Kuyɛi Zãa 13 - Bibeli do fee

Mɛɛmu kugaabu iyi wa fita hai si tenku

¹ Si anyii nŋu, ǹ yɛ mɛɛmu kugaabu gɔ wa fita wa hai inɔ tenku. Í nɛ ngo mɛɛwa do iri mɛɛje nɔ fulai bomma wa lesi ngo ŋau fei, nɔ si iri ŋau fei à kɔ iri laalɔ ŋa ikã ikã iyi wa bu Ilaaɔ̃.

² Mɛɛmu iyi ǹ yɛu í gaabu bɛi muãa, nɔ kutɛɛ í nɛ gbugbã, nɔ gɛlɛɛ í yɛ bɛi ti muusu nla. Akandamau í so gbugbãi nŋu takaɛ í naa, do kitãi bommaɛ do yiiko nlaɛ.

³ Iri akãi mɛɛmuu í jɔ bɛi í ba kumɛɛ iyi á yɔkɔ ku kpaa, amma kumɛɛu í tã nɔ í ba iri. Inɛi andunya ŋa fei à waa cɔɔ do biti nɔ à waa tooɛ.

⁴ Aŋa fei à waa tɔɔ akandamau si na iyi í jɔ̀ í na mɛɛmuu yiikoɛ. Nɔ à waa tɔɔ mɛɛmuu mɔ à waa ni, yooi í yɛ bɛi mɛɛmuu ihɛ̃. Yooi á yɔkɔ ku baa igũ ku ce.

⁵ Mɛɛmuu í nɛ kpãa ku tɔɔò fufu nɔ ku bu Ilaaɔ̃, nɔ í nɛ yiiko ku ceò gbugbãɛ icɛ cukpa ciiji do minji.

⁶ Ŋɔi í cĩ gɛlɛɛ wa bu Ilaaɔ̃ do bi kuwaɛ do inɛ ŋa iyi à wa lele fei nɔ wa fɔ si ŋa ide laalɔ.

⁷ À muaa kpãa ku ce igũ do inɛi Ilaaɔ̃ ŋa nɔ ku jɛ ŋa igũ. Nɔ à naa yiiko si dimi fei do fee fei do ilɛ baa yooma fei.

⁸ Inɛi andunya fei á tɔɔɛ, waatɔ inɛ ŋa iyi Ilaaɔ̃ kù kɔ iri nŋa si tiai kuwɛɛ hee ku maa taka andunya, tia iyi í jɛ ti ama angudã iyi à kpau.

⁹ Na nŋu, inɛ iyi í nɛ itĩ, ku gbɔ.

¹⁰ Inɛ iyi í nɛ piisɔ̃ɔ ku bɔ, tilasi piisɔ̃ɔi á bɔ. Inɛ mɔ iyi à nɛ a kpa do taakuba, tilasi taakubai á kpaa. Na nŋu, woo dasi naanɛ ŋa à nɛ a temuai nɔ a leekĩ si naanɛ ku dasi nŋa.

Mɛɛmu kugaabu iyi wa fita hai si ilɛ

¹¹ Si anyii nŋu, ǹ yɛ mɛɛmu kugaabu gɔ má wa fita wa hai si ilɛ. Í nɛ ngo minji bɛi ngoi ama angudã, nɔ wa fɔ ide bɛi akandama.

¹² Mɛɛmu sinteui í naa gbugbã iyi í nɛ fei ku ceò icɛ si wajuɛ. Í tilasi inɛi ilɛ ŋa a tɔɔ mɛɛmu sinte iyi í ba kumɛɛ iyi á yɔkɔ ku kpaa wo nɔ í ba iriu.

¹³ Mɛɛmu minjisiau bɛi í ce dobu dobu nla nla ŋa hee í jɔ̀ ina í kita wa hai lele í naa ilɛ si wajui amanɛ ŋa.

¹⁴ Í dĩ ijui inɛi andunya ŋa do dobu dobu ŋa iyi í ce si wajui mɛɛmu sinte iyi í náa gbugbãu. Wa sɔ̃ inɛi andunya ŋa a gbe mii iyi á jɔ mɛɛmu sinte iyi à tako à mɛɛ do taakuba nɔ kù kuu.

¹⁵ Mɛɛmui ankãanyiu í ba gbugbã ku mua mii iyi à gbeu kuwɛɛ ku ba ku fɔ ide bɛi amanɛ nɔ ku kpa inɛ ŋa iyi à kɔ̀ ku tɔɔɛ fei.

¹⁶ Nɔ mɛɛmuu í tilasi inɛ fei, ilu gbugbã ŋa do hai nɛ gbugbã ŋa, ilu fia ŋa do ilu are ŋa, aru ŋa do inɛ ŋa iyi à nɛ ara nŋa, à ce nŋa nyinda si awɔ njɛ nŋa walakɔ si ikpo nŋa.

¹⁷ Inɛ gɔ kù wɛɛ iyi á yɔkɔ ku ra walakɔ ku ta bii kù nɛ nyinda iyi í jɛ irii mɛɛmuu walakɔ lambai iriɛ.

¹⁸ Iyi í sĩa ka ce si laakai wee. Inɛ iyi í nɛ bisi fei í sĩa ku mà yaasei lambai mɛɛmuu. Lambaɛ, lambai amanɛi. Jiaɛi cĩɔ mɛɛfa do kita do mɛɛfa (666).