Kuyɛi Zãa 2 - Bibeli do fee

Ide iyi à sɔ̃ inɛi Jesu ŋa iyi à wa Efɛɛzu

¹ Kirisi í sɔ̃m í ni, kɔa amalekai igbɛi inɛm ŋa iyi í wa Efɛɛzu. Kɔaa i ni, inɛ iyi wa mu leleaɔ̃ mɛɛje si awɔ njɛɛ, nɔ wa nɛ si aninii bi ku lesi fitilai wura mɛɛje ŋau í ni,

² ǹ mà kuce nŋɛ do icɛ nŋɛ do temua iyi ì nɛ ŋa. Ǹ mà iyi i kaa yɔkɔ i temua do inɛ laalɔ ŋa. Nɔ ì cɔ laakaii inɛ ŋa iyi à waa kpe ara nŋa woo bɛ amma a kù jɛ woo bɛ ŋa, nɔ ì nyisi iyi woo sɔ ibo ŋai.

³ Ì waa temua ŋa, nɔ ì yɛ ijuukpã na irim ŋa, i kù nɔ i kù gbɛɛji ŋa.

⁴ Amma iyi ǹ yɛ si ŋɛ wee, i kù bim bɛi tako má ŋa.

⁵ Na nŋu, i ye gigi hai hee bii ì cuku wa ŋa, nɔ i kpaasi idɔ i ce bɛi ì sintiò wa ŋa. Bii i kù kpaasi idɔ ŋa, an na n so bi ku lesi fitila nŋɛ hai si agbɛɛ.

⁶ Do nŋu fei, ì nɛ mii akã iyi í sĩa ŋa. Ì cé kookoosui inɛi Nikolaiti ŋa bɛi amu takam ǹ cóo.

⁷ Inɛ iyi í nɛ itĩ, ku sotĩ ku gbɔ mii iyi Hundei Ilaaɔ̃ wa sɔ̃ igbɛi inɛi Jesu ŋa fei. Inɛ iyi í jɛ igũ, an jɔ̀ ku jɛ isoi jĩi ndii kuwɛɛ iyi í wa azanna.

Ide iyi à sɔ̃ inɛi Jesu ŋa iyi à wa Simiinu

⁸ Kirisi í ni má, kɔa amalekai igbɛi inɛm ŋa iyi í wa Simiinu. Kɔaa i ni, inɛ iyi í jɛ sinte do iri ku kpa, iyi í tako í ku wo nɔ í dede má si kuwɛɛ í ni,

⁹ ǹ mà ijuukpã nŋɛ, nɔ ǹ mà are ku jɛ nŋɛ. Do nŋu fei, ì jɛ ilu amani ŋa. Inɛ ŋa iyi à waa kpe ara nŋa Zuifu amma a kù jɛ Zuifu ŋa, ǹ mà laalɔ iyi à ya maa má ŋɛ. Inɛ ŋau inɛi igbɛi Seetam ŋai à jɛ.

¹⁰ I maà ce njo na ijuukpã iyi wa naa si ŋɛ. Seetam á jɔ̀ a dasi inɛ gɔ nŋɛ ŋa piisɔ̃ɔ ku cɔ laakai nŋɛ. Aa yɛ wahala hee ajɔ mɛɛwa ŋa. Amma i jɔ̀ i leekĩ dim dim hee i koo i kuò ŋa. Bii ì ce bɛɛbɛ ŋa an mu nŋɛ kuwɛɛ ku jɛ riba nŋɛ.

¹¹ Inɛ iyi í nɛ itĩ, ku sotĩ ku gbɔ mii iyi Hundei Ilaaɔ̃ wa sɔ̃ igbɛi inɛi Jesu ŋa fei. Inɛ iyi í jɛ igũ, iku minjisiau kaa ceaa nkãma.

Ide iyi à sɔ̃ inɛi Jesu ŋa iyi à wa Pɛɛgamu

¹² Kirisi í ni má, kɔa amalekai igbɛi inɛm ŋa iyi í wa Pɛɛgamu. Kɔaa i ni, inɛ iyi wa mu taakuba andɛ didɔ̃ minjiu í ni,

¹³ ǹ mà bii ì wa ŋa, Seetam nii wa jɛ bommaɛ do gbugbã. Do nŋu fei, ì waa jirima irim ŋa, nɔ i kù fũsi naanɛ iyi ì dasim awɔ ŋa, baa waati iyi à kpa Antipasi bi tu ŋɛ bi kuwai Seetam bɛ. Antipasiu ilu naanɛ woo jɛ sɛɛdam nii.

