Kuyɛi Zãa 7 - Bibeli do fee

Inɛi Izirɛli 144.000

¹ Si anyii nŋu, ǹ yɛ amaleka mɛɛ gɔ ŋa à waa leekĩ si andunya gonta mɛɛ, à waa ganji fufui andunya gonta mɛɛu ku ce si ilɛ do si tenku nɔ ku maà yaga jĩi gɔ.

² Nɔ ǹ yɛ amaleka mmu gɔ wa naa hai nunui daakɔ, wa mu nyindai Ilaaɔ̃, nŋu iyi í jɛ icui kuwɛɛ. Nɔ í dɔ̃ anu si amaleka mɛɛ ŋa iyi Ilaaɔ̃ í mu nŋa gbugbã a cea ilɛ do tenku laalɔu,

³ í ni, i maà cea ilɛ do tenku do jĩi gɔ laalɔ hee káa cea woo dasi naanɛ woo ce icɛi Ilaaɔ̃ ŋau nyinda si ikpo nŋa.

⁴ Ŋɔi à sɔ̃m jiai inɛ ŋa iyi à cea nyindai Ilaaɔ̃ si ikpo nŋau. À wɛɛi aŋa dubu cĩɔ do ciiji do mɛɛ (144.000) hai si dimii inɛi Izirɛli ŋa fei.

⁵ Si dimii Zudaa amanɛ dubu maateejii (12.000) à cea nyinda. Bɛɛbɛ mɔi si dimii Rubɛ̃ɛ amanɛ dubu maateejii. Si dimii Gadi amanɛ dubu maateejii.

⁶ Si dimii Azɛɛ amanɛ dubu maateejii. Si dimii Nɛfitali amanɛ dubu maateejii. Si dimii Manasee amanɛ dubu maateejii.

⁷ Si dimii Simeɔ̃ amanɛ dubu maateejii. Si dimii Levii amanɛ dubu maateejii. Si dimii Isakaa amanɛ dubu maateejii.

⁸ Si dimii Zabulɔ̃ɔ amanɛ dubu maateejii. Si dimii Zozɛfu amanɛ dubu maateejii. Si dimii Bɛnzamɛɛ amanɛ dubu maateejii. Inɛ ŋa iyi à cea nyindau mbɛ.

Zamaa nla nla

⁹ Si anyii nŋu, nɔ ǹ cɔ ilu má nɔ ǹ yɛ zamaa nla nla iyi inɛ gɔ kaa yɔkɔ ku ka. À fita wa hai ilɛ fei do si dimi fei do si fee ikã ikã fei. Aŋa fei à waa leekĩ si wajui kitãu do ama angudãu, à waa dasi jĩnɛ fũfũ nɔ à waa mu wuai kpakpa si awɔ nŋa.

¹⁰ À dɔ̃ anu à waa ni, faaba nwa wa naai hai bi Ilaaɔ̃ Lafɛ̃ɛ nwa iyi wa buba si kitãi bommau do hai bi ama angudãu.

¹¹ Nɔ amaleka ŋau fei à leekĩ à kaako kitãi bommau do inɛ ngbo ŋau do ilu hunde mɛɛ ŋau. À sɛɛbata si wajui kitãu à waa tɔɔ Ilaaɔ̃

¹² à ni, ami. Kucĩ do amboe do kumà do saabu do bɛɛrɛ do gbugbã do yiiko, fei ndɛɛ ku jɛ ti Ilaaɔ̃ Lafɛ̃ɛ nwa hee do ajɔ fei. Ami.

¹³ Ŋɔi inɛ akãi inɛ ngbo ŋau í beem í ni, yoo ŋai à waa dasi jĩnɛ fũfũ ŋau ihɛ̃. Hai iwoi à naa.

¹⁴ Nɔ ǹ jɛaa ǹ ni, lafɛ̃ɛm, n kù mà, awɔi aa mà. Nɔ í sɔ̃m í ni, inɛ ŋau ihɛ̃ à fita wai hai si bɔ̃nɛ nla nla. À fɔ jĩnɛ nŋa ŋa à fũuta ŋa do njɛi ama angudãu.

¹⁵ Nŋui í jɔ̀ à waa leekĩ si wajui kitãi bommai Ilaaɔ̃ à waa tɔɔɛ dasãò idũ inɔ kpasɛ̃ɛ. Nɔ Ilaaɔ̃ á wa inɔ nŋa ku maa degbe ŋa.

¹⁶ Ari kaa kpa ŋa má hee má jɛ agbɛ, nɔ inunu kaa cã ŋa má, bɛɛbɛ mɔi inya gbãa kaa wahala ŋa má.

¹⁷ Angudã iyi wa leekĩ bi kitãi bommau á gbã ŋa ku bɔò ŋa isɔ̃i kuwɛɛ. Ilaaɔ̃ mɔ á gbã cikãaju nŋa fei.