Luku 23 - Bibeli do fee

À bɔò Jesu bi Pilati

¹ Nɔ aŋa fei à dede à bɔò Jesu bi Pilati.

² Ŋɔi à lɔsi dulum ku máa à ni, à ba inɛɛu ihɛ̃ í wasi ku kɔ inɛ ŋa si bisi bɛi aa ce a jɛ ilɛ nwa igũ nɔ wa ganji a sãa ilaalu nlai Romu fiai lɛmpoo. Si anyii nŋu má í ya maa kpe araɛ ilaalu, nɔ í ni nŋuu inɛ iyi Ilaaɔ̃ í cicaui.

³ Nɔ Pilati í beeɛ í ni, awɔi ì jɛ ilaalui Zuifu ŋa? Nɔ Jesu í jɛaa í ni, awɔi ì fɔɔ.

⁴ Nɔ Pilati í sɔ̃ inɛ ngboi woo weei Ilaaɔ̃ ŋau do zamaau í ni, n kù yɛ taale kãma si mɔkɔu ihɛ̃.

⁵ Amma à la do gbugbã à waa ni, í ya maa kosi inɛ ŋa ijai do cioɛ iyi í ya maa ce nŋa. Hai ilɛi Galileei í sintiɛ nɔ í bɔ si ilɛi Zudee fei í bɛi í to wa ihɛ̃ má nsɛi.

À bɔò Jesu si wajui Herodu*

⁶ Iyi Pilati í gbɔ bɛɛbɛ, ŋɔi í bee í ni, kù jɛ mɔkɔu inɛi Galileei ba.

⁷ Nɔ í gbɔ à ni Jesu wa naai hai si ilɛi bommai Herodu. Ŋɔi í ni a bɔòɛ bi Herodu. Wee waati bɛɛbɛ Herodu mɔ í wa Zeruzalɛmu.

⁸ Ŋɔi à bɔò Jesu bi tɛɛ. Iyi Herodu í yɛ Jesu ŋɔi inɔɛ í dɔ̃ ntɔ ntɔ, si na iyi í jɔ̀ hai ku kpɛi wa dɛ ku yɔɔ, na irii laabaauɛ iyi í gbɔ à ya maa fɔu. Ŋɔi í bi ku cea nŋu maamaake gɔ.

⁹ Ŋɔi í bee Jesu ide nkpɔ nkpɔ amma Jesu kù jɛaa ide kãma.

¹⁰ Wee inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau à wa bɛ, à waa máa dulum do gbugbã.

¹¹ Ŋɔi Herodu í jɔ̀ à daa si ibɔ kusĩa gɔ nɔ nŋu do soogeɛ ŋa à waa yaakoɛ nɔ à wasi ku buu. Si anyii nŋu nɔ í jɔ̀ à nyiòɛ bi Pilati má.

¹² Herodu do Pilati wee mbɛɛ ŋai wo, amma ajɔ nŋu bɛi à dɔ̃.

À yɛ taalei Jesu a ba a kpaa

¹³ Pilati í kpe inɛ ngboi woo weei Ilaaɔ̃ ŋa do inɛ ngboi Zuifu ŋa do zamaa nkpɔ má í tɔtɔɔ ŋa.

¹⁴ Nɔ í sɔ̃ ŋa í ni, ì naam mɔkɔu ihɛ̃ wa ŋa, ì ni wa kɔ inɛ ŋa si bisi bɛi aa ce a jɛò ilɛ nwa igũ. Nɔ wee ǹ beeɛ ideu si waju nŋɛ ihɛ̃, amma n kù yɛ si mɔkɔu ide kãma iyi ì waa yɛò taaleɛ ŋa.

¹⁵ Nɔ Herodu mɔ kù yɛ siɛ taale kãma. Na ŋɔi í ce í jɔ̀ à nyiòɛ wa ihɛ̃. Mɔkɔu kù ce kurara kãma iyi í to a kpaa.

¹⁶ Na nŋu, an jɔ̀ a tɛaa kpɔtɔɔ nɔ n jɔ̀ɔ ku nɛɛ. [

¹⁷ Wee si jingaui Iku ku kua fei tilasi Pilati í ya jɔ̀ inɛi piisɔ̃ɔ akãi.]

¹⁸ Ŋɔi aŋa fei à dɔ̃ anu hee lele à waa ni, kpa inɛ ihɛ̃ nɔ i jɔ̀ nwa Barabasi.

