Luku 21 - Bibeli do fee

Idei fia iyi abo jaaɔ̃ gɔ í dasi

¹ Iyi Jesu í fɔ bɛɛbɛ í tã ŋɔi í wu iju wa cɔ bɛi ilu fia ŋa à waa dasi fia si kpakoi kɔlɛtiu.

² Nɔ í yɛ abo jaaɔ̃ ilu are gɔ mɔ í sɔsi kpɛkɛlɛ keeke minji gɔ.

³ Ŋɔi í ni, ntɔ ntɔ, jaaɔ̃ ilu areu ihɛ̃ í dasi fia í re inɛ ŋa iyi à gbe fei.

⁴ Inɛ ŋa iyi à gbe ŋau fei, iyi í lesi antaii fia nŋa ŋai à dasi, amma abou, baa do iyi í jɛ ilu are, andi iyi í nɛ feii í dasi bɛ, nkãma kù gbea iyi á maa wɛɛò má.

Jesu wa fɔ idei kpasɛ̃i Ilaaɔ̃* ku lɛgɛ

⁵ Ajɔ nŋu gɔ inɛ gɔ ŋa à fɔ à waa ni kpasɛ̃i Ilaaɔ̃u í sĩa do kutaɛ ŋa fei do amua ŋa iyi à na Ilaaɔ̃ à ceaò booda. Iyi Jesu í gbɔ bɛɛbɛ ŋɔi í ni,

⁶ mii ŋau bɛ iyi ì waa yɛ fei ŋa ajɔ akã á kpa iri. Kuta baa akã kaa na ku maa lesi njɛ bɛ má, aa kɛkɛɛ mbɛ fei.

Wahala iyi á naa si waatii ankãanyi

⁷ Ŋɔi à beeɛ à ni, Mɛɛtu, waati yoomai inɛ nŋu á to wa. Nyinda yoomai aa ka tako ka yɛ.

⁸ Ŋɔi Jesu í sɔ̃ ŋa í ni, i ce laakai ŋa i maà jɔ̀ inɛ gɔ ku dĩ iju nŋɛ, domi inɛ ŋa iyi aa na a maa naa akã akã a maa ni aŋai à jɛ inɛ iyi Ilaaɔ̃ í cicau aa kpɔ. Nɔ aa nyi a sɔ̃ ŋɛ má a ni, waatiu í maai wa mbɛ. Amma i maà too ŋa ŋa.

⁹ Bii ì gbɔ à waa fɔ laabaaui igũ ŋa do ija ŋa, i maà jɔ̀ zigi nŋɛ ku da, domi nŋu ŋau bɛi á tako ku to wa. Amma kù jɛ iri ku kpai andunyau bɛ titã.

¹⁰ Ŋɔi í sɔ̃ ŋa má í ni, dimi gɔ ŋa aa ya na a maa ja do dimi mmu ŋa, nɔ ilaalu gɔ ŋa mɔ aa maa ja do ilaalu mmu ŋa.

¹¹ Ilɛ á yaya bii gɔ ŋa nla nla, nɔ si ilɛ gɔ ŋa mɔ ari á ce do bɔ̃ɔ laalɔ ŋa iyi á kpa inɛ nkpɔ. Aa na i yɛ maamaake laalɔ ŋa do nyinda nla nla ikpa lele hee zigi nŋɛ ku da.

¹² Amma hee nŋu ŋau bɛ fei ku maa ce aa mu ŋɛ a kpã ŋɛ iju. Aa dasi ŋɛ awɔi woo kiiti ŋa ile bii à ya ce kutɔtɔɔ ŋa, aa dasi ŋɛ piisɔ̃ɔ, nɔ a bɔò ŋɛ bi amanlu ŋa do bi ilu ilɛ ŋa na irim.

¹³ Nŋu ŋau bɛi á mu nŋɛ kpãa i jɛò sɛɛdam ŋa.

¹⁴ Na nŋu, i jilɛ idɔ nŋɛ i maà ya biti do ide iyi aa fɔ i nyaò ara nŋɛ ŋa.

¹⁵ I maà biti ŋa domi an mu nŋɛ ide do bisi iyi mbɛɛ nŋɛ ŋa kãma nŋa a kaa yɔkɔ a jã ŋɛ hee má jɛ a kɔ̀.

¹⁶ Baa iyeò baa nŋɛ ŋa do igbã nŋɛ ŋa do ifɔ nŋɛ ŋa do nyaanze nŋɛ ŋa do kpaasi nŋɛ ŋa, aa zamba ŋɛ nɔ a jɔ̀ a kpa inɛ nkpɔ si inɔ nŋɛ.

