Luku 16 - Bibeli do fee

Amaacɛ ilu bisi

¹ Ŋɔi Jesu í sɔ̃ mɔcɔɛ ŋa í ni, mɔkɔ ilu fia gɔi í wɛɛ. Mɔkɔu í nɛ amaacɛ gɔ nɔ í so amanii kpasɛ̃ɛ fei í daa si awɔ. Iyi í ce ajɔ minji ŋɔi inɛ ŋa à koo à kɔɔmɔtɔ amaacɛu bi lafɛ̃ɛ à ni, wa bɛjɛ amaniɛu fei.

² Ŋɔi lafɛ̃ɛ í kpoo í beeɛ í ni, irei ǹ wa n gbɔ inɛ ŋa à wasi ku sɔ iriɛ ya. I kaa yɔkɔ i jɛ amaacɛm má. Koo so tiai icɛɛ wa si bii ì ya ce dooi fiam, i naa i nyisim.

³ Ŋɔi amaacɛu wa bee araɛ ide wa ni, bɛirei an ce, si bɛi lafɛ̃ɛm wa nyam hai si icɛi kpasɛ̃ɛ. Wee n kù nɛ gbugbã iyi an yɔkɔ n logooò, nɔ wee anyɔ kaa jɔ̀ n bara.

⁴ Ǹ mà bɛi an ce ku ba inɛ ŋa a gbam si kpasɛ̃ nŋa waati iyi aa nyam hai si icɛm.

⁵ Ŋɔi í kpe ilu gbesei lafɛ̃ɛ ŋau fei. Nɔ aŋa fei à koo bi tɛɛ akã akã. Ŋɔi í bee inɛ sinte iyi í to bi tɛɛu í ni, gbesei lafɛ̃ɛm fɛloi ì waa mu.

⁶ Ŋɔi í jɛ í ni, ikpo iyi á kɔ̃ boonyi cĩɔ. Ŋɔi í sɔ̃ɔ í ni, so tiaɛ i buba ńya ńya nɔ i kɔ ciitaa.

⁷ Ŋɔi í bee inɛ gɔ má í ni, awɔ mɔ, fɛloi ì waa mu. Ŋɔi í sɔ̃ɔ í ni, iya saaki cĩɔ. Ŋɔi í sɔ̃ nŋu mɔ í ni, so tiaɛ i kɔ cinɛ.

⁸ Ŋɔi lafɛ̃ɛi amaacɛ hai nɛ naanɛu í gbɔ ideu nɔ í saabuɛ si na iyi í jɔ̀ í yɔɔ iyi í nɛ bisi ntɔ ntɔ. Ŋɔi Jesu í ni, inɛi andunya ŋa à nɛ bisi aŋa duusɔ̃ɔ si kuwɛɛ nŋa à re inɛi inya kumá ŋau.

⁹ Ŋɔi Jesu í sɔ̃ ŋa í ni, amanii andunya iyi ì nɛ, i ya dɛdɛò kpaasi ŋa ku ba bii í na í tã Ilaaɔ̃ ku gba ŋɛ si andunya titɔ̃ɛ.

¹⁰ Inɛ iyi í nɛ naanɛ si mii keeke á nɛ naanɛ si mii nla. Inɛ iyi wa ce laalɔ si mii keeke á ce laalɔ si mii nla.

¹¹ Na nŋu, bii i kù nɛ naanɛ si amanii andunya ŋa, yooi á da nŋɛ si amani ntɔ si awɔ.

¹² Bii i kù nɛ naanɛ si mii ndii inɛ gɔ, yooi á na ŋɛ iyi í jɛ tu ŋɛ.

¹³ Amaacɛ kãma kaa yɔkɔ ku cea lafɛ̃ɛ minji icɛ ajɔ. Ntɔ ntɔ á cé inɛ akã nɔ ku bi inɛ akã, walakɔ ku jirima inɛ akã nɔ ku donda inɛ akã. I kaa yɔkɔ i too Ilaaɔ̃ do fia ajɔ ŋa.

Ide ikã ikã ŋa iyi Jesu í fɔ

¹⁴ Wee Farisi ŋa fia ku bi nŋa í caa. Iyi à gbɔ ide ŋa iyi Jesu í fɔu fei ŋɔi à waa yaakoɛ.

