Luku 14 - Bibeli do fee

Jesu í jɔ̀ bɔ̃ɔ gɔ í ba iri

¹ Si ajɔi kusĩmi gɔ Jesu í bɔ ku jɛ kpasɛ̃i inɛ ngboi Farisi gɔ. Wee inɛ gɔ ŋa mɔ à wa bɛ, à waa cɔɔ do laakai.

² Mɔkɔ gɔ í wa bɛ, wa leekĩ wajui Jesu. Mɔkɔu wa ce bɔ̃ɔi ara ku wu.

³ Ŋɔi Jesu í bee woo kɔ inɛ ŋa si wooda do Farisi ŋau í ni, wooda í wɛɛ a jɔ̀ inɛ gɔ ku ba iri si ajɔi kusĩmi? Mà kù wɛɛ.

⁴ Ŋɔi à coko. Nɔ í lesi awɔɛ si bɔ̃ɔu í jɔ̀ inɛɛu í ba iri nɔ í ni ku nɛ.

⁵ Nɔ í bee ŋa í ni, yoo nŋɛi, bii amaɛ walakɔ bii kɛtɛɛ í dasi lɔgɔ, kaa nyaa gbakã baa bii í jɛ ajɔi kusĩmii.

⁶ Ŋɔi a kù yɔkɔ a kù jɛaa ideu.

Tengi bii í jɔ i buba bii à kpeɛ ku jɛ

⁷ Iyi Jesu í ce laakai í yɛ inɛ ŋa iyi à kpe ku jɛ ŋau à wasi ku cica kitãi waju ŋa iyi à nɛ bɛɛrɛ ŋau nɔ í sɔ̃ ŋa í ni,

⁸ bii à kpeɛ bi ku ce abɔdɔ̃, maà buba si kitãi waju ilu bɛɛrɛ ŋau. Á yɔkɔ ku jɛ à kpe inɛ gɔ iyi í reɛ do bɛɛrɛ.

⁹ Nɔ inɛ iyi í kpe iŋɛ feiu á na ku ni, dede i mua mɔkɔu ihɛ̃ kitãu bɛ. Waati bɛɛbɛi aa dede do anyɔ i koo i buba si kitãi anyi ihɔ̃.

¹⁰ Amma bii à kpeɛ ku jɛ, koo buba si kitãi anyi ku ba bii inɛ iyi í kpeɛu í to wa ku ni, baakɔɔm, dede i naa wa waju. Waati bɛɛbɛi aa jɛ ilu bɛɛrɛ nla si wajui inɛ ŋa iyi iŋɛò ŋa ì waa buba ŋau fei.

¹¹ Ntɔ ntɔ inɛ iyi í so araɛ lele à ya kayeɛi. Inɛ mɔ iyi í kaye araɛ à ya soo lelei.

¹² Nɔ Jesu í sɔ̃ inɛ iyi í kpoo ku jɛu mɔ í ni, bii ì waa kpe inɛ ŋa ku jɛ walakɔ jingau, maà ti i kpe kpaasiɛ ŋa, walakɔ igbãɛ do ifɔɛ ŋa, walakɔ nyaanzeɛ ŋa, walakɔ kpaasi ilu fiaɛ ŋa, ku ba aŋa mɔ a maà kpeɛ a sã gbese.

¹³ Amma bii ì waa kpe inɛ ŋa ku jɛ, kpe ilu are ŋa, do wɛɛgɛ ŋa, do ilu kutɛ akã ŋa do fɛɛju ŋa.

¹⁴ Bii ì ce bɛɛbɛ aa jɛ ilu inɔ didɔ̃ si na iyi í jɔ̀ inɛ nŋu ŋau a kaa ba ngɔgɔ iyi aa sãɛò gbese. Ilaaɔ̃i á sãɛ gbese si waati iyi inɛ dee dee ŋa aa jĩ hai si balɛ.

Mɔndai ijɛ nla

¹⁵ Iyi à gbɔ ideu, ŋɔi inɛ akãi inɛ ŋa iyi aŋaò ŋa à waa jɛu í sɔ̃ Jesu í ni, debɛi ilu inɔ didɔ̃i inɛ iyi á jɛ si bommai Ilaaɔ̃.

¹⁶ Ŋɔi Jesu í kpa nŋa mɔnda í ni, mɔkɔ gɔ í ce ijɛ nla nla nɔ í kpe inɛ nkpɔ.

¹⁷ Iyi awaatii kujɛu í to ŋɔi í bɛ woo ce icɛɛ koo sɔ̃ inɛ ŋa iyi í kpeu ku ni, i naa wa ŋa, domi sɔnda fei í jĩa tã.

