Kuyɛi Zãa 1 - Bibeli do fee

Yaasei tiau

¹ Si tiau ihɛ̃ ǹ kɔ asii ŋa iyi Jesu Kirisi í nya gbugbãa. Ilaaɔ̃i í naa kpãa ku nyisi woo dasi naanɛ woo ce icɛɛ ŋa mii ŋa iyi á na ku ce bii í kɔ̃ɔsi. Nɔ Kirisi í bɛ sim amaleka wa, amu Zãa woo ce icɛɛ, ku ba n mà mii ŋau.

² Hai ide iyi Ilaaɔ̃ í fɔ hee ku bɔ si sɛɛda iyi Jesu Kirisi í jɛ fei, mii iyi ǹ yɛ fei ǹ wa n jɛ sɛɛdaɛ.

³ Inɛ iyi wa cio idei waliiu ihɛ̃ do inɛ ŋa iyi à waa gbɔɔ nɔ à waa jirimaɛ, ilu inɔ didɔ̃ ŋai domi awaatiu í maai wa.

Zãa í ce igbɛ mɛɛjei inɛi Jesu ŋa fɔɔ

^4-5 Amui Zãa, ǹ ce ŋɛ fɔɔ, iŋɛ igbɛ mɛɛjei inɛi Jesu ŋa iyi ì wa ilɛi Azii. Ilaaɔ̃, nŋu iyi í wɛɛ, iyi í tako í wɛɛ wo, nɔ wa naa, ku mu nŋɛ didɔ̃ do laakai ku sũ, nŋu do Jesu Kirisi do hunde mɛɛje ŋa iyi à wa si wajui kitãi bommaɛ. Jesu Kirisiu nŋui í jɛ woo jɛ sɛɛda ilu naanɛ, do inɛ sinte iyi í jĩ hai si balɛ, nɔ í jɛ ilaalui ilaalu ŋa. Í bi wa nɔ í faaba wa hai si dulum du wa do njɛɛ.

⁶ Nɔ í tɔtɔɔ wa í jɛ ilaalu nwa, í ce wa woo weei Ilaaɔ̃ baaɛ. Amboe do gbugbã ku jɛ tɛɛ hee do ajɔ fei. Ami.

⁷ Wee wa naa si kudũi ijĩ. Nɔ ijui inɛ fei á yɔɔ, baa inɛ ŋa iyi à gũu à kpaa. Dimi ikã ikãi andunya fei á kpata na iriɛ. Bɛɛbɛi á ce. Ami.

⁸ Aɔ̃ Lafɛ̃ɛ, ilu gbugbã fei, nŋu iyi í wɛɛ, iyi í tako í wɛɛ wo, nɔ nŋui wa naa í ni, amui ǹ jɛ sinte do iri ku kpa.

Zãa í yɛ Kirisi* si kuyɛɛ

⁹ Amui Zãa, kpaasi nŋɛ. Anu akã iyi ǹ nɛ do Jesui í jɔ̀ ǹ nɛ ikpɛ̃ si ijuukpã iyi iŋɛ mɔ ì waa yɛ ŋa, do si bommai Ilaaɔ̃, do si temua. À bɔòm gũngũm gɔ iyi à ya kpe Patimɔsi na idei Ilaaɔ̃ do sɛɛdai Jesu iyi ǹ wa n jɛ.

¹⁰ Si ajɔ amaazuma gɔ Hundei Ilaaɔ̃ í naa sim, nɔ ǹ gbɔ imu nla nla gɔ do anyim bɛi ti kãakãakĩ

¹¹ í ni, kɔ iyi ì waa yɛ si tia, nɔ i samba tiau bi inɛi igbɛ mɛɛjei Jesu ŋa iyi à wa Efɛɛzu, do Simiinu, do Pɛɛgamu, do Tiatii, do Saadi, do Filadɛɛfi, do Laodisee.

¹² Iyi ǹ sinda ǹ cɔ inɛ iyi wa bam ide ku fɔu ŋɔi ǹ yɛ bi ku lesi fitilai wura mɛɛje.

¹³ Nɔ ǹ yɛ inɛ gɔ í jɔ amanɛ wa leekĩ si aninii bi ku lesi fitila ŋau. Wa dasi ibɔ sisɔ nɔ wa dĩ santiikii wura si kpakaɛ.

¹⁴ Ntoi iriɛ fei í fũuta pai pai bɛi iwu, nɔ ijuɛ í yɛ bɛi amɛi ina.

¹⁵ Isɛɛ wa daana bɛi isɔ danya iyi à yɔ si ina à wiɛ, nɔ imuɛ í jɔ ibai inyii tenku.

¹⁶ Wa mu leleaɔ̃ mɛɛje si awɔ njɛɛ, nɔ taakuba andɛ didɔ̃ minji wa fita hai si gɛlɛɛ nɔ wajuɛ wa daana bɛi nunui dasã.

¹⁷ Iyi ǹ yɔɔ, ǹ cuku si isɛɛ bɛi iku. Nɔ í lesim awɔ njɛɛ í ni, maà ce njo, amui ǹ jɛ sinte do iri ku kpa.

¹⁸ Amui ǹ jɛ ilu hunde. Ǹ tako ǹ ku wo amma nsɛi ǹ wɛɛ hee do ajɔ fei. Ǹ nɛ gbugbã si antaii iku nɔ ǹ wa n mu kileei bi kuwai iku ŋa.

¹⁹ Na nŋu, kɔ iyi ì yɛ, iyi wa ce nsɛi do iyi á na ku ce si anyiɛ.

²⁰ Leleaɔ̃ mɛɛje ŋa iyi ì yɛ si awɔ njɛm nɔu do bi ku lesi fitilai wura mɛɛje ŋau yaasei aŋa fei wee. Leleaɔ̃ mɛɛje ŋaui à jɛ amaleka mɛɛje ŋa iyi à waa mu igbɛ mɛɛje ŋau, nɔ bi ku lesi fitila mɛɛje ŋau, akã fei igbɛ akãi.