¹⁹ Wee à mu Barabasi à dasiɛ piisɔ̃ɔi wo na kosi iyi í ce si inɔ ilu nɔ í nyi í kpa inɛ gɔ má.

²⁰ Ŋɔi Pilati í bee ŋa ide má si na iyi í jɔ̀ í dasi idɔ nŋu ku jɔ̀ Jesu.

²¹ Ŋɔi à dedeò hoya hoya à wasi ku ni, kpakpaɛ si jĩi ku gaau.

²² Ŋɔi Pilati í bee ŋa isɛ gbɛɛtasiaɛ í ni, laalɔ yoomai í bɛi í ce. Amu n kù yɛ siɛ ngɔgɔ iyi í to iku. Na nŋu, an jɔ̀ a tɛaa kpɔtɔɔi nɔ n jɔ̀ɔ ku nɛ.

²³ Amma bɛi Pilati wa fɔ fei, bɛɛbɛ mɔi inɛ ŋau à ya dɔ̃ anu hee lele a maa ni, kpakpaɛ si jĩi ku gaau. Ŋɔi anu ku dɔ̃ nŋau í kãmiaɛ.

²⁴ Nɔ Pilati í dasi idɔ nŋu ku ce bɛi à biu.

²⁵ Nɔ í jɔ̀ nŋa inɛ iyi à biu, inɛ iyi à dasi piisɔ̃ɔ na kosi do inɛ ku kpau, nɔ í da nŋa Jesu si awɔ a ceaa bɛi à bi.

À kpakpa Jesu si jĩi ku gaau

²⁶ Ŋɔi inɛ ŋau à gbã Jesu à waa nɛòɛ. Waati iyi à waa nɛòɛu, ŋɔi à ko mɔkɔ gɔ iyi à ya kpe Simɔɔ, inɛi Sirɛni. Mɔkɔu wa baai hai iko. Ŋɔi à muu à kãa jĩi ku gaauu ku tooò Jesu.

²⁷ Nɔ zamaa nla gɔ wa tooɛ. Si inɔ nŋa inaabo gɔ ŋa à wa bɛ à kpata à waa cã kpokpo na iriɛ.

²⁸ Iyi Jesu í sinda í cɔ ŋa ŋɔi í ni, iŋɛ inaaboi Zeruzalɛmu ŋa, i maà kpata na irim, amma i kpata na iri nŋɛ do na irii ama nŋɛ ŋa.

²⁹ Ntɔ ntɔ, ajɔ wa naa iyi inɛ ŋa aa ni, ilu inɔ didɔ̃i gbɛnda ŋa do inaabo ŋa iyi a kù bí, do inaabo ŋa iyi ama kù mɔmɔ si amɔ nŋa.

³⁰ Waati bɛɛbɛi aa maa sɔ̃ iri kuta ŋa a ni, i cuku i bata wa wa ŋa. Nɔ aa sɔ̃ geete ŋa a ni, i bii wa wa ŋa.

³¹ Ntɔ ntɔ, bii inɛ ŋa à waa cea jĩi tũtũ dimi bɛ ihɛ̃, bɛirei aa na a cea jĩi ngbɛ.

³² Waati iyi à waa nɛò Jesu à kooò woo ce laalɔ minji gɔ ŋa mɔ iyi aa kpa ŋa do nŋu ajɔ.

³³ Ŋɔi à to inya iyi à ya kpe kokoi iriu. Bɛi à kpakpa Jesu si jĩi ku gaauu. Bɛ mɔi à kpakpa woo ce laalɔ minji ŋau, inɛ akã ikpa awɔ njɛɛ, inɛ akã mɔ ikpa awɔ cangaɛ.

³⁴ Nɔ Jesu í ni, Baaba, kpa idei dulum du ŋa, domi a kù mà mii iyi à waa ce. Si anyiɛ sooge ŋau à ta kpasa si jĩnɛɛ ŋa a ba a yɛ iyi inɛ fei á ba. Bɛɛbɛi à ceò ikpɛ̃i jĩnɛɛ ŋau.

³⁵ Ŋɔi zamaau í wa bɛ wa cɔɔ. Nɔ inɛ ngbo ŋau à yaakoɛ à waa ni, í faaba inɛ gɔ ŋa. To, kú faaba araɛ bɛ bii nŋui í jɛ inɛ iyi Ilaaɔ̃ í cicau.

