Luku 19 - Bibeli do fee

Jesu do Zakee

¹ Jesu í to inɔ ilu Zeriko, nɔ wa lɔ.

² Wee mɔkɔ ilu fia gɔ í wa bɛ à ya kpoo Zakee, wa jɛ inɛ ngboi woo gba fiai lɛmpoo ŋa.

³ Nɔ wa dɛ nŋu ku yɛ Jesu, amma kù ba kù yɔɔ na zamaau, domi nŋu amanɛ kandaai.

⁴ Ŋɔi í sɛi í bɔ waju í koo í gũ jĩi ndii sikomɔɔ gɔ ku ba ku yɔɔ, domi í mà iyi do bɛi á lɔò.

⁵ Iyi Jesu í to tengi bii í wau, ŋɔi í wu iju lele í sɔ̃ɔ í ni, Zakee, kita wa ńya ńya, domi kpasɛ̃ɛi an sɔ nnyi.

⁶ Nɔ Zakee í kita wa do saasa í naa í gbaa do inɔ didɔ̃.

⁷ Iyi inɛ ŋa à yɔɔ, ŋɔi aŋa fei à gbagba à waa ni, í koo í sɔ kpasɛ̃i ilu dulum.

⁸ Amma Zakee í dede í leekĩ si wajui Lafɛ̃ɛ í ni, bubui amanim an na ilu are ŋa. Nɔ bii ǹ takii inɛ gɔ ŋa ǹ gba mii ndu ŋa, an sindo nŋa bɛɛbɛ má tuuba mɛɛ.

⁹ Nɔ Jesu í sɔ̃ɔ í ni, nnyi inɛi kpasɛ̃ ŋau ihɛ̃ à ba faaba, domi awɔ mɔ tɔkui Aburahamui.

¹⁰ Amu Amai Amanɛ ǹ naa ku dɛdɛ inɛ ŋa iyi à nyɔi n faaba ŋa.

Mɔndai iye iwo

¹¹ Si bɛi inɛ ŋa à waa de si ideu itĩ, nɔ í kpa mɔnda gɔ má. Inɛ ŋau à waa tamaa bɛi bii í to Zeruzalɛmu á jɛ bommai gbakã, nɔ wee waati bɛɛbɛ í maai Zeruzalɛmu. Na ŋɔi í jɔ í kpa nŋa mɔndau ihɛ̃ ku ba ku nyisi iyi nŋu kaa jɛ bommau gbãa gbãa.

¹² Í ni, mɔkɔ amai amanlu gɔi í bɔ bomma ku jɛ hee ilɛ jĩijĩ gɔ si anyiɛ nɔ ku baa ideɛ.

¹³ Hee ku maa nɛ ŋɔi í kpe amaacɛɛ ŋa aŋa mɛɛwa, nɔ í na aŋa fei kpɛkɛlɛi wura gɔ nɔ í ni, i ceò fiau ihɛ̃ sĩa hee n maa n baa. Iyi í fɔ bɛɛbɛ í tã nɔ í nɛ.

¹⁴ Amma inɛi ilɛɛ ŋa à cóo nɔ à bɛ inɛ ŋa si anyiɛ à ni aŋa a kù bi ku jɛ bomma si ilɛi aŋa.

¹⁵ Waati iyi í jɛ bommau í baa si ilɛɛ, ŋɔi í kpe amaacɛ ŋa iyi í na fiau wo bi tɛɛ ku ba ku yɛ bɛi fiai inɛ fei í bíaa.

¹⁶ Inɛ sinteu í naa í ni, Lafɛ̃ɛ, kpɛkɛlɛ iyi ì nam nɔu ǹ ceò sĩa hee ǹ ba riba mɛɛwa.

¹⁷ Ŋɔi í sɔ̃ɔ í ni, í sĩa, awɔ amaacɛ jiidai. Si bɛi ì jɛ ilu naanɛ si mii keekeu ihɛ̃, an jɔ̀ i jɛ inɛ ngbo si ilu mɛɛwa.

¹⁸ Inɛ minjisiau mɔ í naa í ni, Lafɛ̃ɛ, kpɛkɛlɛ iyi ì nam nɔu ǹ ceò sĩa hee ǹ ba riba miiu.

¹⁹ Nɔ í sɔ̃ɔ í ni, awɔ mɔ, an jɔ̀ i jɛ inɛ ngbo si ilu miiu.

²⁰ Nɔ inɛ mmu í naa má í ni, Lafɛ̃ɛ, fiaɛ wee. Ǹ wooi si mango

²¹ domi ǹ wa n ce njoɛ si na iyi í jɔ̀ ì jɛ inɛ kugaabu. Mii iyi i kù jilɛ nŋui ì ya maa dɛ ku so, baa bii i kù gbɛ̃ ì ya maa dai.

²² Ŋɔi ilaaluu í sɔ̃ɔ í ni, awɔ amaacɛ yaamɔ, an kiitiɛi hai si ideɛ iyi ì fɔ. Awɔi ì mà iyi ǹ jɛ inɛ kugaabu, ǹ ya n so mii iyi n kù jilɛ, nɔ n da mii iyi n kù gbɛ̃.

²³ To, na mii í ce i kù ni i wɛ̃a inɛ ŋa fiam nɔu i da nŋa si inyi ku ba n ba ndom do riba waati iyi ǹ baa.

²⁴ Ŋɔi í sɔ̃ inɛ ŋa iyi à wa bɛu í ni a gba fiau a na ilu mɛɛwau.

