Luku 22 - Bibeli do fee

Inɛ ngbo ŋa à waa busi njɛ a kpa Jesu

¹ Jingaui Pɛ̃ɛ hai nɛ levɛ̃ɛ iyi à ya kpe jingaui Iku ku kuau í maai wa.

² Inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau à waa dɛ kpãa bɛi aa ce a kpaò Jesu, amma à waa ce njoi zamaau.

Zudasi á fita anyii Jesu

³ Ŋɔi Seetam í lɔ idɔi Zudasi iyi à ya kpe Isikariɔti. Zudasiu inɛ akãi mɔcɔ maateeji ŋaui.

⁴ Zudasi í koo í dĩ anu tɔɔsi do inɛ ngboi woo weei Ilaaɔ̃ ŋau do inɛ ngboi woo degbe kpasɛ̃i Ilaaɔ̃ ŋau do yaase bɛi á ce ku da nŋa Jesu si awɔ.

⁵ Ŋɔi inɔ nŋa í dɔ̃ nɔ à ni aŋa aa muaa fia.

⁶ Nɔ Zudasi í jɛsi, nɔ wa dɛ kpãa bɛi á ce ku da nŋa Jesu si awɔ zamaau ku maà ti ku mà.

Jesu í jɔ̀ à ce sɔɔlui jingau

⁷ Ŋɔi ajɔi jingaui Pɛ̃ɛ hai nɛ levɛ̃ɛu í to wa si bii à ya kpa ama angudã ŋa si jingaui Iku ku kua a ceò kuweeu.

⁸ Ŋɔi Jesu í bɛ Piɛɛ do Zãa í ni, i koo i ce sɔɔlui jingaui Iku ku kuau ka jɔɔ ŋa.

⁹ Ŋɔi à beeɛ à ni, iwoi ì bi kaa ce sɔɔluu.

¹⁰ Ŋɔi í sɔ̃ ŋa í ni, bii ì lɔ inɔ iluu ŋa aa yɛ mɔkɔ gɔ wa so inyi jɔlɔ. I tooɛ. Mɔkɔu á koo ku lɔ kpasɛ̃ gɔ. Kpasɛ̃ bii á lɔu

¹¹ i koo i sɔ̃ ilu kpasɛ̃u i ni ŋa, Mɛɛtu í ni ka beeɛ ile bii nŋu á jɛ jingaui Iku ku kua do mɔcɔi nŋu ŋa.

¹² Mɔkɔu á bɔò ŋɛ si antaii ile kukpɛkɛ gɔ nɔ á nyisi ŋɛ ilaawa nla gɔ iyi à ce sɔɔlui fei ndɛɛ tã. Bɛi aa ce nwa sɔɔlui jingauu ŋa.

¹³ Iyi à nɛ nɔ à koo à ba mii ŋau fei í cei dee dee si bɛi í sɔ̃ ŋau, nɔ à ce sɔɔlui jingauu.

Ijɛ iyi aa ka yeò gigii ikui Jesu

¹⁴ Iyi waatiu í to, Jesu do mɔcɔɛ ŋau à bɔ tengi bii à ce sɔɔluu, nɔ à buba à waa jɛ.

¹⁵ Ŋɔi Jesu í sɔ̃ ŋa í ni, ǹ bi ntɔ ntɔ n ce jingaui Iku ku kuau ihɛ̃i awaɛ ŋa n bɛi n yɛ ijuukpãm nɔu.

¹⁶ Nɔ ntɔ ntɔ ǹ wa n sɔ̃ ŋɛi, n kaa n jɛ jingau ihɛ̃ má bii kù jɛ si bommai Ilaaɔ̃.

¹⁷ Iyi í fɔ bɛɛbɛ í tã, ŋɔi í so kɔɔfu í saabu Ilaaɔ̃ nɔ í sɔ̃ mɔcɔɛ ŋa í ni, i gba vɛ̃ɛ iyi í wa si kɔɔfuu ihɛ̃ i mɔ iŋɛ fei.

¹⁸ Amma ǹ wa n sɔ̃ ŋɛi, hai nsɛi amu n kaa n mɔ vɛ̃ɛ má hee andunya titɔ̃i Ilaaɔ̃ koo toò wa.

