Kuyɛi Zãa 21 - Bibeli do fee

Lele titɔ̃ do ilɛ titɔ̃

¹ Si anyii nŋu, ǹ yɛ lele titɔ̃ do ilɛ titɔ̃. Lele nwo do ilɛ nwo ŋau a kù wɛɛ má. Tenku mɔ kù wɛɛ má.

² Nɔ ǹ yɛ ilu kumá iyi í jɛ Zeruzalɛmu titɔ̃ í kita wa hai lelei Aɔ̃. Í tã sɔɔlu bɛi abo titɔ̃ iyi wa bɔ mɔkɔɛ ku ko.

³ Nɔ ǹ gbɔ ide ku fɔ nla gɔ hai bi kitãi bommau í ni, nsɛi bi kuwai Ilaaɔ̃ í wɛɛ do amanɛ ŋa. Ilaaɔ̃ á maa wɛɛ do aŋa, nɔ aa jɛ inɛɛ ŋa. Ilaaɔ̃ takaɛ á wa si anini nŋa.

⁴ Á gbã cikãaju nŋa ŋa fei. Iku do inɔ kufɔɛ do kukpata do ara kuro kaa wɛɛ má, domi mii ndii tako ŋau fei à lɔ.

⁵ Waati bɛɛbɛi inɛ iyi wa buba si kitãi bommau í ni, wee ǹ ce mii fei titɔ̃. Nɔ í sɔ̃m í ni, kɔ iyi ihɛ̃ domi idem ide ntɔi nɔ í nɛ naanɛ.

⁶ Nɔ í sɔ̃m má í ni, fei ndɛɛ í tã. Inɛ kãma kù takom nɔ inɛ kãma kaa naa do anyim. Amui ǹ jɛ sintei mii fei do iri ku kpaɛ. Inɛ iyi agbɛ wa kpa fei an jɔ̀ ku mɔ inyii isɔ̃ hai nɛ fia ku sã. Nɔ inɛ iyi í mɔ inyiu fei á maa wɛɛi.

⁷ Inɛ iyi í jɛ igũ aa naa mii ŋau bɛ, nɔ an jɛ Ilaaɔ̃ Baabaɛ, nɔ nŋu mɔ ku jɛ amam.

⁸ Amma inɛ ŋa iyi à mɔngɔ do hai dasi naanɛ ŋa do woo ce laalɔ ŋa do woo kpa inɛ ŋa do woo ce sakara ŋa, do woo ce dobu dobu ŋa do woo tɔɔ iwɛ̃ ŋa do woo sɔ ibo ŋa fei aa ba ikpɛ̃ nŋa si ina nla iyi wa jo do fainwitau. Iyi bɛi í jɛ iku minjisiau.

Zeruzalɛmu* titɔ̃

⁹ Ŋɔi amaleka mɛɛje ŋa iyi à tako à waa mu fata mɛɛje ŋa si bii bɔ̃nɛ mɛɛje í wa siu, inɛ akã nŋa í naa í sɔ̃m í ni, naa wa n nyisiɛ abo titɔ̃ iyi ama angudãu á so.

¹⁰ Hundei Ilaaɔ̃ í naa sim nɔ amalekau í bɔòm si antaii iri kuta nla gɔ. Í nyisim Zeruzalɛmu ilu kumá iyi wa kita wa hai lele bii Ilaaɔ̃ í wau.

¹¹ Wa daana do amboei Ilaaɔ̃ bɛi kuta kusĩa jiida ku nɛ fia gɔ iyi à ya kpe zasipu iyi í má bɛi digi.

¹² Nɔ bindi nla kugboka gɔ í kaakoɛ. Í nɛ andɛ maateeji, nɔ amaleka maateeji gɔ ŋa à waa degbe andɛ koofa ŋau. Si andɛ koofa ŋaui à kɔ irii dimi maateejii inɛi Izirɛli ŋau.

¹³ Gonta mɛɛi bindiu fei í nɛ andɛ mɛɛta mɛɛta. Andɛ mɛɛta í wa ikpa nunui alɛ, mɛɛta mɔ í wa ikpa nunui daakɔ, nɔ mɛɛta mɛɛta í wa cingaa do cingaa.

¹⁴ À nyɔ icui bindii iluui do kuta maateeji. Si antaiɛi à kɔ irii woo bɛ maateejii ama angudãu.

¹⁵ Amaleka iyi wa bam ide ku fɔu, wa mu goloi wura iyi í jɛ mii ku wã ku ba ku wãò iluu do koofaɛ ŋa do bindiɛ.

¹⁶ Gontai iluu fei wa mungai, kucĩɛ do kusɔɛ fei akãi. Amalekau í wãa do golo ku wãɛ. Nɔ kusɔɛ í ce dubu maateeji (12.000) si yaasei ilɛ ku wã. Bɛɛbɛ mɔi kucĩɛ do kugbokaɛ.

¹⁷ Amalekau í wã bindiu nɔ sisimaɛ í ce agbãawɔ cĩɔ do ciiji do mɛɛ (144). Í wãa do yaase bɛi amanɛ ŋa mɔ à ya ce.

¹⁸ À ma bindiui do dimii kuta ku nɛ fia gɔ iyi à ya kpe zasipu nɔ à ma iluu takaɛi do wura alala iyi í má bɛi digi.

¹⁹ À nyɔ icui bindiui à ce boodaɛ do kuta kusĩa ku nɛ fia gɔ ŋa dimi ikã ikã, í nɛ ila ikã ikã. Kuta sinteui à ya kpe zasipu, minjisiaɛ mɔ safira, mɛɛtasiaɛ agati, mɛɛsiaɛ emɛrodu,

²⁰ miiusiaɛ saadonisi, mɛɛfasiaɛ saaduani, mɛɛjesiaɛ kisoliti, mɛɛjɔsiaɛ berili, mɛɛsãsiaɛ topazi, mɛɛwasiaɛ kisopazi, maatakãsiaɛ zasɛnti, maateejisiaɛ amɛtisi.

²¹ Nɔ à ce gamboi lɛgɛ maateeji. Gambo akã fei à cooi do lɛgɛ fũfũ akã ku nɛ fia. Nɔ à ce kpãai iluu do wura alala iyi í má bɛi digi.

²² N kù yɛ kpasɛ̃ bi ku tɔɔ Ilaaɔ̃ si iluu si na iyi í jɔ̀ Aɔ̃ Lafɛ̃ɛ ilu gbugbã fei do ama angudãu à wai bii fei.

²³ Iluu kù nɛ bukaatai inunu walakɔ cukpa iyi á máa inya, domi amboei Ilaaɔ̃ wa má inya siɛ, nɔ ama angudãu í jɛ fitilaɛ.

²⁴ Dimii ilɛ fei á maa nɛ si inya kumáɛ, nɔ ilaalui ilɛ ŋa fei aa naaò amani nŋa wa bɛ.

²⁵ Koofai iluu á maa cĩi waati kãma fei, domi idũ kaa dũ bɛ má pai.

²⁶ Aa naaò amanii ilɛ fei wa do bɛɛrɛɛ si iluu.

²⁷ Amma mii riisi kãma kaa lɔ bɛ. Bɛɛbɛ mɔi inɛ iyi wa ce laalɔ do woo sɔ ibo a kaa lɔ bɛ pai. Inɛ ŋa iyi aa lɔ bɛ, aŋai à jɛ inɛ ŋa iyi à kɔ iri nŋa si tiai ama angudãu iyi í jɛ tiai kuwɛɛ.