Kuyɛi Zãa 12 - Bibeli do fee

Abo gɔ do akandama

¹ Ŋɔi nyinda nla gɔ í fita lelei Aɔ̃. Inaabo gɔ í wa bɛ, nunui í jɛ ibɔɛ, nɔ wa leekĩ si cukpa nɔ wa dasi fulai leleaɔ̃ maateeji iyi í jɛ ti bomma si iriɛ.

² Abou í nɛ asĩ, nɔ wahalai kubí do ara kuroi inɔu í jɔ̀ wa dɔ̃ anu.

³ Ŋɔi nyinda mmu gɔ í fita má lelei Aɔ̃. Akandama nkpa nla nla gɔ í wa bɛ, í nɛ iri mɛɛje do ngo mɛɛwa nɔ wa dasi fulai bomma si iriu akã fei.

⁴ Akandamau í wɔ ikɔ akãi kukpɛ̃ mɛɛtai leleaɔ̃ ŋa í nyɔ ŋa wa si ilɛ do akpaamuɛ. Nɔ í koo í leekĩ si wajui abo iyi wa bi ku bíu, ku ba ku ŋɔ amau bii í cuku wa.

⁵ Ŋɔi abou í bí ama inɛmɔkɔ. Amaui á gbã dimi fei do goloi isɔ. Hee akandamau ku maa ŋɔ amau à so à bɔòɛ bi Ilaaɔ̃, bii wa buba si kitãi bommaɛ.

⁶ Abou í sa í nɛ ikpa gbaa bii Ilaaɔ̃ í ceaa sɔɔlui inya bii á wa a maa woo si afei ajɔ dubu do cĩɔ minji do kita (1.260).

⁷ Ŋɔi igũ í dede lele bɛ. Misɛli inɛ ngboi amaleka ŋau do amalekaɛ ŋa à ce igũ do akandamau do amalekaɛ ŋa.

⁸ Nɔ Misɛli do amalekaɛ ŋa à jɛ ŋa igũ. Nɔ à kɔ̀ akandamau do amalekaɛ ŋa a wa lele bɛ má.

⁹ Ŋɔi à nyɔ akandama nla nlau wa ilɛ. Akandamaui í jɛ njo iyi í wɛɛ hai tako. Nŋui à ya kpe woo yɛ taalei inɛ walakɔ Seetam. Nɔ nŋui í dĩ ijui inɛi andunya ŋa fei. À nyɔɔ wa ilɛ do amalekaɛ ŋa ajɔ.

¹⁰ Si anyii nŋu, nɔ ǹ gbɔ ide ku fɔ nla gɔ lele í ni, nsɛi, waatii faabau í to wa. Nsɛi, Aɔ̃ Lafɛ̃ɛ nwa í nyisi gbugbãɛ, nɔ í jilɛ bommaɛ. Nsɛi, inɛ iyi í cicau í gba inɛ ngbo ku jɛɛ, domi woo yɛ taalei inɛ nwa ŋa, nŋu iyi í ya maa fɔ laalɔ nŋa si wajui Ilaaɔ̃ dasãò idũ à nyɔɔ wa hai lele.

¹¹ Inɛ nwa ŋau à jɔɔ igũ do saabui njɛi ama angudãu do sɛɛdai ntɔu iyi à jɛ. A kù doo kuwɛɛ nŋa nkãma, amma à jɛsi aŋa a ku.

¹² Na nŋu, lele, jɔ̀ i wɛɛò inɔ didɔ̃, nɔ iŋɛ iyi ì wa lele, i wɛɛò inɔ didɔ̃ ŋa. Amma inɔ kufɔi í jɛ ti iŋɛ ilɛ do tenku domi Seetam í kita si ŋɛ wa do idɔɔkɔ̃ nla nla si na iyi í jɔ̀ í mà iyi waati keekei í gbea nŋu.

¹³ Iyi akandamau í ba à nyɔ nŋu wa ilɛ, ŋɔi í lɔsi ku lele abo iyi í bí ama inɛmɔkɔu.

¹⁴ Amma à na abou ikpa minjii kungbã nla ku ba ku fo ku bɔ ikpa inya iyi Ilaaɔ̃ í ceaa sɔɔluɛu si gbaa bii aa woo adɔ̃ mɛɛta do bubu. Tengi bɛi á jĩò njou.

¹⁵ Ŋɔi njou í tu inyi wa hai si gɛlɛɛ, wa cã bɛi ido nla nla si anyii abou ku ba inyiu ku jɔɔ.

¹⁶ Amma ilɛ í faaba abou, domi í là, í mɔ inyi iyi wa fita hai si gɛlɛi akandamau wa.

¹⁷ Ŋɔi idɔi akandamau í kɔ̃ si abou ntɔ ntɔ, nɔ í bɔ igũ ku ce do dimiɛ ŋa iyi à gbe, aŋa iyi à waa jirima woodai Ilaaɔ̃ fei, inɛ ŋa iyi à waa leekĩ dim dim si sɛɛdai Jesu.

¹⁸ Nɔ í koo í leekĩ si sãai tenku.