Kuyɛi Zãa 18 - Bibeli do fee

Kucukui Babilɔni ilu nlau

¹ Si anyii nŋu ǹ yɛ amaleka mmu gɔ wa kita wa hai lele. Í nɛ gbugbã nla nla, nɔ amboeɛ wa daana bari bari wa má inya si andunya fei.

² Í dɔ̃ anu í ni, Babilɔni ilu nlau, í cuku, í cuku. Nsɛi í baa í jɛ bi kuwai zĩi ŋa do bi kumanjii inɛi inɔɔko baa yooma fei. Yɛi hai maaju do mɛɛmu hai maaju do mɛɛmu laalɔ ŋa fei à wa bɛ.

³ À jɔ̀ iluu í cuku si na iyi í jɔ̀ dimi fei í dasi sakaraɛ ku ce. Sakaraɛui í yɛ bɛi atɛ̃ iyi wa cĩ ŋa iju. Í dasi ilaalui andunya ŋa sakara ku ce do nŋu takaɛ ajɔ, nɔ woo nya sĩai andunya ŋa à ce fia na amani nlaɛu.

⁴ Ŋɔi ǹ gbɔ ide ku fɔ gɔ má hai lele í ni, iŋɛ inɛm ŋa, i fita wa hai inɔ iluu, ku ba i maà na i nɛ ikpɛ̃ si dulum dɛɛ nɔ bɔ̃nɛ ŋa iyi á baa ku maà ba ŋɛ,

⁵ domi dulum dɛɛu í kã hee lele, nɔ Ilaaɔ̃ kù gbɛjɛ laalɔ ŋa iyi í ce.

⁶ Bɛi í cea inɛ ŋa, i sãa bɛɛbɛ isɛ gbeeji. Wahala iyi í dasi inɛ ŋa, i sãa ikɔ minji.

⁷ Zaka bɛi í so araɛ lele í wɛɛ do inɔ didɔ̃ si amani nlaɛ, iŋɛ mɔ i nyisiɛ ijuukpã do inɔ kufɔ zaka bɛɛbɛ ŋa. Wa ni si idɔɛ, ǹ wa n buba bɛi inaabo ilaalu, n kù jɛ jaaɔ̃. Bɛɛbɛ mɔi n kaa n yɛ inɔ kufɔ pai.

⁸ Na nŋu, bɔ̃nɛ ikã ikã á baa si ajɔ akã. Bɔ̃nɛ ŋau wee. Patapoo do inɔ kufɔi iku do ari. Nŋu takaɛ á joi mam mam, domi Aɔ̃ Lafɛ̃ɛ iyi í kiitiɛ í jɛ ilu gbugbã.

⁹ Ilaalui andunya ŋa iyi à ce sakara do nŋu fei nɔ à kpɛ̃ amani nlaɛu, aa na a kpata, aa cã buubuu na iriɛ si waati iyi aa yɛ cuai ina iyi wa joou.

¹⁰ Aa leekĩ a jĩòɛ si na iyi í jɔ̀ à waa ce njoi ijuukpã iyi í baa, nɔ aa ni, waiyooi, waiyooi, Babilɔni ilu nla ilu gbugbã, si isɔ akãi kiiti í jɛɛ.

¹¹ Woo nya sĩai andunya ŋa aa kpata do inɔ kufɔ na iriɛ, si na iyi í jɔ̀ inɛ gɔ kù waa ra iwò nŋa má

¹² iyi í jɛ wura do isɔ fũfũ do kuta jiida ku nɛ fia ŋa do lɛgɛ fũfũ ŋa do acɔ fũfũ kú nɛ fia gɔ do acɔ iyi í jɛ ti ilaalu do acɔ iyi à ya ceò mango do acɔ nkpa jiida. Inɛ gɔ kù waa ra jĩi ku nɛ inunu jiida ilu fia má, do dimii mii ikã ikã iyi à ce do inyíi jua walakɔ do jĩi jiida walakɔ do isɔ nkpa walakɔ do isɔ walakɔ do kuta fũfũ.

