Luku 18 - Bibeli do fee

Mɔndai jaaɔ̃ do woo kiiti gɔ

¹ Jesu í kpa nŋa mɔndau ihɛ̃ ku nyisi ŋa iyi í sĩa a maa ce kutɔɔ waati kãma fei, gbɛɛji ku maà wa si.

² Í ni, woo kiiti gɔ í wa si ilu nla gɔ, kù mà bɛɛrɛi Ilaaɔ̃, kù nɔ kù waa jirima inɛ kãma.

³ Wee si ilu akãu jaaɔ̃ gɔ mɔ í wa bɛ. Í ya naa ajɔò ajɔ bi tɛɛ ku sɔ̃ɔ ku ni, nam ntɔ si kiitiu amu do mbɛɛm.

⁴ Ŋɔi í kɔ̀ hee í kpɛ. Amma si anyiɛ í lasabu si idɔɛ í ni, baa bii n kù mà Ilaaɔ̃, nɔ n kù wa n jirima inɛ gɔ,

⁵ do nŋu fei, si na iyi í jɔ̀ jaaɔ̃u ihɛ̃ í ya maa bitandim, an naa ntɔ si kiitiu, ku ba ku maà bitandim má.

⁶ Ŋɔi Lafɛ̃ɛ í ni, to, i gbɔ bɛi woo kiiti laalɔu í fɔ bɛ ŋa de.

⁷ Ilaaɔ̃ kaa bɛi ku ce ku re zaka bɛɛbɛ? Inɛ ŋa iyi í cica, kaa jɔ̀ a ba ntɔ bii à waa dɔ̃ siɛ anu dasã do idũ? Iyi í re mɔm, kaa kpɛ ku bɛi ku gbɔ nŋa.

⁸ Ǹ wa n sɔ̃ ŋɛi, á jɔ̀ a ba ntɔi gbãa gbãa. Amma waati iyi amu Amai Amanɛ an nyi wa má an na n ba naanɛ ku dasi si ilɛu ihɛ̃?

Kutɔɔi Farisi* do woo gba fiai lɛmpoo* gɔ

⁹ Jesu í kpa mɔnda gɔ má na irii inɛ gɔ ŋa iyi à waa cɔ ara nŋa inɛ dee dee, nɔ à waa ca inɛ gɔ ŋa.

¹⁰ Í ni, amanɛ minji gɔ ŋa à bɔ ku tɔɔ kpasɛ̃i Ilaaɔ̃, inɛ akã Farisii, inɛ akã mɔ woo gba fiai lɛmpooi.

¹¹ Farisiu í leekĩ wa ce kutɔɔ wa ni, Ilaaɔ̃, ǹ saabuɛ do iyi n kù yɛ bɛi inɛ ŋa iyi à gbe, iyi à jɛ woo takii inɛ ŋa, do woo ce laalɔ ŋa, do woo ce sakara ŋa, do woo gba fiai lɛmpoo ŋa bɛi mɔkɔu ihɛ̃.

¹² Si azuma akã fei ǹ ya n dĩ anu ajɔ minji, nɔ mii iyi ǹ ba si mɛɛwa fei, ǹ ya n nya akãi.

¹³ Woo gba fiai lɛmpoou mɔ í leekĩ í mu araɛ ikã, kù yɔkɔ kù wu iju lele, í le awɔ si iri í ni, Ilaaɔ̃, ce araarem amu ilu dulum.

¹⁴ Jesu í ni, ǹ wa n sɔ̃ ŋɛi, hai bɛ inɛɛu ihɛ̃ í baa í jɛ dee dee si wajui Ilaaɔ̃ í nyiò ideɛ. Amma Farisiu kù jɛ dee dee, domi inɛ iyi í so araɛ lele aa kaye lafɛ̃ɛi, inɛ mɔ iyi í kaye araɛ aa soo lelei.

Jesu í weea ama kpɔtɔɔ ŋa

¹⁵ Si anyii nŋu, inɛ ŋa à naa Jesu ama kpɔtɔɔ ŋa wa ku lesi ŋa awɔ. Iyi mɔcɔɛ ŋau à yɔɔ bɛɛbɛ ŋɔi à waa gbagba si ŋa.

¹⁶ Amma Jesu í ni a naa nŋu amu ŋau wa. Nɔ í sɔ̃ mɔcɔɛ ŋau í ni, i jɔ̀ amu ŋau a naa bi tom, i maà ganji ŋa, domi bommai Ilaaɔ̃ í jɛ ti inɛ ŋa iyi à jɔ ŋa.

¹⁷ Ntɔ ntɔ, inɛ iyi kù waa sũa Ilaaɔ̃ iri ilɛ bɛi ama keeke kaa lɔ si bommai Ilaaɔ̃i pai.

Idei ilu fia gɔ

¹⁸ Inɛ ngboi Zuifu gɔ í naa bi Jesu í beeɛ í ni, Mɛɛtu, awɔ inɛ ncɛɛ, mii an ce n baò kuwɛɛ hai tã.