¹⁴ Amma mii iyi ǹ yɛ si ŋɛ wee. Inɛ gɔ ŋa à wa si inɔ nŋɛ iyi à waa too si ikɔi Balamu. Balamu í tako í sɔ̃ Balaki bɛi á ce ku dasi inɛi Izirɛli ŋa kurara ku ba a ŋɔ iŋa iyi à ceaò iwɛ̃ ŋa kuwee, nɔ a ce sɛ̃ɛ ku tɔtɔɔ hai nɛ yaase.

¹⁵ Bɛɛbɛ mɔi, inɛ gɔ ŋa à wa inɔ nŋɛ iyi à waa too si ikɔi inɛi Nikolaiti ŋa.

¹⁶ Na nŋu, i kpaasi idɔ ŋa. Bii kù jɛ bɛɛbɛ, an naa si ŋɛ bii í kɔ̃ɔsi nɔ n ce igũ do inɛ ŋau do taakuba iyi wa fita hai si gɛlɛm.

¹⁷ Inɛ iyi í nɛ itĩ, ku sotĩ ku gbɔ mii iyi Hundei Ilaaɔ̃ wa sɔ̃ igbɛi inɛi Jesu ŋa fei. Inɛ iyi í jɛ igũ, nŋui an mua mana iyi wa manji wo. Nɔ n muaa kuta fũfũ si bii à kɔ iri titɔ̃ɛ iyi inɛ gɔ kù mà bii kù jɛ nŋu iyi ǹ mua.

Ide iyi à sɔ̃ inɛi Jesu ŋa iyi à wa Tiatii

¹⁸ Kirisi í ni má, kɔa amalekai igbɛi inɛm ŋa iyi í wa Tiatii. Kɔaa i ni, Amai Ilaaɔ̃ iyi ijuɛ í yɛ bɛi amɛi ina, nɔ isɛɛ wa daana bɛi isɔ danya iyi à yɔ si ina à wiɛ í ni,

¹⁹ ǹ mà kuce nŋɛ. Nɔ ǹ mà kubi nŋɛ, do naanɛ ku dasi nŋɛ, do icɛ jiida nŋɛ, do temua nŋɛ. Ǹ mà iyi icɛi nsɛi nŋɛ í re ti tako.

²⁰ Amma mii iyi ǹ yɛ si ŋɛ wee. Ì waa temuaò abo iyi à ya kpe Zezabɛli ŋa, nŋu iyi wa kpe araɛ walii nɔ wa wa inyii itĩi woo dasi naanɛ woo ce icɛm ŋa do ikɔɛ ku ba a ya maa ce sɛ̃ɛ ku tɔtɔɔ hai nɛ yaase nɔ a ya maa ŋɔ iŋa iyi à ceaò iwɛ̃ ŋa kuwee.

²¹ Ǹ muaa waati ku kpaasi idɔɛ, amma kù bi ku jɔ̀ sakara ku ceɛ.

²² Na ŋɔi í ce an jɔ̀ ku sũò bɔ̃ɔ. Inɛmɔkɔ ŋa mɔ iyi à ya maa ce sakara do nŋu, an dasi ŋa ijuukpã nla nla, bii kù jɛ à kpaasi idɔ à jɔ̀ kuce laalɔ nŋa.

²³ Si anyiɛ an kpa inɛi anyiɛ ŋa. Waati bɛɛbɛ igbɛi inɛi Jesu ŋa fei aa mà iyi ǹ mà idɔi inɛ ŋa do lasabu nŋa. An sãa inɛ fei si bɛi kookoosuɛ í to.

²⁴ Amma iŋɛ igbɛi inɛi Jesu ŋa iyi ì gbe si ilui Tiatii, iŋɛ iyi i kù too si ikɔ laalɔu ŋa nɔ i kù mà mii iyi inɛ gɔ ŋa à ya kpe asii nlai Seetam, ǹ wa n sɔ̃ ŋɛ, n kaa n kã nŋɛ aso gɔ má.

²⁵ Amma naanɛ iyi ì nɛ ŋa, i muu dim dim ŋa hee n koo n toò wa.

^26-27 Inɛ iyi wa ce iyi ǹ bi hee í jɛò igũ hee kɔɔ, nŋui an mua gbugbã iyi amu takam ǹ ba hai bi Baam. An muaa gbugbãui si antaii dimi fei ku maa gbã ŋa do goloi isɔ ku cã ŋa ku lɛgɛ ŋa bɛi cakai amà.

²⁸ Nɔ an muaa angua.

²⁹ Inɛ iyi í nɛ itĩ, ku sotĩ ku gbɔ mii iyi Hundei Ilaaɔ̃ wa sɔ̃ igbɛi inɛi Jesu ŋa fei.