Luku 1 - Bibeli do fee

Ide sinte

^1-4 Baakɔɔm Teofili, ilu bɛɛrɛ nla, ǹ wa n ceɛ fɔɔ. Í sĩaam si n kɔɛ tiau ihɛ̃ wa n sɔ̃ɛ dee dee mii iyi í ce si anini nwa. Inɛ ŋa iyi à yɔɔ hai sinte, nɔ à baa à jɛ woo ce icɛi ideu, aŋai à sɔ̃ wa. Iyi inɛ ŋa à gbɔɔ, inɛ nkpɔ nkpɔi í ce kookaai ku ba a kɔɔ dee dee. Nɔ í sĩaam si amu mɔ n kɔɛ wa ku ba i mà kãm kãm iyi ide ŋa iyi à kɔɛ siu ntɔi, domi ǹ wũa ideu fei hai sinteɛ.

Amaleka* gɔ wa fɔ idei kubíi Zãa woo dasi inyi

⁵ Si waati iyi Herodu wa jɛ ilaalui Zudee, woo weei Ilaaɔ̃ gɔ í wa bɛ à ya kpoo Zakari. Si wuai woo weei Ilaaɔ̃ ŋa iyi í jɛ ti Abiai í wa. Aboɛi à ya kpe Elizabɛti. Si dimii Arɔ̃ɔ iyi í jɛ woo wee nla sintei Ilaaɔ̃ui í wa.

⁶ Aŋa minji fei à jɛ dee dee si wajui Ilaaɔ̃ Lafɛ̃ɛ nɔ à waa jirima woodaɛ ŋa do ideɛ fei mam mam.

⁷ Amma a kù nɛ ama domi Elizabɛti gbɛndai, nɔ aŋa minji fei à gbo tã.

⁸ Ajɔ nŋu gɔ, Zakari wa ce icɛi kuweeɛ si wajui Ilaaɔ̃ domi si wuaɛi kuweeu í to si.

⁹ Wee à ya ta kpasai ku ba a mà inɛ iyi á lɔ si kpasɛ̃i Ilaaɔ̃ koo jo tuae. Ŋɔi ajɔ nŋu bɛ, kpasau í so Zakari, ŋɔi í jɔ̀ í lɔ inɔ ileu koo jo tuaeu.

¹⁰ Nɔ zamaau fei wa ce kutɔɔ waduude si waati iyi wa jo tuaeu.

¹¹ Ŋɔi amalekai Ilaaɔ̃ gɔ í naa siɛ, wa leekĩ ikpa awɔ njɛi bi ku jo tuaeu.

¹² Iyi Zakari í yɔɔ ŋɔi zigiɛ í da, nɔ njo í muu hee í caa.

¹³ Amma amalekau í sɔ̃ɔ í ni, maà jɔ̀ njo ku muɛ, Zakari. Ilaaɔ̃ í gbɔ kutɔɔɛ. Elizabɛti aboɛ á bíɛ ama inɛmɔkɔ nɔ i sɔɔ Zãa.

¹⁴ Aa nɛ inɔ didɔ̃ nla nla nɔ inɛ nkpɔ á wɛɛ do inɔ didɔ̃ na kubíɛ,

¹⁵ si na iyi í jɔ̀ inɛ nlai á jɛ si wajui Aɔ̃ Lafɛ̃ɛ. Kaa mɔ vɛ̃ɛ, hee má jɛ atɛ̃ kulele mmu gɔ. Nɔ á kɔ̃ò Hundei Ilaaɔ̃ hai inɔi iyeɛ.

¹⁶ Á jɔ̀ inɛi Izirɛli nkpɔ ku kpaasi idɔ nɔ a nyi wa bi Aɔ̃ Lafɛ̃ɛ nŋa.

¹⁷ Nŋui á cuaa Ilaaɔ̃ nɔ ku yɛ bɛi Elii walii nlai takou. Gbugbãɛ mɔ á yɛi bɛi ti Elii. Á jɔ̀ baa do ama nŋa ŋa a gbɔsi njɛ, nɔ á jɔ̀ hai gbɔ ide ŋa mɔ a ce lasabu bɛi inɛ dee dee ŋa, nɔ ku jɔ̀ inɛ ŋa a tã sɔɔlu a maa degbe Aɔ̃ Lafɛ̃ɛ.