¹⁵ Nɔ Jesu í sɔ̃ ŋa í ni, iŋɛ ì waa dɛ i jɛ inɛ dee dee ŋa si wajui amanɛ ŋa, amma Ilaaɔ̃ í mà idɔ nŋɛ. Ǹ wa n sɔ̃ ŋɛi, mii iyi amanɛ ŋa à waa cɔ mii jiida, bi Ilaaɔ̃ mii sãmii.

¹⁶ Wooda do idei walii ŋau fei à wɛɛ hee do waatii Zãa. Hai waati bɛɛbɛ à waa sisi laabaau jiidai bommai Ilaaɔ̃ nɔ inɛ fei wa ce kookaai ku ba ku lɔ do gbugbã.

¹⁷ Wooda baa wasali í gaabu ku bɛjɛ í re lele do ilɛ ku kpa iri mɔm.

¹⁸ Inɛ iyi í kɔ̀si aboɛ nɔ í so mmuɛ í ce sakarai. Inɛ iyi í so abo iyi mɔkɔɛ í kɔ̀si í ce sakarai.

Ilu fia do Lazaa

¹⁹ Ŋɔi Jesu í kpa nŋa mɔndau ihɛ̃ í ni, mɔkɔ ilu amani gɔ í wɛɛ. Mɔkɔu í ya maa dasi ibɔ caada ilu iju kusĩa gɔ. Kpasɛ̃ɛ ajɔ fei jingaui.

²⁰ Ilu are gɔ mɔ í wɛɛ, í ya maa sũi andɛ koofai ilu fiau, à ya kpoo Lazaa. Konkoli wa kɔ̃ si araɛ fei.

²¹ Nɔ aja ŋa à ya naa a maa fa konkoliɛ ŋau. Mɔkɔu í bi ku wo araɛ baa do bubui sɔndai ilu fiau iyi í ya gbe, amma ci ya baa.

²² Ŋɔi mɔkɔu í na í ku nɔ amaleka ŋa à soo à bɔòɛ bi Aburahamu. Nɔ ilu fiau mɔ í na í ku à suu.

²³ Nɔ í koo wa yɛ ijuukpã bi kuwai iku ŋa, ŋɔi í wu iju lele, nɔ í hɔ̃nnɛ Aburahamu nɔ Lazaa í wa bi tɛɛ.

²⁴ Ŋɔi í dɔ̃ anu í ni, baaba Aburahamu, ce araarem. Bɛ Lazaa wa ku sɔsi amaawɔɛ si inyi ku na ku tũ amɛm, domi ǹ wa n yɛ ijuukpã nla nla si amɛi inau ihɛ̃.

²⁵ Ŋɔi Aburahamu í ni, amam, ye gigi iyi ì ba mii jiidaɛ tã hai andunya, nɔ Lazaa mɔ í yɛ wahala. Wee ihɛ̃ nsɛi inɔɛ í tũ nɔ awɔ mɔ ì waa yɛ ijuukpã.

²⁶ Nɔ si antaiɛ, isa nla gɔi í fɛɛfɛ wa ku ba inɛ ŋa iyi à bi a kua a bɔ bi tu ŋɛ bɛ a maà yɔkɔ. Bɛɛbɛ mɔi inɛ gɔ kaa yɔkɔ ku naa ihɛ̃ hai bɛ.

²⁷ Ŋɔi ilu amaniu í ni, debɛi, ǹ wa n tɔɔɛi baaba, bɛ Lazaa kpasɛ̃i baam,

²⁸ koo sɔ̃ ifɔ miiu ŋa iyi ǹ nɛ bɛu ku ni a ce laakai ku ba a maà na a naa si inya kugaabuu ihɛ̃.

²⁹ Amma Aburahamu í ni, à nɛ tia iyi Moizi do walii ŋa à kɔ wou tã, aa yɔkɔ a gbɔ ide nŋa.

³⁰ Nɔ í ni, baaba Aburahamu, iyi bɛ nŋu akã kù to. Bii hai bi iku ŋai inɛ gɔ í koo bi tu ŋa, aa kpaasi idɔ nŋa.

³¹ Ŋɔi Aburahamu í sɔ̃ɔ í ni, bii a kù gbɔ ti Moizi do ti walii ŋau, baa bii inɛ gɔ í jĩ hai bi iku ŋa ihɛ̃ í koo bɛ a kaa dasi naanɛ.