í cica woo bɛ maateeji ŋau

¹² Waati bɛɛbɛ Jesu í koo í gũ iri kuta gɔ ku ce kutɔɔ. Nɔ idũu fei í wasi ku ce kutɔɔ.

¹³ Iyi iju í má í tɔtɔɔ mɔcɔɛ ŋa nɔ í cica amanɛ maateeji si inɔ nŋa, í sɔ ŋa woo bɛ ŋa.

¹⁴ Iri nŋa wee. Simɔɔ iyi í sɔ Piɛɛ do Anderee ifɔɛ, do Zaaki do Zãa do Filipu do Baatelemi

¹⁵ do Matie do Tomaa do Zaaki amai Alifee, do Simɔɔ inɛi igbɛi Zelɔtu,

¹⁶ do Zudasi amai Zaaki, do Zudasi Isikariɔti iyi á na ku zambaɛu.

Didɔ̃ do ijuukpã

¹⁷ Waati iyi Jesu í cica woo bɛ maateeji ŋau í tã ŋɔi aŋaò ŋa à kita wa à waa leekĩ si ilɛ ku munga anu gɔ. Tengi bɛi mɔcɔ nkpɔɛ ŋau à wa do zamaa nla gɔ. Inɛ ŋau à naai hai ilɛi Zudee fei do Zeruzalɛmu ilu nlaɛ, do hai Tii do Sidɔ̃ɔ, ilu ŋa iyi à wa ikpa bi inyi dũdũ.

¹⁸ À naa bi tɛɛi ku ba a gbɔ ideɛ nɔ a ba iri si bɔ̃ɔ nŋa ŋa. Inɛ ŋa iyi inɛi inɔɔko ŋa à sinda iri nŋa à ba iri.

¹⁹ Ŋɔi inɛ ŋau fei à waa dɛ ku luu, domi gbugbã nla nla í ya fita siɛ nɔ ku jɔ̀ aŋa fei a ba iri.

²⁰ Ŋɔi Jesu í cɔ mɔcɔɛ ŋau í ni, ilu inɔ didɔ̃ ŋai iŋɛ ilu are ŋa, domi iŋɛi ì jɛ inɛi bommai Ilaaɔ̃ ŋa.

²¹ Ilu inɔ didɔ̃ ŋai iŋɛ iyi ari wa kpa si nsɛi domi Ilaaɔ̃ á jɔ̀ i yo ŋa. Ilu inɔ didɔ̃ ŋai iŋɛ iyi ì waa kpata si nsɛi, domi aa na i nyaanyi ŋa.

²² Iŋɛ ilu inɔ didɔ̃ ŋai bii inɛ ŋa à cé ŋɛ, nɔ à lele ŋɛ hai inɔ nŋa, nɔ à waa bu ŋɛ, nɔ à waa sɔ ŋɛ iri laalɔ na irii amu Amai Amanɛ.

²³ Ajɔ nŋu, i jɔ̀ inɔ nŋɛ ku dɔ̃, i fo i dingaa do inɔ didɔ̃, domi riba iyi à jilɛ nŋɛ lelei Aɔ̃ í la. Inɛ ŋau bɛ, bɛɛbɛ mɔi bala nŋa ŋa à cea walii ŋau wo.

²⁴ Amma inɔ kufɔi á jɛ ti iŋɛ ilu fia ŋa, domi ì ba inɔ nŋɛ í tũ tã ŋa.

²⁵ Inɔ kufɔi á jɛ ti iŋɛ iyi ì wa si ayo si nsɛi, domi ari á na ku kpa ŋɛ. Inɔ kufɔi á jɛ ti iŋɛ iyi ì waa nyaanyi si nsɛi, domi aa na i kpata i maa cã kpokpo ŋa.

²⁶ Iŋɛ ilu inɔ kufɔ ŋai bii inɛ fei wa saabu ŋɛ domi bɛɛbɛi bala nŋa ŋa à cea walii ilu ibo ŋau wo.

I bi mbɛɛ nŋɛ ŋa

²⁷ Amma iŋɛ iyi ì sotĩ ì waa gbɔ idem ŋa, ǹ wa n sɔ̃ ŋɛi, i ya bi mbɛɛ nŋɛ ŋa, nɔ inɛ ŋa iyi à cé ŋɛ i ya ce nŋa jiida ŋa.

²⁸ I weea inɛ ŋa iyi à waa ceekpe ŋɛ, nɔ i ya cea inɛ ŋa iyi à waa ce nŋɛ laalɔ kutɔɔ ŋa.

²⁹ Bii inɛ gɔ í sambalaɛ, toaa kɛkɛlɛ akãɛ má. Inɛ iyi í gba ibɔ kumbooɛ, maà ti i kɔ ku so danzigiɛ má.

³⁰ Bii inɛ gɔ í tɔɔɛ mii gɔ, muaa. Bii inɛ gɔ í so mii ndɛɛ gɔi, maà ti i beeɛ má.

³¹ Dimi iyi ì bi inɛ ŋa a ce nŋɛ, iŋɛ mɔ i ce nŋa dimi nŋu.

³² Bii inɛ ŋa iyi à bi ŋɛ aŋa akãi iŋɛ mɔ ì bi ŋa, saabu yoomai ì nɛ ŋa. Baa woo ce laalɔ ŋa taka nŋa à ya bi kpaasi nŋa ŋa.

³³ Bii inɛ ŋa iyi à waa ce nŋɛ jiida, aŋai iŋɛ mɔ ì waa sãa gbese, saabu yoomai ì nɛ ŋa. Baa woo ce laalɔ ŋa taka nŋa à ya ce bɛɛbɛ.

