Kuyɛi Zãa 20 - Bibeli do fee

Adɔ̃ dubu

¹ Si anyii nŋu, ǹ yɛ amaleka gɔ má wa kita wa hai lelei Aɔ̃, wa mu kileei isa hai nɛ kɔɔu do sesee nla gɔ.

² Ŋɔi í bata akandama, njo iyi í wɛɛ hai tako tako, iyi í jɛ woo yɛ taalei inɛ do Seetam nɔu nɔ í dũu do seseeu hee adɔ̃ dubu.

³ Nɔ í tale siɛ inɔ isa nlau í sɔkɔ siɛ nɔ í ce si nyinda ku ba ku maà fita ku dĩ ijui dimii inɛi andunya ŋa má hee adɔ̃ dubuu koo tãò. Si anyiɛ à nɛ a cũu nɔ a fũu si waati keeke má.

⁴ Ŋɔi ǹ yɛ kitãi bomma gɔ ŋa nɔ inɛ ŋa à waa buba si. À na inɛ ŋa iyi à waa buba si ŋau yiiko a kiiti inɛ ŋa. Nɔ ǹ yɛ inɛ ŋa iyi à bu iri nŋa na idei Ilaaɔ̃ do si na iyi í jɔ̀ à jɛ sɛɛdai Jesu. Aŋai a kù tɔɔ mɛɛmuu hee má jɛ mii iyi à gbeu, nɔ a kù jɛ aŋa a nɛ nyindaɛ si ikpo nŋa walakɔ si awɔ nŋa. À dede hai si balɛ nɔ à jɛ bomma do Kirisi ajɔ adɔ̃ dubu.

⁵ Iyi bɛi í jɛ kudede sintei iku ŋa. Amma iku ŋa iyi à gbe a kù dede hai si balɛ, í gbe hee adɔ̃ dubuu koo kɔ̃ò.

⁶ Ilu inɔ didɔ̃ ŋai inɛ ŋa iyi à wa si kudede sinteu. Aŋai à nya ikã na irii Ilaaɔ̃. Iku minjisiau kù nɛ gbugbã si ŋa má, amma aa maa jɛ woo weei Ilaaɔ̃ ŋa do ti Kirisi, nɔ aa jɛ bomma do nŋu adɔ̃ dubu.

À jɛ Seetam* igũ

⁷ Bii adɔ̃ dubuu í kɔ̃ aa jɔ̀ Seetam hai si piisɔ̃ɔɛ.

⁸ Nɔ á fita koo dĩ ijui dimii inɛi andunya ŋa fei, waatɔ Gɔgu do Magɔgu, nɔ ku tɔtɔɔ ŋa a ce igũ. Aa kpɔ bɛi sãai acĩi ido.

⁹ Aŋai aa dede wa hai ilɛ fei a naa a kaako gbodoi woo dasi naanɛ ŋa do ilu iyi Ilaaɔ̃ í biu. Amma ina á naa hai lele, nɔ aŋa fei a jo.

¹⁰ Aa so Seetam nŋu iyi í dĩ ijui inɛ ŋau, a sɔsi ina nla iyi wa jo do fainwitau, tengi bii à dasi mɛɛmuu do walii ilu ibou wo. Bɛi aa yɛ ijuukpã nla nla dasãò idũ hee do ajɔ fei.

Kiitii ankãanyi

¹¹ Si anyii nŋu, ŋɔi ǹ yɛ kitãi bomma nla fũfũ gɔ do inɛ iyi wa buba si antaiɛ. Nɔ ilɛ do lele à sa hai si wajuɛ, nɔ a kù yɛ gɔgɔ nŋa gɔ má.

¹² Ŋɔi ǹ yɛ iku ŋa, keekeò nla, à waa leekĩ si wajui kitãi bommau. Nɔ à cĩ tia ŋa do tia gɔ iyi à ya ni tiai kuwɛɛ. À kiiti iku ŋa si bɛi kookoosu nŋa ŋa iyi à kɔ si tia ŋau à to.

¹³ Waati bɛɛbɛi tenku í sindo iku ŋa iyi à wa inɔɛ wa, nɔ iku do bi kuwai iku ŋa à sindo iku nŋa ŋa iyi à waa mu wo. Aŋa fei à baa si kuwɛɛ nɔ à kiiti ŋa si bɛi kookoosu nŋa ŋa à to.

¹⁴ Ŋɔi à so iku do bi kuwai iku ŋau à dasi ina nlau. Ina nlaui í jɛ iku minjisia.

¹⁵ À so inɛ baa yooma iyi a kù kɔ iriɛ si tiai kuwɛɛu à dasi ina nlau.