Luku 2 - Bibeli do fee

Kubíi Jesu

¹ Waati bɛɛbɛ, ilaalu nlai Romu iyi à ya kpe Ogusitu í na wooda í ni a ce inɛ ŋa kuka si ilɛɛ fei.

² Kuka sinteu ihɛ̃ à cooi si waati iyi Kiriniusi wa jɛ ilu ilɛ si ilɛi Siri.

³ Nɔ inɛ fei í nɛ si iluɛ koo na iriɛ a kɔɔ si tia.

⁴ Ŋɔi Zozɛfu mɔ í nɛ hai Nazarɛti si ilɛi Galilee, í bɔ ilɛi Zudee si ilui Davidi iyi à ya kpe Betelehɛmu, domi nŋu mɔ nyaanzei Davidii wa jɛ.

⁵ Í bɔ ku na iriɛ, nŋu do Maari abo bãasĩɛu.

⁶ Si waati iyi à wa bɛ, ajɔ í na í to si bii á bí amaɛ.

⁷ Nɔ í bí ama sinteɛ, ama inɛmɔkɔ. Í biiɛ do acɔ nɔ í tɔɔ si bi ku jɛi angudã ŋa, si na iyi í jɔ̀ inya kù wɛɛ bii inɛ njoo ŋa aa sɔ.

Amaleka* gɔ ŋa à naa bi woo degbe ŋa

⁸ Woo degbe gɔ ŋa à wa inɔ sako bɛ, à waa degbe angudã ŋa idũ.

⁹ Ŋɔi amalekai Ilaaɔ̃ gɔ í faata si ŋa wa, nɔ inya kumá nla gɔ í kaako ŋa. Inya kumáu amboei Lafɛ̃ɛui. Ŋɔi njo í mu ŋa jiida.

¹⁰ Amma amalekau í sɔ̃ ŋa í ni, i maà jɔ̀ njo ku mu ŋɛ. Laabaau jiidai ǹ naa ku sisi nŋɛ, iyi á jɛa inɛ fei inɔ didɔ̃ nla nla.

¹¹ Laabaauu wee. Nnyi, si ilui Davidi, à bí nŋɛ Woo faaba. Nŋui í jɛ Lafɛ̃ɛ, inɛ iyi Ilaaɔ̃ í cicau.

¹² Yaase bɛi aa màaò ŋa wee. Aa yɛ ama kpɔtɔɔ gɔ bɛ à biiɛ do acɔ, wa sũ si bi ku jɛi angudã ŋa.

¹³ Iyi í fɔ bɛɛbɛ í tã ŋɔi gbakã amaleka mmu gɔ ŋa à naa bi tɛɛ aŋa nkpɔ nkpɔ nɔ à saabu Ilaaɔ̃ à waa ni,

¹⁴ Amboe ku jɛ ti Ilaaɔ̃ hee lele. Nɔ laakai ku sũ ku wa si ilɛ si inɛ ŋa iyi Ilaaɔ̃ í bi.

Woo degbe ŋau à bɔ Betelehɛmu

¹⁵ Ŋɔi amaleka ŋau à jɔ̀ ŋa à nyi lele. Si anyii nŋu, woo degbe ŋau à sabuu njɛ à waa ni, debɛi, ka bɔ Betelehɛmu, kaa cɔ mii iyi í ce, iyi Aɔ̃ Lafɛ̃ɛ í jɔ̀ à mà.

¹⁶ Nɔ à ce saasa à koo. Ŋɔi à to nɔ à yɛ Maari do Zozɛfu, do ama kpɔtɔɔu bii wa sũ si bi ku jɛi angudã ŋa.

¹⁷ Iyi à yɔɔ, à waa sisi mii iyi amalekau í sɔ̃ ŋa si gãmɛi amau.

¹⁸ Nɔ inɛ ŋa iyi à gbɔ idei woo degbe ŋau fei ideu í ya mu ŋa bitii.

¹⁹ Amma Maari njɛ wa mu fei ndɛɛ si idɔɛ, nɔ wa lasabu si do laakai.

