Kuyɛi Zãa 11 - Bibeli do fee

Woo jɛ sɛɛda minji ŋa

¹ Si anyii nŋu, inɛ gɔ í nam mii ku wã ilɛ iyi í yɛ bɛi akpa, nɔ í sɔ̃m í ni, dede i koo i wã kpasɛ̃i Ilaaɔ̃ do bi kuweeu, nɔ i ka inɛ ŋa iyi à waa ce kutɔɔ bɛ.

² Amma maà wã bantumaɛ, domi à mua dimi mmu ŋa, aŋa iyi aa tɛɛsɛ ilu kumáu si afei cukpa ciiji do minji.

³ Nɔ í ni nŋu á jɔ̀ woo jɛ sɛɛda minjii nŋu ŋau a fɔ idei nŋu. Aa maa we saaki ŋa, nɔ nŋu á na ŋa kpãa a ceò walii si afei ajɔ dubu do cĩɔ minji do kita (1.260).

⁴ Woo jɛ sɛɛda minji ŋaui à yɛ bɛi jĩi ndii olivi minji do bi ku lesi fitila minji iyi wa leekĩ si wajui Ilaaɔ̃ Lafɛ̃ɛi ilɛu fei.

⁵ Bii inɛ gɔ wa bi ku ce nŋa laalɔ, ina í ya fitai hai si gɛlɛ nŋa ku kpa irii mbɛɛ nŋa ŋa. Bɛɛbɛi inɛ iyi wa dɛdɛ ku ce nŋa laalɔ á kuò.

⁶ À nɛ gbugbã a cĩmbo lele ijĩ ku maà wɔ si waati iyi à waa ce walii. À nɔ à nɛ gbugbã a kpaasi inyi njɛ. À nɔ à nɛ gbugbã má a naaò dimii wahala ikã ikã baa yooma fei wa si andunya si waati iyi à bi fei.

⁷ Waati iyi aa jɛ sɛɛda a tã, mɛɛmu kugaabu gɔ á ba ŋa igũ ku ce ku kãmia ŋa ku kpa ŋa. Mɛɛmu kugaabuu á fita wai hai si isa nla hai nɛ kɔɔu.

⁸ Iku nŋa á maa sũi si bantumai ilu nla bii à kpakpa Lafɛ̃ɛ nŋa si jĩi nɔu. À nɛ a kpe iluui wo Sodomu walakɔ Ezibiti.

⁹ Inɛ ŋa si dimi fei do si fee fei do si ilɛ fei aa cɔ iku nŋa ajɔ mɛɛta do bubu, a kaa jɛ a si ŋa.

¹⁰ Inɔi inɛi andunya ŋa á dɔ̃, aa ce jingau nɔ a sambaa njɛ amua ŋa si na iyi í jɔ̀ walii minji iyi à tako à wahala ŋa ŋau à ku.

¹¹ Si anyii ajɔ mɛɛta do bubuu, Ilaaɔ̃ á nyi ku da nŋa si hunde má, nɔ a dede a leekĩ. Njo nla nlai á mu inɛ ŋa iyi aa yɛ ŋa fei.

¹² Walii minji ŋau aa gbɔ ide ku fɔ gɔ wa hai lele wa ku ni, i gũ wa ihɛ̃. Nɔ aa gũ lele si kudũi ijĩ ijui mbɛɛ nŋa ŋa.

¹³ Bɛ gbakã ilɛ á yaya ntɔ ntɔ, nɔ ikɔ akãi kukpɛ̃ mɛɛwai iluu á cuku. Inɛ ŋa iyi aa ku si kuyayai ilɛu, kukpɔ nŋa á to amanɛ dubu mɛɛje (7.000). Zigii inɛ ŋa iyi à gbe á da ntɔ ntɔ, nɔ aa ni Ilaaɔ̃ í la.

¹⁴ Nsɛi, ijuukpã minjisiau í lɔ, wee mɛɛtasiaɛ wa naa má.

Kãakãakĩ mɛɛjesia

¹⁵ Si anyii nŋu, amaleka mɛɛjesiau í fã kãakãakĩɛ. Ŋɔi à gbɔ anu ku dɔ̃ nla nla gɔ ŋa lelei Aɔ̃ à ni, à sindoa Aɔ̃ Lafɛ̃ɛ nwa do inɛ iyi í cicau bommai andunyau, nɔ á jɛ bomma hee do ajɔ fei.

¹⁶ Waati bɛɛbɛi inɛ ngbo kɔnfia do mɛɛ ŋa iyi à waa buba si kitãi bomma nŋa si wajui Ilaaɔ̃u à sɛɛbata à waa tɔɔɛ

¹⁷ à waa ni, Aɔ̃ Lafɛ̃ɛ ilu gbugbã fei, awɔ iyi ì wɛɛ nsɛi, ì nɔ ì wɛɛ wo, à waa saabuɛi si na iyi í jɔ̀ ì ce icɛ do gbugbã nlaɛ. Nɔ ì sinti bommaɛ ku jɛ.

¹⁸ Dimii andunya fei í damɔɔ. Amma idɔɔkɔ̃ɛ í to wa. Waati í to i kiiti iku ŋa. Waati í nɔ í to i na woo ce icɛɛ ŋa riba nŋa, hai walii ŋa do woo dasi naanɛ ŋa hee do inɛ ŋa iyi à waa jirimaɛ ŋa fei, hai keekeò nlaɛ. Waati í to i ce nfei inɛ ŋa iyi à waa ce nfei andunya.

¹⁹ Ŋɔi à cĩ kpasɛ̃i Ilaaɔ̃ iyi í wa lele nɔ à yɛ kpakoi akabuuɛ si inɔɛ. Nɔ ijĩ wa ŋɔ, nɔ à waa gbɔ iba ŋa do kulai ijĩ. Nɔ ilɛ wa yaya, nɔ kutai ijĩ ŋa à waa cuku wa do gbugbã.