Luku 11 - Bibeli do fee

Idei kutɔɔ

¹ Ajɔ nŋu gɔ Jesu wa ce kutɔɔ bii gɔ. Iyi í tã ŋɔi mɔcɔ akãɛ í ni, Lafɛ̃ɛ, kɔ wa si bɛi aa ka ya ce kutɔɔ, bɛi Zãa í kɔ mɔcɔɛ ŋa si.

² Ŋɔi Jesu í sɔ̃ ŋa í ni, bii ì waa ce kutɔɔ ŋa i ya ni, Baaba, jɔ̀ inɛ fei ku mà iyi awɔi ì jɛ inɛ kumá. Naa i jɛ bommaɛ.

³ Mu nwa ijɛi ajɔ fei nwa.

⁴ Kpa idei dulum du wa, domi awa mɔ à ya ka kpa idei kurara iyi inɛ ŋa à ce nwa. Maà ti i jɔ̀ ka dasi kulɛlɛ.

⁵ Nɔ í sɔ̃ ŋa má í ni, á yɔkɔ ku jɛ nsɛi inɛ gɔ nŋɛ í ba inɛ njoo idũ laja. Bii kù nɛ ijɛ iyi á naa, á bɔ bi kpaasiɛi ku ni, wɛ̃ɛm pɛ̃ɛ mɛɛta wa,

⁶ domi kpaasim gɔ í naa bi tom hai ilu gɔ. Nɔ wee n kù nɛ ngɔgɔ iyi an naa.

⁷ Kpaasiɛu á yɔkɔ ku jɛaa hai inɔ ile ku ni, maà mantem, amu ǹ sɔkɔ tã, amu do amam ŋa fei à waa sũ. N kaa n yɔkɔ n dede n naɛ pɛ̃ɛ.

⁸ Ǹ wa n sɔ̃ ŋɛi, baa bii kù bi ku dede ku náa si na iyi í jɔ̀ í jɛ kpaasiɛ, á yɔkɔ ku dede ku naa bukaatai mii iyi í bi fei si na iyi í jɔ̀ wa manteɛ.

⁹ Na nŋu, ǹ wa n sɔ̃ ŋɛi, i ya tɔɔ ŋa, aa mu nŋɛ. I ya dɛdɛ ŋa aa ba ŋa. I ya cã gambo ŋa, aa cĩ nŋɛ.

¹⁰ Ntɔ ntɔ, inɛ iyi wa tɔɔ fei, Ilaaɔ̃ á muaa. Inɛ mɔ iyi wa dɛdɛ, Ilaaɔ̃ á jɔ̀ ku ba. Inɛ mɔ iyi í nɔ wa cã gambo, Ilaaɔ̃ á cĩaa.

¹¹ Yooi í wa si inɔ nŋɛ ihɛ̃ iyi [bii amaɛ í tɔɔɛ pɛ̃ɛ á so kuta ku naa. Bɛɛbɛ mɔi inɛ kãma kù wɛɛ iyi] bii amaɛ í tɔɔɛ cɛ̃ɛ á so njo ku naa,

¹² walakɔ bii í tɔɔɛ njɛi ajɛɛ ku so cencee ku naa.

¹³ Iŋɛ iyi ì ya ce laalɔ ŋa ì mà mii jiida ku na ama nŋɛ ŋa, mà irei. To, Ilaaɔ̃ Baa nŋɛ iyi í wa lele kaa ce ku re zaka bɛɛbɛ? Kaa so Hundeɛ ku na inɛ ŋa iyi à waa tɔɔɛ?

Jesu í jɛa inɛ ŋa iyi à máa ide

¹⁴ Si anyii nŋu, à naa Jesu mɔkɔ gɔ wa. Mɔkɔu í nɛ inɛi inɔɔko gɔ iyi í jɔ̀ ci ya fɔ ide. Nɔ Jesu í lele inɛi inɔɔkou. Iyi inɛi inɔɔkou í fita ŋɔi mɔkɔu í lɔsi ide ku fɔ, nɔ zamaa fei í biti.

¹⁵ Amma inɛ gɔ ŋa à ni, inɛ ngboi inɛi inɔɔko ŋa iyi à ya kpe Bɛɛlizebui í mua Jesu gbugbã wa leleò inɛi inɔɔko ŋa.

¹⁶ Nɔ inɛ gɔ ŋa mɔ à waa bi a cã idɔɛ a cɔ. Nɔ à sɔ̃ɔ à ni ku ce maamaake ku nyisi iyi gbugbãɛ wa naai hai lele.

¹⁷ Si bɛi Jesu í mà lasabu nŋa ŋɔi í ni, bomma iyi inɛɛ ŋa à waa ja aŋa duusɔ̃ɔ, bommau á na ku kpɔò bomma nɔ kpasɛ̃ɛ ŋa a cuku.

¹⁸ Bɛɛbɛ mɔi bii Seetam wa ja do araɛ, bɛirei bommaɛ á ce ku bɔ waju. Ǹ ni bɛɛbɛi si na iyi í jɔ̀ ì waa ni ŋa do gbugbãi Bɛɛlizebui ǹ wa n leleò inɛi inɔɔko ŋa.

