Kuyɛi Zãa 5 - Bibeli do fee

Tia do ama angudã

¹ Ŋɔi ǹ yɛ inɛ iyi wa buba si kitãi bommau wa mu tia gɔ iyi à ka si awɔ njɛɛ. À kɔ tiau anyiò waju, nɔ à cĩmboɛ do sɛɛda mɛɛje.

² Nɔ ǹ yɛ amaleka ilu gbugbã gɔ, í là do gbugbã í ni, yooi í to ku ga sɛɛda ŋau ihɛ̃, nɔ ku fũ tiau.

³ Nɔ inɛ gɔ kù wɛɛ iyi í wa lele walakɔ ilɛ walakɔ lɛlɛi ilɛ iyi á yɔkɔ ku cĩ tiau ku cɔ inɔɛ.

⁴ Ǹ kpata ntɔ ntɔ si na iyi í jɔ̀ inɛ gɔ kù wɛɛ iyi í to ku cĩ tiau ku cɔ inɔɛ.

⁵ Ŋɔi inɛ akãi inɛ ngbo ŋau í sɔ̃m í ni, maà kpata. Muusu nla iyi í fita hai si dimii Zudaa iyi í jɛ tɔkui Davidiu í jɛ igũ, á yɔkɔ ku ga sɛɛda mɛɛje ŋau nɔ ku fũ tiau.

⁶ Iyi ǹ cɔ ikpa bi kitãi bommau nɔ ǹ yɛ ama angudã iyi à ceò kuwee wo wa leekĩ anini bɛ, nɔ ilu hunde mɛɛ do inɛ ngbo ŋau à kaakoɛ. Ama angudãu, í nɛ ngo mɛɛje do iju mɛɛje iyi í jɛ hunde mɛɛjei Ilaaɔ̃ ŋa iyi í bɛ si andunya fei.

⁷ Ama angudãu í bɔ bi inɛ iyi wa buba si antaii kitãu, nɔ í gba tiau hai si awɔ njɛɛ.

⁸ Iyi í gba tiau, ŋɔi ilu hunde mɛɛ ŋau do inɛ ngbo kɔnfia do mɛɛ ŋau à sɛɛbata si wajuɛ. Aŋa fei à nɛ mɔɔlɔ do kɔɔfui wura ŋa si bii tuae í wa. Tuaeui í jɛ kutɔɔi inɛi Ilaaɔ̃ ŋa.

⁹ Nɔ à kɔ̃ iri titɔ̃ gɔ à waa ni, awɔi ì to i gba tiau nɔ i ga sɛɛda ŋau, domi à kpaɛ wo, nɔ do njɛɛi ì raa Ilaaɔ̃ amanɛ ŋa hai si dimi fei, do fee ikã ikã fei, do ilɛ fei.

¹⁰ Nɔ ì tɔtɔɔ ŋa ì jɛ ilaalu nŋa, ì ce ŋa woo weei Ilaaɔ̃ Lafɛ̃ɛ nwa, nɔ aŋai aa jɛ bomma si andunyau.

¹¹ Iyi ǹ cɔ ilu má nɔ ǹ gbɔ anui amaleka nkpɔ gɔ ŋa, kukpɔ nŋa í to dubu nkpɔ nkpɔ. À kaako kitãi bommau do ilu hunde ŋau do inɛ ngbo ŋau.

¹² À dɔ̃ anu à waa ni, ama angudã iyi à ceò kuweeu wo í to ku ba yiiko do amani do kumà do gbugbã do bɛɛrɛ do amboe do saabu.

¹³ Nɔ ǹ gbɔ mii ilu hunde ŋa fei iyi à wa lele do ilɛ, do si lɛlɛi ilɛ, do si inɔ inyi, andi ilu hunde iyi í wa si andunya fei, à dɔ̃ anu à waa ni, inɛ iyi wa buba si kitãi bommau do ama angudãu, saabu do bɛɛrɛ do amboe do gbugbã ku jɛ tu ŋa hee do ajɔ fei.

¹⁴ Nɔ ilu hunde mɛɛ ŋau à jɛ à ni, ami. Nɔ inɛ ngbo ŋau à sɛɛbata à ce kutɔɔ.