Kuyɛi Zãa 3 - Bibeli do fee

Ide iyi à sɔ̃ inɛi Jesu ŋa iyi à wa Saadi

¹ Kirisi í ni má, kɔa amalekai igbɛi inɛm ŋa iyi í wa Saadi. Kɔaa i ni, inɛ iyi í nɛ hunde mɛɛjei Ilaaɔ̃ ŋau do leleaɔ̃ mɛɛje ŋau í ni, ǹ mà kuce nŋɛ. Ǹ mà iyi à waa fɔ à ni ì jɛ ilu hunde ŋa baa do iyi ì jɛ iku ŋa.

² I jĩ hai si iri njoo ŋa nɔ i leekĩ si kuwɛɛ keeke iyi í gbe nŋɛ ku ba i maà ku mam mam ŋa, domi ǹ yɛ kookoosu nŋɛ kù kɔ̃ dee dee bi Ilaaɔ̃.

³ Na nŋu, i ye gigii mii iyi à kɔ nŋɛ si do bɛi ì gbɔ ŋa. I jirimaɛ ŋa nɔ i kpaasi idɔ nŋɛ. Bii i kù jĩ hai si iri njoo ŋa, an naa n ba ŋɛ bɛi ile. I kaa mà waati iyi an naa si ŋɛ.

⁴ Do nŋu fei, inɛ gɔ ŋa à wa inɔ nŋɛ iyi a kù dasi ara nŋa riisi, aŋai aa toom nɔ a maa dasi jĩnɛ fũfũ, domi aŋai à jɔò.

⁵ Inɛ iyi í jɛ igũi á dasi jĩnɛ fũfũ dimi bɛɛbɛ. N kaa n kpa iriɛ si tiai kuwɛɛ pai. Si bantuma an jɛsi si wajui Baam do amalekaɛ ŋa iyi inɛm nii.

⁶ Inɛ iyi í nɛ itĩ, ku sotĩ ku gbɔ mii iyi Hundei Ilaaɔ̃ wa sɔ̃ igbɛi inɛi Jesu ŋa fei.

Ide iyi à sɔ̃ inɛi Jesu ŋa iyi à wa Filadɛɛfi

⁷ Kirisi í ni má, kɔa amalekai igbɛi inɛm ŋa iyi í wa Filadɛɛfi. Kɔaa i ni, inɛ iyi í jɛ inɛ kumá do ilu ntɔ, iyi wa mu kileei ilaalu Davidi, nŋu iyi bii í cũu, inɛ gɔ kaa cĩmboɛ, bii í nɔ í cĩmboɛ, inɛ gɔ kaa cũu, nŋui í ni,

⁸ ǹ mà kuce nŋɛ. Ǹ mà iyi gbugbã nŋɛ kù la. Do nŋu fei, ì jirima idem nɔ i kù kɔ̀sim ŋa. Nŋui í jɔ̀ ǹ cĩ nŋɛ gambo iyi inɛ gɔ kaa yɔkɔ ku cĩmbo.

⁹ Wee an da nŋɛ inɛi igbɛi Seetam ŋa si awɔ, inɛ ŋa iyi à waa kpe ara nŋa Zuifu amma a kù jɛ Zuifu ŋa, iboi à waa sɔ. An jɔ̀ a naa bi tu ŋɛ a na a gulɛ si waju nŋɛ. Aŋa fei aa mà iyi ǹ bi ŋɛ.

¹⁰ Ǹ ni i temua ŋa, nɔ ì jirima idem nɔu ŋa. Na ŋɔi í jɔ̀ amu mɔ an degbe ŋɛ si waatii wahala iyi wa naa si andunya fei ku na ku cɔ laakaii inɛ ŋa.

¹¹ An nyi wa kaa kpɛ. Naanɛ iyi ì nɛ ŋa, i muu dim dim ŋa ku ba inɛ gɔ ku maà na ku gba ribai igũ ku jɛ nŋɛ.

¹² Inɛ iyi í jɛ igũ, an jɔ̀ ku jɛ sɔbe si kpasɛ̃i Ilaaɔ̃, kaa fita má. An kɔ irii Ilaaɔ̃ siɛ do irii iluɛ iyi í jɛ Zeruzalɛmu titɔ̃ iyi Ilaaɔ̃ á jɔ̀ ku kita wa hai lele. Nɔ n kɔ iri titɔ̃m siɛ.

¹³ Inɛ iyi í nɛ itĩ, ku sotĩ ku gbɔ mii iyi Hundei Ilaaɔ̃ wa sɔ̃ igbɛi inɛi Jesu ŋa fei.

Ide iyi à sɔ̃ inɛi Jesu ŋa iyi à wa Laodisee

¹⁴ Kirisi í ni má, kɔa amalekai igbɛi inɛm ŋa iyi í wa Laodisee. Kɔaa i ni, inɛ iyi à ya kpe Ami, woo jɛ sɛɛda ilu naanɛ iyi í jɛ ntɔu, nŋu iyi í jɛ icui mii iyi Ilaaɔ̃ í taka fei í ni,

¹⁵ ǹ mà kuce nŋɛ. Ǹ mà iyi i kù tũ ŋa, i kù nɔ i kù gbãa ŋa. Ǹ bi wo i tũ ŋa walakɔ i gbãa ŋa.

¹⁶ Amma si na iyi í jɔ̀ ì jɛ wɔɔwɔɔ ŋa, an kpɔ ŋɛ wai hai si gɛlɛm.

¹⁷ Ì ya fɔ i ni ŋa ì jɛ ilu fia ŋa, ì ba amani ŋa, nɔ i kù waa ce arei ngɔgɔ ŋa. Amma ǹ wa n sɔ̃ ŋɛ iyi idɔ nŋɛ wa ce bɔ̃ɔ, ì jɛ ilu araare ŋa do ilu are do fɛɛju do basĩ ŋa.

¹⁸ Na ŋɔi í ce ǹ wa n mu nŋɛ bisi, i jɔ̀ i ra wura iyi à yɔ si ina à wiɛ bi tom ŋa ku ba i jɛ ilu amani do ntɔ ŋa. Nɔ i ra jĩnɛ fũfũ i biiò anyii ara nŋɛ ŋa ku ba i maà maa nɛ bũmbũm ŋa nɔ anyɔ ku maà maa mu ŋɛ. I ra iwɔi iju i dasi iju nŋɛ ku ba i yɛ ilu ŋa.

¹⁹ Inɛ ŋa iyi ǹ bi fei, ǹ ya n kpã ŋa ijui nɔ n nyisi ŋa kpãa. Na nŋu, i hanya i kpaasi idɔ ŋa.

²⁰ Wee ǹ wa n leekĩ andɛi ile, nɔ ǹ wa n cã gambo. Inɛ iyi í gbɔ imum nɔ í cĩim, an lɔ bi tɛɛ, nɔ n baa ku jɛ, nɔ awaò ka jɛ ajɔ.

²¹ Inɛ iyi í jɛ igũ, lafɛ̃ɛi an jɔ̀ ku bam ku buba si kitãi bommam, si bɛi amu mɔ ǹ jɛ igũ nɔ ǹ buba do Baam si kitãi bommaɛ.

²² Inɛ iyi í nɛ itĩ, ku sotĩ ku gbɔ mii iyi Hundei Ilaaɔ̃ wa sɔ̃ igbɛi inɛi Jesu ŋa fei.