¹⁹ Bii do gbugbãi Bɛɛlizebuui ǹ wa n leleò inɛi inɔɔko ŋa, to, do gbugbãi yooi mɔcɔ nŋɛ ŋa mɔ à waa leleò ŋa. Na ŋɔi í ce aŋa taka nŋa aa nyisi iyi ì rara ŋa.

²⁰ Amma bii do gbugbãi Ilaaɔ̃i ǹ wa n leleò inɛi inɔɔko ŋau, nŋu bɛ wa nyisi iyi Ilaaɔ̃ í sinti ku jɛ bommaɛ si anini nŋɛ.

²¹ Bii ilu gbugbã jiida gɔ í nɛ jĩnɛi igũ nɔ wa degbe kpasɛ̃ɛ, amaniɛ á wɛɛi si laakai.

²² Amma bii ilu gbugbã gɔ mɔ iyi í roo í naa í kãmiaɛ, njɛ á ko jĩnɛi igũ iyi wa naanɛui fei nɔ ku ce ikpɛ̃i amaniu mɔ.

²³ Inɛ iyi kù jɛ tom, mbɛɛm nii. Inɛ iyi kù waa bam ku tɔtɔɔ, wa fangaaɛi.

Kunyii inɛi inɔɔko wa má

²⁴ Ŋɔi Jesu í kpa nŋa mɔndau ihɛ̃ í ni, bii inɛi inɔɔko í fita si inɛ, í ya maa dabii si gbaa ŋai ku maa dɛ bi ku sĩmi. Bii í kua, ŋɔi í ya ni, an nyi inya nwom hai bii ǹ fita wai.

²⁵ Waati iyi í nyi nɔ í ba inɛɛu í yɛ bɛi ile ngbɛ iyi à kpã à teeseɛ sãa sãa,

²⁶ á koo ku dɛdɛ kpaasi laalɔ ŋa iyi à roo wa má bɛi aŋa mɛɛje, a na a lɔ si inɛɛu a maa wa bɛ. Waati bɛɛbɛ kuwɛɛi takoi inɛɛu á tia baa ti ankãanyiɛ má.

Inɔ didɔ̃ ntɔ

²⁷ Waati iyi Jesu wa fɔ bɛɛbɛ, abo gɔ í dɔ̃ anu hai inɔ zamaau í ni, ilu inɔ didɔ̃i inɛ iyi í so asĩɛ, nɔ ì mɔmɔ amɔɛ.

²⁸ Ŋɔi Jesu í jɛaa í ni, í tia i ni ilu inɔ didɔ̃ ŋai inɛ ŋa iyi à waa gbɔ idei Ilaaɔ̃, nɔ à waa ceò icɛ.

Inɛ ŋa à bi maamaake

²⁹ Si bɛi zamaau wa kɔ̃ɔsi ŋɔi Jesu í ni, inɛi nsɛi ŋa inɛ laalɔ ŋai. À waa tɔɔ maamaake, amma maamaake gɔ kù wɛɛ iyi aa nyisi ŋa, bii kù jɛ ti faajii walii Zonasi.

³⁰ Si bɛi Zonasi í jɛ nyinda bi inɛi Ninivu ŋa, bɛɛbɛ mɔi amu Amai Amanɛ an jɛ nyinda bi inɛi nsɛi ŋa.

³¹ Si ajɔi kiitiu inaabo ilaalui ilɛi Seba á dede si inɛi nsɛi ŋa ku yɛ taale nŋa, si na iyi í jɔ̀ hai jĩijĩi í dede í naa ku gbɔ idei bisii Salomɔɔ ilaalu nlau. Nɔ wee nsɛi, mii gɔ í wa ihɛ̃ iyi í nɛ bɛɛrɛ í re Salomɔɔ.

³² Si ajɔi kiitiu inɛi Ninivu ŋa aa dede si inɛi nsɛi ŋa a yɛ taale nŋa, si na iyi í jɔ̀ à kpaasi idɔ nŋa na waazoi Zonasi. Nɔ wee nsɛi, mii gɔ í wa ihɛ̃ iyi í nɛ bɛɛrɛ í re Zonasi.

Inya kumái ara

³³ Inɛ gɔ ci ya má fitila ku singaɛ, [walakɔ ku biiɛ do caka,] amma à ya jilɔɔi bi ku lesi fitila ku ba inɛ ŋa iyi à waa lɔ wa a maa yɛ inya kumá.

³⁴ Ijuɛi í jɛ fitilai araɛ. Bii ijuɛ wa nɛ baani, araɛ fei í wa si inya kumái. Amma bii kù waa nɛ baani, araɛ mɔ fei í wa si ilu kukui.

³⁵ Na nŋu, ce laakai ku ba inya kumá iyi í wa si araɛu ku maà ce ilu kuku.

³⁶ Bii araɛ fei wa nɛ inya kumá, nɔ baa ikɔ̃ akãɛ gɔ kù wa si ilu kuku, fei ndɛɛ á maa mái bɛi waati iyi fitila í má siɛ inya.