¹³ A kù waa ra fufui anyii jĩi iyi à ya kpe kanɛli, do nyaui ayɛ do tuae do ikpo ku dɔ̃ inunu iyi à ya kpe miru do ikpo dimi mmu gɔ má, do vɛ̃ɛ do ikpoi olivi do iyafũ do bilee do kɛtɛ ŋa do angudã ŋa, do acĩ do sarɛti nŋa ŋa, do aru ŋa.

¹⁴ Nɔ woo nya sĩa ŋau aa sɔ̃ iluu a ni, mii jiida iyi ì bi ku jɛ titɛɛ fei wo í lɔɛ, nɔ amaniɛ do mii kusĩaɛ fei í nyɔɛ, amanɛ kaa yɔɔ má pai.

¹⁵ Woo nya sĩa ŋau, aŋa iyi à ce fia do saabui iluu aa leekĩ ku jĩ, aa maa kpata, a maa weewea na njoi ijuukpã iyi í baau,

¹⁶ aa maa ni, waiyooi, irei ì gbɔ bɔ̃nɛ iyi í ba ilu nlau ihɛ̃. Iluu í tako í yɛi bɛi abo iyi í ya we acɔ fũfũ ku nɛ fia gɔ, do acɔ nkpa jiida do acɔ iyi í jɛ ti ilaalu, nɔ í ya dasi wura si araɛ do kuta jiida ku nɛ fia ŋa, do lɛgɛ fũfũ ŋa.

¹⁷ Nɔ si isɔ akã amaniɛ fei í ce nfe. Waakɔ ŋau fei do woo ce icɛɛ ŋa do inɛ ŋa iyi à wa inɔ akɔi inyi ŋau fei hee do inɛ ŋa iyi à waa ba ijɛ si inyi dũdũu, à leekĩ à jĩòɛ,

¹⁸ à waa dɔ̃ anu iyi à yɛ cuai kujoi iluu à waa ni, ilu nla gɔ kù wɛɛ bɛi iluu ihɛ̃ má.

¹⁹ À waa kosi iri nŋa sãa à waa nyisiò inɔ kufɔ nŋa. À waa kpata à dɔ̃ anu à waa ni, waiyooi, irei ì gbɔ bɔ̃nɛ iyi í ba ilu nlau ihɛ̃. Do saabui amaniɛi ilu akɔi inyi ŋa fei à ceò fia. Nɔ si isɔ akã, fei ndɛɛ í ce nfe.

²⁰ Iŋɛ inɛi lele ŋa, i jɔ̀ inɔ nŋɛ ku dɔ̃. Iŋɛ woo dasi naanɛ ŋa mɔ do woo bɛ ŋa do walii ŋa, i jɔ̀ inɔ nŋɛ ku dɔ̃, si na iyi í jɔ̀ Ilaaɔ̃ í kiiti iluu í sã nŋɛ gbese.

²¹ Ŋɔi amaleka ilu gbugbã gɔ í so kuta nla bɛi alɔ gɔ í nyɔɔ si inyi dũdũu í ni, bɛɛbɛ mɔi aa kɛkɛ Babilɔni ilu nlau do gbugbã nɔ a kaa yɔɔ má pai.

²² A kaa gbɔ anu ku dɔ̃i mɔɔlɔ má bi titɛɛ do woo kɔ̃ iri ŋau do gaasia ŋau do woo fã kãakãakĩ ŋau. A kaa ba woo ce icɛi awɔ dimi ikã ikã má, a kaa gbɔ ibai alɔ iyi wa lɔlɔ má.

²³ A kaa yɛ inya kumái fitila bɛ má, a kaa nɔ a gbɔ gɛlɛi abo titɔ̃ do mɔkɔ titɔ̃. Woo nya sĩaɛ ŋai à nɛ gbugbã à re wo si andunyau ihɛ̃ fei, nɔ ì dĩ ijui inɛi andunya ŋa fei do dobu dobuɛ.

²⁴ À nyisi ilui Babilɔni ijuukpã si na iyi í jɔ̀ à yɛ siɛ njɛi walii ŋa do ti woo dasi naanɛ ŋa do njɛi inɛ ŋa iyi à kpa si andunyau ihɛ̃ fei.