Luku 4 - Bibeli do fee

Seetam* í lɛlɛ Jesu

¹ Jesu í kɔ̃ò Hundei Ilaaɔ̃ nɔ í baa hai idoi Zuudɛ̃ɛ. Nɔ Hundeu í bɔòɛ si gbaa.

² Nɔ Seetam í lɛlɛɛ bɛ ajɔ ciiji. Nɔ si ajɔu bɛ fei kù jɛ nkãma. Iyi baai nŋu í lɔ, ŋɔi ari wa kpaa.

³ Nɔ Seetam í sɔ̃ɔ í ni, bii awɔ Amai Ilaaɔ̃i do ntɔ, jɔ̀ kutau ihɛ̃ ku kpɔò pɛ̃ɛ.

⁴ Nɔ Jesu í jɛaa í ni, kukɔi idei Ilaaɔ̃ í ni, amanɛ ci ya wɛɛ na ijɛ nŋu akã.

⁵ Nɔ Seetam í bɔòɛ hee antaii iri kuta gɔ, í nyisiɛ bommai andunya fei si iju kãmɛɛ.

⁶ Nɔ í sɔ̃ɔ í ni, amboei bomma ŋau fei an muuɛ nɔ an jɔ̀ i nɛ yiiko si ŋa. Inɛ iyi ǹ bi, lafɛ̃ɛi an mua, si na iyi í jɔ̀ à nam nii.

⁷ Na nŋu, bii ì naa ì gulɛ si wajum, fei ndɛɛ á jɛ tɛɛ.

⁸ Nɔ Jesu í jɛaa í ni, kukɔi idei Ilaaɔ̃ í ni, Aɔ̃ Lafɛ̃ɛɛi aa gulɛa, nɔ nŋu akãi aa tɔɔ.

⁹ Nɔ Seetam í gbãa í bɔòɛ Zeruzalɛmu nɔ í gũòɛ hee si antaii ile lelei kpasɛ̃i Ilaaɔ̃ nɔ í sɔ̃ɔ í ni, bii awɔ amai Ilaaɔ̃i, fo i dingaa ilɛ,

¹⁰ domi kukɔi idei Ilaaɔ̃ í ni, Ilaaɔ̃ á na amalekaɛ ŋa wooda na iriɛ a maa degbeɛ,

¹¹ nɔ a maa muɛ si awɔ ku ba i maà ti i koosɛ si kuta.

¹² Ŋɔi Jesu í jɛaa í ni, kukɔi idei Ilaaɔ̃ í ni, maà ti i sii Aɔ̃ Lafɛ̃ɛɛ.

¹³ Iyi Seetam í lɛlɛɛ do yaase ikã ikã fei í tã, ŋɔi í jɔ̀ɔ titã í nɛ hee waati mmu gɔ má.

Jesu í sinti icɛɛ Galilee

¹⁴ Nɔ Jesu í nyi ikpa ilɛi Galilee do gbugbãi Hundei Ilaaɔ̃, nɔ iriɛ í fangaa si ilɛu fei.

¹⁵ Wa kɔ ŋa si cioi idei Ilaaɔ̃ ile bii Zuifu ŋa à ya ce kutɔtɔɔ nŋa ŋa, nɔ inɛ fei wa saabuɛ.

À kɔ̀si Jesu Nazarɛti bɛ

¹⁶ Nɔ Jesu í bɔ Nazarɛti ilu bii í jɛ amau. Ŋɔi si ajɔi kusĩmi í bɔ ile bii Zuifu ŋa à ya ce kutɔtɔɔu si bɛi í nɛ dɔ̃ɔnɛɛ. Ŋɔi í dede ku cio tia.

¹⁷ Ŋɔi à náa tia iyi Ezai waliiu í kɔ. Si bɛi wa fũu ŋɔi í kã si kukɔ gɔ iyi wa ni,

¹⁸ Hundei Aɔ̃ Lafɛ̃ɛ í wa sim. Í cicam n sisiaò ilu are ŋa laabaau jiidau. Í bɛm n koo n sɔ̃ inɛi piisɔ̃ɔ ŋa n ni aa jɔ̀ ŋa a nɛ nɔ n sɔ̃ fɛɛju ŋa n ni aa yɛ ilu má, nɔ n jɔ̀ inɛ ŋa iyi inɛ ŋa à waa taa gbugbã a nɛ ara nŋa.

¹⁹ Nɔ n sisia inɛ ŋa n ni awaatii didɔ̃i Lafɛ̃ɛ í to wa.

²⁰ Ŋɔi Jesu í ka tiau má í sindoa woo ce icɛu nɔ í buba. Ŋɔi inɛ ŋa iyi à tɔtɔɔ bɛ fei à kãsiɛ iju.

²¹ Ŋɔi í sinti ideɛ ku sɔ̃ ŋa í ni, nnyii kukɔi idei Ilaaɔ̃ iyi ì gbɔ nsɛiu ŋa í kɔ̃.

²² Ŋɔi aŋa fei à waa jɛaa sɛɛda jiida, nɔ biti í mu ŋa do ide didɔ̃ iyi wa fita hai si gɛlɛɛu. À ni, kù jɛ amai Zozɛfuu mbɛ ya.

²³ Nɔ Jesu í sɔ̃ ŋa í ni, kù nɛ sika aa kpaam mɔndau ihɛ̃ i ni ŋa, awɔ lokotoo, faaba araɛ. Ce si iluɛ ihɛ̃ mii ŋa iyi à gbɔ ì ce Kapɛranumu fei.