Jesu í yɛ taalei Farisi* ŋa do woo kɔ inɛ ŋa si wooda* ŋa

³⁷ Iyi Jesu í fɔ ideu í tã, ŋɔi Farisi gɔ í kpoo ku jɛ kpasɛ̃ɛ. Nɔ í koo í buba kpasɛ̃i Farisiu, aŋaò à waa jɛ.

³⁸ Ŋɔi Farisiu í cɔɔ í biti do iyi kù wɔɔ í bɛi wa jɛ.

³⁹ Amma Lafɛ̃ɛ í sɔ̃ɔ í ni, iŋɛ Farisi ŋa, í yɛ ŋai bɛi inɛ ŋa iyi à ya wiɛ anyii kɔɔfu do jɛɛ ŋa nɔ a jɔ̀ inɔɛ riisi. Inɔ hai sĩa do takiii wa kɔ̃ nŋɛ.

⁴⁰ Iŋɛ hai nɛ yaase ŋa, inɛ iyi í taka anyii ara, lafɛ̃ɛ si í ce inɔɛ mɔ?

⁴¹ Í sĩa i na ilu are ŋa mii iyi í wa si inɔ jɛɛ do kɔɔfu, nɔ mii fei á má nŋɛ.

⁴² Amma ijuukpãi á jɛ tu ŋɛ, iŋɛ Farisi ŋa, si na iyi í jɔ̀ ì ya na Ilaaɔ̃ akã si mɛɛwa fei si nyaui ayɛ nŋɛ ŋa. Do nŋu fei, i kù waa ce jiida nɔ i kù waa nyisi kubii Ilaaɔ̃ ŋa. Iyi bɛi í jɔ i ya ce nɔ i maà gbɛjɛ iyi í gbe ŋa.

⁴³ Ijuukpãi á jɛ tu ŋɛ, iŋɛ Farisi ŋa, si na iyi í jɔ̀ si ile bi ku ce kutɔtɔɔ ŋa kitãi inɛ ngbo ŋai ì ya bi ŋa, nɔ ì ya bi a ce ŋɛ fɔɔ do bɛɛrɛ nla nla si bantuma ŋa.

⁴⁴ Aa yɛ ijuukpã ŋa domi ì yɛ ŋai bɛi balɛ ŋa iyi inɛ gɔ kù waa yɛ. Si antai nŋai à waa nɛ a kù nɔ a kù mà.

⁴⁵ Ŋɔi woo kɔ inɛ ŋa si wooda gɔ í sɔ̃ɔ í ni, Mɛɛtu, bii ì waa fɔ bɛɛbɛ, awa mɔi ì waa bu.

⁴⁶ Ŋɔi Jesu í jɛaa í ni, ijuukpãi á jɛ tu ŋɛ, iŋɛ woo kɔ inɛ ŋa si wooda ŋa mɔ, domi ì waa kãa inɛ ŋa aso kugaabu ku so ŋa, nɔ iŋɛ taka nŋɛ i ci ya lesi baa amaawɔ nŋɛ.

⁴⁷ Aa yɛ ijuukpã ŋa, si na iyi í jɔ̀ walii ŋa iyi bala nŋɛ ŋa à kpa wo, iŋɛi ì waa teese balɛ nŋa ŋa.

⁴⁸ Ì waa nyisi ŋa iyi ì jɛsi mii iyi bala nŋɛ ŋau à ce, si na iyi í jɔ̀ aŋai à kpa walii ŋau, nɔ iŋɛi ì waa teese balɛ nŋa ŋa.

⁴⁹ Ŋɔi í jɔ̀ Ilaaɔ̃ í fɔ si bisiɛ í ni, an bɛ walii ŋa do woo bɛ ŋa si anini nŋa. Aa kpa inɛ gɔ ŋa nɔ a kpã inɛ gɔ ŋa mɔ iju.

⁵⁰ Na nŋu, ijuukpãi woo kpa walii ŋau fei hai sintei andunya si iri nŋɛi á jɛ.

⁵¹ Iŋɛi aa yɛ ijuukpãi ku kpai Abɛli hee ku koo si Zakari iyi à kpa si afei bi kuweeu do kpasɛ̃i Ilaaɔ̃. Ntɔ ntɔ, ǹ wa n sɔ̃ ŋɛ, ijuukpãi mii ŋau bɛ fei si inɛi nsɛi ŋau ihɛ̃i á baa ku jɛ si.

⁵² Ijuukpãi á jɛ tu ŋɛ, iŋɛ woo kɔ inɛ ŋa si wooda ŋau, domi i kù bi ntɔi idei Ilaaɔ̃ ku mà ŋa, nɔ inɛ ŋa iyi à bi ku màɛ iŋɛi ì waa ganji ŋa ŋa.

⁵³ Iyi Jesu í fɔ bɛɛbɛ í tã ŋɔi í fita hai bɛ. Ŋɔi idɔi woo kɔ inɛ ŋa si wooda do Farisi ŋau í kɔ̃ nɔ à wasi ku manteɛ do ide ku bee si gãmɛi ide nkpɔ,

⁵⁴ à waa leaò taai ide ku ba a muu si ide gɔ.