Kuyɛi Zãa 4 - Bibeli do fee

Ilaaɔ̃ ku tɔɔ lele

¹ Si anyii nŋu bɛ, si kuyɛ ǹ yɛ gambo gɔ í cĩ lelei Aɔ̃. Inɛ iyi í tako í bam ide ku fɔ wo, nŋu iyi imuɛ í yɛ bɛi ti kãakãakĩ, í bam ide ku fɔ má í ni, gũ wa ihɛ̃ n nyisiɛ mii iyi á na ku naa si anyiɛ.

² Gbakã Hundei Ilaaɔ̃ í so í nɛɛm. Nɔ lelei Aɔ̃ bɛ ǹ yɛ kitãi bomma gɔ, inɛ gɔ wa buba si.

³ Inɛ iyi wa buba bɛu wa daanai bɛi kuta ku nɛ fia gɔ ŋa iyi à ya kpe zasipu do saaduani. Njoi Aɔ̃ í kaako kitãu nɔ wa daana bɛi emɛrodu.

⁴ Nɔ ǹ yɛ kitãi bomma kɔnfia do mɛɛ í kaako kitãi bommau. Nɔ inɛ ngbo kɔnfia do mɛɛ wa buba si antaii kitã ŋau, à dasi jĩnɛ fũfũ do fulai wura.

⁵ Ŋɔi hai si kitãi bommau kuŋɔi ijĩ wa fita wa, do anu ku dɔ̃, do kulai ijĩ. Fitila mɛɛje iyi wa má í wa si wajui kitãi bommau. Aŋai à jɛ hunde mɛɛjei Ilaaɔ̃u.

⁶ Si wajui kitãu dimii tenku gɔ í wa bɛ, wa daana bɛi digi. Mii ilu hunde mɛɛ gɔ ŋa à kaako kitãi bommau cingaa do cingaaɛ, à nɛ iju bii fei anyiò waju.

⁷ Mii ilu hunde sinteu í jɔ muusu nla, minjisiau mɔ í jɔ ama kɛtɛ, mɛɛtasiau wajuɛ í jɔ wajui amanɛ, nɔ mɛɛsiau í jɔ kungbã iyi wa fo.

⁸ Ilu hunde mɛɛ ŋau à nɛ ikpa mɛɛfa mɛɛfa, nɔ à nɛ iju bii fei inɔ do waduude. À ya maa kɔ̃ iri waati kãma fei alɛò daakɔ a maa ni, Kumá, Kumá, Kumá, bɛɛbɛi Aɔ̃ Lafɛ̃ɛ ilu gbugbã fei í jɛ, nŋu iyi í tako í wɛɛ wo, nɔ í wɛɛ baa nsɛi, nɔ wa naa.

⁹ Ilu hunde ŋau à waa kɔ̃ iri à waa saabu inɛ iyi wa buba si antaii kitãi bommau, nɔ à waa fɔ idei amboeɛ do bɛɛrɛɛ, nŋu iyi í wɛɛ do ajɔ fei.

¹⁰ Waati iyi à waa kɔ̃ iri bɛɛbɛ fei inɛ ngbo kɔnfia do mɛɛ ŋau à ya sɛɛbataa a maa tɔɔɛi. Nɔ à ya bɔ fula nŋa ŋai a jilɔɔ si wajui kitãi bommau a maa ni,

¹¹ awɔ Ilaaɔ̃ Lafɛ̃ɛ nwa, awɔi ì to i nɛ amboe do bɛɛrɛ do gbugbã, domi awɔi ì taka mii fei. Si idɔɔbiɛi ì taka ŋa nɔ à wɛɛ.