¹⁹ Si anyii nŋu, í so pɛ̃ɛ nɔ í saabu Ilaaɔ̃ titã í bɛi í bububuɛ, nɔ í na ŋa í ni, iyi ihɛ̃i í jɛ aram [iyi ǹ na na iri nŋɛ. I ya coo ŋa i maa yeò gigim.

²⁰ Iyi à jɛ à tã ŋɔi í so kɔɔfu má í na ŋa í ni, kɔɔfuu ihɛ̃i í jɛ nyindai akabuu titɔ̃ iyi Ilaaɔ̃ í dĩ do njɛm iyi á nikã na iri nŋɛ si ikum.]

²¹ Amma i cɔ, inɛ iyi á zambam nɔu wee í wa ihɛ̃ awaò à waa jɛ.

²² Amu Amai Amanɛ an ku si bɛi Ilaaɔ̃ í jilɔɔ. Amma ijuukpãi inɛ iyi á zambam nɔu á la.

²³ Ŋɔi à sinti ku bee njɛ à waa ni, yooi á yɔkɔ ku ce dimiɛ si inɔ nwa.

Yooi í jɛ inɛ ngbo

²⁴ Ŋɔi kakɔɔ í dede si aninii mɔcɔ ŋau, à waa bee njɛ inɛ iyi á jɛ inɛ ngbo si inɔ nŋa.

²⁵ Ŋɔi Jesu í sɔ̃ ŋa í ni, amanlui andunya ŋa à ya maa taa inɛ ŋa amanlu ku jɛi, nɔ inɛ ngbo ŋa iyi à waa nyisi gbugbã nŋa à ya bi a kpe aŋa woo ce jiida ŋa.

²⁶ Amma iŋɛ i maà yɛ bɛɛbɛ ŋa. I jɔ̀ inɛ iyi í la í re si inɔ nŋɛ ku baa ku jɛ keeke nŋɛ, nɔ inɛ iyi í jɛ inɛ ngbo kú jɛ amaacɛ nŋɛ.

²⁷ Inɛ iyi í buba wa jɛ si antaii taabu do inɛ iyi wa naaò ijɛu wa, yoo nŋai í re. Kù jɛ inɛ iyi wa jɛui? To, amu wee ǹ wa inɔ nŋɛi bɛi inɛ iyi wa naaò ijɛu wa.

²⁸ Iŋɛi ì temua do amu si wahalam ŋau ŋa.

²⁹ Na nŋu, si bɛi Baaba í jilɛɛm bommau, bɛɛbɛ mɔi amu mɔ ǹ wa n jilɛ nŋɛ

³⁰ ku ba i jɛ nɔ i mɔ do amu si bommam ŋa, nɔ i buba si batai amanlu ŋa i kiitiò dimi maateejii Izirɛli ŋau.

Jesu wa fɔ iyi Piɛɛ á jã ku ni kù mà nŋu

³¹ Ŋɔi Jesu í ni, Simɔɔ, Simɔɔ, Seetam í tɔɔ kpãa ku ba ku fɛɛ bɛi iya.

³² Amma amu ǹ ce kutɔɔ na iriɛ ku ba naanɛ ku dasiɛ ku maà gaizia. Nɔ awɔ, waati iyi aa kpaasi idɔ má, mua kpaasiɛ ŋa mɔ gbugbã.

³³ Ŋɔi Piɛɛ í ni, Lafɛ̃ɛ, ǹ tã sɔɔlu awaɛ ka bɔ piisɔ̃ɔ, bii iku mɔi ka ku ajɔ.

³⁴ Ŋɔi Jesu í ni, Piɛɛ, ǹ wa n sɔ̃ɛi, idũuyi mɔm, hee ajɛɛ ku maa kɔ, aa jã isɛ gbɛɛta i ni i kù màm.

Taalili do bɔgɔ do taakuba

³⁵ Si anyii nŋu ŋɔi Jesu í bee ŋa í ni, si waati iyi ǹ bɛ ŋɛ hai mu taalili do bɔgɔ do baata ì kua ngɔgɔ ŋa? Ŋɔi à jɛ à ni, aawo, a kù kua nkãma.