¹⁷ Inɛ fei á cé ŋɛi na irim.

¹⁸ Amma baa ntoi iri akã nŋɛ kaa da ku nyɔ.

¹⁹ I temua ŋa, aa ba faabai hunde nŋɛ.

Jesu wa fɔ idei iri kulɛgɛi Zeruzalɛmu*

²⁰ Ajɔ iyi ì yɛ woo ja igũ ŋa à to wa Zeruzalɛmu à buu koe, i mà ŋa iyi kulɛgɛɛ í maai wa mbɛ.

²¹ Waati bɛɛbɛ inɛ ŋa iyi à wa ilɛi Zudee a sa a bɔ iri kuta ŋau. Inɛ ŋa mɔ iyi à wa inɔ ilu Zeruzalɛmu takaɛ a sa a fita, inɛ ŋa mɔ iyi à wa iko ku sũ a maà bɔ inɔ ilu má.

²² Ntɔ ntɔ, waatiu á jɛ waati iyi Ilaaɔ̃ á kpã inɛ ŋa iju ku sã gbese ku ba mii iyi à fɔ si kukɔi ideɛ ku kɔ̃.

²³ Waati bɛɛbɛ wahalai bãasĩ ŋa do ayawo ŋa á caa. Ijuukpã nla nlai á wa si ilɛu si na iyi í jɔ̀ Ilaaɔ̃ á sã idɔɔkɔ̃ɛ si inɛ ŋau.

²⁴ Aa maa kpa ŋa do taakuba, nɔ a mu ŋa aru si ilɛ ŋa fei. Dimi mmu ŋa aa tɛɛsɛ Zeruzalɛmuui hee waatiu koo kpaò iri.

Kubaai Amai Amanɛ*

²⁵ Aa yɛ nyinda si inunu do si cukpa do si leleaɔ̃ ŋa. Nɔ si ilɛ ibai tenku do kucãi inyiu á jɔ̀ dimi ŋa a biti hee a kaa mà baa bɛi aa ce.

²⁶ Baa njo alála á jɔ̀ inɛ ŋa a kasãm na mii ŋa iyi á na ku ce si andunyau ihɛ̃, domi gbugbãi lele ŋa aa maa yayai.

²⁷ Waati bɛɛbɛi inɛ ŋa aa yɛ amu Amai Amanɛ n faata wa si kudũi ijĩ do gbugbã nla nla do amboe.

²⁸ Bii iyi bɛ ŋa à sinti ku ce, i leekĩ i mu ara nŋɛ ŋa, domi faaba nŋɛi í maai wa.

Mii iyi jĩi ndii figi wa kɔ inɛ ŋa si

²⁹ Nɔ Jesu í kpa nŋa mɔnda gɔ í ni, i cɔ jĩi ndii figi do jĩi ŋa iyi à gbe fei.

³⁰ Bii ì yɛ í sinti ku wu wua ŋa, iŋɛ taka nŋɛ ì ya mà ŋa iyi atɛ í maai wai.

³¹ Bɛɛbɛ mɔi bii iŋɛ mɔ ì yɛ mii ŋau bɛ wa ce, i mà ŋa iyi bommai Ilaaɔ̃i í maai wa.

³² Ntɔ ntɔ ǹ wa n sɔ̃ ŋɛi, inɛi nsɛi ŋa, kù jɛ aŋa feii aa ku ideu ihɛ̃ ku bɛi ku ce.

³³ Lele do ilɛ fei á na ku tã amma idem ŋa a kaa tã pai.

I ce laakaii ara nŋɛ ŋa

³⁴ I ce laakaii ara nŋɛ ŋa ku ba i maà na i jɛ hai nɛ laakai ŋa na atɛ̃ ku mɔ do ijɛ ku bi do lasabui mii ndii andunya ŋa. Bii kù jɛ bɛɛbɛ ajɔu á na ku boe ŋɛi bɛi cɛkũm,

³⁵ domi á na ku ba inɛ ŋa iyi à wa si andunyau ihɛ̃ fei.

³⁶ Na nŋu, i cɔ kpãa i maa ceò kutɔɔ ŋa waati kãma fei ku ba i ba gbugbã i gbã si mii iyi wa naa fei ŋa, nɔ i yɔkɔ i leekĩ si wajui amu Amai Amanɛ ŋa.

³⁷ Ajɔ fei Jesu í ya kɔ inɛ ŋa si cio kpasɛ̃i Ilaaɔ̃, alɛ nɔ koo sũ geetei Olivie.

³⁸ Bii iju í má inɛ fei í ya naa kpasɛ̃i Ilaaɔ̃ bɛ ku gbɔò ideɛ iyi wa fɔ.