Kuyɛi Zãa 9 - Bibeli do fee

Kãakãakĩ miiusia

¹ Si anyii nŋu, amaleka miiusiau í fã kãakãakĩɛ. Nɔ ǹ yɛ leleaɔ̃ gɔ í cuku ilɛ hai lele wa. Nŋui à na kileei isa nla hai nɛ kɔɔu.

² Leleaɔ̃u í cĩ isau nɔ cua wa fita bɛi cuai ina nla, nɔ í bii inunu í jɔ̀ inya fei í dũ.

³ Nɔ kɛtɛngbo ŋa à fita wa hai si cuau à waa tɛ ilɛ, nɔ à mu nŋa gbugbã bɛi acĩi cencee.

⁴ À na ŋa wooda à ni a maà bɛjɛ fɔfɔ walakɔ mii tũtũ gɔ walakɔ jĩi gɔ bii kù jɛ inɛ ŋa iyi a kù nɛ nyindai Ilaaɔ̃ si ikpo nŋa.

⁵ A kù na kɛtɛngbo ŋau wooda a kpaò amanɛ ŋa bii kù jɛ a kpã ŋa iju hee zakai cukpa miiu. Ara kuroi ijuukpãu í mungaò bɛi bii cencee í ta amanɛ.

⁶ Si cukpa miiuu, inɛ ŋa aa dɛdɛ iku amma a kaa ba. Aa bi aŋa a ku amma iku á sa nŋa.

⁷ Kɛtɛngbo ŋau à jɔ acĩ ŋa iyi à tã sɔɔlu a bɔ igũ. Ngɔgɔ í wa si iri nŋa bɛi fulai wura, nɔ waju nŋa í yɛ bɛi ti amanɛ ŋa.

⁸ Ntoi iri nŋa í yɛ bɛi ntoi irii inaabo ŋa nɔ inyí nŋa í yɛ bɛi ti muusu nla ŋa.

⁹ À bii gɛndɛ nŋa do bata ku nɛ sisima gɔ iyi bii ì yɔɔ aa ni isɔi. Nɔ ikpa nŋa í ya maa ce iba bɛi sarɛtii igũ nkpɔ iyi acĩ ŋa à waa fa bi ku ce igũ.

¹⁰ À nɛ akpaamu ku nɛ acĩ bɛi cencee ŋa. Do akpaamu nŋau bɛi aa kpãò amanɛ ŋa iju si cukpa miiuu.

¹¹ Ilaalui kɛtɛngbo ŋaui í jɛ amaleka ilu irii isa nla hai nɛ kɔɔu. Iriɛi í jɛ Abadɔ̃ɔ do feei Ebɛɛ. Do Gɛrɛki mɔ à ya kpooi Apoliɔ̃, waatɔ woo bɛjɛ.

¹² Nsɛi, iyi ijuukpã sinte í lɔ í gbe ijuukpã minji gɔ ŋa iyi aa naa má.

Kãakãakĩ mɛɛfasia

¹³ Ŋɔi amaleka mɛɛfasiau í fã kãakãakĩɛ. Nɔ ǹ gbɔ ide ku fɔ gɔ hai gonta mɛɛi bi kuweei wura iyi í wa si wajui Ilaaɔ̃.

¹⁴ Ide ku fɔu í sɔ̃ amaleka mɛɛfasia iyi wa mu kãakãakĩu í ni, fũ amaleka mɛɛ ŋa iyi à dĩ kɔkɔi ido nla iyi à ya kpe Efaratau.

¹⁵ Ŋɔi í fũ amaleka mɛɛ ŋau. Amaleka ŋau à tã sɔɔlui mam mam si adɔ̃u do si cukpau do si ajɔu do si isɔu ku ba a kpa ikɔ akãi kukpɛ̃ mɛɛtai amanɛ ŋa.

¹⁶ À sɔ̃m jiai masa nŋa ŋa, à wɛɛi dubu minji ikɔ dubu cĩɔ (200.000.000).

¹⁷ Si bɛi ǹ yɛ acĩ ŋau do masa ŋau si kuyɛm wee. À dasi batai igũ nkpa bɛi ina do boogu bɛi bulam do igbaagba bɛi fainwita. Irii acĩ ŋau í yɛ bɛi irii muusu nla, nɔ ina do cua do fainwita wa fita wa hai si gɛlɛ nŋa.

¹⁸ Ikɔ akãi kukpɛ̃ mɛɛtai inɛi andunya ŋa í ku na saabui bɔ̃nɛ mɛɛta ŋau, waatɔ ina do cua do fainwita iyi wa fita hai si gɛlɛi acĩ ŋau.

¹⁹ Gbugbãi acĩ ŋau í wai si gɛlɛ nŋa do si akpaamu nŋa. Akpaamuu í yɛi bɛi njo, nɔ í nɛ iri. Do nŋui à ya kpã inɛ ŋa iju.

²⁰ Do nŋu fei, inɛi andunya ŋa iyi à gbe a kù ku si bɔ̃nɛu à kɔ̀ ku kpaasi idɔ. Nɔ à kɔ̀ ku jɔ̀ mii ŋa iyi à ce do awɔ nŋa ku tɔɔ. À waa mɔsi inɛi inɔɔko ŋa ku tɔɔ do iwɛ̃ ŋa iyi à ce do wura do isɔ fũfũ do isɔ danya do kuta do jĩi ŋa, aŋa iyi a kaa yɔkɔ a gbɔ ide, a kaa nɔ a yɔkɔ a yɛ ilu, hee má jɛ a nɛ.

²¹ Bɛɛbɛ mɔi inɛ ŋau a kù jɔ̀ inɛ ku kpa, do dobu dobu nŋa ŋa ku ce, do sakara ku ce, do ile nŋa ŋa.