Kuyɛi Zãa 15 - Bibeli do fee

Amaleka* ŋa do ijuukpãi ankãanyi

¹ Si anyii nŋu, ǹ yɛ nyinda gɔ má lelei Aɔ̃, í lá nɔ í nɛ njo. Iyi ǹ yɛ wee. Amaleka mɛɛje gɔ ŋa à waa mu ijuukpã mɛɛje. Aŋai à jɛ ijuukpãi ankãanyi domi si bɛi idɔɔkɔ̃i Ilaaɔ̃ á tã.

² Ŋɔi ǹ yɛ tenku gɔ wa daana bɛi digi í yɔgɛɛ do ina. Nɔ ǹ yɛ inɛ ŋa iyi à jɛ mɛɛmu kugaabuu igũ do mii iyi à gbeu do lambai iriɛ. Inɛ ŋau à waa leekĩ si antaii tenkuu à waa mu mɔɔlɔ ŋa iyi Ilaaɔ̃ í na ŋa.

³ À waa kɔ̃ irii Moizi woo ce icɛi Ilaaɔ̃u do ti ama angudãu à waa ni, Aɔ̃ Lafɛ̃ɛ ilu gbugbã fei, icɛɛ í la nɔ í jɛ maamaake. Awɔi ì jɛ ilaalui ilɛ fei. Kpãaɛ í jɛ ntɔ nɔ í jɛ dee dee.

⁴ Yooi kaa ce njoɛ, Lafɛ̃ɛ. Yooi á kɔ̀ ku saabuɛ. Awɔ akãi ì jɛ inɛ kumá. Inɛi ilɛ baa yooma fei á naa bi tɛɛ, aa na a gulɛ a tɔɔɛ, domi ì nyisi iyi kiitiɛ í jɛ dee dee.

⁵ Si anyii nŋu, iyi ǹ cɔ ilu nɔ ǹ yɛ à cĩ kpasɛ̃i Ilaaɔ̃ iyi í wa lele, tengi bii í jɛ bi kuwai akabuuɛu.

⁶ Amaleka mɛɛje ŋa iyi à waa mu ijuukpã mɛɛje ŋau à fita hai kpasɛ̃u. À waa dasi jĩnɛ fũfũ iyi wa daana nɔ à waa dĩ santiikii wura si kpaka nŋa.

⁷ Ŋɔi inɛ akãi mii ilu hunde mɛɛ ŋau í na amaleka mɛɛje ŋau fatai wura ara mɛɛje iyi í kɔ̃ do idɔɔkɔ̃i Ilaaɔ̃, nŋu iyi í wɛɛ hee do ajɔ fei.

⁸ Nɔ kpasɛ̃u í kɔ̃ do cua iyi wa naa hai si amboei Ilaaɔ̃ do gbugbãɛ. Inɛ gɔ kaa nɔ ku yɔkɔ ku lɔ si inɔɛ hee ijuukpã mɛɛjei amaleka mɛɛje ŋau koo kpaò iri.