Kuyɛi Zãa 8 - Bibeli do fee

À ga sɛɛda mɛɛjesia

¹ Waati iyi ama angudãu í ga sɛɛda mɛɛjesiau, ilu í coko lelei Aɔ̃ zakai iju kãmɛɛ kuntaa.

² Si anyii nŋu, nɔ ǹ yɛ à na amaleka mɛɛje ŋa iyi à ya maa leekĩ si wajui Ilaaɔ̃u kãakãakĩ mɛɛje.

³ Si anyii nŋu, amaleka mmu gɔ í naa í leekĩ kɔkɔi bi kuweeu, wa mu fatai wura bii à ya jo tuae. À náa tuae nkpɔ nkpɔ ku tɔtɔɔò kutɔɔi woo dasi naanɛ ŋa ku ba ku joo si antaii bi kuweei wura iyi í wa si wajui kitãi bommai Ilaaɔ̃u.

⁴ Cuai tuaeu do kutɔɔi woo dasi naanɛ ŋau í dede lele si wajui Ilaaɔ̃ hai si awɔi amalekau.

⁵ Ŋɔi amalekau í so fatau nɔ í bu ina hai bi kuweeu, í dasi inɔɛ hee í kɔ̃, nɔ í nyɔɔ ilɛ bɛ. Waati bɛɛbɛ à gbɔ kulai ijĩ do iba ŋa nɔ à yɛ kuŋɔi ijĩ nɔ ilɛ í yaya.

Kãakãakĩ ŋa

⁶ Si anyiɛ, amaleka mɛɛje ŋa iyi à waa mu kãakãakĩ mɛɛje ŋau, à ce sɔɔlu a fãa.

⁷ Amaleka sinteu í fã kãakãakĩɛ. Ŋɔi kutai ijĩ do ina do njɛ í yɔgɛɛ si njɛ nɔ wa naa hai lele do gbugbã. Nɔ ikɔ akãi kukpɛ̃ mɛɛtai ilɛ í jo do jĩi ŋa do fɔfɔ tũtũ ŋa fei.

⁸ Nɔ amaleka minjisiau í fã kãakãakĩɛ. Nɔ à nyɔ ngɔgɔ iyi í yɛ bɛi iri kuta nla iyi wa jo si tenku. Ŋɔi ikɔ akãi kukpɛ̃ mɛɛtai tenkuu í kpɔò njɛ,

⁹ nɔ ikɔ akãi kukpɛ̃ mɛɛtai mii ilu hunde ŋa iyi à wa si inyiu à ku, nɔ ikɔ akãi kukpɛ̃ mɛɛtai akɔi inyi fei í ce nfe.

¹⁰ Si anyii nŋu, amaleka mɛɛtasiau í fã kãakãakĩɛ. Ŋɔi leleaɔ̃ nla gɔ iyi í ya ina bɛi jugula í cuku wa hai lele si ikɔ akãi kukpɛ̃ mɛɛtai ido do isɔ̃ ŋa.

¹¹ Irii leleaɔ̃ui Kuro. Nɔ ikɔ akãi kukpɛ̃ mɛɛtai inyiu í ro. Iyi inɛ ŋa à mɔɔ, nkpɔ nŋa í ku si na iyi í jɔ̀ inyiu í ro.

¹² Si anyii nŋu, amaleka mɛɛsiau í fã kãakãakĩɛ. Ŋɔi ikɔ akãi kukpɛ̃ mɛɛtai inunu do ti cukpa do ti leleaɔ̃ ŋa í dũ, nɔ ikɔ akãi kukpɛ̃ mɛɛtai inya kumái dasã kù wɛɛ má, bɛɛbɛ mɔi ikɔ akãi kukpɛ̃ mɛɛtai inya kumái idũ kù wɛɛ má.

¹³ Iyi ǹ cɔ ilu má nɔ ǹ yɛ kungbã wa fo hee lelei Aɔ̃. Kungbãu wa kpata wa dɔ̃ anu hee lele wa ni, waiyooi, iko í jɛm, iko í jɛm. Bɛirei ijuukpãi inɛi andunya ŋa á to si waati iyi amaleka mɛɛta ŋa iyi à gbe ŋau aa fã kãakãakĩ nŋa.