³⁶ Ŋɔi í ni, to, nsɛi, kù jɛ bɛɛbɛ má. Inɛ iyi í nɛ taalili ku soo, bɛɛbɛ mɔi inɛ iyi í nɛ bɔgɔ ku soo. Inɛ mɔ iyi kù nɛ taakuba, ku ta ibɔɛ ku raò.

³⁷ Si anyii nŋu má, í sɔ̃ ŋa í ni, ideu ihɛ̃ iyi à kɔ na irim nɔu á cei, si bɛi à ni, à dooaɛ si woo ce laalɔ ŋa. Kù nɔ kù nɛ bɛi á ce iyi kù ce bɛɛbɛ.

³⁸ Ŋɔi mɔcɔ ŋau à ni, Lafɛ̃ɛ, taakuba minji gɔ wee. Nɔ í ni, ka jɔ̀ ide nŋu bɛ.

Jesu wa ce kutɔɔ si geetei Olivie

³⁹ Iyi Jesu í fɔ bɛɛbɛ í tã nɔ í fita hai inɔ iluu í bɔ geetei Olivie si bɛi í nɛ dɔ̃ɔnɛɛ. Nɔ mɔcɔɛ ŋa à waa tooɛ.

⁴⁰ Iyi à to inyau, ŋɔi í sɔ̃ ŋa í ni, i ce kutɔɔ ŋa ku ba i maà dási kulɛlɛ ŋa.

⁴¹ Si anyii nŋu nɔ í sɛkɛɛ í jɔ̀ ŋa zakai kujĩi kutai awɔ nɔ í gulɛ bɛ wa ce kutɔɔ

⁴² wa ni, Baaba, bii ì bi, aa jɔ̀ wahalau ihɛ̃ ku jĩim. Amma ku maà ti ku jɛ ti idɔɔbim, jɔ̀ idɔɔbiɛ ku ce. [

⁴³ Ŋɔi amaleka gɔ í naa siɛ wa hai lele í naa í muaa gbugbã.

⁴⁴ Si inɔ kufɔ nla nlau wa ce kutɔɔui do gbugbã, nɔ í da koko hee wa tontoo ilɛ. Koko iyi í dau í yɛi bɛi njɛ.]

⁴⁵ Iyi í ce kutɔɔu í tã ŋɔi í dede í bɔ bi mɔcɔɛ ŋau nɔ í koo í ba à waa sĩ njoo do inɔ kufɔ.

⁴⁶ Nɔ í bee ŋa í ni, na mii í ce ì waa sĩ njoo ŋa. I dede i ce kutɔɔ ŋa ku ba i maà dasi kulɛlɛ ŋa.

À mu Jesu

⁴⁷ Iyi Jesu wa fɔ bɛɛbɛ gbakã ŋɔi Zudasi inɛ akãi mɔcɔ maateeji ŋau í to wa do zamaa gɔ. Iyi í to wa í naa wa baabaa Jesu.

⁴⁸ Ŋɔi Jesu í ni, Zudasi, do dimii fɔɔ bɛ ihɛ̃i aa zambaò amu Amai Amanɛ?

⁴⁹ Inɛ ŋa iyi à waa too Jesuu, iyi à yɛ mii iyi wa ce, ŋɔi à bee Jesu à ni, Lafɛ̃ɛ, ka da ŋa do taakubau?

⁵⁰ Ŋɔi inɛ akã nŋa í cafe itĩ njɛi amaacɛi woo wee nlai Ilaaɔ̃u í buu.

⁵¹ Amma Jesu í ni, i leekĩ, i to bɛɛbɛ. Nɔ í lu itĩi mɔkɔu nɔ í ba iri.

⁵² Si anyii nŋu Jesu í bee inɛ ngboi woo weei Ilaaɔ̃ ŋa do inɛ ngboi woo degbe kpasɛ̃i Ilaaɔ̃ ŋau do inɛ ngboi Zuifu ŋa iyi à naa siɛu í ni, amui ì naa ku mu ŋa do taakuba do golo ŋa bɛi woo ce ile?

