Kuyɛi Zãa 16 - Bibeli do fee

Fatai idɔɔkɔ̃i Ilaaɔ̃ ŋa

¹ Ŋɔi ǹ gbɔ ide ku fɔ nla gɔ hai kpasɛ̃i Ilaaɔ̃u í sɔ̃ amaleka mɛɛje ŋau í ni, i koo i nikã idɔɔkɔ̃i Ilaaɔ̃ iyi í wa si fata mɛɛje ŋau si ilɛ.

² Amaleka sinteu í koo í nikã titɛɛ ilɛ. Ŋɔi dimii ngoli kuro laalɔ gɔ í naa si inɛ ŋa iyi à nɛ nyindai mɛɛmu kugaabuu nɔ à waa tɔɔ mii iyi à gbeu.

³ Ŋɔi amaleka minjisiau mɔ í nikã titɛɛ si tenku. Inyiu í sinda bɛi njɛi iku, nɔ mii ilu hunde baa yooma fei í ku si inɔ inyiu.

⁴ Ŋɔi amaleka mɛɛtasiau mɔ í nikã titɛɛ si ido nla ŋa do si isɔ̃ ŋa, nɔ inyi nŋa í kpaasi njɛ.

⁵ Nɔ ǹ gbɔ anui amaleka iyi í nɛ gbugbã si antaii inyiu í ni, awɔ Ilaaɔ̃ ì nɛ ntɔ i kiiti bɛ ihɛ̃, awɔ inɛ kumá, awɔ iyi ì wɛɛ, ì nɔ ì wɛɛi wo.

⁶ Inɛ ŋau à kpa woo dasi naanɛ ŋa do walii ŋa à nikã njɛ nŋa, nɔ ì na ŋa njɛ a mɔ. Bɛɛbɛi à jɔò.

⁷ Si anyii nŋu, ǹ gbɔ ide ku fɔ gɔ má hai bi kuweeu í ni, ntɔi Aɔ̃ Lafɛ̃ɛ ilu gbugbã fei, kiitiɛ í tɛ í jɛ ntɔ.

⁸ Ŋɔi amaleka mɛɛsiau mɔ í nikã titɛɛ si inunu, nɔ inunu í ba gbugbã wa jo amanɛ ŋa do inya gbãaɛ bɛi ina.

⁹ Nɔ inya gbãa nlau í jo amanɛ ŋa, nɔ à waa bu Ilaaɔ̃, nŋu iyi í nɛ yiiko si antaii bɔ̃nɛ ŋau. Amma à kɔ̀ ku kpaasi idɔ a jirimaɛ.

¹⁰ Ŋɔi amaleka miiusiau mɔ í nikã titɛɛ si antaii kitãi bommai mɛɛmu kugaabuu. Nɔ ilu í kuku si bommaɛu. Nɔ inɛ ŋa à waa ŋɔ amɛ nŋa ŋa na ara kuro.

¹¹ À waa bu Ilaaɔ̃ na ara kuro do ngoli nŋa ŋa, amma à kɔ̀ ku jɔ̀ laalɔ ku ce nŋa.

¹² Ŋɔi amaleka mɛɛfasiau mɔ í nikã titɛɛ si ido nla iyi à ya kpe Efarata, nɔ í gbɛ mam mam ku mua amanlui nunui daakɔ ŋa kpãa a kua.

¹³ Nɔ ǹ yɛ inɛi inɔɔko mɛɛta gɔ ŋa à kpaasi ara nŋa bɛi kpɔlɔ, akã í fita wa hai si gɛlɛi akandamau, akã mɔ hai si gɛlɛi mɛɛmu kugaabuu, mɛɛtasiau mɔ hai si gɛlɛi walii ilu ibou.

¹⁴ Inɛi inɔɔko ŋaui à jɛ mɔcɔi Seetam ŋa iyi à waa ce dobu dobu ŋa. Nɔ à waa bɔ bi ilaalui andunya ŋa fei a tɔtɔɔ ŋa a ce igũ si ajɔ nlai Ilaaɔ̃ ilu gbugbã fei.

¹⁵ Ŋɔi Jesu í ni, ǹ wa n naa si ŋɛi bɛi ile. Ilu inɔ didɔ̃i inɛ iyi wa wɔ njoo, nɔ wa dasi jĩnɛɛ ŋa ku ba ku maà na ku dasi kpãa basĩ ku na ku yɛ anyɔ si bantuma.

¹⁶ Ŋɔi inɛi inɔɔko ŋau à tɔtɔɔ ilaalu ŋau fei bii gɔ iyi à ya kpe do feei Ebɛɛ Aamagedɔ̃ɔ.

¹⁷ Si anyii nŋu, amaleka mɛɛjesiau mɔ í nikã titɛɛ si fufu. Nɔ à gbɔ ide ku fɔ nla gɔ hai bi kitãi bomma iyi í wa kpasɛ̃i Ilaaɔ̃u í ni, ide í tã.

¹⁸ Ŋɔi ijĩ í ŋɔ, nɔ à gbɔ iba ŋa do kulai ijĩ. Nɔ ilɛ í yaya ntɔ ntɔ. Ilɛ kuyayau í caa. Dimiɛ kù ce titã hai waati iyi à taka amanɛ ŋa.

¹⁹ Ilu nlau í kpɛ̃ ikɔ mɛɛta, nɔ ilui ilɛ fei í cuku. Ilaaɔ̃ kù gbɛjɛ laalɔ ku cei inɛi Babilɔni ŋa ilu nlau nɔ í nyisi ŋa idɔɔkɔ̃ nlaɛ.

²⁰ Gũngũm kãma kù wa bɛ má, nɔ a kù waa yɛ iri kuta ŋa mɔ má.

²¹ Ŋɔi kutai ijĩ nla nla ŋa à waa cuku si inɛ ŋa wa. Akãɛ fei í to kiloo ciiji. Nɔ inɛ ŋa à waa bu Ilaaɔ̃ na bɔ̃nɛi kutai ijĩu, domi bɔ̃nɛu í caa.