Luku 3 - Bibeli do fee

Waazoi Zãa woo dasi inyi

¹ Waati iyi ilaalu nlai Romu iyi à ya kpe Tibɛɛ í ce adɔ̃ maatũ si bommaɛ, waati bɛɛbɛ Pɔnsu Pilatii wa jɛ ilu ilɛi Zudee, nɔ Herodu mɔ wa jɛ ilaalu si ilɛi Galilee, nɔ Filipu ifɔɛu mɔ wa jɛ ilaalu si ilɛi Iture do Takoniti, nɔ Lisania mɔ wa jɛ ilaalu si ilɛi Abilɛni.

² Ani do Kaifu ŋa mɔ à waa jɛ woo wee nlai Ilaaɔ̃. Waati bɛɛbɛi Ilaaɔ̃ í sɔ̃ Zãa amai Zakari ide si gbaa.

³ Nɔ Zãa wa dabii si ilɛ ŋa iyi à wa kɔkɔi idoi Zuudɛ̃ɛ fei wa waazo nŋa wa ni, i kpaasi idɔ ku ba Ilaaɔ̃ ku kpa idei dulum du ŋɛ nɔ a dasi ŋɛ inyi.

⁴ Bɛɛbɛi ide iyi walii Ezai í kɔ si tiaɛu í ce. Í ni, à gbɔ imui inɛ gɔ wa dɔ̃ anu si gbaa wa ni, i teese kpãai Lafɛ̃ɛ ku tɛ ŋa.

⁵ Aa dĩ lɔɔma ŋau fei, nɔ geete do iri kuta fei á munga anu, nɔ kpãa ku ka ŋa fei aa tɛ, kpãa iyi í sãmi fei á sĩa.

⁶ Inɛ fei á yɛ bɛi Ilaaɔ̃ wa faaba wa.

⁷ Zamaa nla nla wa koo bi Zãa ku dasi ŋa inyi. Nɔ í sɔ̃ ŋa í ni, iŋɛ inɛ buu ŋa bɛi njo wukuku, yooi í sɔ̃ ŋɛ í ni i saa idɔɔkɔ̃i kiitii Ilaaɔ̃ iyi á na ku naau.

⁸ Na nŋu, i ce kookoosu jiida i nyisiò iyi ì kpaasi idɔ ŋa, nɔ i maà tamaa mà aa ba faaba ŋa si na iyi í jɔ̀ ì ya maa ni iŋɛ ì jɛ dimii Aburahamu ŋa. Ǹ wa n sɔ̃ ŋɛi, Ilaaɔ̃ á yɔkɔ ku so kuta ŋau ihɛ̃ ku ce ŋa dimii Aburahamu ŋa.

⁹ Wee dagba wa kã si jĩi tã mɔm a daò icuɛ. Na nŋu, jĩi iyi kù waa so iso jiida fei aa daai a dasi ina.

¹⁰ Ŋɔi zamaau í beeɛ wa ni, debɛi, bɛirei aa ka ce.

¹¹ Nɔ í jɛ nŋa í ni, inɛ iyi í nɛ ibɔ minji ku so akã ku mua kpaasiɛ iyi kù nɛ, nɔ inɛ mɔ iyi í nɛ ijɛ ku kpɔ̃ɔ do kpaasiɛ.

¹² Woo gba fiai lɛmpoo gɔ ŋa mɔ à naa a dasi aŋa mɔ inyi, ŋɔi à beeɛ à ni, Mɛɛtu, bɛirei aa ka ce.

¹³ Ŋɔi í sɔ̃ ŋa í ni, i maà gba ku lɔ zaka bɛi à da nŋɛ.

¹⁴ Ŋɔi sooge gɔ ŋa mɔ à beeɛ à ni, awa mɔ ni, bɛirei aa ka ce. Nɔ í sɔ̃ ŋa í ni, i maà ya gba fiai inɛ gɔ do gbugbã ŋa, nɔ i maà ya má inɛ gɔ ide, nɔ i maà ya donda iyi à waa sã nŋɛ.