²⁰ Ŋɔi woo degbe ŋau à sinda à waa nɛ. Nɔ à waa fɔ idei amboei Ilaaɔ̃, à waa saabuɛò na irii mii iyi à gbɔ do iyi à yɛ fei, domi fei ndɛɛ í cei si bɛi amalekau í sisi nŋa.

À bɔò Jesu kpasɛ̃i Ilaaɔ̃

²¹ Si ajɔ mɛɛjɔsia ŋɔi à sɔɔ Jesu, iri iyi amalekau í ni a kpoo hai waati iyi iyeɛ kù nɛ asĩu. Ajɔ nŋu bɛ mɔi à dasiɛ bango.

^22-23 Mii iyi Moizi í kɔ si woodaɛ wee. Í ni, ama inɛmɔkɔ iyi à bí sinte fei aa nyaa ikãi ku jɛ ti Aɔ̃ Lafɛ̃ɛ. Na ŋɔi í jɔ̀ iyi waati í to si bii aa ce kuwee Maari ku bɛi ku maaju si ayawo iyi í ceu Zozɛfu do Maari à so amau à bɔò Zeruzalɛmu ku ba a nyisi Aɔ̃ Lafɛ̃ɛ

²⁴ nɔ a ce kuwee. Kuweeu do kufe minji walakɔ do ankasiidi minjii à ya cooò si bɛi à kɔɔ si woodai Aɔ̃ Lafɛ̃ɛ.

²⁵ Wee mɔkɔ gɔ í wa Zeruzalɛmu bɛ à ya kpoo Simeɔ̃. Mɔkɔu í jɛ inɛ dee dee nɔ í mà bɛɛrɛi Ilaaɔ̃. Wa degbe Ilaaɔ̃ ku tũ idɔi inɛi Izirɛli ŋa nɔ Hundei Ilaaɔ̃ í wɛɛ do nŋu.

²⁶ Hundei Ilaaɔ̃u í sɔ̃ɔ wo í ni á yɛ inɛ iyi Aɔ̃ Lafɛ̃ɛ í cicau ku bɛi ku ku.

²⁷ Ŋɔi Hundeu í tale siɛ kpasɛ̃i Ilaaɔ̃ ku bɔ. Iyi iyeò baai Jesu ŋa à lɔòɛ bɛ ku ba a ceaa bɛi wooda í fɔ,

²⁸ ŋɔi Simeɔ̃ í gbaa í muu si awɔɛ í saabu Ilaaɔ̃ wa ni,

²⁹ Lafɛ̃ɛ, nsɛi jɔ̀ amu woo ce icɛɛ n jɔ̀ andunya do laakai ku sũ si bɛi ì sɔ̃m wo,

³⁰ domi ijum í yɛ faabaɛ,

³¹ iyi ì ce sɔɔluɛ nɔ dimi fei á yɔɔ.

³² Nŋui í jɛ inya kumá iyi á nyisi dimi mmu ŋa kpãaɛ. Nɔ nŋui í jɛ amboei inɛɛ ŋa, inɛi Izirɛli ŋa.

Walii* iyi Simeɔ̃ í ce

³³ Ide iyi Simeɔ̃ wa fɔ si gãmɛi amau í mu iyeò baaɛ fei biti.

³⁴ Simeɔ̃ í wee nŋa nɔ í sɔ̃ Maari iyei Jesuu í ni, Ilaaɔ̃ í cica amau ihɛ̃i ku kɛkɛ inɛ nkpɔ nɔ ku dede inɛ nkpɔ mɔ si inɔi inɛi Izirɛli ŋa. Nŋui Ilaaɔ̃ í bɛ wa ku jɛ bɛi nyinda, amma inɛ ŋa aa kɔ siɛ.

³⁵ Nɔ lasabui idɔi inɛ nkpɔ kú fita gbugbãa. Awɔ takaɛ, inɔ kufɔ á gũɛ ajɔ akã si idɔɛ bɛi taakuba.