⁵³ Ajɔ fei ǹ ya n wa si inɔ nŋɛ si inɔ kpasɛ̃i Ilaaɔ̃, nɔ i kù mum ŋa. Amma waatiu ihɛ̃i í jɛ tu ŋɛ do gbugbãi ilu kuku.

Piɛɛ í jã í ni nŋu kù mà Jesu

⁵⁴ Iyi inɛ ŋau à mu Jesu, ŋɔi à bɔòɛ kpasɛ̃i woo wee nlai Ilaaɔ̃u. Nɔ Piɛɛ í wa hee jĩijĩ wa too ŋa wa do anyi.

⁵⁵ Ŋɔi inɛ ŋa à ko ina si aninii bantumai kpasɛ̃u à waa buba bɛ. Nɔ Piɛɛ mɔ í koo í buba bi tu ŋa bɛ.

⁵⁶ Ŋɔi inaabo woo ce icɛ gɔ í yɔɔ wa buba kɔkɔi inau nɔ í kãsiɛ iju í ni, inɛɛu ihɛ̃ mɔ í tako í wa bi Jesu wo.

⁵⁷ Amma í jã í ni, abooyi, n kù màa.

⁵⁸ Iyi í ce sãa má ŋɔi inɛ gɔ í yɔɔ nɔ í ni, awɔ mɔ inɛ akãi inɛ ŋaui. Amma Piɛɛ í ni, mɔkɔɔyi, n kù jɛ inɛ nŋa.

⁵⁹ Si anyii nŋu zakai isɔ akã má, ŋɔi inɛ gɔ í fɔ do gbugbã í ni, ntɔ ntɔ, mɔkɔu ihɛ̃ mɔ í ya wa bi Jesu wo domi nŋu mɔ inɛi Galileei.

⁶⁰ Amma Piɛɛ í ni, awɔ bɛ, n kù mà bɛi ì waa bi i fɔ. Si bɛi wa fɔ ideu gbakã ŋɔi ajɛɛ wa kɔ.

⁶¹ Nɔ Jesu í sinda í cɔ Piɛɛ. Ŋɔi Piɛɛ í ye gigii ide iyi Lafɛ̃ɛ í sɔ̃ɔu wo í ni, nnyi hee ajɛɛ ku maa kɔ aa jã isɛ gbɛɛta i ni i kù màm.

⁶² Ŋɔi í fita waduude í koo wa kpata do inɔ kufɔ.

Inɛ ŋa à yaako Jesu

⁶³ Inɛ ŋa iyi à mu Jesuu à waa buu nɔ à wasi ku cãa.

⁶⁴ À bii wajuɛ à bɛi à beeɛ à waa ni, ce walii. Yooi í cãɛ.

⁶⁵ Nɔ à buu dimii arabu ikã ikã fei.

Jesu í wa wajui igbɛi woo kiiti ŋa

⁶⁶ Iyi iju í má ŋɔi igbɛi inɛ ngboi Zuifu ŋau à tɔtɔɔ nɔ inɛ ngboi woo weei Ilaaɔ̃ ŋau do woo kɔ inɛ ŋa si wooda ŋau à bɔò Jesu bi igbɛi woo kiiti ŋa.

⁶⁷ Nɔ à beeɛ à ni, sɔ̃ wa bii awɔi ì jɛ inɛ iyi Ilaaɔ̃ í cicau. Ŋɔi Jesu í jɛ nŋa í ni, baa bii ǹ sɔ̃ ŋɛ i kaa dasi naanɛ ŋa.

⁶⁸ Nɔ bii ǹ bee ŋɛ ide gɔ i kaa jɛɛm ŋa.

⁶⁹ Amma hai nsɛi amu Amai Amanɛ an bubai si awɔ njɛi Ilaaɔ̃ ilu gbugbã.

⁷⁰ Ŋɔi aŋa fei à ni, debɛi, awɔ Amai Ilaaɔ̃i? Ŋɔi í jɛ nŋa í ni, iŋɛi ì fɔɔ ŋa.

⁷¹ Ŋɔi à ni, sɛɛda yoomai à waa degbe má. Awa taka nwa à gbɔɔ tã hai si gɛlɛɛ.