¹⁸ Amma aŋa fei à lɔsi gaafara ku tɔɔ. Inɛ sinteu í ni, ǹ ra iko, tilasi, í gbe n koo n cɔɔ. Ǹ wa n tɔɔɛ ku ceem suuru.

¹⁹ Inɛ mmu mɔ í ni, ǹ ra kɛtɛ ku logoo ŋai kɔ̃ɔ miiu, nɔ ǹ wa n bi n dĩ nŋa n ceò icɛ n cɔ. Ǹ wa n tɔɔɛ ku ceem suuru.

²⁰ Nɔ inɛ mmu gɔ mɔ í ni má, nsɛii ǹ so abo. Na ŋɔi í jɔ̀ n kaa n ba n naa.

²¹ Ŋɔi woo ce icɛu í sinda í koo í sɔ̃ lafɛ̃ɛɛ gaafara iyi inɛ ŋau fei à tɔɔ. Ŋɔi idɔi lafɛ̃ɛu í kɔ̃, nɔ í sɔ̃ woo ce icɛɛu í ni, koo i bɔ si bantuma ŋa nsɛi nsɛi do si kpãai inɔ iluu, kpeem ilu are ŋa wa do wɛɛgɛ ŋa do fɛɛju ŋa do ilu kutɛ akã ŋa.

²² Ŋɔi woo ce icɛu í koo. Iyi í baa nɔ í ni, lafɛ̃ɛ, iyi ì dasim nɔu ǹ coo tã. Wee inya í gbe má.

²³ Ŋɔi lafɛ̃ɛu í sɔ̃ɔ má í ni, bɔ si kpãai ilɛɛko ŋa do kpãai iko ŋa, jɔ̀ inɛ ŋa a lɔ wa baa do kumante, kpasɛ̃m de ku kɔ̃.

²⁴ Ntɔ ntɔ, an sɔ ŋɛ, inɛ ŋa iyi ǹ tako ǹ kpeu baa inɛ akã nŋa kaa tiɛ ijɛu ihɛ̃ má.

Mii amanɛ á ce ku bɛi ku jɛ mɔcɔi Jesu

²⁵ Ajɔ nŋu gɔ Jesu wa nɛ nɔ zamaa nla nla gɔ wa tooɛ. Ŋɔi Jesu í sinda í sɔ̃ ŋa í ni,

²⁶ inɛ iyi í naa bi tom nɔ kù cé baaɛ do iyeɛ do aboɛ do amaɛ ŋa do igbãɛ ŋa do ifɔɛ ŋa do wecĩɛ ŋa do kuwɛɛi nŋu takaɛ kaa yɔkɔ kù jɛ mɔcɔm.

²⁷ Inɛ iyi kù jɛsi nŋu ku so jĩi ku gaauɛ ku toom do wa kaa yɔkɔ ku jɛ mɔcɔm.

²⁸ Bii inɛ gɔ nŋɛ í bi ku ma ile á buba ku ce dooa titã ku cɔ mà fiai nŋu á to ku kpaò iriɛ.

²⁹ Bii kù jɛ bɛɛbɛ, nɔ í cɛ icui ileu, í bɛi í na í mɔngɔ ku maɛ, inɛ ŋa iyi à yɔɔ fei aa nyaanyiɛ,

³⁰ a ni, mɔkɔu ihɛ̃ í sinti ku ma nɔ wee í mɔngɔ kù kpa iriɛ.

³¹ Bɛɛbɛ mɔi ilaalu ŋa mɔ à ya ce a bɛi a bɔ igũ. Bii ilaalu gɔ í nɛ sooge dubu mɛɛwa, nɔ í yɛ ilaalu mmu gɔ wa naa siɛ igũ do sooge dubu kɔnfia, á dedei gbakã ku ce igũ? Aawo, á bubai titã ku lasabu ku cɔ mà nŋu á yɔkɔ ku kãmiaɛ.

³² Bii í yɛ iyi nŋu kaa nɔɔ, á bɛ inɛ ŋai bi ilaalu iyi ihɔ̃u hai waati iyi kù to wa titã ku ba aŋaò a gbɔsi njɛ nɔ laakai ku sũ ku wa anini nŋa.

³³ Na ŋɔi í ce awɔ iyi i kù jɔ̀ mii iyi ì nɛ fei, i kaa yɔkɔ í jɛ mɔcɔm.

Imu iyi í ku

³⁴ Nɔ Jesu í ni má, imu mii ncɛɛi, amma bii didɔ̃i imu í ku, mii aa dasi a jɔ̀ ku dɔ̃ má.

³⁵ Kaa ce bukaata kãma má nɔ baa bii ikoi kaa ce taasi. À ya dikãɛi waduude. Inɛ iyi í nɛ itĩ iyi á gbɔò ide, ku gbɔ.