¹⁸ Amma Zakari í sɔ̃ amalekau í ni, amu wee ǹ gbo tã nɔ abom mɔ í ce inɛ ngbo. To, bɛirei an ce n mà iyi ideu á ce.

¹⁹ Ŋɔi amalekau í jɛaa í ni, amui Gabiɛli. Amui ǹ ya n wa bi Ilaaɔ̃ n maa n ceaa icɛ. Nŋui í bɛm wa n na n baɛ ide ku fɔ nɔ n sisiɛ laabaau jiidau ihɛ̃.

²⁰ Amma i kù dasi idem nɔu naanɛ baa do iyi á na ku ce bii waatiɛ í to. Na nŋu, aa dekĩ, i kaa yɔkɔ i fɔ ide má í gbe ajɔ iyi ideu í cei.

²¹ Wee inɛ ŋa à waa degbe Zakari, nɔ à biti do iyi wa kpɛ inɔ kpasɛ̃i Ilaaɔ̃ bɛ.

²² Iyi í fita wa, kù yɔkɔ ku ba ŋa ide ku fɔ má, ŋɔi à mà iyi í ce kuyɛ gɔi si inɔ ileu bɛ. Wa ba ŋa ide ku fɔ do awɔ, amma kù yɔkɔ ku fɔ ide do gɛlɛ.

²³ Si anyii kuyɛu, Zakari í mɔsi icɛɛ má hee í koo í to ajɔ iyi icɛɛ í kpa iri inɔ kpasɛ̃ bɛ. Ŋɔi í nyi ideɛ.

²⁴ Si anyiɛ, Elizabɛti aboɛ í ba asĩ, nɔ wa singa araɛ zakai cukpa miiu, í ni,

²⁵ cɔ mii iyi Ilaaɔ̃ í ceem. Í cɔm do iju jiida nɔ í nyaam anyɔ si wajui amanɛ ŋa.

Amaleka* wa fɔ idei kubíi Jesu

²⁶ Iyi asĩi Elizabɛti í ba cukpa mɛɛfa, ŋɔi Ilaaɔ̃ í bɛ amaleka Gabiɛli Nazarɛti si ilɛi Galilee.

²⁷ Í bɔɔi bi mudɛ̃ɛ gɔ iyi kù mà mɔkɔ, amma à mua awaasũ gɔ iyi à ya kpe Zozɛfu, si dimii ilaalu Davidi. Irii mudɛ̃ɛui í jɛ Maari.

²⁸ Amalekau í lɔ bi tɛɛ í sɔ̃ɔ í ni, ǹ wa n ceɛ fɔɔ, awɔ iyi Ilaaɔ̃ í cea didɔ̃. Aɔ̃ Lafɛ̃ɛ í wɛɛ do awɔ.

²⁹ Ŋɔi Maari í biti do ideu nɔ wa bee araɛ ide wa ni, yoomai í jɛ yaasei fɔɔu ihɛ̃.

³⁰ Ŋɔi amalekau í sɔ̃ɔ í ni, maà jɔ̀ njo ku muɛ Maari. Ilaaɔ̃ í ceɛ didɔ̃.

³¹ Aa ba asĩ i bí ama inɛmɔkɔ nɔ i sɔɔ Jesu.

³² Á na ku jɛ inɛ nla. Amai Ilaaɔ̃i aa ya kpoo, nŋu iyi kù nɛ saa. Aɔ̃ Lafɛ̃ɛ á coo ilaalu, á náa bommai Davidi balaɛ.

³³ Nŋui á jɛ bomma si dimii Zakɔbu do ajɔ fei. Bommaɛ kaa nɛ kɔɔ.

³⁴ Ŋɔi Maari í bee amalekau í ni, bɛirei á ce ku ce, si bɛi n kù mà mɔkɔ.

³⁵ Ŋɔi amalekau í jɛaa í ni, Hundei Ilaaɔ̃i á naa siɛ, nɔ gbugbãɛ ku biiɛ bɛi jĩjĩ. Nŋui í jɔ̀ ama iyi aa na i bíu á jɛ inɛ kumá nɔ a kpoo Amai Ilaaɔ̃.

