Luku 24 - Bibeli do fee

Kujĩi Jesu hai si balɛ

¹ Ajɔ amaazuma daadaakɔu inaabo ŋau à bɔ bi balɛu à waa mu ikpo nŋa ŋa do tuae jiida iyi à ce sɔɔluɛu.

² Ŋɔi à ba kutau í bimbili hai andɛi balɛu.

³ Ŋɔi à lɔ inɔ balɛu amma a kù yɛ ikui Jesu bɛ.

⁴ Si bɛi à waa leekĩ do bitiu ŋɔi amanɛ minji gɔ ŋa à naa si ŋa à waa dasi ibɔ ku daana gɔ ŋa.

⁵ Ŋɔi inaabo ŋau à waa ce njo nɔ à kɔmba iri nŋa ilɛ, nɔ inɛ ŋau à sɔ̃ ŋa à ni, na mii í ce ì waa dɛdɛ ilu hunde bi kuwai iku ŋa.

⁶ Kù wa ihɛ̃ má, njɛ í jĩ hai si balɛ. I ye gigii ide iyi í sɔ̃ ŋɛ si waati iyi í wa Galilee.

⁷ Í ni kù nɛ bɛi á ce iyi a kù mu nŋu Amai Amanɛ a kù dasi nŋu si awɔi ilu dulum ŋa. Í ni aa kpakpa nŋu si jĩi ku gaau, amma nŋu á jĩ má si ajɔ mɛɛtasia.

⁸ Ŋɔi inaabo ŋau à ye gigii idei Jesuu.

⁹ Ŋɔi à sinda à nɛ hai bi balɛu. Nɔ bɛi mii ŋau í ce fei à koo à sisia mɔcɔ maatakã ŋau do inɛ ŋa iyi à gbeu fei.

¹⁰ Maari inɛi Madala do Zoana do Maari iyei Zaaki do inaabo gɔ ŋa má, aŋai à koo à sɔ̃ woo bɛ ŋau ideu.

¹¹ Amma ideu wa jɛ nŋai bɛi ara, a kù dasi idei inaabo ŋau naanɛ. [

¹² Do nŋu fei Piɛɛ í dede í sɛi í bɔ bi balɛu. Iyi í to í bate í cɔ inɔ balɛu, amma acɔ iyi à woo dou nŋu akãi í yɛ wa timbi ilɛ, nɔ í sinda í nyi kpasɛ̃ do biti.]

Jesu í tusɛa mɔcɔ minji gɔ ŋa araɛ

¹³ Si ajɔ akãu mɔcɔ minji gɔ ŋa à waa bɔ ilu gɔ iyi à ya kpe Emayusi. Zakai kiloo maatakãi í jĩò Zeruzalɛmu.

¹⁴ À waa nya faajii mii ŋa iyi í ceu fei à waa nɛò.

¹⁵ Iyi à wasi ku nya faajii ideu, ŋɔi Jesu takaɛ í sɛkɛɛ si ŋa aŋaò ŋa à waa nɛ ajɔ.

¹⁶ À yɔɔ amma ngɔgɔ í ganji ŋa a màa.

¹⁷ Nɔ í bee ŋa í ni, ide yoomai ì fɔ ì waa nɛò bɛɛbɛ ŋa. Ŋɔi à leekĩ à bɛjɛ waju do inɔ kufɔ.

¹⁸ Inɛ akã iyi à ya kpe Keleopa í ni, bii kù jɛ awɔ akã baasi, yooi í wa si Zeruzalɛmu iyi kù mà mii iyi í ce si ajɔ gbeejiu ihɛ̃.

¹⁹ Ŋɔi í bee ŋa í ni, mii í ce. Ŋɔi à ni, idei Jesu inɛi Nazarɛtiu ni. Mɔkɔu walii ilu gbugbãi si icɛ do si ide ku fɔ si wajui Ilaaɔ̃ do si wajui amanɛ ŋa fei.

²⁰ Ŋɔi inɛ ngboi woo weei Ilaaɔ̃ ŋa do inɛ ngbo nwa ŋa à daa inɛ ŋa si awɔ à yɛ taaleɛ à kpakpaɛ si jĩi à kpaa.

²¹ À waa tamaa nŋui á faaba inɛi Izirɛli ŋa wo, amma ajɔ mɛɛtaɛi ihɛ̃ iyi ideu í ce wa tã.

²² Si anyii nŋu, inaabo gɔ ŋa si inɔ nwa à naa à gidi wa do ideu má. Inaabo ŋau à dede daadaakɔ à bɔ bi balɛu.

²³ Iyi à to nɔ a kù yɛ ikui Jesuu bɛ. Ŋɔi à naa à sɔ̃ wa à ni amaleka ŋa à naa si aŋa nɔ à sɔ̃ aŋa à ni í jĩ má.

²⁴ Ŋɔi inɛ gɔ ŋa hai si inɔ nwa à bɔ bi balɛu nɔ à koo à ba mii ŋau í cei dee dee si bɛi inaabo ŋau à sɔ̃ wau, amma a kù yɛ nŋu takaɛ.

²⁵ Ŋɔi Jesu í sɔ̃ ŋa í ni, iŋɛ hai nɛ bisi ŋai, i ci ya dasi ide iyi walii ŋa à fɔ fei naanɛ gbãa gbãa ŋa.

²⁶ Kù nɛ bɛi á ce iyi inɛ iyi Ilaaɔ̃ í cicau kù yɛ ijuukpã, inɛ ŋa a bɛi a yɛ amboeɛ.

²⁷ Ŋɔi í sisi nŋa ide iyi à fɔ si kukɔi idei Ilaaɔ̃ fei si gãmɛi nŋu takaɛ. Í sintiɛi hai si tiai Moizi ŋa do ti walii ŋau fei.

