Kuyɛi Zãa 17 - Bibeli do fee

Abo à ce sakara nla nla

¹ Ŋɔi inɛ akãi amaleka mɛɛje ŋa iyi à waa mu fata mɛɛje ŋau í sɔ̃m í ni, naa wa, an nyisiɛ bɛi Ilaaɔ̃ á kiiti abo à ce sakara nlau ihɛ̃, nŋu iyi wa buba si antaii inyi nlau.

² Abo à ce sakara nlau í dasi ilaalui andunya ŋa sakara ku ce, nɔ inɛi andunya ŋa à waa too si daa laalɔ nkpɔ nkpɔɛ hee í baa í sinda iri nŋa bɛi atɛ̃ vɛ̃ɛ í ya sinda irii inɛ.

³ Ŋɔi Hundei Ilaaɔ̃ í naa sim nɔ amalekau í bɔòm gbaa. Bɛi, ǹ yɛ abo gɔ wa buba si antaii mɛɛmu kugaabu nkpa gɔ. Mɛɛmuu í nɛ iri mɛɛje do ngo mɛɛwa nɔ à kɔ si araɛ fei iri laalɔ ku bu Ilaaɔ̃.

⁴ Abou wa dasi jĩnɛ nkpa jiida gɔ dimi iyi ilaalu ŋa à ya dasi, nɔ wa dasi booda ŋa iyi à ce do wura do kuta ku nɛ fia gɔ ŋa do lɛgɛ fũfũ bii fei. Wa mu kɔɔfui wura si awɔ si bii mii laalɔ do riisii sakara ku ceɛ wa kɔ̃.

⁵ À kɔ iri gɔ si ikpoɛ, yaasei iriui í jɛ asii. Iriu wee. Babilɔni ilu nla, iyei inaabo à ta icui andunya ŋa, do iyei daa bututu fei.

⁶ Nɔ ǹ yɛ abou í mɔ njɛi woo dasi naanɛ ŋa iyi à kpa si na iyi í jɔ̀ à jɛ sɛɛdai Jesu, nɔ iriɛ í sinda bɛi atɛ̃ vɛ̃ɛ í ya sinda irii inɛ. Iyi ǹ yɔɔ, ǹ biti ntɔ ntɔ.

⁷ Ŋɔi amalekau í sɔ̃m í ni, na mii í ce ì waa biti. An sisiɛ asiii abou do ti mɛɛmu kugaabu iyi í nɛ iri mɛɛje do ngo mɛɛwau.

⁸ Mɛɛmu iyi ì yɛu bɛ í wɛɛ wo amma kù wɛɛ má nsɛi. Bii í kɔ̃ɔsi à fita wa hai si isa nla hai nɛ kɔɔu ku bɔ nfe ku ce. Inɛi andunya ŋa iyi Ilaaɔ̃ kù kɔ iri nŋa si tiai kuwɛɛ hee ku maa taka andunya, aa biti bii à yɛ mɛɛmuu má, domi í tako í wɛɛ wo amma kù wɛɛ má nsɛi nɔ á na ku faata wa má.

⁹ Inɛ ku bɛi ku gbɔ yaasei ideu, í nɛ bukaatai bisi iyi í nɛ laakai. Iri mɛɛje ŋau, aŋai à jɛ iri kuta mɛɛje si bii abou wa buba.

¹⁰ Nɔ aŋai à nyi à jɛ ilaalu mɛɛje ŋau má. Ilaalu miiu í cuku tã, inɛ akã í wɛɛ si nsɛi, nɔ inɛ akã mɔ kù to wa titã. Bii í na í to wa, kaa kpɛ.

¹¹ Nɔ mɛɛmu iyi í wɛɛ wo nɔ kù wɛɛ nsɛi máu, nŋu takaɛ í jɛ ilaalu mɛɛjɔsia, nɔ í jɛ inɛ akãi ilaalu mɛɛje ŋau nɔ wa bɔ nfe ku ce.

¹² Ngo mɛɛwa iyi ì yɛu, aŋai à jɛ ilaalu mɛɛwa ŋa iyi a kù jɛ bomma titã, amma aa ba yiiko a jɛ bomma isɔ akã do mɛɛmuu ajɔ.

¹³ Aŋa mɛɛwau fei mii akãi à waa lele, nɔ aa na mɛɛmuu gbugbã do yiiko nŋa.

¹⁴ Aa ce igũ do ama angudãu, amma ama angudãu á jɛ ŋa igũ si na iyi í jɔ̀ í jɛ Lafɛ̃ɛi lafɛ̃ɛ ŋa nɔ í jɛ ilaalui ilaalu ŋa. Nɔ ilu naanɛ ŋa iyi Ilaaɔ̃ í kpe í cica, aŋaò ama angudãu aa jɛ igũ ajɔ.

¹⁵ Nɔ amalekau í sɔ̃m má í ni, inyi iyi ì yɛ abo à ce sakarau wa buba si antaiɛu bɛ, nŋui í jɛ inɛ nkpɔ iyi wa naa hai ilɛ ikã ikã nɔ à waa fɔ fee ikã ikã.

¹⁶ Ngo mɛɛwa iyi ì yɛu bɛ do mɛɛmuu, aa cé abo à ce sakarau. Aa so mii iyi í nɛ fei nɔ a jɔ̀ɔ basĩ. Aa ŋɔ iŋaɛ nɔ a joo ina mam mam.

¹⁷ Aa ce bɛɛbɛi si na iyi í jɔ̀ Ilaaɔ̃ í jɔ̀ à ce idɔɔbiɛ. Bɛɛbɛi aa ce anu akã ku ba a so ilaalu ku jɛ nŋa a na mɛɛmuu. Aa maa jirima mɛɛmuui hee idei Ilaaɔ̃ koo ceò.

¹⁸ Abo iyi ì yɛu, nŋui í jɛ ilu nla iyi í nɛ gbugbã si ilaalui ilɛ fei.