³⁶ Elizabɛti nyaanzeɛu mɔ iyi à ya maa kpe gbɛndau, do si agboɛu fei, í nɛ asĩi ama inɛmɔkɔ. Í wɛɛ si cukpa mɛɛfasiaɛ nsɛi.

³⁷ Maari, jɔ̀ i mà iyi nkãma kù wɛɛ iyi Ilaaɔ̃ í mɔngɔ.

³⁸ Ŋɔi Maari í ni, amu woo ce icɛi Aɔ̃ Lafɛ̃ɛi. Fei ndɛɛ ku ceem bɛi ì sɔ̃m nɔu. Ŋɔi amalekau í nɛ.

Maari í bɔ Elizabɛti ku cɔ

³⁹ Si anyii nŋu, ŋɔi Maari í dede do saasa í dasi kpãa wa nɛ ikpa geete ŋa, í bɔ ilu gɔ si ilɛi Zudee.

⁴⁰ Iyi í to bɛ ŋɔi í lɔ kpasɛ̃i Zakari nɔ í ce Elizabɛti fɔɔ.

⁴¹ Waati iyi Elizabɛti í gbɔ fɔɔi Maariu, ŋɔi amau í yaga si inɔɛ, nɔ Elizabɛti í kɔ̃ò Hundei Ilaaɔ̃.

⁴² Nɔ í dɔ̃ anu hee lele í ni, Ilaaɔ̃ í weeɛ í re inaabo fei, nɔ kuweeu á sɔ si ama iyi aa na i bíu.

⁴³ Yooi ǹ jɛ hee iyei Lafɛ̃ɛm í naa bi tom.

⁴⁴ Waati iyi ǹ gbɔ fɔɔɛu bɛ, ama iyi í wa inɔm í yaga do inɔ didɔ̃.

⁴⁵ Ilu inɔ didɔ̃i awɔ iyi ì dasi naanɛ iyi mii iyi Ilaaɔ̃ í sɔ̃ɛ á na ku ce.

Iri ku kɔ̃i Maari

⁴⁶ Nɔ Maari í ni, idɔm wa saabu Aɔ̃ Lafɛ̃ɛ.

⁴⁷ Nɔ ǹ wɛɛò inɔ didɔ̃ na irii Ilaaɔ̃ Woo faabam,

⁴⁸ si na iyi í jɔ̀ í kãsim iju jiidaɛ, amu woo ce icɛɛ iyi n kù jɛ ngɔgɔ. Nɔ hai nsɛi inɛi andunya ŋa fei aa maa ni amu ilu inɔ didɔ̃i,

⁴⁹ domi Ilaaɔ̃, ilu gbugbã fei í ceem mii nla nla. Í jɛ inɛ kumá.

⁵⁰ Í ya ce araarei inɛ ŋa iyi à waa jirimaɛ hee do ajɔ fei.

⁵¹ Í ce icɛ gbugbã ŋa do gbugbãi awɔɛ nɔ í fangaa inɛ ŋa iyi lasabui idɔ nŋa í nɛ faau.

⁵² Í kɛkɛ ilaalu ŋa si batai bomma nŋa ŋa, nɔ í so ilu are ŋa lele.

⁵³ Í jɔ̀ inɛ ŋa iyi ari wa kpa à jɛ mii jiida ŋa à yo, amma í lele ilu fia ŋa awɔ ngbɛ.

^54-55 Í sobi inɛi Izirɛli woo ce icɛɛ ŋa, í ce araare nŋa hee do ajɔ fei bɛi í tako í sɔ̃ Aburahamu do tɔkuɛ ŋa aŋa iyi à jɛ bala nwa ŋa.

⁵⁶ Iri iyi Maari í kɔ̃u mbɛ. Si anyiɛ nɔ í buba bi Elizabɛti bɛ zakai cukpa mɛɛta, í bɛi í nyi ideɛ.

Kubíi Zãa woo dasi inyiu

⁵⁷ Awaati í to bii Elizabɛti á bí amaɛ, nɔ í bí ama inɛmɔkɔ.

⁵⁸ Kpaasiɛ ŋa do nyaanzeɛ ŋa à gbɔ iyi Aɔ̃ Lafɛ̃ɛ í ce araareɛ ntɔ ntɔ, nɔ aŋaò ŋa à wɛɛò inɔ didɔ̃ ajɔ.