Ana walii* inaabo

³⁶ Inaabo walii gɔ mɔ í wa bɛ à ya kpoo Ana, amai Fanuɛli si dimii Azɛɛ ŋa. Abou í gbo ntɔ ntɔ. Í ce muau zakai adɔ̃ mɛɛje mɔkɔɛ kù bɛi kù na kù wɛɛ,

³⁷ nɔ í buba jaaɔ̃ adɔ̃ nkpɔ nkpɔ. Nsɛi abou í nɛ adɔ̃ cinɛ do mɛɛ, nɔ ci ya fita hai bantumai kpasɛ̃i Ilaaɔ̃. Dasã do idũ fei, í ya maa cea Ilaaɔ̃ icɛi do anu kudĩ do kutɔɔ.

³⁸ Waati bɛɛbɛ nŋu mɔ í sɛkɛɛ si ŋa wa, wa saabu Ilaaɔ̃, nɔ í lɔsi idei amau ku sisia inɛ ŋa iyi à waa degbe Ilaaɔ̃ ku faaba inɛi Zeruzalɛmu ŋa fei.

³⁹ Waati iyi iyeò baai Jesu ŋa à tã mii ŋa iyi woodai Aɔ̃ Lafɛ̃ɛ í ni a ceu fei, ŋɔi à nyi Nazarɛti ilu nŋa si ilɛi Galilee.

⁴⁰ Nɔ amau wa la, gbugbãɛ wa kɔ̃ɔsi nɔ í kɔ̃ò bisi. Nɔ didɔ̃i Ilaaɔ̃ í wɛɛa.

Jesu í bɔ kpasɛ̃i Ilaaɔ̃* si waati iyi í nɛ adɔ̃ maateeji

⁴¹ Adɔ̃ fei iyeò baai Jesu ŋa à ya bɔ jingaui Iku ku kuai Zeruzalɛmu.

⁴² Si waati iyi Jesu í nɛ adɔ̃ maateeji ŋɔi à bɔ jingauu si bɛi à nɛ dɔ̃ɔnɛɛ.

⁴³ Iyi jingauu í tã à waa nɛ, ŋɔi Jesu í gbe Zeruzalɛmu bɛ, amma baaɛ ŋa a kù mà.

⁴⁴ À waa tamaa bɛi í wa si inɔ nŋai. Wee à nɛi zakai ajɔ akã, ŋɔi à dɛdɛɛ si inɔi nyaanze nŋa ŋa do kpaasi nŋa ŋa.

⁴⁵ Amma a kù yɔɔ, nɔ à sinda à nyi Zeruzalɛmu à waa dɛdɛɛ.

⁴⁶ Si ajɔ mɛɛtasia ŋɔi à yɔɔ bantumai kpasɛ̃i Ilaaɔ̃. Wa buba si aninii woo kɔ inɛ ŋa si wooda ŋa, wa gbɔ ide nŋa nɔ wa bee ŋa ide.

⁴⁷ Inɛ ŋa iyi à waa gbɔ ideɛ fei à bitiò bisiɛ do si bɛi wa jɛ nŋa ide.

⁴⁸ Iyi baaɛ ŋau à yɔɔ bɛ, ŋɔi aŋa mɔ à biti, nɔ iyeɛ í ni, amam, na mii í ce ì ce nwa bɛɛbɛ. Amu do baaɛ wee à wasi ku dɛdɛɛ do zigiida.

⁴⁹ Ŋɔi í bee ŋa í ni, na mii í ce ì waa dɛdɛɛm ŋa. I kù mà ŋa iyi wũai Baam nii ǹ nɛ n ce?

⁵⁰ Amma ide iyi wa sɔ̃ ŋau a kù gbɔ yaaseɛ.

⁵¹ Ŋɔi í too ŋa à nɛ Nazarɛti nɔ wa gbɔ ide nŋa. Wee iyeu wa mu ide ŋau bɛ fei si idɔɛ.

⁵² Jesu í lá wa koo nɔ bisiɛ mɔ wa kɔ̃ɔsi nɔ Ilaaɔ̃ do amanɛ ŋa à nɛ siɛ inɔ didɔ̃.