¹⁹ Ŋɔi Jesu í beeɛ í ni, na mii í ce ì waa kpem inɛ ncɛɛ. Inɛ gɔ kù wɛɛ iyi í jɛ ncɛɛ bii kù jɛ Ilaaɔ̃ nŋu akã.

²⁰ Ì mà sãa sãa mii iyi wooda í ni. Mii iyi wooda í ni wee. Maà ce sakara, maà kpa inɛ, maà ce ile, maà jɛa inɛ gɔ sɛɛda ibo, jirima iyeò baaɛ.

²¹ Ŋɔi inɛɛu í ni, ǹ wa n jirima mii ŋau bɛ fei tã hai keekem.

²² Iyi Jesu í gbɔ bɛɛbɛ, ŋɔi í sɔ̃ɔ í ni, í gbeɛ mii akã. Koo i ta mii iyi ì nɛ fei nɔ i kpɛ̃a ilu are ŋa fiau. Bii ì ce bɛɛbɛ aa ba amani jiida lelei Aɔ̃. Si anyiɛ nɔ i naa i toom.

²³ Iyi mɔkɔu í gbɔ bɛɛbɛ ŋɔi inɔɛ í fɔ ntɔ ntɔ, domi ilu amani nla nlai.

²⁴ Iyi Jesu í yɔɔ iyi inɔɛ í fɔ bɛɛbɛ ŋɔi í ni, á gaabu hee ku caa ilu fia ku lɔ tengi bii Ilaaɔ̃ í jɛ bommaɛ.

²⁵ Á faalaa kpookpo ku lɔ si iwoi abɛɛ do iyi ilu amani á lɔò tengi bii Ilaaɔ̃ í jɛ bommaɛ.

²⁶ Ŋɔi inɛ ŋa iyi à waa de siɛ itĩu à ni, bii bɛɛbɛi nɔ yooi á ba faaba.

²⁷ Nɔ Jesu í sɔ̃ ŋa í ni, mii iyi amanɛ í mɔngɔ, Ilaaɔ̃ kaa mɔngɔɛ.

²⁸ Ŋɔi Piɛɛ í ni, wee à jɔ̀ mii iyi à nɛ fei tã, à waa tooɛ.

²⁹ Nɔ Jesu í ni, ntɔ ntɔ, inɛ iyi í jɔ̀ kpasɛ̃ɛ fei, walakɔ aboɛ, walakɔ igbã do ifɔɛ ŋa, walakɔ iyeò baaɛ, walakɔ amaɛ ŋa, na irii bommai Ilaaɔ̃,

³⁰ á ba ku kpɔ ku re si nsɛi, nɔ si antaiɛ má á ba kuwɛɛ hai tã ala.

Jesu wa fɔ idei ikuɛ do kujĩɛ isɛ gbɛɛtasia

³¹ Jesu í kpe mɔcɔ maateeji ŋau bi tɛɛ, nɔ í sɔ̃ ŋa í ni, wee à waa bɔ Zeruzalɛmu. Bɛi, ide iyi walii ŋau a kɔ na irii amu Amai Amanɛu fei á ce.

³² Aa mum a daa dimi mmu ŋa si awɔ a yaakom, nɔ a kpãm iju a tu sim antɔ.

³³ Aa weem kpɔtɔɔ, si anyiɛ nɔ aa kpam, amma si ajɔ mɛɛtasia an jĩ hai si balɛ.

³⁴ Amma mɔcɔ ŋau a kù mà nkãma si ideu. Ideu í manji nŋa a kù gbɔ yaaseɛ.

Jesu í jɔ̀ fɛɛju gɔ í yɛ ilu

³⁵ Si isɛɛnɛu Jesu í maai Zeriko. Wee fɛɛju gɔ wa buba itĩ kpãa wa bara.

³⁶ Iyi í gbɔ ibai zamaa iyi wa lɔ, ŋɔi í bee mii í ce.

³⁷ Ŋɔi à sɔ̃ɔ à ni, Jesu inɛi Nazarɛtiui wa lɔ.

³⁸ Ŋɔi í wasi ku dɔ̃ anu wa ni, Jesu, tɔkui Davidi, ce araarem.

³⁹ Inɛ ŋa iyi à waa cua ŋau à la siɛ à ni ku coko. Amma bɛi à waa ni ku cokou, bɛɛbɛ mɔi í ya dɔ̃ anu hee lele ku maa ni, tɔkui Davidi, ce araarem.

⁴⁰ Ŋɔi Jesu í leekĩ í ni a naaɛ wa. Iyi fɛɛjuu í to wa ŋɔi Jesu í beeɛ í ni,

⁴¹ mii ì bi n ceɛ. Ŋɔi í ni, Lafɛ̃ɛ, ǹ bi n yɛ ilui.

⁴² Ŋɔi Jesu í sɔ̃ɔ í ni, yɛ ilu. Naanɛɛi í faabaɛ.

⁴³ Ŋɔi gbakã í yɛ ilu, nɔ wa too Jesu í wasi Ilaaɔ̃ ku saabu. Iyi zamaau í yɔɔ, ŋɔi aŋa fei à wasi Ilaaɔ̃ ku saabu.