²⁸ Waati iyi à maai si ilu bii à waa bɔu, ŋɔi Jesu takaɛ í ce bɛi inɛ iyi wa bɔ waju.

²⁹ Ŋɔi à mante manteɛ à ni ku gbe bi aŋa domi alɛ í lɛ tã nɔ inunu wa lɔ. Ŋɔi í sinda wa í naa í gbe bi tu ŋa bɛ.

³⁰ Ŋɔi aŋaò ŋa à waa jɛ. Waati iyi à waa jɛu ŋɔi í so pɛ̃ɛ í ce si kutɔɔ í bɛi í bububuɛ nɔ í na ŋa.

³¹ Waati bɛɛbɛi iju nŋa í cĩ bɛi nɔ à màa. Amma tengi bɛ má gbakã à kuaɛ.

³² Nɔ à sɔ̃ njɛ à waa ni, baa si waati iyi wa sɔ̃ wa idei kukɔi Ilaaɔ̃u hai si kpãau wa inɔ nwa kù tũ de.

³³ Nɔ aŋa mɔ à dede gbakã à nɛ ikpa Zeruzalɛmu. Iyi à to bɛ à koo à ba mɔcɔ maatakã ŋau à waa tɔtɔɔ do inɛ gɔ ŋa.

³⁴ Ŋɔi inɛ ŋa iyi à tɔtɔɔ ŋau à waa sɔ̃ amanɛ minji ŋau mɔ à ni, Lafɛ̃ɛ í jĩi hai si balɛ ntɔ ntɔ, nɔ í nyisi araɛ bi Simɔɔ.

³⁵ Nɔ amanɛ minji ŋau mɔ à sisi nŋa mii iyi í ba aŋa si kpãa do bɛi aŋa à mà Jesu si waati iyi wa bu pɛ̃ɛu.

Jesu í tusɛa mɔcɔ maatakã ŋau araɛ

³⁶ Iyi à wasi ideu ku fɔ bɛɛbɛ, ŋɔi nŋu takaɛ í faata wa si anini nŋa [nɔ í ni, Ilaaɔ̃ ku mu nŋɛ laakai ku sũ.]

³⁷ Ŋɔi njo í mu ŋa, zigi nŋa í da. À tamaa bɛi zĩii.

³⁸ Ŋɔi í bee ŋa í ni, mii í ce ì waa biti ŋa. Na mii í ce dimii lasabuu ihɛ̃ í wa si idɔ nŋɛ.

³⁹ I cɔ awɔm do isɛm ŋa. Amui, i lum i cɔ ŋa. Zĩii ci ya nɛ ara do kũkũ si bɛi ì waa yɛm ŋau ihɛ̃ ŋa. [

⁴⁰ Iyi í fɔ bɛɛbɛ í tã nɔ í nyisi ŋa awɔɛ do isɛɛ ŋa.]

⁴¹ Ŋɔi inɔ didɔ̃ nŋa í jɔ̀ a kù dasi naanɛ gbãa gbãa nɔ à wa si biti nla nla, ŋɔi í jɔ̀ í bee ŋa í ni, i kù nɛ mii ku jɛ gɔ ihɛ̃ ŋa?

⁴² Ŋɔi à nya cɛ̃ɛ ku banda akã à naa.

⁴³ Nɔ í gba í ŋɔɔ si waju nŋa.

⁴⁴ Ŋɔi í ye ŋa gigi í ni, ide ŋa iyi ǹ sɔ̃ ŋɛu mbɛ si waati iyi ǹ wa inɔ nŋɛ wo. Ǹ tako ǹ sɔ̃ ŋɛ wo ǹ ni mii ŋa iyi à kɔ na irim si tiai woodai Moizi ŋa do si ti walii ŋau do si iri ku kɔ̃i Davidi ŋau kù nɛ bɛi á ce iyi kù ce.

⁴⁵ Ŋɔi í mu nŋa laakai jiida ku ba a gbɔ yaasei kukɔi idei Ilaaɔ̃u.

⁴⁶ Nɔ í sɔ̃ ŋa í ni, bɛɛbɛi à kɔɔ à ni amu iyi Ilaaɔ̃ í cica an yɛ ijuukpã. Aa kpam, amma an jĩ hai si balɛ si ajɔ mɛɛtasia.

⁴⁷ Nɔ aa waazo do irim si dimi fei, aa sintii hai Zeruzalɛmu. Aa waazo a kpe inɛ ŋa a kpaasi idɔ nɔ Ilaaɔ̃ ku kpa idei dulum du ŋa.

⁴⁸ Iŋɛi aa jɛ sɛɛdai ide ŋau bɛ fei ŋa.

⁴⁹ Nɔ an samba nŋɛ mii iyi Baam í wã ŋɛ dou wa. Amma si iluu ihɛ̃i aa maa wa ŋa hee gbugbãi Ilaaɔ̃ ku naa si ŋɛ wa.

Jesu í nyi kɔkɔi Ilaaɔ̃ má

⁵⁰ Ŋɔi Jesu í gbã mɔcɔɛ ŋau í fitaò ŋa hai inɔ iluu. Nɔ í bɔò ŋa hee ikpa Betani, nɔ í wu awɔ lele í wee nŋa.

⁵¹ Waati iyi wa wee nŋau, ŋɔi í sɛkɛɛ hai bi tu ŋa nɔ í so araɛ í nɛ lele.

⁵² Aŋa mɔ iyi à gulɛ à tɔɔɛ ŋɔi à nyi ikpa Zeruzalɛmu do inɔ didɔ̃ nla nla.

⁵³ Nɔ kpasɛ̃i Ilaaɔ̃ bɛi à ya maa wa waati kãma fei a maa saabu Ilaaɔ̃.