Kuyɛi Zãa 6 - Bibeli do fee

À ga sɛɛda mɛɛfa

¹ Ŋɔi ǹ yɛ ama angudãu í ga akãi sɛɛda mɛɛje ŋa iyi wa mási tiau, nɔ ǹ gbɔ inɛ akãi ilu hunde mɛɛ ŋau í la hee aa ni bɛi kulai ijĩi. Í ni, naa wa.

² Iyi ǹ cɔ ilu, ŋɔi ǹ yɛ acĩ fũfũ gɔ wa naa. Inɛ iyi wa gũu wa mu bioo, nɔ à daa si fulai amanlu. Í dasi kpãa bɛi woo jɛ igũ iyi wa bɔ ku jɛ igũ wa má.

³ Ŋɔi ama angudãu í ga sɛɛda minjisiau, nɔ ǹ gbɔ ilu hunde minjisiau í ni, naa wa.

⁴ Nɔ acĩ nkpa gɔ í fita wa. Nɔ à mua inɛ iyi wa gũu gbugbã ku dede igũ si andunya ku ba inɛ ŋa a kpa njɛ. Nɔ à naa taakuba nla gɔ.

⁵ Ŋɔi ama angudãu í ga sɛɛda mɛɛtasiau, nɔ ǹ gbɔ ilu hunde mɛɛtasiau í ni, naa wa. Iyi ǹ cɔ nɔ ǹ yɛ acĩ dũdũ gɔ wa naa. Inɛ iyi wa gũu wa mu gũa si awɔɛ.

⁶ Nɔ ǹ gbɔ imu gɔ hai si aninii ilu hunde mɛɛ ŋau, í ni, jɔ̀ inɛ ŋa a ya ra bilee tongoo akã do fiai icɛi ajɔ akã. Bɛɛbɛ mɔi fiai ɔɔzu tongoo mɛɛta á ya jɛ. Amma jɔ̀ fiai ikpo do vɛ̃ɛ si agbɛɛ.

⁷ Ŋɔi ama angudãu í ga sɛɛda mɛɛsiau, nɔ ǹ gbɔ ilu hunde mɛɛsiau í ni, naa wa.

⁸ Ǹ cɔ ilu nɔ ǹ yɛ acĩ fũfũ fɛɛ̀fɛɛ̀ gɔ wa naa. Inɛ iyi wa gũu, iriɛi Iku, nɔ bi kuwai iku ŋa wa tooɛ. Aŋai à na gbugbã a kpa ikɔ akãi kukpɛ̃ mɛɛi inɛi andunya ŋau do mɛɛmui sako ŋa iyi à wa si ilɛu do taakuba, do ari, do bɔ̃ɔ.

⁹ Si anyii nŋu, ama angudãu í ga sɛɛda miiusia iyi wa mási tiau. Nɔ ǹ yɛ hundei amanɛ ŋa si icui bi kuweeu, aŋa iyi à kpa na idei Ilaaɔ̃ do na sɛɛdai Jesu iyi à jɛ.

¹⁰ Hunde ŋau à la à ni, Lafɛ̃ɛ kumá ilu ntɔ, hee waati yoomai ì waa degbe i bɛi i kiiti inɛi andunya ŋa i sã nwa gbese si na iyi í jɔ̀ à kpa wa.

¹¹ Iyi à dɔ̃ bɛɛbɛ à tã ŋɔi à daa aŋa fei si jĩnɛ fũfũ, nɔ à sɔ̃ ŋa à ni a temua keeke titã hee jiai woo ce icɛ kpaasi nŋa ŋa ku kɔ̃, aŋa iyi aa na a kpa bɛi à tako à kpa aŋa mɔ.

¹² Ǹ cɔ ilu má si waati iyi ama angudãu í ga sɛɛda mɛɛfasia iyi wa mási tiau. Nɔ ilɛ í yaya do gbugbã, nɔ inunu í kuku inya kiti kiti bɛi acɔ dũdũ iyi í nɛ sisima, nɔ cukpa í kpã konkom bɛi njɛ.

¹³ Nɔ leleaɔ̃ ŋa à wɔ wa hai lele bɛi isoi jĩi iko í ya wɔ wa waati iyi fufu nla wa ce wa yagaɛ.

¹⁴ Nɔ lele í tɔtɔɔ inya akã bɛi sɛ̃ɛ iyi à ka. Nɔ iri kuta do gũngũm ŋa fei à yaya a kù wa agbɛ nŋa má.

¹⁵ Waati bɛɛbɛi ilaalui andunya ŋa do ilu ilɛ ŋa do inɛ ngboi sooge ŋa do ilu amani ŋa do ilu gbugbã ŋa do inɛ fei de, hai aru do inɛ ŋa iyi à nɛ ara nŋa, à waa manji si isai kuta do si afei kuta ŋa.

¹⁶ À waa dɔ̃ anu si iri kuta ŋau do si kuta ŋau à waa ni, i cuku si wa wa, i bii wa ku ba Ilaaɔ̃ ku maà yɛ wa, nŋu iyi wa buba si kitãi bommau. Nɔ i bii wa na idɔɔkɔ̃i ama angudãu ŋa.

¹⁷ I bii wa ŋa si na iyi í jɔ̀ ajɔi idɔɔkɔ̃ nla nla nŋau í to wa. Yooi á yɔkɔ ku leekĩ si waju nŋa.