¹⁵ Inɛ ŋau à waa cɔ kpãai inɛ iyi Ilaaɔ̃ í cicau nɔ à waa lasabu si idɔ nŋa mà Zãai í jɛ inɛɛu.

¹⁶ Nɔ Zãa í sɔ̃ aŋa fei í ni, inyii amu ǹ wa n dasi ŋɛ, amma inɛ gɔ wa naa iyi í rem do gbugbã. N kù to n fũ baa ikũi baataɛ. Nŋui á da nŋɛ si Hundei Ilaaɔ̃ do ina.

¹⁷ Wa mu kaale ku fɛ bileeɛ si awɔ, nɔ ku kpã bileeu bii à kpokpoɛ, nɔ ku ko yɔyɔu ku dasi aka, sakou mɔ ku dasi ina iyi ci ya ku.

¹⁸ Do faaji nkpɔ gɔ ŋa mɔi Zãa wa ceaò inɛ ŋa waazoi laabaau jiidau.

¹⁹ Amma hai tako ilaalu Herodu í so Herodiasi aboi ifɔɛ í ce abo. Ŋɔi Zãa í gbagba siɛ na ideu do na daa laalɔ ŋa iyi í ce fei wo.

²⁰ Si antaii laalɔ ŋa iyi Herodu wa ce, do ankãanyi í na í jɔ̀ à mu Zãa à dasiɛ piisɔ̃ɔ má.

Inyi ku dasii Jesu

²¹ Zãa í wasi inɛ nkpɔ nkpɔ ku dasi inyi si waati iyi a kù dasiɛ piisɔ̃ɔ, ŋɔi Jesu mɔ í naa bi tɛɛ, nɔ í dasi Jesu mɔ inyi. Ŋɔi Jesu wa ce kutɔɔ nɔ lelei Aɔ̃ í cĩ,

²² nɔ Hundei Ilaaɔ̃ í de siɛ wa hai lele do ara gɔ bɛi ankasiidi. Nɔ à gbɔ ide ku fɔ gɔ wa hai lele í ni, awɔ amam nii, ǹ biɛ jiida jiida. Siɛi inɔ didɔ̃m fei í ya wa.

Balai Jesu ŋa

²³ Jesu í to adɔ̃ kuntaa í bɛi í sinti icɛɛ. Inɛ ŋa à ya maa cɔɔi bɛi amai Zozɛfu. Balai Zozɛfu ŋa wee.

²⁴ Heli do Matati do Levii do Mɛliki do Zanai do Zozɛfu,

²⁵ do Matatia do Amɔsu do Nahumu do Esili do Nagai,

²⁶ do Maatu do Matatia do Semɛni do Zozɛki do Zoda,

²⁷ do Yoanaa do Reza do Zorobabɛli do Seatiɛli do Neri,

²⁸ do Mɛliki do Adi do Kosamu do Elimadamu do Ɛɛ,

²⁹ do Zozue do Eliezɛɛ do Zorimu do Matati do Levii,

³⁰ do Simeɔ̃ do Zudaa do Zozɛfu do Zonamui do Eliakimu,

³¹ do Melea do Mɛna do Matata do Natãa do Davidi,

³² do Izai do Obɛdi do Boazi do Salamɔɔ do Nasɔ̃ɔ,

³³ do Aminadabu do Adimi do Aani do Hɛsirɔ̃ɔ do Perɛsi do Zudaa,

³⁴ do Zakɔbu do Izaaki do Aburahamu do Tera do Nakɔɔ,

³⁵ do Serugu do Rehu do Pelɛgi do Ebɛɛ do Sela,

³⁶ do Kenaa do Aapakisadi do Sɛmu do Nowee do Lemɛki,

³⁷ do Mɛtusela do Enɔku do Yerɛdi do Mahalaleɛli do Kenaa,

³⁸ do Enɔsi do Sɛti do Adamu do Ilaaɔ̃.