Kuyɛi Zãa 10 - Bibeli do fee

Amaleka* do tia keeke

¹ Ǹ nyi ǹ yɛ amaleka ilu gbugbã gɔ má wa kita wa hai lele. Kudũi ijĩ í biiɛ bɛi jĩnɛ iyi í dasi, nɔ njoi Aɔ̃ í wenwee si iriɛ, wajuɛ wa daana bɛi inunu, nɔ kutɛɛ í yɛ bɛi amɛi ina.

² Wa mu tia keeke gɔ iyi wa cĩ si awɔɛ. Í lesi isɛ njɛɛ si antaii tenku, isɛ cangaɛ mɔ si ilɛ.

³ Nɔ í dɔ̃ anu bɛi muusu nla. Iyi í dɔ̃ anu í tã ŋɔi ǹ gbɔ kulai ijĩ tuuba mɛɛje.

⁴ Iyi kulai ijĩ tuuba mɛɛje ŋau à lɔ, gbakã ǹ tã sɔɔlu n kɔ ide nŋau. Amma ǹ gbɔ ide ku fɔ gɔ wa hai lele wa ni, maà ti i kɔ ide iyi kulai ijĩ tuuba mɛɛje ŋau à fɔ. Muu si asii.

⁵ Ŋɔi amaleka iyi ǹ yɛ wa leekĩ si antaii tenku do si ilɛu, í wu awɔ njɛɛ lele,

⁶ nɔ í gbasi do irii inɛ iyi í wɛɛ hee do ajɔ fei, iyi í taka lele do ilɛ do tenku do mii ndu ŋa ŋa fei. Amalekau í fɔ í ni, waati iyi í gbe kù waa sɔ má,

⁷ amma waati iyi amaleka mɛɛjesiau mɔ á fã kãakãakĩɛ, waati bɛɛbɛi Ilaaɔ̃ á kɔ̃ mii iyi í dasi idɔ ku ce iyi inɛ kãma kù màu, si bɛi í sɔ̃ walii woo ce icɛɛ ŋa wo.

⁸ Si anyii nŋu, imu iyi ǹ tako ǹ gbɔ hai leleu, í bam ide ku fɔ má í ni, koo gba tia keeke iyi wa cĩu hai si awɔi amaleka iyi wa leekĩ si antaii tenku do si ilɛu.

⁹ Ŋɔi ǹ bɔ bi amalekau ǹ tɔɔɛ ku nam tia keekeu. Nɔ í sɔ̃m í ni, gba i ŋɔɔ. Á ro si inɔɛ, amma á dɔ̃i si gɛlɛɛ bɛi nyikɔ̃.

¹⁰ Ŋɔi ǹ gba tia keekeu hai si awɔɛ, nɔ ǹ ŋɔɔ. Ntɔi, í dɔ̃ si gɛlɛm bɛi nyikɔ̃, amma iyi ǹ muu ǹ tã, í roi koro koro si inɔm.

¹¹ Ŋɔi à sɔ̃m à ni, í gbe i sisi i ce walii má na inɛ nkpɔ do dimi nkpɔ do fee nkpɔ do ilaalu nkpɔ.