³⁶ Ŋɔi sooge ŋa mɔ à sɛkɛɛ siɛ aŋa mɔ à koo à waa yaakoɛ nɔ à naa inyi ikã ku mɔ.

³⁷ Nɔ à sɔ̃ɔ à ni, bii awɔi í jɛ ilaalui Zuifu ŋa, awɔ takaɛ faaba araɛ.

³⁸ Si dee deei antaii iriɛ à kɔɔ à ni, inɛ ihɛ̃i í jɛ ilaalui Zuifu ŋa.

³⁹ Inɛ akãi woo ce laalɔ ŋa iyi à kpakpa si jĩi nɔu wa sɔ̃ Jesu ide nfe wa ni, kù jɛ awɔi ì jɛ inɛ iyi Ilaaɔ̃ í cicau ba. To, faaba araɛ nɔ i faaba awa mɔ.

⁴⁰ Amma inɛ akãu mɔ í jɛaa í ni, i kù waa ce njoi Ilaaɔ̃, baa awɔ iyi iŋɛò fei ì waa yɛ ijuukpã akã?

⁴¹ Bii awai à waa kpã iju bɛɛbɛ, dee deei, domi à waa sã nwa gbesei mii iyi à cei. Amma njɛ kù ce laalɔ kãma.

⁴² Ŋɔi í sinda í sɔ̃ Jesu í ni, waati iyi aa koo i jɛ bommaɛ, ye gigim.

⁴³ Nɔ Jesu í jɛaa í ni, ntɔ ntɔ, ǹ wa n sɔ̃ɛi, nnyi mɔm aa wɛɛ do amu lelei Aɔ̃.

Waati iyi Jesu í ku

⁴⁴ Ŋɔi zakai dasã nkpau ilu í kuku si ilɛu fei hee í koo í to isɔ mɛɛtai alɛ.

⁴⁵ Inunu kù waa má inya má. Nɔ ridooi kpasɛ̃i Ilaaɔ̃u í ga í kpɛ̃ minji.

⁴⁶ Ŋɔi Jesu í la do gbugbã í ni, Baaba, ǹ daaɛ hundem si awɔ. Iyi í fɔ bɛɛbɛ nɔ í ku.

⁴⁷ Iyi inɛ ngboi sooge ŋau í yɛ mii iyi í ceu, ŋɔi í saabu Ilaaɔ̃ í ni, ntɔ ntɔ inɛɛu ihɛ̃ kù nɛ taale kãma.

⁴⁸ Nɔ inɛ ŋa mɔ iyi à naa ku cɔ mii iyi á na ku ceu fei à yɔɔ nɔ à sinda à nɛ do inɔ kufɔ nla nla.

⁴⁹ Inɛ ŋa iyi à mà Jesu fei do inaabo ŋa iyi à tooɛ wa hai ilɛi Galileeu, à leekĩ hee jĩijĩ à waa cɔ mii iyi wa ce.

À dasi ikui Jesu balɛ

^50-51 Mɔkɔ gɔ iyi à ya kpe Zozɛfu, inɛi Arimatee ilu akãi Zuifu ŋau í naa bɛ. Mɔkɔu inɛ dee deei, wa ce jiida, nɔ í wɛɛò kpãa ku cɔ iyi Ilaaɔ̃ á na ku jɛ bommaɛ. Í wa si igbɛi woo kiiti ŋa, amma kù jɛsi ide nŋa iyi à jilɛ a cea Jesu wo.

⁵² Mɔkɔu í bɔ bi Pilati í koo í tɔɔ ikui Jesu.

⁵³ Ŋɔi Pilati í jɛaa si, nɔ Zozɛfu í kitaɛ wa hai si antaii jĩi ku gaauu nɔ í biiɛ do acɔ fũfũ titɔ̃ gɔ í bɛi í koo í suu. Í suui si isai kuta gɔ iyi à gbe wo nɔ a kù si inɛ gɔ bɛ titã.

⁵⁴ Wee ajɔi sɔɔlui kusĩmii, iyi hai alɛu ajɔi kusĩmiu á sinti.

⁵⁵ Ŋɔi inaabo ŋa iyi à too Jesu wa hai ilɛi Galileeu à too Zozɛfu nɔ à yɛ balɛu do bɛi à si Jesu fei.

⁵⁶ Ŋɔi à sinda à bɔ ide à koo à ce sɔɔlui ikpo ku dɔ̃ inúnù do tuae ŋa wa. Si ajɔi kusĩmiu nɔ à sĩmi si bɛi wooda í fɔ.