²⁴ Amma an sɔ̃ ŋɛ, walii kãma kù wɛɛ iyi í ya nɛ bɛɛrɛ si ilui nŋu takaɛ.

²⁵ Ì mà sãa sãa ŋa iyi ari nla gɔ í ce si ilɛu fei si waatii Elii walii nlau. Ijĩ kù wɔ si afei adɔ̃ mɛɛta do cukpa mɛɛfa, mà irei. Waati bɛɛbɛ inaabo jaaɔ̃ nkpɔi í wa si ilɛi Izirɛli.

²⁶ Do nŋu fei, Ilaaɔ̃ kù bɛ Elii walii nlau bi kãma nŋa bii kù jɛ bi jaaɔ̃ gɔ iyi í wa Sarɛpita si ilɛi Sidɔ̃ɔ.

²⁷ Nɔ dintɛ nkpɔ mɔi í wɛɛ wo si ilɛi Izirɛli si waatii Elizee waliiu. Do nŋu fei, kù jɔ̀ gɔgɔ nŋa gɔ ku ba iri, bii kù jɛ Naama inɛi ilɛi Siriu.

²⁸ Iyi Jesu í fɔ bɛɛbɛ í tã ŋɔi idɔi inɛ ŋa iyi à wa ile bii à ya ce kutɔtɔɔu bɛ fei í kɔ̃.

²⁹ Ŋɔi à dede à leleɛ hai inɔ iluu à bɔòɛ hee si antaii iri kuta si bii à ma ilu nŋa ku ba a taleɛ wa ilɛ.

³⁰ Amma í lɔ anini nŋa bɛ í nɛɛ.

Jesu í lele inɛi inɔɔko hai si inɛ gɔ

³¹ Nɔ Jesu í bɔ Kapɛranumu, ilui Galilee gɔ nɔ wa kɔ inɛ ŋa si cioi idei Ilaaɔ̃ si ajɔi kusĩmi.

³² Wa kɔ ŋa si cio do yiiko. Nŋui í jɔ̀ ideu í tosi ŋa.

³³ Wee mɔkɔ gɔ í wa ile bii Zuifu ŋa à ya ce kutɔtɔɔu bɛ í nɛ inɛi inɔɔko, ŋɔi í dɔ̃ anu hee lele í ni,

³⁴ mii í wa si gãmɛi awaɛ ŋa awɔ Jesu inɛi Nazarɛti. Ì naa ku kpa wai? Ǹ mà inɛ iyi ì jɛ. Awɔi ì jɛ Inɛ Kumá iyi Ilaaɔ̃ í bɛ wa.

³⁵ Ŋɔi Jesu í la siɛ í ni, coko, fita hai si mɔkɔu. Ŋɔi inɛi inɔɔkou í ta mɔkɔu ilɛ si anini nŋa, nɔ í fita siɛ, kù mɛɛ.

³⁶ Ŋɔi aŋa fei à biti, à bee njɛ aŋa duusɔ̃ɔ à waa ni, ide dimi yoomai ihɛ̃. Mɔkɔu wee wa sɔ̃ inɛi inɔɔko ŋa ide do yiiko do gbugbã nɔ à waa fita.

³⁷ Ŋɔi iriɛ í fangaa si ilɛɛkoi iluu fei.

Jesu í jɔ̀ bɔ̃ɔ nkpɔ í ba iri

³⁸ Ŋɔi Jesu í fita hai ile bii à ya ce kutɔtɔɔu, nɔ í bɔ kpasɛ̃i Simɔɔ. Wee iyei aboi Simɔɔu wa ce bɔ̃ɔi ara gbãa ntɔ ntɔ. Ŋɔi à tɔɔɛ ku jɔ̀ ku ba iri.

³⁹ Ŋɔi í kɔmba si abou í la si ara gbãau nɔ í nya. Nɔ abou í dede gbakã í yaaɛ ŋa.

⁴⁰ Alɛi ajɔ nŋu iyi inunu í lɔ, ŋɔi inɛ ŋa iyi inɛ nŋa ŋa à waa ce bɔ̃ɔ dimi ikã ikã fei à wasi ku naaò ŋa wa bi tɛɛ. Nɔ í lesi aŋa fei awɔ í jɔ̀ à ba iri.

⁴¹ Inɛi inɔɔko ŋa mɔ à fita hai si inɛ nkpɔ, à dɔ̃ò anu à waa ni, awɔi ì jɛ Amai Ilaaɔ̃. Amma Jesu í la si ŋa nɔ wa ganji ŋa ide ku fɔ domi à mà iyi nŋuu inɛ iyi Ilaaɔ̃ í cicai.

Jesu wa waazo ilɛi Zudee*

⁴² Iyi iju í má ŋɔi Jesu í fita hai inɔ ilu í bɔ gbabua. Ŋɔi zamaa nla nla gɔ wa dɛdɛɛ. Iyi à to bi tɛɛ ŋɔi à tɔɔɛ suuru ku maà nɛ ku jɔ̀ aŋa.

⁴³ Amma í sɔ̃ ŋa í ni, kù nɛ bɛi an ce iyi n kù waazo laabaau jiidai bommai Ilaaɔ̃ si ilu mmu ŋa má, domi na nŋui Ilaaɔ̃ í bɛm wa.

⁴⁴ Iyi í fɔ bɛɛbɛ í tã nɔ í koo í dabii wa ce waazo ile bii Zuifu ŋa à ya ce kutɔtɔɔ ŋa ilɛi Zudee.