²⁵ Ŋɔi à sɔ̃ɔ à ni, Lafɛ̃ɛ, inɛ nŋu í nɛ mɛɛwa tã.

²⁶ Ŋɔi í ni, ǹ wa n sɔ̃ ŋɛi, inɛ iyi í nɛ, lafɛ̃ɛi aa kɔ̃ɔa si. Inɛ mɔ iyi kù nɛ, baa andi keeke iyi í nɛu má aa gbaai.

²⁷ Si anyiɛ nɔ í ni, i koo i naam mbɛɛm ŋau wa ihɛ̃, aŋa iyi a kù bi n jɛ bommau, nɔ i kpa ŋa si wajum.

Jesu wa lɔ inɔ ilu Zeruzalɛmu*

²⁸ Iyi Jesu í fɔ bɛɛbɛ í tã, ŋɔi í mu kpãa í cuaa zamaau wa bɔ ikpa Zeruzalɛmu.

²⁹ Si isɛɛnɛɛu í maai ilui Bɛtifazee do Betani, kɔkɔi geetei Olivie. Ŋɔi í bɛ mɔcɔ minjiɛ gɔ ŋa

³⁰ í sɔ̃ ŋa í ni, i bɔ ilu iyi í wa waju nŋɛu bɛ ŋa. Bii ì to bɛ ŋa aa yɛ ama gbankɛlɛ gɔ wa so bɛ iyi inɛ gɔ kù gũu titã. I fũu i naam wa ihɛ̃ ŋa.

³¹ Nɔ bii inɛ gɔ í bee ŋɛ í ni, na mii í ce ì waa fũu ŋa, i ni, Lafɛ̃ɛi í nɛ bukaataɛ.

³² Inɛ ŋa iyi Jesu í bɛu à koo à ba mii ŋau fei í ce si bɛi í sɔ̃ ŋau.

³³ Si waati iyi à waa fũu, ilu gbankɛlɛ ŋau à ni, bɛirei í ce ì waa fũu ŋa.

³⁴ Ŋɔi à ni, Lafɛ̃ɛi í nɛ bukaataɛ.

³⁵ Ŋɔi à naaa Jesu ama gbankɛlɛu wa. Nɔ à tɛ si acɔ nŋa ŋa Jesu í bɛi í gũ antaiɛ í buba si.

³⁶ Iyi í sinti ku nɛ, ŋɔi inɛ ŋa à wasi ku tɛ ibɔ nŋa ŋa si kpãau.

³⁷ Iyi í maai Zeruzalɛmu tengi bii kpãai geetei Olivieu í sinti ku dasi lɔɔma, ŋɔi mɔcɔɛ ŋau fei à waa dɔ̃ anu à lɔsi Ilaaɔ̃ ku saabu do inɔ didɔ̃ na irii maamaake ŋa iyi à yɛu fei.

³⁸ À wasi ku ni, Ilaaɔ̃ ku weea ilaalu iyi wa naa do irii Lafɛ̃ɛ. Ilaaɔ̃ ku jɔ̀ laakai ku sũ ku wa lele nɔ ku nyisi amboeɛ bɛ.

³⁹ Hai si inɔ zamaau Farisi gɔ ŋa à sɔ̃ Jesu à ni, Mɛɛtu, sɔ̃ mɔcɔɛ ŋau a coko.

⁴⁰ Ŋɔi Jesu í ni, ǹ wa n sɔ̃ ŋɛi, baa bii inɛ ihɛ̃ ŋa à coko, kuta ŋa aa dɔ̃ anu.

Jesu í kpataa inɛi Zeruzalɛmu* ŋa

⁴¹ Si bɛi Jesu í maai Zeruzalɛmu, ŋɔi í yɛ iluu nɔ wa kpataa inɛɛ ŋa í ni,

⁴² ǹ bi i mà ŋa wo mii iyi á mu nŋɛ laakai ku sũ baa nnyi. Amma nsɛi í manji nŋɛ.

⁴³ Awaati wa naa si ŋɛ iyi mbɛɛ nŋɛ ŋa aa bu ilu nŋɛ koe, aa bii si ŋɛ a mante ŋɛ canga do njɛ.

⁴⁴ Aa lɛgɛ ilu nŋɛ nɔ a kpa iŋɛ inɛɛ ŋa iyi ì wa inɔɛ ŋa. A kaa jɔ̀ kuta baa akã ku maa lesi njɛ ajɔ nŋu. Bɛɛbɛi á ce si na iyi í jɔ̀ Ilaaɔ̃ í naa bi tu ŋɛ nɔ i kù mà waati iyi í to wa bi tu ŋɛ.

Jesu í wa bantumai kpasɛ̃i Ilaaɔ̃*

⁴⁵ Waati iyi à to Zeruzalɛmu Jesu í bɔ bantumai kpasɛ̃i Ilaaɔ̃. Nɔ í lɔsi ku lele woo ta iwò ŋa.

⁴⁶ Í sɔ̃ ŋa í ni, à kɔɔ à ni, Ilaaɔ̃ í ni ilei nŋu ile bi kutɔɔi á jɛ. Amma iŋɛ wee ì coo bi kutɔtɔɔi ile ŋa.

⁴⁷ Jesu í ya maa kɔa inɛ ŋa si cioi idei Ilaaɔ̃ ajɔ fei kpasɛ̃i Ilaaɔ̃ bɛ. Ŋɔi inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa do inɛ ngboi Zuifu ŋa à waa bi a kpaa.

⁴⁸ Amma a kù mà bɛirei aa ce, domi inɛ feii í ya maa de si ideɛ itĩ do laakai.