⁵⁹ Si ajɔ mɛɛjɔsia à naa ku dasi amau bango, nɔ à waa bi à kpoo Zakari, irii baaɛu.

⁶⁰ Amma iyeɛ í so ide í ni, aawo, Zãai aa kpoo.

⁶¹ Ŋɔi à sɔ̃ɔ à ni, si nyaanzeɛ inɛ kãma kù nɛ dimii iriu bɛ.

⁶² Nɔ à bee baaɛ do awɔ ku ba a mà bɛi í bi a kpe amau.

⁶³ Ŋɔi Zakari í tɔɔ mii gɔ si bii á kɔ si, nɔ í kɔ í ni, Zãai í jɛ iriɛ. Nɔ aŋa fei à biti.

⁶⁴ Ŋɔi gbakã Zakari í yɔkɔ í fɔ ide do gɛlɛɛ, nɔ í lɔsi ide ku fɔ wa saabuò Ilaaɔ̃.

⁶⁵ Ŋɔi njo í mu hee do inɛ ŋa iyi à wa amɛɛ amɛɛ fei. Nɔ si ilɛɛkoi geetei Zudee ŋa fei inɛ ŋa à wasi ku ce faajii ideu.

⁶⁶ Inɛ ŋa iyi à gbɔ ideu fei à ya maa muui si idɔ nŋa nɔ a maa ni, debɛi, bɛirei amau ihɛ̃ á na ku jɛ. Mii ŋa iyi í ceu ihɛ̃ fei wa nyisi iyi gbugbãi Ilaaɔ̃ í wɛɛ do nŋu.

Iri ku kɔ̃i Zakari

⁶⁷ Ŋɔi Zakari baai amau í kɔ̃ò Hundei Ilaaɔ̃, nɔ í ce walii í ni,

⁶⁸ saabui í jɛ ti Ilaaɔ̃ Lafɛ̃ɛi inɛi Izirɛli ŋa si na iyi í jɔ̀ í naa bi inɛɛ ŋa í naa í ya ŋa.

⁶⁹ Nɔ í naa nwa woo faaba ilu gbugbã wa si nyaanzei ilaalu Davidi amaacɛɛu,

⁷⁰ si bɛi í jɔ̀ walii kumáɛ ŋau à fɔ wo hai ku kpɛ.

⁷¹ Nŋui á faaba wa hai si awɔi mbɛɛ nwa ŋa, do hai bi inɛ ŋa iyi à cé wa fei.

⁷² Bɛɛbɛi í nyisi bala nwa ŋa araareɛ, nɔ wa yeò gigii akabuu kumáɛ.

⁷³ Akabuuui í jɛ kuwã iyi í cea Aburahamu bala nwa,

⁷⁴ í ni nŋu á nya wa hai si awɔi mbɛɛ nwa ŋa, nɔ nŋu ku jɔ̀ ka cea nŋu icɛ do wɔɔkɔ.

⁷⁵ Nɔ icɛ iyi aa ka ceau ku jɛ do idɔ kumá nɔ ka jɛ dee dee si wajuɛ do ajɔ fei si kuwɛɛ nwa.

⁷⁶ Nɔ awɔ amam, aa kpeɛ waliii Ilaaɔ̃, nŋu iyi kù nɛ saa, domi aa cuaa Lafɛ̃ɛ i maa teesea kpãa,

⁷⁷ nɔ aa jɔ̀ inɛɛ ŋa a mà iyi aŋa aa ba faaba waati iyi Ilaaɔ̃ á nya dulum du ŋa.

⁷⁸ Ntɔ ntɔ, araarei Ilaaɔ̃ Lafɛ̃ɛ nwa í lá si wa. Na saabui araareɛui í jɔ̀ inya kumá í naa si wa hai lele bɛi nunui daakɔ,

⁷⁹ ku ba ku má inya si inɛ ŋa iyi à waa buba si ilu kuku do si jĩjĩi iku ku maa nɛò awa fei si kpãai laakai akã.

⁸⁰ Iri iyi Zakari í kɔ̃u mbɛ. Si anyii nŋu amau wa la, nɔ bisiɛ wa kɔ̃ɔsi nɔ í koo í wa gbaa hee í koo í tóò ajɔ iyi í nyisi araɛ bantuma si wajui inɛi Izirɛli ŋa.