Kuyɛi Zãa 19 - Bibeli do fee

¹ Si anyii nŋu, ǹ gbɔ ide ku fɔ gɔ bɛi anu ku dɔ̃i zamaa ikpa lelei Aɔ̃ í ni, ka saabu Ilaaɔ̃ Lafɛ̃ɛ nwa, nŋui í faaba wa, í nɔ í nɛ amboe do gbugbã.

² Kiitiɛ í jɛ ntɔ, nɔ í tɛ, domi í kiiti abo à ta icu iyi í bɛjɛ andunya fei do daa laalɔɛ ŋa, nɔ í sã siɛ gbese si na iyi í jɔ̀ í nikã njɛi woo ce icɛɛ ŋa.

³ Nɔ à dɔ̃ anu má à waa ni, ka saabu Ilaaɔ̃ Lafɛ̃ɛ nwa. Cuai ilu nlau á maa bɔ lelei hee do ajɔ fei.

⁴ Ŋɔi inɛ ngbo kɔnfia do mɛɛ ŋau do ilu hunde mɛɛ ŋau à sɛɛbata si wajui Ilaaɔ̃, nŋu iyi wa buba si kitãi bommau à tɔɔɛ à waa ni, ami, ka saabu Ilaaɔ̃ Lafɛ̃ɛ nwa.

Jingaui abɔdɔ̃i ama angudãu

⁵ Waati bɛɛbɛi à gbɔ ide ku fɔ gɔ hai ikpa bi kitãi bommau í ni, i saabu Ilaaɔ̃ Lafɛ̃ɛ nwa, iŋɛ woo ce icɛɛ ŋa fei, iŋɛ iyi ì waa jirimaɛ, keekeò nla.

⁶ Nɔ ǹ gbɔ ide ku fɔ gɔ bɛi imui zamaa. Aa ni bɛi iri cuui inyi nla gɔi walakɔ bɛi kulai ijĩ. Ide ku fɔu í ni, ka saabu Ilaaɔ̃, domi Ilaaɔ̃ Lafɛ̃ɛ nwa ilu gbugbã fei í jɛ bomma.

⁷ I jɔ̀ ka nyaanyi, ka wɛɛò inɔ didɔ̃. Ka jɔ̀ ku nɛ amboe domi abɔdɔ̃i ama angudãu í to wa, mudɛ̃ɛu takaɛ mɔ í tã sɔɔlu.

⁸ À jɔ̀ í dasi jĩnɛ fũfũ pai pai ku nɛ bɛɛrɛ iyi í má. Jĩnɛ ku nɛ bɛɛrɛui í jɛ kookoosu jiidai woo dasi naanɛ ŋa.

⁹ Ŋɔi amalekau í sɔ̃m í ni, kɔ iyi ihɛ̃. Ilu inɔ didɔ̃ ŋai inɛ ŋa iyi à kpe ku jɛ bi ku ce abɔdɔ̃i ama angudãu. Nɔ í sɔ̃m má í ni, ideu ide ku fɔi Ilaaɔ̃ takaɛi.

¹⁰ Ŋɔi ǹ sɛɛbata ku ba n tɔɔɛ, amma í ni, maà ce bɛɛbɛ. Amu mɔ woo ce icɛi bɛi awɔ do bɛi kpaasiɛ ŋa iyi à waa mu ide ntɔ iyi Jesu í nyisi wau. Tɔɔ Ilaaɔ̃. Ide ntɔ iyi Jesu í nyisi wau nŋui í jɛ icui idei walii fei.

Masa ilu acĩ fũfũ

¹¹ Si anyii nŋu, ǹ yɛ lelei Aɔ̃ í cĩ nɔ acĩ fũfũ gɔ í faata wa. Inɛ iyi wa gũui à ya kpe ilu naanɛ do ilu ntɔ. Si ntɔi í ya kiiti, bɛɛbɛ mɔi í ya ceò igũ.

¹² Ijuɛ í yɛi bɛi amɛi ina, nɔ wa dasi fulai bomma nkpɔ si iriɛ. Nɔ à kɔ iri gɔ siɛ iyi inɛ gɔ kù mà bii kù jɛ nŋu akã.

¹³ Wa dasi ibɔ gɔ iyi à mù do njɛ. Iriɛi Idei Ilaaɔ̃.

¹⁴ Woo ce igũi lele ŋa à gũ acĩ fũfũ ŋa à waa tooɛ nɔ à waa dasi jĩnɛɛ fũfũ ku nɛ bɛɛrɛ iyi í má wau wau.

¹⁵ Taakuba didɔ̃ gɔ wa fita wa hai si gɛlɛɛ iyi á jɛò dimii andunya ŋa igũ. Si anyiɛ nɔ ku gbã ŋa do goloi isɔ. Á fɔ̃ inyii isoi jĩi ndii rezɛ̃ɛ ku nyisiò idɔɔkɔ̃ nlai Ilaaɔ̃ ilu gbugbã fei iyi á naa si inɛi andunya ŋa.

¹⁶ Si ibɔɛ do si itãɛ à kɔ iriɛ à ni, Ilaalui ilaalu ŋa do Lafɛ̃ɛi lafɛ̃ɛ ŋa.

¹⁷ Nɔ ǹ yɛ amaleka gɔ má wa leekĩ si inunu. Nɔ í dɔ̃ anu wa kpe yɛi ŋa iyi à waa fo hee lelei Aɔ̃ fei wa ni, i naa i tɔtɔɔ i jɛ jingau nlai Ilaaɔ̃ ŋa.

¹⁸ I naa i jɛ iŋai arai ilaalu ŋa do ti inɛ ngboi sooge ŋa do ti woo ce igũ ŋa, do ti acĩ ŋa do masa nŋa ŋa, do iŋai inɛ fei, hai aru hee do inɛ ŋa iyi à nɛ ara nŋa, keekeò nla.

¹⁹ Ŋɔi ǹ yɛ mɛɛmu kugaabuu do ilaalui andunya ŋa do woo ce igũ nŋa ŋa, aŋa fei à tɔtɔɔ ku ba a ce igũ do inɛ iyi wa gũ acĩu do woo ce igũɛ ŋa.

²⁰ Ŋɔi masau do woo ce igũɛ ŋa à mu mɛɛmuu do walii ilu ibou ajɔ, nŋu iyi wa ce dobu dobu si wajui mɛɛmuu wo. Do dobu dobuui í dĩ ijui inɛ ŋa iyi à tako à nɛ nyindai mɛɛmuu nɔ à tɔɔ mii iyi à gbeu. À sɔsi aŋa minji fei si ina nla iyi wa jo do fainwitau njaawɛ.

²¹ Nɔ masau í kpa woo ce igũ nŋa ŋa do taakuba iyi wa fita wa hai si gɛlɛɛ. Nɔ yɛi fei í jɛ iŋa nŋa í yo.