Luku 15 - Bibeli do fee

Mɔndai angudã iyi í nyɔ à tasiɛu

¹ Woo gba fiai lɛmpoo ŋa do inɛ laalɔ ŋa fei à naa bi Jesu ku ba a gbɔ ideɛ.

² Ŋɔi Farisi do woo kɔ inɛ ŋa si wooda ŋa à lɔsi ku gbagba à waa ni, mɔkɔu wa gba inɛ laalɔ ŋa nɔ aŋaò ŋa à tɔtɔɔ à waa jɛ.

³ Ŋɔi Jesu í kpa nŋa mɔnda gɔ í ni,

⁴ bii inɛ gɔ nŋɛ í nɛ angudã cĩɔ iyi wa degbe si inɔ sako nɔ akã í nyɔ siɛ, lafɛ̃ɛ á jɔ̀ cinɛò fɛɛwa do mɛɛsã iyi í gbeu inɔ sako bɛi koo dɛdɛ akã iyi í nyɔu wa hee koo yɔɔ, mà irei.

⁵ Hai í nɔ í yɔɔ gbakã á muu ku lesiɛ kɔngɔ wai do inɔ didɔ̃.

⁶ Bii í baa kpasɛ̃ á kpe kpaasiɛ ŋa do inɛ ŋa iyi à waa má kɔkɔɛ ku sɔ̃ ŋa ku ni, i bam inɔ didɔ̃ ku kpɛ̃, domi angudãm iyi í nyɔu ǹ yɔɔ wa.

⁷ Ŋɔi Jesu í ni, bɛɛbɛ mɔi ǹ wa n sɔ̃ ŋɛ, inɔ didɔ̃i inɛi lele ŋa á la na ilu dulum akã iyi í kpaasi idɔ ku re inɛ dee dee cĩɔ fakã kù wa si iyi a kù nɛ bukaatai idɔ ku kpaasi.

Fia iyi í nyɔ nɔ à yɔɔ má

⁸ Nɔ Jesu í kpa nŋa mɔnda mmuɛ má í ni, bii inaabo gɔ í nɛ kpɛkɛlɛ mɛɛwa nɔ akãɛ í nyɔ, á má fitilai nɔ ku kpã ileu ku dɛdɛɛ do laakai hee koo yɔɔ.

⁹ Bii í yɔɔ á kpe kpaasiɛ ŋa do inɛ ŋa iyi à waa má kɔkɔɛ nɔ ku ni, i bam inɔ didɔ̃ ku kpɛ̃, domi fiam iyi í nyɔu ǹ yɔɔ.

¹⁰ Bɛɛbɛ mɔi ǹ wa n sɔ̃ ŋɛ, amalekai Ilaaɔ̃ ŋa à ya wɛɛò inɔ didɔ̃ na ilu dulum akã iyi í kpaasi idɔ.

Ama iyi í nyɔu à yɔɔ má

¹¹ Jesu í ni má, mɔkɔ gɔ í nɛ ama inɛmɔkɔ minji.

¹² Ŋɔi ifɔu í sɔ̃ baau í ni, baam, kpɛ̃ amaniu nɔ i nam iyi í jɛ titom. Nɔ baau í ce nŋa ikpɛ̃i amaniɛu.

¹³ Iyi í ce ajɔ minji, ifɔu í ta mii iyi í nɛ fei nɔ í so fiau í nɛò hee ilɛ jĩijĩ gɔ. Bɛi í koo í ce kuwɛɛɛ si daa laalɔ í kpaò irii amaniɛu fei.

¹⁴ Waati iyi í jɛ fei ndɛɛ í kpa iriɛ, ari nla gɔ í bɛi í naa si ilɛu nɔ í lɔ si are.

¹⁵ Ŋɔi í bɔ bi inɛi ilɛ bɛ gɔ nɔ lafɛ̃ɛ í koo í dasiɛ icɛi kusɔɔ ŋa ku degbe.

¹⁶ Tengi bɛi í bi ku wo araɛ do ijɛi kusɔɔ ŋau amma inɛ kãma kù muaa.

¹⁷ Iyi laakaiɛ í na í baa nɔ í ni, amaacɛi baam ŋa fei à nɛ ijɛ wa kɔ̃ nŋai, nɔ amu wee ǹ wa n ku do ari ihɛ̃.

¹⁸ An dede n nyi bi baam n sɔ̃ɔ n ni, baam, ǹ ce dulum bi Ilaaɔ̃ nɔ ǹ ce kurara bi tɛɛ.

¹⁹ Na nŋu, n kù to a kpem amaɛ má. Ceem bɛi amaacɛɛ.

²⁰ Ŋɔi í dede wa nyi ikpa bi baaɛu. Hai waati iyi wa jĩ, ŋɔi baaɛ í hɔ̃nnɛɛ nɔ araare fei í muu. Í sɛi í koo í yaa do inɔ didɔ̃ nɔ í coo fɔɔ do kubi.

²¹ Ŋɔi amau í ni, baaba, ǹ ce dulum bi Ilaaɔ̃ nɔ ǹ ce kurara bi tɛɛ. Na nŋu, n kù to a kpem amaɛ má.

²² Amma baaɛu í sɔ̃ woo ce icɛɛ ŋa í ni, i naaò ibɔ kumboo wa ńya ńya iyi í sĩa, i daa si ŋa. Nɔ i naa lɛlɛawɔ do baata ku dasi.

²³ I naaò kɛtɛ kombo saasaabɔ iyi í la í reu bɛ wa, nɔ i kpaa ŋa. Ka jɛ ka ce jingau do inɔ didɔ̃,

²⁴ domi amam iyi í yɛ bɛi í ku wo, í baa si andunya má. Í nyɔ wo nɔ à yɔɔ má. Ŋɔi à wa si inɔ didɔ̃.

²⁵ Wee waati bɛɛbɛ igbãu í wa iko. Iyi wa baa í maai kpasɛ̃ wa ŋɔi wa gbɔ anui gãgã nɔ inɛ ŋa à waa jojo.

²⁶ Ŋɔi í kpe woo ce icɛ gɔ í beeɛ í ni, mii í ce.

²⁷ Ŋɔi woo ce icɛu í sɔ̃ɔ í ni, ifɔɛi í baa, nɔ baa nŋɛ í kpa kɛtɛ saasaabɔ iyi í nɛ ikpo si na iyi í jɔ̀ í yɔɔ baani.

²⁸ Ŋɔi igbãu í damɔɔ í kɔ̀ ku lɔ kpasɛ̃. Ŋɔi baau í fita wa í naa ku lɛlɛɛ.

²⁹ Amma í sɔ̃ baau í ni, cɔ hai adɔ̃ nkpɔ nkpɔ iyi ǹ wa n ceɛ icɛ wa. Nɔ n kù donda ideɛ kãma, nɔ baa ama iwo i kù muum n ceò jingau do inɔ didɔ̃ amu do kpaasim ŋa.

³⁰ Amma iyi amaɛ í baa, nŋu iyi í koo í jɛ amaniɛ do abo à ta icu ŋa, na iriɛi ì kpa kɛtɛ saasaabɔu ihɛ̃.

³¹ Ŋɔi baau í ni, awɔ amam nii, awaɛi à wɛɛ do ajɔ fei, nɔ mii iyi ǹ nɛ fei í jɛ tɛɛ.

³² Amma í sĩa ka jɛ jingau do inɔ didɔ̃ nla nla si na iyi í jɔ̀ ifɔɛu ihɛ̃ í yɛ bɛi í kui wo nɔ í baa si andunya má. Í nyɔ wo nɔ à yɔɔ má.