³⁴ Bii ì waa wɛ̃a inɛ ŋa ngɔgɔ si na iyi í jɔ̀ ì waa tamaa aa na a sã nŋɛ, to, saabu yoomai ì nɛ ŋa. Baa woo ce laalɔ ŋa taka nŋa à ya wɛ̃a njɛ nɔ a sã.

³⁵ Amma i bi mbɛɛ nŋɛ ŋa, i ce nŋa jiida ŋa, i ya wɛ̃ nŋa nɔ i maà ya cɔ kpãai ku sã ŋa. Bii ì waa ce bɛɛbɛ ŋa, riba nŋɛ á la nɔ aa jɛ amai Ilaaɔ̃ ŋa, nŋu iyi kù nɛ saa, domi nŋu takaɛ wa nyisi amanɛ gudulu ŋa do amanɛ laalɔ ŋa didɔ̃ɛ.

³⁶ I jɔ̀ i nɛ araarei inɛ ŋa bɛi Baa nŋɛ mɔ í nɛ.

Maà kiiti kpaasiɛ

³⁷ Jesu í sɔ̃ ŋa má í ni, i maà ya kiiti inɛ ŋa, nɔ Ilaaɔ̃ mɔ kaa kiiti ŋɛ. I maà ya yɛ taalei inɛ ŋa nɔ Ilaaɔ̃ mɔ kaa yɛ taale nŋɛ. I ya kpa idei kurarai njɛ ŋa nɔ Ilaaɔ̃ mɔ á kpa idei kurarai iŋɛ mɔ.

³⁸ I ya mua njɛ ŋa nɔ Ilaaɔ̃ mɔ á mu nŋɛ. Si gũa nla nlai á ce nŋɛ amua. Á yagaɛ ku kitigbaɛ ku kɔ̃ hee andɛɛ, nɔ ku cuu nŋɛ si bɔgɔ. Ntɔ ntɔ gũa iyi ì wãaò inɛ ŋa, nŋui Ilaaɔ̃ mɔ á wã nŋɛ do.

³⁹ Nɔ í kpa nŋa mɔnda gɔ í ni, fɛɛju á yɔkɔ ku mua fɛɛju akpa? Bii fɛɛju ŋa à waa mua njɛ akpa aŋa minji fei a kaa dasi isa?

⁴⁰ Woo kɔkɔ icɛ ci ya re inɛ ngboɛ. Amma inɛ fei, waati iyi í mà mii iyi inɛ ngboɛ í nyisiɛ, nŋu mɔ í ya yɛi bɛi inɛ ngbou.

⁴¹ Na mii í ce ì waa yɛ fɔfɔ keeke iyi í wa si ijui kpaasiɛ nɔ i kù yɛ jĩi ite iyi í wa si titɛɛ.

⁴² Bɛirei aa ce i ni, kpaasi, jɔ̀ n nyaɛ fɔfɔ si ijuɛ, nɔ awɔ i kù waa yɛ jĩi ite iyi í wa si titɛɛ. Awɔ ilu muafitii, jɔ̀ i tako i nya jĩi ite iyi í wa si ijuɛu titã ku ba i yɛ ilu sãa sãa, i bɛi i nya fɔfɔ iyi í wa si ijui kpaasiɛ.

À ya mà jĩii hai si isoɛ

⁴³ Ŋɔi Jesu í sɔ̃ ŋa má í ni, jĩi jiida kaa so iso laalɔ. Bɛɛbɛ mɔi jĩi laalɔ kaa so iso jiida.

⁴⁴ Ntɔ ntɔ jĩi fei hai si isoɛi à ya màa. A ci ya ka figi si agũ, bɛɛbɛ mɔi a ci ya ka rezɛ̃ɛ si agũ fũfũ, mà irei.

⁴⁵ Amanɛ jiida í ya nya jiida wai hai si mii jiida iyi wa singa si idɔɛ. Amanɛ laalɔ mɔ í ya nya laalɔ wai hai si mii laalɔ iyi wa singa si idɔɛ, domi mii iyi wa kɔ̃ si idɔi amanɛ, nŋui gɛlɛɛ í ya fɔ.

Idei woo ma ile minji gɔ ŋa

⁴⁶ Nɔ Jesu í sɔ̃ ŋa má í ni, na mii í ce ì ya maa kpem Lafɛ̃ɛ Lafɛ̃ɛ, nɔ i ci ya ceò ide iyi ǹ sɔ̃ ŋɛ icɛ ŋa.

⁴⁷ Inɛ iyi í naa bi tom fei nɔ wa gbɔ idem nɔ wa jirimaɛ, an nyisi ŋɛ inɛ iyi lafɛ̃ɛ í jɔ.

⁴⁸ Í jɔ mɔkɔ gɔ iyi wa ma ile. Mɔkɔu í tu isa titã í jĩ hee í koo í kãsi kuta í bɛi í nyɔ icui ileu. Si anyiɛ nɔ ido í kɔ̃ wa nikã, wa cã ileu, amma kù yɔkɔ ku kɛkɛɛ domi kumaɛ í sĩa.

⁴⁹ Amma inɛ iyi í gbɔ idem nɔ kù waa jirimaɛ, í yɛi bɛi mɔkɔ gɔ iyi í ma ile nɔ kù nyɔ icuɛ do kuta. Ŋɔi ido í na í kɔ̃ í nikã wa cã ileu nɔ gbakã í cuku í lɛgɛ fei.